རྔ་བ་ཀུན་བཟང་།
ང་མི་ཡུལ་ན་འགྲོན་པོ་ཐེངས་གཅིག་ཡོང་བའི་མགོ་སྟོང་ལྡོམ་པོ་དེ་ཡིན། རང་མགོ་རང་གི་གཡོག་བཞིན། རང་རྐང་གཞན་གྱི་བལ་ཐག་ན་འཆིང་བའི་འཁོར་བའི་ཚ་མོ་ཡིན། ཚ་མོ་མགོ་ཀྱལ་མ་ཡིན། དར་དཀར་པོ་འདྲ་བའི་སྟག་རྒོད་དང་། སྤང་མེ་ཏོག་འདྲ་བའི་མཛེས་མ། དབྱར་དྲུག་པ་འདྲ་བའི་ཁ་མདོག་རེ་མཐོང་དུས། གཏམ་སྙན་པོ་ཁ་ཡིས་མ་བཤད་ཀྱང་། ཚིག་སྟོང་ཕྲག་འགའ་ཡི་དབྱངས་ལམ་ནས། མཚོ་སྔོན་མོའི་བཞུར་སྒྲ་ལྷུང་ལྷུང་བཞིན་གང་ས་ལ་གཡོས་དུས། སྐྱོ་སེམས་རླུང་ལ་བསྐུར་ནས་སྣང་བ་གླུ་རུ་ལེན་བཞིན་ཁ་བ་ལྷབ་ལྷུབ་བབས་བའི་མཚན་མོ་མྱུལ།
ང་མི་ཡུལ་ན་འགྲོན་པོ་ཐེངས་གཅིག་ཡོང་བའི་ཆང་འཐུང་བཟི་བོ་དེ་ཡིན།བཟི་ཁྱོམ་ཁྱོམ་ངང་མཐོང་བའི་མི་ཡུལ་འདི་ངའི་བཅོ་ལྔའི་ཟླ་བ་ལ་དཔེ་བཞག་ན་འདོད་གི། སྐྱ་གསལ་ལེ་གནམ་མཁའ་ལངས་དུས། ཟླ་འོད་ཡོད་ཀྱང་འོད་མདངས་ཀྱི་ཁ་མདོག་མེད་ནོ་ཅི་རེད། མི་དེ་དག་རྫ་མགོ་ཁ་བ་ལ་དཔེ་བཞག་ན་འདོད་གི། དབྱར་དྲུག་པའི་་མེ་ཏོག་ཤར་དུས། གངས་དཀར་པོ་འདུག་ས་མེད་ནོ་ཅི་རེད། ང་བཟི་འཐོམ་
འཐོམ་དུ་རྒྱུ་གྱུར་ནས། མགོ་ཡོམ་ཡོམ་བྱེད་དུས།ཧམ་སེམས་ཀྱི་མེ་ལྕེ་འབར་ནས་རྨོངས་སེམས་ལ་རྡོག་རྒྱག་བྱེད་དུས། ཀུན་གསལ་གྱི་ཟླ་བའི་བས་ང་ལ་ཁང་རའི་ཟུར་མདའ་ག་ཙམ་འཕེན།
ང་མི་ཡུལ་ནས་འགྲོན་པོ་ཐེངས་གཅིག་ཡོང་བའི་འབྲོག་མོ་ཁེར་རྐྱང་མ་དེ་ཡིན། རྫ་མཐོན་པོ་སྨུག་པས་གཡོག་དུས་མཁོ་འཁོར་མ་དེ་ཡིན། རྟ་ནོར་ལུག་རི་ལ་འཚོལ་དུས་གཉིད་ཀྱལ་མ་དེ་ཡིན། མི་སེམས་མི་ལ་འདྲེས་དུས་སེམས་ཆུང་སྡེ་བའི་གནས་འགྲོ་མ་ཞིག་ཡིན། དམ་ཚིག་མདུན་པ་ལྷོད་དུས་ནགས་ཚུལ་ཁྲོད་ཀྱི་སྟག་རྒོད་མ་ཞིག་ཡིན། ཡིད་ཆེས་སེམས་ན་ཡོད་དུས་འབྲོག་མོ་ལྷ་མོ་འདྲ་ཞིག་ཡིན། བརྩེ་སེམས་རླུང་ལ་ཁུར་དུས་འདྲེ་མོ་མི་ཤ་ཟ་མཁན་འདྲ་ཞིག་ཡིན། གང་ལྟར། ཆེ་ཡང་ཆེ་རྒྱུ་མེད་ལ། ཆུང་ཡང་ཆུང་རྒྱུ་མེད་པའི་གནས་འདི་ན་འགྲོན་པོ་ཐེངས་ཡོང་བ་རི་བོ་རྩེ་ལྔ་ནས་མར་ལྟ་བ་དང་ཆ་འདྲ་རེད། ཧ་ཅང་ཡངས་ལ་ཧ་ཅང་མཚར།
20/1/2022