མི་ཚེ་རྩེད་འཇོར་འཐིམ་པའི་བྱུང་བ།

བློ་བཟང་རིན་ཆེན།
 
ཞོགས་པའི་སྐྱ་རེངས་དམར་སེར་ཤར་མ་ཐག།
གམ་གྱི་གྲོགས་པོ་བཀྲ་ཤིས་གཉིད་ལས་སད།།
ཅི་ཞིག་བརླག་པ་ལྟ་བུའི་རྣམ་འགྱུར་ཁྲོད།།
སྔས་ཀྱི་ཁ་པར་དེ་ལ་འཕྲལ་དུ་བསྙབས།།

ཁ་པར་ངོགས་ལ་ཅུང་ཙམ་ཅེར་བས་ན།།
རང་ལ་རྒྱལ་ཁ་ཐོབ་པའི་ངང་ཚུལ་ལྟར།།
ང་རང་དགའ་སའི་ཚོགས་པ་རྒྱལ་སོང་ཞེས།།
ལག་གཉིས་ཁུ་ཚུར་བསྡམས་ནས་གནམ་ལ་བསྒྲེངས།།

དགའ་སྤྲོའི་ཚོར་འདུ་ཅུང་ཙམ་ལྷོད་པའི་སྐབས།།
ཁམས་ཚན་རྒན་གྱི་གོམ་སྒྲ་ཐོས་ཙ་ན།།
མིག་གིས་ཧྲིག་ཧྲིག་ཡར་མར་ལྟ་བཞིན་དུ།།
དཔེ་ཆ་སྐྱོར་བའི་ཁུར་གྱི་འཁྲབ་སྟོན་བྱས།།

དགེ་རྒན་གཟིགས་སྐོར་ཡོང་བའི་སྐབས་དག་ལ།།
ལག་ལ་རྩལ་དགུ་རྫོགས་པའི་གྲོགས་པོ་ཡིས།།
ཁ་པར་རྐུབ་ལ་འདེད་པའི་མགྱོགས་མྱུར་དེས།།
ངེས་མེད་ཁ་པར་རྩེ་བ་མཐོང་མྱོང་མེད།།

རྩོད་ཤུགས་རབ་ཏུ་ཆེ་བའི་ཆོས་གྲྭ་ནས།།
ན་མཉམ་གྲོགས་ཀྱི་རིག་པར་རྣོ་ངར་རྒྱས།།
ཁོང་གི་ཁ་ལ་སྨྲ་བའི་དབང་ཐོབ་སྟེ།།
ཆོས་གྲྭའི་དུས་སྐབས་ལབ་རྡོལ་ཁྲོད་ནས་ཟད།།

ཚ་གདུང་རབ་ཏུ་ཆེ་བའི་ཞིང་མཐའ་ནས།།
རང་དང་འདྲ་བའི་ན་མཉམ་ཚོགས་པ་ཞིག །
རྐང་རྩེད་སྤོ་ལོར་དགའ་བའི་སྤྲོ་སྣང་དེས།།
ཉི་མས་ངོ་གདོང་བསྲེག་པ་ཚོར་མ་མྱོང་།།

གྲྭ་རྐྱང་རྩེད་འཇོར་དགའ་བའི་གྲོགས་ཉིད་ལ།།
རྐང་རྩེད་འགྲན་སྡུར་ཁྲོད་ཀྱི་ཕམ་ཁ་དང་།།
ཁམས་ཚན་རྒན་ལ་བྱིན་པའི་ཆད་པ་ཡིས།།
སྒོར་ཁུག་སྟོང་པར་ཕུད་པའི་གཏམ་རྒྱུད་མང་།།

ལོ་ཟླ་རྒྱུན་ཆད་མེད་པར་བཞུད་པ་ན།།
དགེ་བཤེས་ཤིག་གི་ཆོ་ལོ་ཐོབ་ནས་བཟུང་།།
སྟོད་འགག་སེར་པོ་ལུས་ལ་མནབས་བཞིན་དུ།།
རྐང་རྩེད་སྤོ་ལོ་རྩེ་བའི་སྟབས་མ་བདེ།།

རྐང་རྩེད་སྤོ་ལོ་སློབ་སའི་གཞི་མ་རག །
ནང་བསྟན་གཞུང་ལུགས་འཆད་པའི་བློ་མ་རྒྱས།།
ཐ་སྙད་རིག་གནས་སྨྲ་བའི་ངག་མ་གྲོལ།།
མི་ཚེ་ཐུང་ཐུང་སྤོ་ལོའི་ཁྲོད་ནས་རྫོགས།།

སློབ་གླིང་འདི་ཡི་དགེ་མཚན་མ་ངེས་ཤིང་།།
རྩེད་འཇོ་མ་གཏོགས་རིག་པ་མི་སློབ་པའི།།
ང་དང་ང་འདྲའི་རབ་བྱུང་དཀྱུས་མ་དག །
བློས་བསླངས་བྱས་ཏེ་ཡི་གེའི་གཟུགས་སུ་ཕབ།།

མ་གཞི་རྩེད་མོ་ལ་དགའ་བ་ནི་སྐྱོན་ཆ་ཞིག་ག་ལ་ཡིན། ད་དུང་དུས་ཚོད་རན་པའི་ལུས་རྩལ་སྣ་ཚོགས་ཤིག་བརྩེས་ན་ལུས་པོའི་འཕྲོད་བསྟེན་དང་། སེམས་ཀྱི་ལོངས་སྤྱོད་ཅིག་ཡིན་པ་ནི་སུས་ཀྱང་བསྙོན་དུ་མེད་པའི་བདེན་པ་ཞིག་ཡིན། འོན་ཏེ་གོང་གི་རྩོམ་ཡིག་དེ་ནི་རྩེད་མོ་རྐྱང་རྐྱང་ལ་མགོ་འཁོར་ཏེ། རང་ཉིད་གང་ལ་གནས་པའི་ཆོས་གྲྭ་འདིའི་དགེ་མཚན་མ་རྙེད་པའི་ང་དང་ང་ལྟ་བུ་དག་བློས་བསླངས་བྱས་ནས་བྲིས་པའོ།།

2020/ 7/ 22 བློ་བཟང་རིན་ཆེན་གྱིས་བྲིས།