འབའ་སྲས།
མི་ནི་ཤིན་ཏུ་གླེན་པའི་སྲོག་ཆགས་ཤིག །
དེ་ལྟར་མིན་ན་ཤེས་བྱར་ཅི་ལ་སྦྱོང་།།
དུད་འགྲོ་དག་ནི་མི་ལས་མཁས་པ་སྟེ།།
གང་ལ་མ་སྦྱངས་རང་ཉིད་མཁས་པར་གྲུབ།།
དུད་འགྲོས་མི་ལ་སློབ་སྦྱོང་བྱས་མྱོང་མེད།།
མི་ཡིས་དུད་འགྲོ་སློབ་དཔོན་ཉིད་དུ་བསྟེན།།
མི་ཡི་འཁྲིག་སྤྱོད་ཁྱི་ཡིས་མི་སྤྱོད་མོད།།
ཁྱི་ཡི་སྤྱོད་པ་མི་ཡིས་སྤྱད་པ་མང་།།
རྟ་ནོར་ལུག་གསུམ་ཕྱི་དྲོར་ལྷས་རར་འཁོར།།
རང་ཉིད་ཉལ་ས་ཡིན་པའི་གནས་དེ་ཤེས།།
མི་རྣམས་མཚན་གུང་འཇབ་ཀྱིས་ཕྱི་ལ་འགྲོ །
ཁྱིམ་གྱི་བདེ་བ་དོར་བས་འཚོ་བ་ཉམས།།
མི་ཡི་གཟུགས་རིས་དུད་འགྲོས་མ་བྲིས་མོད།།
དུད་འགྲོའི་རི་མོ་མི་ཡིས་བྲིས་པ་མང་།།
དེ་ནི་མི་རྣམས་མཁས་པ་གཏན་མ་ཡིན།།
དུད་འགྲོའི་སྟེང་ན་སྦྱང་བྱ་མང་བས་ཡིན།།
དུད་འགྲོའི་འཚོ་བ་མ་རྩོལ་ལྷུན་གྱིས་གྲུབ།།
མི་ཡི་འཚོ་བ་དཀའ་སྡུག་བརྩོན་པས་ཐོབ།།
འདི་ཡང་མི་དང་དུད་འགྲོའི་ཁྱད་པར་གྱི།།
རྒྱུད་ན་ཡོན་ཏན་མང་བས་ཁྱད་པར་ཞིག །
སྦྲུལ་གྱི་ནུར་སྟངས་མི་ཡིས་མ་མཐོང་པར།།
མེ་འཁོར་བཟོ་བའི་རྣམ་དཔྱོད་མི་ལ་མེད།།
དེ་བཞིན་བྱ་དང་ཉ་ཡི་འགུལ་བསྐྱོད་ལས།།
གནམ་གྲུ་མཚོ་གྲུ་བཟོ་བ་མི་ཡིས་ཤེས།།
མདོར་ན་མི་ནི་ལུས་རྟེན་མཆོག་ཡིན་ཡང་།།
དུད་འགྲོ་རྣམས་དང་བསྡུར་ན་ཤིན་ཏུ་གླེན།།
ཁ་ལ་ཡུག་གིས་ཁང་བ་བཟོ་བའི་དུས།།
མི་རྣམས་ད་དུང་བྲག་ཁུང་ནང་དུ་གནས།།
དེ་བས་ཁྱི་དང་དུད་འགྲོ་འདབ་འཕུར་རྣམས།།
སྨྲ་ཤེས་དོན་གོ་རྣམས་ཀྱིས་སློབ་དཔོན་བསྟེན།།
མི་རྣམས་ཁེར་རྐྱང་ཉིད་དུ་བསྡད་པ་ན།།
སང་ཉིན་འཚོ་བ་དེ་ཡང་འཕྱང་མོ་ཉུག །
༡༦/༩༣/༡༤ ཕྱི་དྲོར།
འཇིག་རྟེན་འགོ་མཇུག་ལྡོག་པའི་ཕ་རོལ་ན།།
མི་ལས་དུད་འགྲོ་མཆོག་གི་ལྟ་ངན་མང་།།
མིག་མེད་མུན་ནག་ཁྲོད་ནས་སྐྱིད་སྣང་ཞིག།
གཟུགས་བརྙན་གསོན་པོར་མ་མཐོང་ཡིད་རེ་སྐྱོ།།
འཁྲུལ་སྣང་རྟོག་པས་བརྫུས་བའི་ཞིང་ཁམས་ཤིག།།
ཡོ་ལང་སྐྱིད་ལ་རོལ་བའི་ཚོར་བས་བཟི།།
གནས་ལུགས་གཏམ་གྱི་ཆོ་ལོ་གང་ཞིག་ན།།
རྨི་ལམ་མིག་ཡོར་འདྲ་བ་རྟོགས་སྲིད་དམ།།
མི་ཡི་ལུས་པོ་སྤྲེལ་ལ་ཡོད། །
མི་ཡི་སེམས་པ་ཁྱི་ལ་ཡོད། །
ཁྱི་སྤྲེལ་དུད་འགྲོར་མེད་པ་ནི། །
ཕན་ཚུན་ཤོད་པའི་སྐད་ཆ་ཙམ། །