འདབ་པ་ཚེ་དབང་མགོན་པོ།
སྤྱིར་མི་དམངས་དཀྱུས་མ་རྣམས་ཀྱིས་ངེས་པར་དུ་ཤེས་དགོས་པ་ཞིག་ལ། ཆོས་ལུགས་དང་། ཆབ་སྲིད་གཉིས་ལ་བརྡ་ཆད་སྐམ་པོའི་ཁྱད་པར་ཙམ་ལས། དོན་གྱི་ངོ་བོ་དང་། བྱེད་ལས་གཉིས་ལ་བཟང་ངན་དང་། ཡག་བཙོག་གི་ཁྱད་པར་གཏན་ནས་མེད་ལ། དང་པོ་དེ་ནི། མི་གཞན་གྱིས་ཁྱེད་ལ་སྤྲད་པའི་ངོ་རྟགས་མི་ཆོད་པའི་ལྐོག་གྱུར་གྱི་ཚུལ་དུ་གནས་པའི་ཀླད་པའི་ནང་གི་སྐྲན་ནད་གསོན་པོ་ཞིག་ཡིན་ལ། ན་ཚ་འདི་ཕོག་པ་ནས་བཟུང། ཁྱེད་ཀྱི་ཚེ་གང་བོའི་བླ་སྲོག་གཉིས་ཁ་འདི་ཡིས་རྩད་ནས་གཅོད་སྲིད།
དེ་བཞིན་ཆབ་སྲིད་ཅེས་པ་ཡང་། དགེ་རྒན་རྡུགས་པོ་ཞིག་གིས་བསླབས་པའི་རང་ཉིད་བསླུ་བྱེད་ཀྱི་སློབ་གསོ་ངན་པ་ཞིག་ཡིན་ལ། སློབ་གསོ་འདི་ཐོབ་རྗེས་རང་ཉིད་ཀྱི་མི་ཚེ་མཐའ་དག་ཁྱེད་རང་རང་གིས་མགོ་སྐོར་གཏང་སྲིད། དེའི་ཕྱིར་དཀའ་ངལ་འདི་གཉིས་ཀྱི་འོག་ཏུ་མ་ཚུད་པའི་གོང་ལ། ས་ཐག་རིང་ས་ཞིག་ཏུ་སོང་ན་མི་ཚེ་གཅིག་ལ་ཁྱེད་རང་གྱོང་གུན་རག་རྒྱུ་མེད་ས་ཞིག་ཏུ་བསླེབས་པ་ཡིན་ནོ།