མཱ་ཡོན་གྱིས་བྱེད་སྒོ་གསར་སྤེལ་སྐོར་བཤད་པའི་གཏམ། 

སྒྱུར་པ་པོ།—སློང་མོ་བ།
 
༡༩༩༥ལོར་ཕྲན་ལ་གློ་བུར་དུ་ཨ་རིར་བསྐྱོད་ཆོག་པའི་གོ་སྐབས་ཤིག་ཐོབ་པས་ལོ་དེར་ཨ་རིར་སོང་བ་ཡིན། སྐབས་དེར་ངས་དྲྭ་རྒྱའམ་འབྲེལ་དྲྭ། ཡང་ན་互联网ཞེས་པ་དེ་ཤེས་རྟོགས་བྱུང་། རང་ཡུལ་དུ་ལོག་རྗེས་རང་ཉིད་ཀྱི་གྲོགས་པོ༢༤ནང་དུ་སྐད་བཏང་སྟེ་ང་མཐོ་སློབ་ནས་རྩ་དགོངས་ཞུས་ནས་དྲྭ་རྒྱའམ་འབྲེལ་དྲྭ་གསར་བ་ཞིག་བཟོ་རྒྱུ་ཡིན་རབས་བཤད་དེ་ཚང་མས་མུ་མཐུད་ཡོད་མེད་འོས་ཤོག་འཕང་དགོས་ཡོད་ཅེས་རེ་བ་ཞུས། ཆུ་ཚོད་གཉིས་ཙམ་གྱི་རྗེས་སུ་འོས་ཤོག་འཕངས་པའི་འབྲས་བུ་ནི་མི་༢༤ལས་གྲོགས་པོ་གཅིག་ཁོ་ནས་འོས་བླུགས་ཏེ་ཡིད་ཆེས་དང་རྒྱབ་སྐྱོར་བྱས་འདུག གཞན་པ་ཚང་མས་ང་ལ་སྟོང་བསམ་གཏོང་གི་མ་འདུག དྲྭ་རྒྱ་དེ་འདྲ་ཞིག་ད་བར་ཡོད་མྱོང་ཡོད་མ་རེད། ལས་དོན་དེ་ནི་བློ་གཏད་དཀའ་བ་ཞིག་དང་ལེགས་འགྲུབ་བྱུང་ཁག་པོ་ཞིག་ཀྱང་རེད། ལྷག་པར་དུ་ཁྱེད་རང་གློག་ཀླད་ནི་མི་ཤེས། དེ་ལས་མཐོ་སློབ་ཡག་པོ་བཏོན་ཏེ་མ་འོངས་པར་སྤྱི་ཚོགས་སུ་ལས་ཀ་བཙལ་ན་ཡག་རབས་དང་བཟང་རབས་བཤད།

ཉིན་དེའི་མཚན་མོར་ངས་བསམ་བློ་ཡང་ཡང་བཏང་ཡིན། ཕྱི་ཉིན་ཞོགས་པར་ང་ད་དུང་རྩ་དགོངས་ཞུས་ཏེ་རང་ཉིད་ཀྱི་རྨི་ལམ་གྱི་ཆེད་དུ་འཚོལ་སྙེག་བྱེད་འདོད་པ་ལས་འཛིན་གྲྭར་འགྲོ་སྟེ་སློབ་མཐར་ཕྱིན་དགོས་བསམ་པའི་འདོད་འདུན་ཡེ་ནས་མི་འདུག ཡིན་ནའང་། སྐབས་དེར་ངའི་སེམས་ནང་ལ་དྲི་བ་ཆེན་པོ་ཞིག་ཡོད་པ་ནི་ངས་དམིགས་ཡུལ་དེ་ཉིད་ཐོག་མར་གང་ནས་འགོ་རྩོམ་དགོས་མེད་མི་ཤེས་པ་དེ་རེད།

རེད་ཀྱང་། དེ་རིང་འདི་ནས་རང་ཉིད་ཀྱི་འདས་པའི་ལོ་ཟླ་དེ་དག་གཞིར་བཞག་སྟེ་བསམ་གཞིགས་ཤིག་བྱེད་ཚེ། ངས་ཤེས་རྟོགས་ཐུབ་པའམ་སྤོབས་པ་ཆེན་པོས་བཤད་ཐུབ་པ་ནི་དེང་སང་གི་ན་གཞོན་ཤེས་ཡོན་པ་དག་གི་ཁྲོད་ན། དགོང་མོར་བསམ་བློ་གཏོང་དུས་ཐབས་ལམ་བརྒྱ་ཕྲག་དུ་མ་འཁོར་ཞིང་རྙེད་ཀྱང་། སང་ཉིན་ཞོགས་པར་ཡང་བསྐྱར་སྔར་གྱི་ལམ་དུ་ཞུགས་ཏེ་བྱ་བ་དག་ནམ་རྒྱུན་བཞིན་བྱེད་འདུག་པ་དེ་རེད། ལྷག་པར་དུ་ག་དུས་ཡིན་ནའང་བསམ་བློ་ཞིབ་ཕྲ་མི་གཏོང་མཁན་གྱི་རིགས་ཧ་ཅང་མང་ལ། དེ་དག་གིས་ལས་དོན་ཅི་ཞིག་ཐག་གཅོད་བྱེད་པ་ཡིན་ནའང་ཚ་ཚ་འུར་འུར་གྱིས་བྱེད་པ་ཙམ་ལས། ལས་དོན་དེའི་འགོ་འཇུག་བར་དུ་བསམ་བློ་གཏོང་མི་ཐུབ་པས་ཕྱིས་སུ་ལས་དོན་དེ་ལེགས་གྲུབ་ཡག་པོ་ཡོང་ཁག་པོ་ཡོད། མ་ཟད། སྐབས་རེར་བསམ་བློ་མ་བཏང་པའི་རྐྱེན་གྱིས་འགྱོད་པ་སྐྱེས་དགོས་བྱུང་བ་དེ་འདྲའང་མང་པོ་ཡོད། གང་ལྟར། བྱ་བ་ཞིག་མ་བྱེད་སྔོན་བསམ་གཞིགས་ཡང་ནས་ཡང་དུ་བྱེད་དགོས་པ་ནི་ཧ་ཅང་གལ་ཆེན་ཞིག་ཡིན་པས། སྤྱི་ཚོགས་སུ་གསར་དུ་ཞུགས་པའི་ཁེ་ལས་པ་ཡིན་ན་རེད། ལས་བྱེད་པ་ཡིན་ན་རེད། སློབ་མཐར་ཕྱིན་ཏེ་ལས་ཀ་གསར་དུ་འཚོལ་མཁན་ཞིག་ཡིན་ན་རེད། བསམ་བློ་རབས་དང་རིམ་པ་བཏང་སྟེ་རང་ཉིད་ཀྱི་མི་ཚེའི་མདུན་ལམ་ཐག་གཅོད་བྱེད་དགོས་པ་དེ་བྱ་བ་ཚང་མ་ནང་གི་ཐོག་མ་དེ་རེད་སྙམ།

གལ་ཏེ། རང་གིས་རང་གི་དམིགས་ཡུལ་གྱི་ཆེད་དུ་འགུལ་སྐྱོད་མི་བྱེད་པ། རང་གི་རྨི་ལམ་ལ་རང་གིས་སྙིང་སྟོབས་དང་སྤོབས་པ་མ་སྦྱིན་ན། ཁྱེད་ལ་ནམ་ཡང་མདུན་བསྐྱོད་ཀྱི་གོ་སྐབས་ཤིག་ཡོད་མི་སྲིད། གང་ལྟར། ང་དེ་ལྟར་རྨོངས་རྨོངས་ཚོད་ཚོད་ཀྱིས་མཐོ་སློབ་ནས་རྩ་དགོངས་ཞུས་ཏེ་ཟང་ཟིང་གི་སྤྱི་ཚོགས་ཀྱི་ནང་དུ་ཀླད་པ་སྟོང་པ་དེ་འཁྱེར་ཏེ་བྱེད་སྒོ་གསར་སྤེལ་གྱི་ལམ་དུ་ཞུགས་པ་རེད། སྐབས་དེར་ངས་མི་གཞན་ལ་འདི་ལྟར་ཟེར་གྱི་ཡོད་དེ། ང་ནི་སྟག་རྒན་ལོང་བ་ཞོན་མཁན་གྱི་ལྡོང་པོ་ཞིག་སྟེ་མ་འོངས་པར་སྟ་གོན་གང་ཡང་མེད་པའི་ཁེ་ལས་པ་ཞིག་ཡིན་ཟེར་གྱི་ཡོད།

འོན་ཀྱང་། སྐབས་དུས་དེ་ནས་ངས་དྲ་རྒྱའམ་འབྲེལ་དྲྭ་ལ་ཡིད་ཆེས་ཡོད་ལ། མ་འོངས་པར་དེས་མིིའི་རིགས་ལ་ཕན་ཐོགས་ཆེན་པོ་བྱུང་ངེས་རེད་བསམ་པའི་གདེང་སྤོབས་དང་ཡིད་ཆེས་དེ་བས་ཀྱང་ཡོད། ༡༩༩༥ སྐབས་ཀྱི་སྤྱི་ཚོགས་དང་མི་ཕལ་ཆེར་ཞིག་གིས་འབྲེལ་དྲྭའམ་དྲ་རྒྱ་ལ་ཡིད་ཆེས་ཡེ་ནས་བྱེད་ཀྱི་མེད། ལྷག་པར་དུ་དེས་སྤྱི་ཚོགས་དང་མིའི་འཚོ་བ་ལ་ཕན་ཐོགས་ཡོད་པར་ཡིད་ཆེས་བྱེད་མཁན་དང་རྒྱབ་སྐྱོར་གནང་མཁན་ཧ་ལམ་མེད་པ་དང་གཅིག་མཚུངས་རེད་ལ། ངས་བཤད་པའི་སྐད་ཆ་ལ་བསམ་བློ་གཏོང་མཁན་དང་ཉན་མཁན། ངས་བཤད་པའི་སྐད་ཆ་ལ་རྒྱུ་མཚན་འདུག་བསམ་མཁན་མེད་པ་མ་ཟད། མི་འགའ་ཤས་ངས་བཤད་པའི་སྐད་ཆ་དེ་དག་སྨྱོ་གཏམ་རེད་ཟེར་མཁན་ཡང་འདུག  གང་ལྟར། ངས་ག་ཚོད་གལ་ཆེན་པོ་ཡིན་པར་བཤད་ཀྱང་དོ་སྣང་ཡོད་མཁན་ཁ་ཤས་ཤིག་མ་གཏོགས་སྤྱི་ཚོགས་ཀྱི་མི་རྣམས་རྦད་དེ་ཡ་མེད་རེད། ཕྱིས་སུ་ངས་སྐད་ཆ་དེ་ཐབས་ལམ་གཞན་ཞིག་སྤྱོད་དེ་མི་རྣམས་ལ་སྦེལ་ཀེའུ་ཊས(Bill Gate)འབྲེལ་དྲྭ་གལ་ཆེན་པོ་ཡིན་པ་དང་དེས་མ་འོངས་པར་མིའི་རིགས་ཀྱི་འཚོ་བ་དང་སྤྱི་ཚོགས་གང་ཅིའི་ཐད་ལ་ཕན་ཐོགས་ཆེན་པོ་བྱུང་ངེས་རེད་ཅེས་གསུངས་འདུག་ཟེར་བ་ཡིན། ཡིད་བསམ་ལས་འདས་པ་ཞིག་ལ་ཡུན་རིང་མ་འགོར་པར་གསར་འགྱུར་བརྒྱུད་ལམ་ཁག་དང་། སྤྱི་ཚོགས་ཀྱི་ནང་དུ་སྦེལ་ཀེའུ་ཊས(Bill Gate)འབྲེལ་དྲྭའམ་དྲ་རྒྱ་ཡིས་མ་འོངས་མིའི་རིགས་ཀྱི་འཚོ་བ་དང་། སྤྱི་ཚོགས་ལ་ཕན་ཐོགས་ཆེན་པོ་བྱུང་ངེས་ཡིན་པར་བཤད་ཀྱི་འདུག་ཅེས་ལབ་གླེང་དང་ཁྱབ་བསྒྲགག་བྱས་འདུག ཡིན་ན་ཡང་། དོན་དངོས་སུ་སྐད་ཆ་དེ་སྦེལ་ཀེའུ་ཊས་བཤད་པ་ཞིག་མ་ཡིན་པར་ང་མཱ་ཡོན་རང་གིས་བཤད་པའི་སྐད་ཆ་ཞིག་ཡིན། ད་དུང་སྐབས་དེར་སྦེལ་ཀེའུ་ཊས་འབྲེལ་དྲྭ་ལ་སྐྱོན་བརྗོད་དང་རྒྱབ་སྐྱོར་མེད་པའི་རྣམ་པ་མང་པོ་བསྟན་ཡོད།

མི་ཞིག་ལ་དམིགས་ཡུལ་བརྟན་པོ་ཞིག་ཡོད་པ་ཡིན་ན། ཐོག་མར་དམིགས་ཡུལ་དེའི་ཆེད་དུ་བྱེད་དགོས་པའམ་ངེས་པར་དུ་བྱེད་དགོས་པ་ནི་དམིགས་ཡུལ་དེ་བསྒྲུབ་པར་དམ་བཅའ་འཇོག་རྒྱུ་དེ་རེད་སྙམ། དམིགས་ཡུལ་དེའི་ཆེད་དུ་དཀའ་སྡུག་ཅི་འདྲ་ཞིག་མྱོང་དགོས་ཐུག་ཀྱང་མདུན་བསྐྱོད་ཀྱི་སྤོབས་པ་སྔར་བཞིན་གནས་ཞིང་ཉམས་པ་མེད་པའི་དམ་བཅའ་ཞིག་ཡོད་དགོས། ཁེ་ལས་པ་མང་པོ་ཞིག་གིས་དུས་རྒྱུན་དུ་འདི་ལྟར་བསམ་བཞིན་ཡོད་དེ་བྱེད་སྒོ་གསར་སྤེལ་བྱེད་དགོས་ན་ཆ་རྐྱེན་འདི་ཚང་གི་མི་འདུག ཆ་རྐྱེན་དེའང་ཚང་གི་མི་འདུག ཆ་རྐྱེན་དེ་ཡང་ཆ་ཚང་གི་མི་འདུག་བསམས་ཏེ་ཅི་བྱ་གཏོལ་མེད་དུ་འགྱུར་ཏེ་ལས་དོན་གང་ལ་བལྟས་ཀྱང་ཆ་རྐྱེན་གྱིས་མ་འདང་ནས་ཡོད། འོན་ཀྱང་། ཁེ་ལས་པ་ཞིག་ལ་མཚོན་ན་ཆེས་གལ་གནད་ཆེ་ཤོས་ནི་ཆ་རྐྱེན་གསར་བཟོ་བྱེད་པ་དེ་རེད་སྙམ། གལ་ཏེ། གོ་སྐབས་ཟེར་བ་དེ་དཀོན་པོ་ཞིག་མ་ཡིན་པར་འབེལ་པོ་ཞིག་ཡིན་པ། ལས་ལ་འབད་བརྩོན་བྱེད་མཁན་དང་མི་བྱེད་མཁན་ཚང་མ་ལ་གོ་སྐབས་འཐོབ་ཆོག་ཆོག་ཅིག་ཡིན་ན། ཁེ་ལས་པ་ཞེས་པ་དེ་རིན་ཐུང་མེད་པ་ཞིག་དང་སྤྱི་ཚོགས་དང་དཔལ་འབྱོར་ལ་ཕན་གང་ཡང་ཐོགས་མི་ཐུབ་མཁན་ཞིག་རེད། དེར་བརྟེན། ཁྱེད་ཚོ་ཕལ་ཆེར་བས་འདི་ནི་གོ་སྐབས་བཟང་པོ་ཞིག་རེད་བསམ་སྲིད། ཡང་མང་པོ་ཞིག་གིས་གོ་སྐབས་ཟེར་བ་དེ་ག་དུས་ཡིན་ཡང་ཡོད་པ་དང་ལས་སླ་མོས་རག་ཆོག་ཆོག་ཅིག་རེད་ཀྱང་བསམ་ངེས། ཡིན་ན་ཡང་། ང་ནི་ནམ་ཡང་དེ་ལྟར་མི་འདོད་དེ་གོ་སྐབས་ནི་ནམ་ཡང་ང་ཚོར་ཁོ་ནར་དབང་བ་ཞིག་མ་རེད་ལ། གོ་སྐབས་ནི་རང་གིས་རང་ལ་བསྐྲུན་དགོས་པ་ཞིག་ལས་གཞན་གྱིས་ང་ཚོར་སྤྲད་པའམ་རང་བཞིན་གྱིས་འཐོབ་རྒྱུ་ཡོད་པ་ཞིག་ཡེ་ནས་རེད་བསམ་གྱི་མེད། གོང་དུ་བཤད་པ་བཞིན་རང་ཉིད་ལ་མོས་པ་དང་སྤྲོ་བ་ཡོད་པའི་ངང་ནས་དམིགས་ཡུལ་ཞིག་བདམས། དེ་ནས་སྤོབས་པ་དང་ཡིད་ཆེས་གཉིས་ལྡན་གྱི་ངང་ནས་དམིགས་ཡུལ་དེ་ཉིད་བསྒྲུབ་ཐུབ་པའི་དམ་བཅའ་བརྟན་པོ་ཞིག་བཞག་སྟེ་རང་གིས་རང་ལ་དམིགས་ཡུལ་དེ་ལོ་ལྔ། ལོ་བཅུ། ལོ་ཉི་ཤུའི་ནང་ཚུད་བསྒྲུབ་ཐུབ་པར་ཡིད་ཆེས་བྱེད་དགོས། དེ་ལྟར་ན། ང་ཚོས་བྱེད་སྒོ་གསར་སྤེལ་བྱས་ཏེ་ཁེ་ལས་ཀྱི་ལམ་དུ་ཡུན་རིང་གནས་ཐུབ་ངེས་རེད་བསམ་གྱི་འདུག
ལོ་བདུན་བརྒྱད་ཅིག་གི་ཡར་སྔོན་ན་ཨ་ལི་པཱ་པཱ(阿里巴巴) ལ་མཚན་སྙན་གྲགས་མེད། ཟོང་རྟགས་དང་མ་དངུལ་ཡང་མེད། ལྷག་པར་དུ་མི་རྣམས་ཀྱིས་གློག་རྡུལ་ཚོང་དོན་ནམ་དྲྭ་བརྒྱུད་ཚོང་དོན་ལ་ཡིད་ཆེས་དེ་བས་མེད། ད་དུང་སྐབས་དེར་ངོ་ཤེས་མི་ཤེས་སུ་རུང་ང་ཚོའི་ལས་ཁུངས་ལ་ལས་ཀ་ཡོང་མཁན་མེད། སྐབས་དེར་ང་ཚོ་གྲོགས་པོ་ཕན་ཚུན་རྩེད་མོ་རྩེས་ཏེ་ཁྲོམ་ལ་འགྲོ་ནས་གོམ་པ་རྒྱག་ཤེས་མཁན་དང་དབང་པོ་སྐྱོན་ཤོར་མིན་མཁན་ཚང་མ་འཁྲིད་ཡོང་སྟེ་ལས་མི་བྱེད་འཇུག་དགོས་མིན་འགྲོ་ཟེར་གྱི་ཡོད།
རེད་དེའང་། ལོ་ལྔ་དྲུག་ཅིིག་གི་རྗེས་སུ་ང་ཚོས་མ་དངུལ་བསགས་ཐུབ་ཡོད་ལ། ལས་མི་ཚང་མར་སྒོར་མོ་མང་པོ་ཡོད་པར་འགྱུར་ཞིང་ལས་ཀ་དེ་ལ་ལྷག་ཏུ་ཡིད་ཆེས་དང་དགའ་མོས་དམིགས་བསལ་བ་ཞིག་རྙེད། གང་ཡིན་ཟེར་ན། མི་སུ་གཅིག་གིས་ཀྱང་ང་ཚོའི་ལས་ཀ་འདི་ལ་ཡིད་ཆེས་མེད་དུས་ང་ཚོས་ཡིད་ཆེས་བྱས་པ་རེད། སུ་གཅིག་གིས་ཀྱང་འབྲེལ་དྲྭའམ་དྲྭ་རྒྱ་ཡིས་མིའི་རིགས་ཀྱི་འཚོ་བ་དང་སྤྱི་ཚོགས་ལ་ཕན་ཐོགས་ཡོད་པར་ཡིད་ཆེས་མེད་དུས་ང་ཚོས་ཡིད་ཆེས་བྱས་ཤིང་དེའི་ཆེད་དུ་བློས་བཏང་དུ་མ་ཞིག་བྱས་པའི་འབྲས་བུ་རེད།  དེའི་ཕྱིར། ཁེ་ལས་པ་ཞིག་ཡིན་ཚེ། ཐོག་མར་རང་ཉིད་ལ་དམིགས་ཡུལ་ཞིག་བསྐྲུན། དམིགས་ཡུལ་དེ་བསྒྲུབ་པའི་དམ་བཅའ་ཞིག་བཞག དེ་ནས་དམིགས་ཡུལ་དེ་ལ་ཡིད་ཆེས་དང་སྤྲོ་བ་ལྡན་པའི་ངང་ནས་འབད་བརྩོན་བྱེད་ན་ཁེ་ལས་པ་གཞན་དང་མི་འདྲ་བ་ཞིག་ཏན་ཏན་ཆགས་ངེས་རེད། མདོར་ན། མ་འོངས་པའི་ཁེ་ལས་པ་དང་ཁེ་ལས་པ་བྱེད་འདོད་མཁན་ཚོས་ཐོག་པར་གནད་དོན་གསུམ་ལ་བསམ་བློ་ངེས་པར་དུ་གཏོང་དགོས་འདུག་བསམ་གྱི་ཡོད།

དང་པོ། ཁྱེད་ཀྱིས་ཅི་ཞིག་བྱེད་འདོད་ཡོད། ཁྱེད་ཀྱིས་བྱེད་འདོད་པ་དེ་ཕ་མས་ཁྱེད་ལ་རེ་བ་བརྒྱབ་པ་དེ་མ་ཡིན་ཞིང། གྲོགས་པོས་ཁྱེད་ཉིད་ཅི་ཞིག་ཆགས་འདོད་པ་དེའང་མ་ཡིན་པ། གཞན་གྱིས་བསམ་ཚུལ་ལམ་ལྟ་ཚུལ་ཡང་མ་ཡིན་པར་ཁྱེད་རང་ཉིད་ཀྱིས་ཐག་བཅད་ཅིང་བྱེད་འདོད་ཡོད་པ་ཞིག་ཡིན་དགོས། དེ་ནས་བྱ་བ་ཅི་ཞིག་ལ་འདོད་པ་ཡོད་མེད་ཐག་བཅད་ཚར་རྗེས། ཁྱེད་ཀྱིས་ཅི་ཞིག་བྱེད་དགོས་མེད་ལ་བསམ་གཞིགས་བྱེད་པ་ལས་ཁྱེད་ཀྱིས་ཅི་ཞིག་བྱེད་ཐུབ་མི་ཐུབ་ལ་བསམ་བློ་གཏོང་མི་རུང་སྙམ།

གཉིས་པ། བྱེད་སྒོ་གསར་སྤེལ་ཞིག་མ་བྱེད་སྔོན་ངེས་པར་དུ་དེའི་སྐོར་མི་མང་པོ་ལ་སྐད་ཆ་འདྲི་དགོས། ལྷག་པར་དུ་མི་ཉམས་མྱོང་ཅན་རྣམས་ལ་རང་ཉིད་ཀྱི་ལྟ་ཚུལ་དང། ཁྱེད་ཀྱིས་ཅི་ཞིག་བྱེད་འདོད་ཡོད་མེད་སོགས་ལ་གང་ཐུབ་ཅི་ཐུབ་སྐད་ཆ་འདྲི་དགོས། སྤྱིར་བཏང་ལྟར་ན། ཁྱེད་ཀྱིས་བྱེད་འདོད་པའི་ལས་དོན་དམ་དམིགས་ཡུལ་དེ་འཛམ་གླིང་འདིའི་ནང་དུ་མི་སྟོང་ཕྲག་མང་པོས་བྱེད་འདོད་ཡོད་པ་དང། དམིགས་ཡུལ་དེ་བསྒྲུབ་པར་ཁྱེད་ལས་ཆ་རྐྱེན་ཡག་པའི་གང་ཟག་མང་པོ་ཡོད་ཀྱང་། ཁྱེད་ཀྱིས་ཐོག་མར་ནས་བསམ་གཞིགས་བྱེད་དགོས་པའི་གནད་འགག་གཙོ་བོ་ཞིག་ནི་གཞན་གྱིས་བྱེད་བཞིན་པ་དང་བྱས་ཚར་བ་རྣམས་ལས་སྤུས་དག་པ་དང་། དམིགས་བསལ་བ་ཞིག་དང་ཁྱད་ཆོས་ལྡན་པ་ཞིག་བཟོ་ཐུབ་པར་བྱ་རྒྱུ་ནི་ཁྱེད་ཉིད་ལ་རྒྱལ་ཁ་ཐོབ་པའི་གོ་སྐབས་དང་ཐབས་ལམ་ཡག་ཤོས་དེ་རེད་སྙམ། དེ་མིན་ཁྱེད་ཀྱིས་བྱེད་པ་དེའང་གཞན་དང་གཅིག་མཚུངས་ཙམ་ཆགས་པ་ལས་དམིགས་བསལ་གྱི་ཁྱད་ཆོས་ཅན་ཞིག་ཏུ་ནམ་ཡང་འགྱུར་མི་སྲིིད། གང་ལྟར་ཐོག་མར་ཁྱེད་ཀྱིས་ཅི་ཞིག་བྱེད་འདོད་པ་དང་། ཅི་ཞིག་བྱེད་དགོས་པ། ལྷག་པར་དུ་ཅི་ཞིག་བྱེད་མི་རུང་བ་སོགས་སེམས་ལ་ངེས་ཤིང་དུས་རྟག་ཏུ་ཡང་ཡང་དྲན་པར་བྱེད་དགོས། ཐོག་མར་བྱེད་སྒོ་གསར་སྤེལ་བྱེད་པའི་ལོ་བཞི་ལྔ་ཞིག་གི་བརྒྱུད་རིམ་ཁྲོད་གདམ་ག་དང་གོ་སྐབས་མང་པོ་ཞིག་ཡོད། གདམ་ག་དང་གོ་སྐབས་དེ་དག་ཀྱང་ཐོག་མར་ཁྱེད་ཀྱིས་བུ་མོ་ཞིག་ལ་སེམས་པ་ཤོར་བའི་ཉིན་མོ་དེ་ཉིད་ལྟར་ངེས་པར་དུ་བརྗེད་མི་ཉན། རྒྱུ་མཚན། ཁྱེད་ཀྱིས་བུ་མོ་དེ་ལ་བརྩེ་བ་སྤྲད་པ་དང་དགའ་བ་མཉམ་དུ་ཁྱེད་ཀྱིས་ཐོག་མར་འཕྲད་པའི་ཉིན་དེ་བརྗེད་མི་ཐུབ་པ། དེ་ལ་འགན་འཁུར་བ། དེ་ཉིན་མཚན་དབྱེར་མེད་དུ་དྲན་པ་ནང་བཞིན་ཁྱེད་ཀྱིས་བྱེད་སྒོ་གསར་བ་གང་འདྲ་ཞིག་སྤེལ་བ་ཡིན་ནའང་ཐོག་མར་འགོ་ཅི་ལྟར་བརྩམས་པ་དང་དེ་ཡི་བརྒྱུད་རིམ་སོགས་སེམས་ལ་ངེས་དགོས། དེ་རྒྱུ་མཚན་གང་ལ་བརྟེན་ནས་བཤད་ཡིན་ཟེར་ན། ཁྱེད་ཀྱིས་བྱེད་སྒོ་གསར་སྤེལ་བྱེད་སྐབས་རྩ་དོན་ལ་ཐུག་དུས་ཁྱེད་ཀྱིས་མཐའ་འཁྱོང་རུང་ངམ་མི་རུང། སླུ་བྲིད་ལ་ཐུག་དུས་ཁྱེད་ཀྱིས་རྒྱུན་འཁྱོང་བྱེད་རུང་ངམ་མི་རུང་། གནོད་ཤུགས་ལ་ཐུག་དུས་ཁྱེད་ཀྱིས་གདོང་ལེན་བྱེད་རུང་ངམ་མི་རུང་ཤེས་པར་བྱ་རྒྱུ་དེ་ཧ་ཅང་གལ་ཆེན་པོ་ཡིན་པས་ཡིན།

གསུམ་པ། ཁྱེད་ཀྱིས་ཅི་ཞིག་བྱེད་འདོད་པ་དང་ཅི་ཞིག་བྱེད་དགོས་མེད་བསམ་བློ་ཞིབ་ཚགས་བཏང་ཚར་རྗེས། ད་གཟོད་སོ་སོ་ལ་ང་ཅི་ཞིག་བྱེད་ནུས་སམ། ངས་དམིགས་ཡུལ་དེའི་ཆེད་དུ་ལོ་ག་ཚོད་རིང་དཀའ་ལས་རྒྱག་ཐུབ་བམ། བསམ་གཞིག་གི་དྲི་བ་དེ་གཉིས་ལ་ངེས་པར་དུ་བསམ་བློ་གཏོང་དགོས། ང་ལ་མཚོན་ན་ལོ་དགུའི་རིང་གི་བརྒྱུད་རིམ་ཁྲོད་ཀྱི་ཉམས་མྱོང་གིས་ཆ་རྐྱེན་མེད་དུས་སྐབས་སུ་ཡིན་ནའང་། དམིགས་ཡུལ་དེ་ཉིད་ཀྱི་ཆེད་དུ་ལས་རོགས་སོགས་དང་མཉམ་དུ་སྤོབས་པ་དང་ཡིད་ཆེས་ཡོད་པའི་ཐོག་ནས་མུ་མཐུད་དུ་འབད་བརྩོན་དང་དཀའ་བ་སྤྱད་པ་ཡིན་ན་སེལ་མི་ཐུབ་པའི་དཀའ་ངལ་ཞིག་དང་འགྲུབ་མི་ཐུབ་པའི་དམིགས་ཡུལ་ཞིག་ཡོད་མི་སྲིད་པའི་ཚོར་བ་སྤྲད་མྱོང་།

ད་ལྟའི་སྤྱི་ཚོགས་ནང་དུ་༼ཨ་ལི་པཱ་པཱ阿里巴巴༽ཅི་ལྟར་ལེགས་འགྲུབ་བྱུང་བ་ཡིན་མིན་གྱི་སྐོར་ལ་རྩོམ་ཡིག་སྤེལ་མཁན་དང་ལབ་གླེང་བྱེད་མཁན་མང་པོ་ཡོད་ལ། རྩོམ་པ་པོ་མང་པོ་ཞིག་གིས་དེའི་སྐོར་ལ་དེབ་བཏོན་ཏེ་འགྲེམ་སྤེལ་བྱེད་མཁན་ཡང་འདུག  དཔེ་དེབ་དེ་དག་ངས་བཀླགས་མ་མྱོང་བ་ཞིག་མེད་དེ།  དཔེ་དེབ་དེ་དག་གི་ཁྲོད་ན་ངས་བརྩམས་པའི་དཔེ་དེབ་ཅིག་དང་ངས་བཤད་པའི་སྐད་ཆ་ཚིག་གཅིག་ཀྱང་མི་འདུག ཡིན་ནའང་། མ་འོངས་པར་ངས་阿里巴巴ཨ་ལི་པཱ་པཱའི་༼ནོར་འཁྲུལ་གཅིག་སྟོང་གཅིག༽་ཅེས་པའི་དཔེ་དེབ་ཅིག་བརྩམ་འདོད། རྒྱུ་མཚན་ནི། དཔེ་དེབ་དང་རྩོམ་ཡིག གསར་འགྱུར་དེ་དག་གི་ནང་དུ༼ཨ་ལི་པཱ་པཱ阿里巴巴༽ ལ་མ་དངུལ་ག་ཚོད་ཡིན་མེད་དང་། ཨ་ལི་པཱ་པཱ་ཡག་པོ་འདུག་ཟེར་མཁན་མ་གཏོགས་དེ་ལ་ནོར་འཁྲུལ་ག་རེ་འདུག དེ་ཡིས་སྤྱི་ཚོགས་ལ་གནོད་སྐྱེལ་གྱི་ཡོད་དང་མེད་གང་ཡང་མེད་པས་ཡིན།
མཐའ་མཇུག་ཏུ་ངས་འདིར་བཞུགས་ཀྱི་ཁེ་ལས་པ་དང། མ་འོངས་པར་ཁེ་ལས་པ་ཆགས་འདོད་མཁན་གྱི་མི་ཚང་མ་ལ་བཤད་འདོད་པ་ནི། དེ་རིང་ནི་ཧ་ཅང་གདུབ་རྩུབ་ཆེ་བ་ཞིག སང་ཉིན་ནི་དེ་བས་ཀྱང་གདུབ་རྩུབ་ཆེ་བ་ཞིག ཡིན་ནའང་། གནངས་ཉིན་ནི་བདེ་སྐྱིད་ཀྱི་ཉི་མ་འཆར་ངེས་པའི་ཉིན་མོ་ཞིག་ཏན་ཏན་ཡིན། མི་ཕལ་ཆེར་བ་སང་ཉིན་དགོང་མོར་འཆི་རྒྱུ་རེད། དེས་ན་ང་ཚོས་དེ་རིང་གི་ཉིན་མོ་འདི་གཙོ་བོར་བཟུང་སྟེ་དུས་རྟག་ཏུ་དཀའ་སྡུག་ལ་གདོང་ལེན་བྱེད་ཅིང་ལས་དོན་དང་དམིགས་ཡུལ་གྱི་ཆེད་དུ་འབད་པ་བྱ་དགོས་སོ།།

༢༠༡༨/༠༤/ ༢༣ ཉིན།