གནས་ཚུལ་ལྟར་ན། བོད་ནང་གི་བོད་ཡིག་ཟིན་བྲིས་སྤྱི་དང་ལྷག་པར་ཧི་གཟུགས་ཟིན་བྲིས་ལ་མིག་སྔར་ཟིན་བྲིས་བརྒྱ་དང་རེ་བརྒྱད་ལ་ཀློག་གྲངས་ཆིག་ཁྲི་དྲུག་སྟོང་ལྷག་དང་དཔྱད་གཏམ་དྲུག་བརྒྱ་ལྷག་ཡོད་པའི་ཟིན་བྲིས་པ་མི་ཁོམ་པའི་རྒྱལ་སྲས་ལགས་ཀྱི་ཟིན་བྲིས་ཧི་ཟིན་དོ་དམ་པས་ཡོངས་སུ་མེད་བརླག་ཏུ་བཏང་བ་དང་མཉམ་ཕྱིར་ཕུད་བྱས་བའི་གནས་ཚུལ་ཞིག་བྱུང་འདུག་ལ་གནད་དོན་དེའི་འབྱུང་རྐྱེན་ནི་གཙོ་བོ་ཁོ་བོའི་ཟིན་བྲིས་་༼གནས་ལུགས་རློན་བཤད་རྒྱབ་ན་འདི་འདྲ་རེད༽ཅེས་པ་དེར་འབྲེལ་བ་ཡོད་ཚུལ་གླེང་འདུག
གཤམ་དུ་བཀོད་པ་གནས་ལུགས་རློན་བཤད་བརྒྱབ་ན་འདི་འདྲ་རེད་ཀློག་རོགས
མི་ཁོམ་པའི་རྒྱལ་སྲས།
–ང་དང་ཟིན་བྲིས་པ་སྐོར་ཞིག་ལ།
ཟིན་བྲིས་ཀྱི་འགྲེད་བརྡབ།
རང་ཉིད་ལ་མི་ཁོམ་པའི་རྒྱལ་སྲས་སུ་བོས་པ་ནས་རང་ཉིད་ཀྱིས་རང་ཉིད་ལ་དམ་བཅའི་སྡོམ་ཚིག་གཅིག་བཀོད་ཡོད་པ་ནི། ངས་སྙན་ངག་མི་ཤེས་ལ། ནམ་ཡང་ལྷ་སྒྲུང་རང་བཞིན་ཅན་གྱི་ལོ་རྒྱུས་མི་ཀློག ང་ལ་མིག་ཡོད་ཅིང་། རྣ་བའང་རབ་ཏུ་གསལ། ལྕེ་དེ་བས་ཀྱང་བཅད་མེད། དེའི་ཕྱིར་ནམ་ཡང་བདེན་དྲང་གི་སྐད་ཆ་ཏག་ཏག་བོད་མང་ཚོགས་ཀྱི་འཚོ་བ་དང་ཐག་ཉེ་སར་བཅར་ཏེ་བཤད་འདོད་ཡོད་ཅེས་བྲིས་ཡོད། འདི་ནི་ང་རང་སྒེར་ཚུགས་ཡོད་པ་ཞིག་དང་སྒལ་ཚིགས་དྲང་བཞག་ཅན་དུ་བགྱུར་བྱེད་ཀྱི་གདམས་ངག་གསོན་པོ་ཅིག་ཏུ་སྒོམ་ཡོད། གདམས་ངག་འདི་རང་ཉིད་ཀྱིས་རང་ཉིད་ལ་གནངས་པའི་དྲང་བོའི་ལམ་དེ་ཡིན། འདི་ནི་གནའ་དང་མ་ང་ཚོ་བོད་པའི་དད་ལྡན་པ་ཚོ་དབུས་ལ་འགྲོ་བ་ལྟ་བུ་ཞིག་ཁྱོན་ནས་མ་ཡིན་པར་གཡོ་སྒྱུ་དང་ངོ་སོ། རང་འདོད་དང་སྙན་གྲགས། ཕྲག་དོག་དང་ངོ་དགའ། མི་གཤིས་དང་སྒེར་ཚུགས། རྒྱུ་འབྲས་དང་དགག་སྒྲུབ། བློ་མིག་དང་ཧོལ་རྒྱུགས། གཟབ་ནན་དང་ཅལ་འདྲོགས། ཞིབ་ཚགས་དང་བརྡབ་ཞོགས། རྟུལ་ཕོད་དང་བྲན་གཡོག སྟིང་ཚིག་དང་ཡོག་ལུ། ཨུ་ཚུགས་དང་དཀྱེལ་ཡངས། བཟོད་སྒོམ་དང་གཞུར་བརྟག་ལ་སོགས་པའི་གཡུལ་ས་དང་འགག་འཕྲེང་མང་པོ་བརྒྱུད་དགོས་པ་ཞིག་ཡིན་སྟབས་ཧ་ཅང་གཟབ་གཟབ་དང་ཀུན་སློང་ཡང་དག་ཡིན་མིན་ལ་བྱི་དོར་བྱེད་སའི་མེ་ལོང་ཞིག་ནམ་རྒྱུན་རང་གི་མདུན་ཐད་དུ་བཤམས་ནས་མ་བཞག་ན་ཟ་ཟུར་དང་ཞར་ཞོར་གང་རུང་ནས་རང་ཚུགས་དང་ནང་ཁྲོལ་ཕྱི་ཤོར་བྱུང་རྒྱུར་ཧ་ཅང་ཐག་ཉེ་འདྲ་བོ་འདུག དེ་ལྟ་ཡིན་ན་ཐོག་མར་ཟིན་བྲིས་ཀྱི་གཞུང་ལམ་ཆེན་མོ་འདིའི་སྟེང་དུ་གོམ་ཁ་བསྒྱུར་བ་ནས་རང་ཉིད་ཀྱི་ལྷད་མ་ཞུགས་པའི་བྱིས་བློ་དྭངས་མོའམ་དམ་བཅའ་དྲོད་མོ་འདིའི་ཀློང་ནས་བུད་བསྙེགས་ཐོབ་གསུམ་གྱི་གོ་རིམ་གང་དུ་བརྒྱུད་དགོས་ཀྱང་གཉིས་ལོ་དྲང་བཞག་དང་བདེན་པ་བདེན་དྲང་གིས་སྐད་ཆ་རེ་བཤད་བསམ་ཡོད་ལ་མངོན་ལྐོག་དང་མདུན་རྒྱབ་མེད་པའི་ལས་འགན་གང་ཞིག་འཁུར་སྙམ་གྱིས་ནམ་ཡང་རང་གིས་རང་ལ་གསལ་འདེབས་རེ་བྱེད་ཅི་ཐུབ་བྱས་པ་ཡིན། ཡིན་ཡང་ཁ་སང་དེ་རིང་གི་རང་ཉིད་ཀྱི་ཟིན་ཐོ་འབྲི་སྟངས་དང་ཕ་རོལ་བོའི་ཟིན་ཐོར་ཀློག་ཉེས་ཤོར་ཚུལ་ལ་བལྟས་ཡོང་ན་བདེན་དྲང་གི་སྨྱུ་གུ་འདར་འདར་དང་གཞན་བསྟོད་ཀྱི་ཁ་ཚིག་འཇམ་འཇམ་གྱིས་མིང་ཐོབ་ཅན་ལ་ཡོག་ལུའི་ཀོན་ཐུག་དང་གྲོགས་པོའི་འཐེན་འཁྱེར་གྱིས་རྡེབ་གྲངས་དང་ཁ་བྱང་ཙམ་ལ་ལྟོས་ཏེ་ལེགས་འདེམས་བྱེད་པ། ཕ་རོལ་བོའི་ཟིན་ཐོའི་སྤུས་ཀའི་བཟང་ངན་མི་འཇལ་བར་བཀླགས་ཟིན་དང་ང་ཐོན་ཡོད་ལྟ་བུ་ལ་སོགས་པའི་ཟིན་ཐོ་དང་འབྲེལ་མེད་ཀྱི་ཚིག་ལོ་མང་པོ་སྤུངས་ཚུལ་འདིས་ཁྱོད་མི་ཁོམ་པའི་རྒྱལ་སྲས་ཁྱི་སྐྱག་གི་ལོག་གི་མེད་ཀི་ནས།
དེ་མ་རེད་ཟེར་ན་ཁྱོད་ཀྱིས་ནམ་རྒྱུན་གཅན་མེ་སྟག་སོགས་ཀྱི་སྙན་ངག་ཧ་གོ་གི་མེད་པའམ་ཧ་གོ་རྒྱུ་མེད་ནའང་གོ་སོང་ཚུལ་དང་སྙན་སོང་ཚུལ་གྱི་ངོ་སོ་དང་ཡོག་ལུ་བྱེད་ཅི་ཐུབ་བྱས་ཏེ་རང་ཉིད་ལ་མགོ་སྐོར་གཏོང་ཚུལ་སྐྱུག་ལོག་པོ་འདིའི་གསེང་ན་ཁྱོད་ཀྱི་ཟིན་ཐོ་དག་ལ་མེ་སྟག་གིས་ལེགས་འདེམས་དང་དཔྱད་བརྗོད་རེ་ཨེ་བྱེད་ལ་རེ་བ་སྟོང་གིས་བརྟས་པ་མ་ཡིན་ནམ། ལྟོས་བཅོས་ཀྱི་བཤད་ན་མེ་སྟག་ནི་བོད་ཀྱི་སྙན་ངག་པ་ལོ་ལོན་དེ་ཡིན་པས་ཁོང་གིས་ལེགས་འདེམས་རེ་ཐོབ་ན་དགའ་འོས་པ་ཞིག་ཡིན་པར་མ་ཟད་ང་ཚོས་ནམ་ཡང་ཁོང་ཉིད་ལ་བརྩི་མཐོང་དང་གོང་བཀུར་བྱེད་རིན་ཡོད་པ་ཞིག་ཀྱང་ཡིན་དུ་ཆུགས་མོད། ད་ལོ་ཟིན་བྲིས་མཁན་ཐོབ་རྩོད་པའི་གཡས་གཡོན་དུ་ཁོ་རང་ཉིད་ཀྱི་ཟིན་ཐོ་ཡོངས་རྫོགས་དུས་གཅིག་ཏུ་བསུབས་ཐུབ་པའི་ཞེ་སྤོ་དམྱལ་བའི་མེ་འདག་འདྲ་བ་ཞིག་ལངས་སོང་བ་དང་། མཚམས་ལན་རེར་ཧོན་རྟགས་ཁྱི་རོ་འབུ་ཟོས་འདྲ་ཟིག་ཀྱང་སྟོན་རྒྱུ་ཡོད་པའང་མ་བརྗེད་པར་གྱིས་ཤིག དེའི་སྟབས་ཀྱིས་ཁྱོད་ཀྱིས་སྤེལ་ཟིན་པའི་དཔྱད་བརྗོད་ཁྲོད་དུ་བློ་འགྱོད་སྐྱེས་དགོས་སའང་མང་དུ་མཆིས་པར་ཅི་ཁག དཔེར་ན་ཁ་སང་དེ་རིང་གི་ཟིན་ཐོ་དག་ལས་གླེང་ཡོང་ན་མི་རྒོད་ཀྱི་ཟིན་ཐོ་ཞིག་མཐོང་མ་ཐག་ཏུ་མེ་སྟག་ཁོ་བླ་རྒན་སྙིང་རླུང་ཅན་ཞིག་དང་འདྲ་བར་དེ་མ་ཐག་མེ་ཏོག་ནད་པའི་གོ་མདའ་ཞིག་གཡུགས་ཁུལ་བྱས་མོད། ཡང་དུ་རྐང་གཅིག་གི་བསམ་གཞིགས་བར་ནས་རང་ཉིད་ཀྱི་མིང་ཐོབ་སྐམ་པོ་དེ་དང་ཆང་ཕོར་གྱི་སིལ་སྒྲ་དེ་རྣ་བར་འཇགས་ཡོང་ཞིང་སྐུ་ཞབས་མི་རྒོད་སོགས་ཀྱི་གསར་བུའི་ཁུ་ཚུར་གྱི་འཇིགས་ཟིལ་དྲན་ཏེ་ལམ་སེང་སྨྱུག་ཁ་འཁྱོག་པོར་བསྒྱུར་དེ་མེ་ཏོག་ནད་པར་འགྲེལ་བ་དང་ཡང་འགྲེལ་མང་པོ་བརྒྱབ་ཁུལ་གྱིས་དགོངས་དག་དང་ངོས་ལེན་འདྲ་ཟིག་བྱེད་ཚུལ་འདིས། དེ་སྔོན་སྒང་བ་བོད་ཀྱི་མྱི་ཆེན་གྱིས་ཧི་ཟིན་མཁན་པོར་ཐབས་ཀྱིས་དབང་བསྐུར་བའང་སྟོང་ཟད་དུ་མ་བཏང་བ་ཞིག་ཏུ་སྒོམ་ལོས་ཆོག སྙན་ངག་པ་ཡིན་པ་བདེན་དུ་ཆུགས་ཀྱང་སྙན་ངག་འབྲི་ན་འགན་འཁྲི་ཞིག་ངེས་པར་ཡོད་དགོས་པ་ཞིག་མ་རེད་ནས། ང་ཚོ་སུ་ཡིན་རུང་སྙན་ངག་འབྲི་མི་ཤེས་རུང་ཀློག་པ་ལ་སྤྲོ་སྣང་ཡོད་པ་ཞིག་ཡིན་པས་ཁྱོད་ཀྱི་སྙན་ངག་བཀླགས་པའི་ཚེ་ནའང་མིང་བརྡའི་གཟབ་འཆོར་ཁོ་ནའི་བསླུ་བྲིད་ཀྱིས་ཡིད་ཚིམ་ཐབས་མ་བྱུང༌ལ། ཁྱོད་ཀྱི་དབུགས་སྒང་འདྲ་བའི་སྙན་ངག་དེ་དག་བར་སྣང་དུ་བཏང་ན་ཕྱེ་ལེབ་བཞིན་སྒེག་པར་སྣང་ཡང་ལག་ཏུ་བླངས་ནས་ཞིབ་ཏུ་བརྟགས་ཤིང་དཔྱད་ན་ཕྱི་གཟུགས་ནང་སྟོང་ཅན་ཞིག་ལས་ཅི་ཡང་མེད་པའི་ཚིག་འབྱམས་ཀྱི་གད་སྙིགས་རང་རེད་འདུག ཡང་ན་ཁྱོད་ཀྱི་སྙན་ངག་ནི་ད་ལྟའི་སྐྱ་ཆད་སྔོ་སྡུག་གི་བོད་པའི་སྤྱི་ཚོགས་འཚོ་བ་ལ་རྒྱབ་ཀྱིས་ཕྱོགས་འདུག་པས། ཟུར་བལྟས་ལེབ་མཐོང་གི་ཧྲག་བར་ནས་ཁྱོད་ཀྱི་སྙན་ངག་འགའ་རེ་ནི་སྨུག་ལོང་ཁྲོད་ཀྱི་རི་སྒང་ལུང་ཁུག་ན་ཕྱུགས་རྫི་ཚོས་གླུ་དང་ལ་གཞས་ཐན་ཐུན་རེ་བླངས་ནས་རང་གི་སྣང་བ་གསོ་ཐབས་བྱེད་པ་དང་ཀུན་ནས་མཚུངས་སོང་བས། ཧི་གཟུགས་ཚང་གི་མོ་སྟོན་ཕག་མགོ་ཟེར་བའི་ཆོ་ལོ་འདི་ད་ལྟའི་ཁྱོད་ལ་ཕུལ་ན་མི་འཚམ་པ་ཅི་ཡོད་ཨང༌།
ཟིན་བྲིས་ཀྱི་བརྡབ་ཞོགས།
སྙན་ངག་གི་རྒྱལ་ཁམས་སུ་གཡབ་མོ་དང་ཀི་འདེབས་བྱེད་མཁན་གྱི་སྐུ་ཞབས་མི་རྒོད་ལགས་ལ་མཚོན་ན་མཚན་མོ་ནག་ཐིང་ཐིང་དུ་མི་ལོང་རྟ་ལོང་ལ་ཞོན་དེ་གཡང་སར་རྒྱུགས་པ་དང་འདྲ་ནའང་ཟིན་བྲིས་བྲན་གཡོག་པ་ཁོ་ཚོས་གྱ་ཚོམ་དང་ཚོད་ཚོད་ལ་ཅལ་འདྲོགས་བྱས་ཏེ་བརྡབ་ཞོགས་ཆེན་པོས་འུར་བསྟོད་དང་ཡོ་གཟུར་ཅན་གྱི་སྐད་ཆ་འདྲ་མིན་དང་། ལེགས་འདེམས་མང་པོ་བྱེད་པར་འབུར་འཚངས་རྒྱག་གིན་ཡོད་པའི་གསེང་ནས་དེ་ལ་དོ་ཁུར་དང་གཟབ་ནན་གྱིས་སྐད་ཆ་གནད་ཐིངས་པ་ཞིག་བཤད་ཕོད་པའི་མི་བུ་སུ་ཞིག་ཡོད་བཏང༌། སྙན་ངག་གི་རྒྱལ་ཁམས་འགྲིམས་པ་ནི་སྡེ་དཔོན་ཞིག་གིས་མང་ཚོགས་ལ་གོང་རིམ་གྱི་གསལ་བརྡ་བསྒྲགས་པ་ཙམ་ཞིག་ག་ནས་ཡིན། མ་ཡིན་ཏེ་དེ་བས་སྐུ་ཞབས་རྣོ་སྦྲེང་ལགས་ཀྱིས་རང་གི་སྒལ་ཚིགས་མ་བོར་བ་ཙམ་གྱིས༼་ཁོ་རེ། འཛམ་གླིང་རྩོམ་རིག་ཁྲོད་ཀྱི་གལ་ཆེའི་སྙན་ངག་གྲུབ་མཐའ་ཟེར་བ་ལས་འཛམ་གླིང་རྩོམ་རིག་ཁྲོད་ཀྱི་སྙན་ངག་གི་གྲུབ་མཐའ་གལ་ཆེན་འགའ་ཟེར་ན་བོད་སྐད་ཀྱི་ཁྱད་ཆོས་ཡོད་པ་འདྲ། གང་ལྟར་དེ་ནི་ཐ་སྙད་ཙམ་རེད་དེ། མི་སྐྱོན་མོད། ཁྱེད་ཀྱིས་ནུབ་ཕྱོགས་དེང་རབས་སྨྲ་བའི་རྩོམ་རིག་གི་དྲི་གཞི་ལྔ་བརྒྱ་ལས་ལ་བཏུས་ལུང་བཏུས་བྱས་ཏེ་མདོར་བསྡུས་པའི་དཔེ་ཀློག་ནང་དོན་མདོར་བསྡུས་བསྐྱར་འབྲི་འདི་གངས་རྒྱན་མེ་ཏོག་རྩོམ་སྒྲིག་ཁང་གི་དཔྱོད་པའི་བློ་མིག་གི་ལེ་ཚན་དུ་བཞག་པར་ཁོ་བོ་ཧང་འཐོར་གི་ཡོད། རྩོམ་སྒྲིག་པ་ནི་བློ་མིག་ལྡོང་བའི་རྩོམ་སྒྲིག་པ་རང་རེད་དེ། ཕྱི་གླིང་གི་ཕྱི་ཚུལ་གྱི་རྣམ་པ་ཙམ་ལ་འཐམ་པའི་བརྩམས་ཆོས་བསྐྱར་འབྲི་འདི་དཔྱོད་པའི་བློ་མིག་ཏུ་བཞག་པ་འདིས། ངས་ཕྱི་ཚུལ་ཙམ་ལ་འཐམ་པའི་རང་རེའི་ན་གཞོན་རྩོམ་པ་པོ་ཁ་ཤས་དང་རྩོམ་སྒྲིག་པ་ཁ་ཤས་ལ་ཚ་འདྲི་མི་གཏོང་ག་མེད་རེད། དཔེ་ཀློག་བསྐྱར་འབྲི་དང་དཔྱོད་པའི་བློ་མིག་ལ་མཚུངས་རྟགས་རྒྱག་པའི་སྐབས་འདིར་ངས་གྲོགས་པོ་ལ་གནད་ཀ་འདིའི་སྟེང་ནས་ཁྱེད་ལ་ལྟ་ཚུལ་ག་འདྲ་ཡོད་ཅེས་ཀྱང་འབྲི་དགོས་བྱུང་། ཞེས་དྲན་པ་ཁ་རུ་འབྱིན་ལ་སྤྲོ་བའི་རྣོ་སྦྲེང་གིས་༽མི་རྒོད་ཀྱི་བཤུས་རྩོམ་དེ་ནུབ་ཕྱོགས་དེང་རབས་སྨྲ་བའི་རྩོམ་རིག་གི་དྲི་གཞི་ལྔ་བརྒྱ་ལས་ལ་བཏུས་ལུང་བཏུས་བྱས་པའི་ཡང་བརྡ་སྤྲད་པ་མ་ཡིན་ནམ། ཡིན་ནའང་། ཧི་ཟིན་ཚང་གིས་གློར་བུར་ལ་ལེགས་འདེམས་ཀྱི་ཅོད་པན་རི་འདྲ་བ་ཞིག་བསྩལ་པ་ཅི་ཡིན་ནམ། གྲྭ་བཙུན་སྙན་ངག་སྐོར་ཅིག་ལ་བསྡིགས་པ་དང་དེའི་ཞབས་བཏགས་མའི་རྒྱབ་ན་ལྡོང་ཕྲུག་དང་གཟི་མིག་གསུམ་པ། བྱ་མདོ་རབ་རྒྱས་སོགས་ཀྱིས་ཕན་ཚུན་རྩབ་ཧྲལ་གྱི་བསམ་བློ་དང་ནང་སྙིང་རུལ་བ་དག་ཕྱིར་བསྟན་ཡོད་པ་མ་ཟད། ཚིག་མཚོན་གྱི་རལ་གྲི་ཤུབ་ནས་བཏོན་ཏེ་རྒྱུ་མའི་ལྡ་ལྡི་འཐེན་རེས་ཀྱི་བྱ་སྤྱོད་ངུ་བྲོ་བོ་ཡོད་པ་འདི་ལ་ལེ་འགྲིག་གི་འཇའ་ས་ཞིག་སུས་གནང་ཡོང༌། དེ་ལས་ཀྱང་མི་བོ་ཆེ་དགེ་འདུན་ཆོས་འཕེལ་ཀྱང་མི་རྒོད་ཀྱི་ཨག་སྒྲ་འདིས་རྡོག་འོག་གི་ས་ལ་སྦྱར་མེད་དམ། སྐུ་ཞབས་མི་རྒོད་ལ་མཚོན་ན་ནམ་རྒྱུན་བོད་ཡིག་ཟིན་བྲིས་ཀྱི་ཀློང་ན་གསར་འགོད་པ་ཆུང་ཆུང་ཞིག་དང་འདྲ་བར་གསར་འགྱུར་ལྡོམ་པོ་དག་བཏུས་ནས་ཡོང་མཁན་ཞིག་དང་མཚམས་ལན་རེར་བོད་ཀྱི་རྩོམ་རིག་ལམ་ལུགས་ལ་ངོ་ལོག་བྱེད་མཁན་ཞིག་ཀྱང་རེད་ཟེར་ན་མི་ཆོག་པ་གང་ཡོད་དམ། ལྟོས་དང་ཁོས་བྲིས་པའི་ཟིན་ཐོ་མང་ཤོས་ནི་ཨ་རི་དང་དབྱིན་ཇི། ཨུ་རི་སུ འཇར་མན་ལ་སོགས་པའི་བརྩམས་ཆོས་བོད་འགྱུར་མ་དག་ལས་ཕྱི་གླིང་རྩོམ་རིག་པ་དག་གི་ལྟ་བ་དང་རང་ལུགས་ཀྱི་དུག་རྫས་བོད་ཀྱི་རྩོམ་རིག་ནང་དུ་བརྡལ་ཁྱབ་དང་རང་གི་ཡིན་ཁུལ་གྱི་མགོ་འབག་ནག་པོ་ཞིག་གཡོགས་པ་དང་ཨུ་ཚུགས་ཀྱིས་འཇུག་བཞིན་ཡོད་པས་རྡོ་ཆགས་བཙན་བསྒྲིགས་ཀྱི་ལས་ཀ་འདི་ལ་ཁྱོད་ཚོ་ཀློག་པ་པོ་དག་མི་སུན་གི་ནས ད་དུང་ཕོ་ཚོད་ཆེན་པོས་ལུག་མགོ་བསྟན་ཏེ་ཁྱི་ཤ་འཚོང་བའི་ཚུལ་ངོམ་གྱིན་འདུག རྒྱལ་ཁབ་དང་མི་རིགས་གཞན་དང་གཞན་དག་གིས་མི་སྣ་གང་དང་གང་ཞིག་གི་ཚིག་ཀྱོག་སྐམ་པོ་དག་གི་ནང་ནས་མགོ་ཆག་ཡ་སྡེབ་རེ་དྲུད་ཡོང་རྒྱུ་ཞིག་གོམས་ཡོད་པ་ལས་བོད་རང་གི་དམ་པ་གོང་མ་བཀའ་དྲིན་ཅན་ཚོའི་གསུང་ཚིག་ཐ་ན་ཚིག་བཞི་ཙམ་གྱི་གནས་ལུགས་ཀྱང་བཤད་ཉེས་དང་འགྲེལ་ཉེས་ཀྱི་རྔ་མ་སྒྱིད་ཁུག་ནས་བུད་ཨེ་འཇོག་ལ་སྐྲག་ནི་མིན་ནམ་གང་ཡིན། ད་རུང་གྲྭ་བཙུན་ཚོས་སྙན་ངག་མི་ཤེས་པ་གླེང་ཚུལ་འདིས་ཐ་ན་ཁྱོད་ཀྱི་སྙན་ངག་ཞེས་པའི་མིང་ཚིག་འདི་ལའང་འགྲེལ་བ་སྟབས་བདེ་ཞིག་འཁྱོངས་ཀི་མེད་པའི་དན་རྟགས་ཤིག་དང་ཁྱོད་རང་ཉིད་ཀྱི་ངོ་གདོང་ལ་དྲི་མག་བསྐུས་མེད་ཀི་ནས། ད་རུང་ཧི་ཟིན་མཁན་མིང་བ་བླ་རྒན་ལྷམ་ཀོག་ལགས་ནས་ཀྱང་ཧི་གཟུགས་ནང་ཆེན་གྱི་སྒེའུ་ཁུང་ནས་ཁྱོད་ལ་ཡོ་གཟུར་གྱིས་བལྟ་རྒྱུ་ཞིག་ལོབས་ཡོད་པས་ད་ལྟ་སྒལ་རྣག་ཕྱིར་རུ་ལུད་པའི་ཁ་འབར་སྒྲོགས་ཀི་ཡོད་སྐད།
སྐུ་ཞབས་མེ་སྟག་དང་མི་རྒོད། ལྷམ་ཀོག་དང་མྱི་ཆེན་ལ་སོགས་ཧི་ཟིན་ཚང་གི་གྲལ་མགོ་ན་སྒམ་ཚིགས་དང་རྒྱ་སྟག་བཞིན་བརྐྱངས་ཤད་དུ་ཉལ་བ་ལས་ཟིན་བྲིས་ཀྱི་ཁ་དབུགས་འབག་གཙོག་གཙང་སེལ་དང་འདས་མ་ད་གསུམ་སྐྱེ་འཇིག་ཐད་དུ་གླེང་སློང་དང་ཐུགས་ཁུར་གྱི་སྐད་ཆ་བབ་ཆགས་པ་ཞིག་བཤད་ཨེ་མྱོང༌། ཟིན་ཐོ་འབྲི་བ་བོ་དང་ཀློག་པ་པོའི་རྩོམ་ཡིག་སྤུས་ཀ་གཟབ་ནན་ངང་ཞིབ་གཤེར་གྱི་སྨྱུག་རྩེ་རྣོ་པོ་དང་བཟང་ངན་གྱི་སྐད་ཆ་རེ་བཤད་དགོས་སྙམ་པའི་འགན་འཁྲི་ཞིག་ཀྱང་མེད་སོང་ན་ཧི་གཟུགས་ཚང་གིས་འབག་སྐུ་ལྟ་བུ་ཁྱོད་ཅག་ལ་གཟུང་གཞུག་རབ་གནས་མཛད་ཡོད་པ་མིན་ནམ།
ཟིན་བྲིས་ཀྱི་བརྡབ་བཤིག
གོ་ཐོས་ལྟར་ན་གཙོ་བོར་བཞག་ནས་ཡར་བསྟད་ན་གཙོད་སྒྱེ་དྲུད་ནས་མར་ལ་འགྲོ་མཁན་སེང་རྡོར་ལགས་ནས་ཕྱག་སྟོང་སྤྱན་སྟོང་གི་སྐྱེ་བ་བླངས་ནས་ཉེ་ལམ་བོད་ཧི་གཟུགས་ཟིན་བྲིས་ཀྱི་སྟོད་སྨད་བར་གསུམ་ན་ཁྱི་རྒན་ཧོན་ལོག་ཧད་ཧད་བྱེད་ཀྱིན་ཡོད་པ་ཞིག་ཐོས་པས་ཞོར་དུ་ཁོ་ལའང་ཚིག་འགའ་ཞུ་འདོད་ཡོད། ཁྲི་ཐོག་ནས་གདན་ཐོག་ཏུ་ཙོག་ཅིང་གྲྭ་ས་ནས་སྐྱ་སར་བབས་ཏེ་སྟོན་པ་ཤཱཀྱ་ཐུབ་པར་གཟི་ལོག་གིས་བལྟས་པ་ནང་བཞིན་ཧི་ཟིན་གྱི་མཁན་ཐོབ་གནས་སྐབས་ཙམ་དུ་རེག་པའི་ཕྱི་ནང་དུ་འབྲོག་པའི་ཁ་རྫུ་བཅའ་ཚུལ་ཞིག་ཡོད་པ་ལྟར་དུ་མཁན་ཐོབ་འདི་རེག་ཀྱང་འདོད་ཀི་མེད་ཚུལ་སོགས་གསོག་གསོབ་ཀྱི་སྐད་ཆའི་ཝུ་བ་རླུང་ལ་བསྐུར་བཞིན་སྒེར་ཚུགས་ཡོད་པའི་ཚུལ་འཆོས་འཁྱག་རོམ་གྱི་མཆོད་རྟེན་འདྲ་བོ་བཞེངས་ནས་ཡོད་ནའང་མེ་སྟག་དང་མི་རྒོད་སོགས་བག་མ་བག་རོགས་ཀྱི་ཚུལ་དུ་ཧི་ཟིན་ལ་ལག་བརྡ་གཏོང་ཁུལ་གྱི་ཕྱིར་བུད་དེ་ཞེན་ཆགས་ཀྱི་གད་པའི་ནང་དུ་ཡིབ་ཏེ་ཁྱོད་ལ་ཐུན་སྔགས་སྒྲུབ་པས་ད་བཟོད་ཁྱོད་ཀྱིས་ཡང་བསྐྱར་སྐྱེ་བ་སྔོན་མའི་རང་ཉིད་དྲན་དེ་ཧི་ཟིན་མཁན་ཐོབ་ནས་བབས་ཏེ་དོ་དམ་པ་དག་ལ་སྙད་འཚོལ་རྒྱུ་དེ་དྲན་ནས་<<ངས་ཟིན་ཐོ་ལེགས་ཤོས་དེ་དགག་གི་ཡིན།ཁྱོད་ཚོ་དོ་དམ་པར་ཨེ་སྐྲག་གི>>ལ་སོགས་པ་རང་སྣང་གང་དྲན་ཞིག་བཤད་ཀྱིན་ཡོད་མོད་དེ་ནི་ཁྱོད་ལ་མཚོན་ན་འཆི་ཁ་མའི་དབུགས་རྒྱུན་ལྷེམ་ལྷེམ་འདྲ་བོ་དེ་ཡིན་པ་ད་ལྟ་དངོས་སུ་ཤེས་ཡོང༌། ཧི་ཟིན་ནས་རྒྱང་ཕུད་དུ་བཏང་བའི་ན་ཟུག་གིས་སེང་རྡོར་དྲ་བའི་ངོ་གདོང་སྐྱ་བོ་ཞིག་བསྟན་བྱུང་བ་ནི་ད་དུང་གསོན་པའི་བརྡ་ཙམ་ཡིན་ལོས་ཆེ། ནམ་ཡང་ཧི་ཟིན་ཚང་ལ་སྤྲོ་བ་ཤི་བའི་ཁ་རྒྱག་རེ་བཤད་ཞོར་ཧི་ཟིན་ཚང་གི་གྲུ་ཕུག་ན་མིག་ཟུང་ཀེམ་ཀེམ་དང་ལག་གཉིས་སིག་སིག་གིས་སུ་དང་གང་གི་རྐུབ་འབྱོག་གིན་མེད་ལ། རྩམ་པ་རང་གིས་ཟོས་ཏེ་རྩམ་ཁུག་གཞན་གྱི་མགོ་ལ་བསྐོན་ཞེས་པའི་གདན་ཞུ་ཡི་གེ་འདིས་ཟི་ལིང་གི་ནག་ཚོགས་སྐོར་ཞིག་ལ་འཚོ་བའི་ཁ་སྣོན་རེ་རྒྱག་འདོད་པའི་སེམས་བསྐྱེད་རྒྱུད་ལ་སྐྱེས་ཡོད་པའང་ཤུགས་ལ་གོ་ཡོང་བས་གྲྭ་རྐྱང་གྲོགས་མེད་ང་ལྟ་བུ་ཚོ་ཤ་ཟིང་སྤུ་ཟིང་ལངས་སུ་བཅུག་འགྲོ ཁམས་ཕྱོགས་ཀྱི་སྔགས་རྒན་ཞིག་དང་འདྲ་བའི་དོ་དམ་པས་ཟིན་བྲིས་མཁན་པོར་བསྐོ་རྒྱུ་གཙོ་བོ་མ་རེད་ཞེས་ཉོབ་བརྫིས་པའི་རྗེན་ཐུག་སླ་ང་གང་དང་དོ་དམ་པའི་གསལ་བསྒྲགས་གལ་ཆེན་གྱི་ངར་གླུད་སྡེར་མ་གང་བསྐྱལ་ཞོར་འགུག་བཞུག་ལན་གཅིག་གིས་སྟེང་འོག་ལྷ་འདྲེ་ཐམས་ཅད་འཚང་ཁ་ཤིག་ཤིག་རུབ་ཡོང་ནས་ཁ་ལྡག་ལྕེ་ལྡག་བྱེད་ཚུལ་འདིའང་ཇི་འདྲའི་ཞེ་སྡུག་སྤྱད་ཅིག་རེད་ཨང༌། ཡང་གཅིག་བཤད་ན་ཧི་ཟིན་མཁན་ཐོབ་དེ་ནི་མིང་ཙམ་ཞིག་ཡིན་ཚུལ་གྱི་གསལ་བསྒྲགས་ཞིག་སྤེལ་དགོས་མི་འདུག་ཀྱང་བརྒྱ་དེ་འདྲ་ཡིན་ན་འདྲ་པར་དེ་དག་མར་གཡུགས་ཡར་འཇོག་དང་གསལ་བསྒྲགས་སྐྱུར་བོ་འདི་དྲ་ལྡོམ་ཚོའི་སྤྱི་ལ་བཞག་པའི་ཚེར་མ་འདོམ་གཞལ་དང་དྲ་འབུ་ཚོ་འཚུབ་ལོང་སེ་འཁོར་བྱེད་ཀྱི་ཁྱི་རོ་ཞིག་མ་རེད་ནས། དོ་དམ་པ་ལོ་བའི་ཁ་ཁས་ཡུན་རིང་ཞིག་ལ་དྲ་བར་དོ་དམ་ལེགས་པོ་བྱེད་མ་ཐུབ་ཚུལ་རེ་བཤད་ཀི་ཡོད་མོད་དོ་དམ་པ་ཡིན་ཟེར་མཁན་ཞིག་གིས་སྒེར་གཅོད་ཀྱིས་སྣོག་ལས་མང་པོ་དངོས་ཤུགས་གང་རུང་ན་རྒྱག་གིན་ཡོད་པའང་དོ་དམ་པས་དོ་དམ་པར་ཁ་ལབ་སློབ་གསོ་རེ་ཡོད་ན་བསམ་ཡོད། དེ་མིན་རྣམ་རྟོག་དགྲ་རུ་ལངས་ན་ཁང་སྟོང་རྐུན་མས་ཁེངས་འགྲོ་བའང་ཆོས་ཉིད་ཡིན་པས་དེ་ནི་བདག་གཞན་ཀུན་གྱི་སེམས་སུ་འཛིན་རོགས། ངོས་ནི་ཧི་ཟིན་གྱི་གནས་བབས་ཙམ་ཞིག་ལ་སེམས་ཁུར་བྱེད་ཀྱིན་མེད་ལ་སུ་ཞིག་གིས་ཆེད་དུ་ཁ་འཛིན་རོགས་དན་དེ་བས་ཀྱང་བྱེད་འདོད་མེད་པར་མི་བུ་རང་ཉིད་ནས་འགོ་རྩོམ་ཚུལ་དང་འབའ་རྒྱུགས་བདེན་དྲང་གིས་འཚོ་ཐབས་ལ་འབད་བཞིན་ཡོད་པས་དྲ་ལྡོམ་ཚོས་སྦོམ་བཤད་དང་ཀོ་ཆེས་པར་ང་རང་ད་ལྟ་ནས་དམུས་བྱུང་ཡོད། རྗེས་སོར་ང་ཚོ་སུ་དང་སུ་ཡིན་རུང་ཁེངས་རློམ་གཞན་བརྙས་དང་ཁག་དཀྲི་བསྙོན་འཛུགས་ཀྱི་ལས་ཀ་འདོར་ཅི་ཐུབ་བྱས་ཏེ་ཆུ་གྲམ་མཉམ་འཇགས་ཤིག་ཡོང་ན་མེ་ཏོག་མཉམ་བཞད་དང་མཁས་བརྒྱ་གླེང་གི་ཚུལ་དུ་བོད་ཀྱི་རིག་གནས་ཁོ་ནས་ཨ་མའི་ནུ་རིན་དང་མི་ཡུལ་ལ་ཟས་རིན་སྤྲད་ཆོག་ཅེས་ཁོ་བོས་སྨྲ་བར་སྤོབས།
བཀྲ་ཤིས་བདེ་ལེགས།
tashi delek
very good
བོད་ཕྲག་དོག་གིས་ཕུང་ཟེར་བ་ལྟར། ཕལ་ཆེར་ཕྲག་དོག་གིས་སྒོ་རྒྱབ་་པ་ཡིན་རྒྱུ་རེད་མ་གཏོགས་གལ་སྲིད། སྲིད་དོན་དང་འབྲེལ་བའི་ཟིན་བྲིས་དུས་ཀྱི་དབང་གིས་བསྲུབ་དགོས་ཀྱང་། ཟིན་བྲིས་ཡོངས་རྫོགས་སྒོ་རྒྱབ་པ་དེ་མ་འགྲིགས་པ་ཞིག་རེད་འདོད་ཀི