མི་འདྲ་འདྲའི་ཆག་སྒོ།

ཚེར་ནགས་རྡོ་རྗེ་རིན་ཆེན།

ངེད་ནས་ཉིན་ཤས་སྔོན་ལ་རྒྱ་གར་ནང་དངོས་བྱུང་གནས་ཚུལ་འཁྲབ་འཁྲིད་བྱས་པའི་གྱོད་གཞི་ཞིག་ལ་བལྟས་པ་ཡིན། ལྟད་མོ་དེ་རིགས་ཉིན་ལྟར་མཚན་མོའི་དུས་ཚོད་བཅུ་དང་ཕྱེད་ཀར་རྒྱ་གར་གྱི་བརྙན་འཕྲིན་ཚན་ཁག་ལཱེ་ཕྷུ་ཨོ་ཁེད་(Life Ok) དང་ཁིར་རིམ་ཕཱེ་ཊོལ་(Crime Patrol) གཉིས་སུ་སྟོན་བཞིན་འདུག མཚན་མོ་དེར་ལཱེ་ཕྷུ་ཨོ་ཁེད (LifeOk )ཞེས་པའི་བརྙན་འཕྲིན་ལས་རིམ་ནང་གྲོང་ཁྱེར་མུམ་བྷེ་རུ་ཤེས་ཡོན་མེད་པའི་སྐྱེས་དམན་ཞིག་གི་བཟའ་ཟླ་སྡོད་གནས་དང་ཁད་མི་རིང་བའི་ཆང་ཁང་ཞིག་གི་སྒོ་འགྲམ་དུ་ཁ་པར་གཏོང་སྐབས་གཞན་གྱིས་མེ་མདའ་བརྒྱབ་ནས་ལྐོག་གསོད་བྱས་པའི་དོན་རྐྱེན་སྐོར་རེད། སྙིང་རྗེ་ཡུལ་ཞིག་ལ་སྐྱེས་པ་དེར་བྱིས་པ་ལོ་ཆུང་ཞིག་དང་མ་རྒན་འཁོགས་ཤིག་ཀྱང་མཆིས། ས་གནས་ཉེན་རྟོག་པས་རྩད་ཞིབ་མཇུག་འབྲས་སྐྱེས་པ་དེ་ལོ་གཉིས་གོང་ཆང་ཁང་དེའི་ནང་ཡོང་མཁན་ཞིག་དང་། ཐེངས་འདིར་ཡང་ཆང་ཁང་དེའི་སྒོའི་འགྲམ་དུ་བསད་ཡོད་སྟབས། ཆང་ཁང་ནང་སྐྱོད་མཁན་རིགས་ལ་དེ་འདྲ་ཡོང་རྒྱུ་ཡིན་ཤག་བྱས་ཏེ་གྱོད་གཞི་དེ་ཡང་དེ་མུར་བཞག་པ་རེད། ཡིན་ནའང་ཤེས་ཡོན་མེད་པའི་སྐྱེས་དམན་དེས་རང་གི་སྐྱེས་པའི་གཤིས་སྤྱོད་ལ་རྒྱུས་མངའ་གཏིང་ཟབ་ཡོད་སྟབས། དོན་རྐྱེན་དེར་བསྐྱར་ཞིབ་བྱེད་རྒྱུར་ས་གནས་ཉེན་རྟོག་པར་རེ་བ་ཐེངས་ཤས་བཏོན་ཀྱང་ཉེན་རྟོག་པས་ཁོ་མོའི་རེ་འདུན་ལ་དོ་སྣང་གཏན་ནས་མ་བྱས། དེར་བརྟེན་སྐྱེས་པའི་ཨ་མ་ཡང་འུ་ཐུག་ནས་ཁོ་མོར་འདི་ལྟར་བཤད། ‘‘བུ་ནི་ཤི་ཚར། རྒྱབ་ལྗོངས་སྔོག་ནས་ཅི་ཕན། ད་ཁྱེད་ཀྱིས་མཚམས་འཇོག་གནང་རོགས།’’ ཞེས་ཤོད་དུས། ཁོ་མོ་སྤྱན་ཆབ་ལྷུང་བཞིན་པང་གི་བྱིས་པར་མཛུབ་མོར་ཀེར་ཏེ། ‘‘ངས་འདི་ལྟར་བྱེད་དགོས་དོན་ཚང་མ་རང་གི་བྱིས་པའི་ཆེད་ཡིན། བྱིས་པའི་མི་ཚེའི་འགན་འཁྲི་ང་ལ་ཡོད། བྱིས་པ་འདིས་ཅི་ཕྱིར་ཕ་ཉེས་མེད་ཡིན་བཞིན་ནག་ཉེས་ཅན་ཞིག་ཁས་ལེན་དགོས་པ་རེད།’’ཅེས་བཤད།
དོན་དངོས་བྱུང་རིམ་ལྟར་བྱས་ན། སྐྱེས་པ་དེ་གཉེན་མ་སྒྲིག་པའི་ལོ་གཉིས་གོང་ཆང་ཁང་དེ་ནང་སྐབས་རེར་ཕེབས་ནས་གྲོགས་པོ་ཚོ་དང་ལྷན་དུ་རྒྱན་རྩེད་ཀྱིན་ཡོད་པ་དང་། བུ་ལོན་ཡང་ཡོད་མཁན་ཞིག་རེད། ཁོ་བ་གཉེན་མ་སྒྲིག་པའི་ཉིན་ཤས་གོང་ཆང་ཁང་དེར་ཡོང་སྟེ། རང་གི་གྲོགས་པོ་ཚོར་མངར་ཟས་ལ་ཊོ་ (Ladoo) ཕུལ་ནས། ‘‘སླད་ཕྱིན་རྒྱན་པོ་རྩེད་དུ་ཡོང་རྒྱུ་མིན། མི་རིང་བར་གཉེན་སྒྲིག་སྟེ་རང་གི་མ་རྒན་དང་ཁྱིམ་ཚང་ལ་འགན་འཁྱེར་རྒྱུ་’’ཞེས་བཤད་པ་ནས་བཟུང་ཆང་ཁང་དེར་གཏན་ནས་ཡོང་མེད། འོ་ན་སྐྱེས་པ་དེ་ཤི་རྐྱེན་ངོ་མ་དེ་གང་ཡིན་ནམ། ‘‘མི་འདྲ་འདྲ་ཡོད་ན་དགོད་ཁ་སློང་། ། ཟོག་འདྲ་འདྲ་ཡོད་ན་ཁ་མཆུ་སློང་། ། ཞེས་པའི་དཔེ་ལྟར།’’ རབས་འདིར་སྐྱེས་པ་དེས་ལོ་གཉིས་སྔོན་ཆང་ཁང་ལ་འཇལ་རྒྱུའི་བུ་ལོན་ཞིག་སྟེར་ཆེད་དེར་ཡོང་། ཕྱིར་ལོག་པའི་ལམ་དུ་རང་གི་བཟའ་ཟླར་ཁ་པར་གཏོང་སྐབས་གཞན་གྱིས་མེ་མདའ་བརྒྱབ་ནས་དམར་གསོད་བྱས་པ་རེད། གོང་ནས བཤད་པ་ལྟར་སྐྱེས་པ་དེའི་ཆུང་མས་གྱོད་གཞི་དེར་ཉེན་རྟོག་པའི་སར་གྲུབ་འབྲས་མེད་པ་ཤེས་རྗེས། ཁོ་མོ་གཅིག་པོ་ཡར་རྒྱུག་མར་རྒྱུགས་ཀྱིས་འདྲི་རྩད་བྱས། འདྲི་རྩད་ཀྱི་བརྒྱུད་རིམ་ནང་ཁོ་མོར་རོགས་འདེགས་བྱེད་མཁན་བུད་མེད་ཅིག་དང་འཕྲད། དེ་ལས་ལྡོག་སྟེ་འཇིགས་སྣང་དང་། ཚེ་སྲོག་ལ་ཉེན་བརྡ་ཡང་ཐེངས་ཤས་བྱུང་། ཡིན་ནའང་ཁོ་མོས་བློ་ཐག་རྦད་ཆོད་ཀྱིས་འདྲི་རྩད་གོ་རིམ་བློས་གཏོང་གཏན་ནས་བྱས་མེད།
བསམ་ཡིད་ལས་འདས་པ་ཞིག་ལ། ཁོ་མོ་དང་ངོ་ཤེས་བུད་མེད་གཉིས་ཀྱིས་འདྲི་རྩད་ལས་དོན་གཉེར་བཞིན་པའི་སྐབས་ཤིག ཁོ་མོས་རང་གི་སྐྱེས་པ་མཐོང་ཞིང་། སྐྱེས་པའི་མཚན་ནས་བོས་ཏེ་རྗེས་འདེད་བཏང་། སྐབས་དེར་ལས་རོགས་བུད་མེད་དེ་ཡང་ཧང་སངས་ནས་ཁོ་མོའི་རྗེས་སུ་རྒྱུགས། ཁོ་ཚོ་གཅིག་རྗེས་གཅིག་གིས་དེད་ནས་མཐར་སྔ་མོའི་ཆང་ཁང་དེར་འཛོམས། སྐྱེས་པ་དེའི་ལོ་ནའི་བབ་དང་། གཟུགས་བྱད། ངོ་གདོང་། ཐ་ན་གྱོན་ཆས་གྱོན་སྟངས་སོགས་སྒོ་ཐམས་ཅད་ནས། འདས་གྲོངས་སུ་ཕྱིན་པའི་རང་གི་སྐྱེས་པ་དང་གཅིག་མཚུངས་ཡིན་སྟབས། དེ་ལུགས་ཉེན་རྟོག་པར་སྙན་སེང་ཞུས། ངང་ཚུལ་དེར་ཉེན་རྟོག་པ་ཡང་ཧ་ལས་ཤིང་། སྐྱེས་པ་དེའི་མཚན་དང་འདས་པའི་ལོ་རྒྱུས་ རྒྱབ་ལྗོངས་བཅས་འདྲི་རྟོག་བརྒྱུད་རིམ་ནང་། མི་འདིས་ཟླ་ཤས་གོང་ཆང་ཁང་དེར་རང་གི་ཁ་གཏད་ཅིག་དང་འཁྲུག་འཛིང་ཤོར་ཡོད་པའི་གནས་ཚུལ་ངོ་འཕྲོད་བྱུང་། ཉེན་རྟོག་ཚན་པས་མི་དེ་དང་འཁྲུག་འཛིང་ཤོར་མཁན་མི་དེ་བཙལ་ནས་འདྲི་རྟོག་སྐབས། ཁ་གཏད་པས་རང་ཉིད་དང་འཁྲུག་འཛིང་ཤོར་མཁན་དེ། ཆང་ཁང་དེའི་སྒོ་འགྲམ་དུ་ཁ་པར་གཏོང་སྐབས་ཤིག་ལ་མེ་མདའ་བརྒྱབ་ནས་བསད་པ་ཁས་ལེན་ཞུས། དངོས་སྒྲུང་མཇུག་རྫོགས་སོང་།
ཉེན་རྟོག་ཚན་པས་སྐྱེ་དམན་དེར་དགོངས་སེལ་ཞུས་པ་དང་། དངོས་བྱུང་གློག་བརྙན་མཚམས་སྦྱོར་བས་ཤེས་ཡོན་མེད་པའི་བུད་མེད་ཅིག་གིས་འདི་ལྟར། རང་གི་སྐྱེས་པར་དཀར་འདོན་བྱེད་ཐུབ་པ་དེ། ཧང་སང་དགོས་པའི་གནད་དོན་ཞིག་ཡིན་ཚུལ་གདེངས་འཇོག་གནང་། དེ་ནས་བཟུང་ཆང་ཁང་དེ་ཡང་གཏན་དུ་སྒོ་བརྒྱབ་སོང་།
ཀློག་མཁན་རྣམ་པ། དངོས་བྱུང་ལོ་རྒྱུས་འདིའི་ཁྲོད་སྤྲོ་སྣང་ཡོང་གཞི་གཙོ་བོ་དེ་ཤེས་ཡོན་མེད་པའི་བུད་མེད་ཅིག་གིས་རང་གི་འགན་འཁྲི་ཤེས་ཤིང་། དེའི་ཐད་རང་ཉིད་ཀྱིས་འགན་ཆ་ཚང་ཞིག་ཁུར་ཐུབ་པའི་བརྒྱུད་རིམ་དེ་རེད་ལ། དེ་དང་ཆབས་ཅིག་ཤེས་རྒྱུ་ཞིག་ལ། མི་འདྲ་འདྲ་ཡོད་ན་བཟང་ཉེས་གང་རུང་གི་རྗེས་སུ་འགྲོ་ལྡོག་བྱེད་སྲིད་པའི་ཆོས་ཉིད་ཅིག་ཡོད་པ་མིན་ནམ།