གོང་གི་པར་འདིའི་ཡོང་ཁུངས་བོད་ནང་གི་རྩོམ་པ་པོ་ག་གེ་མོ་ཞིག་གི་ཟིན་བྲིས་ཡིན། འདི་ནི་དེང་སྐབས་ལྷ་སའི་གྲོང་ཁྱེར་ནང་གི་མི་རིགས་དབྱེ་འབྱེད་བྱེད་ཀྱིན་པའི་དཔང་རྟགས་རི་འདྲ་བོ་ཞིག་ཡིན་ན། སྐུ་ཉིད་ལ་འདིའི་ཐད་བསམ་ཚུལ་ཅི་འདྲ་འདུག་གམ། ནང་དོན་ནི་བོད་པ་ལས་ཀ་བ་ཚོར་ཉིན་རེར་ལས་གླ་རྒྱ་སྒོར་ ༣༠ དང་རྒྱ་མི་ལས་ཀ་བ་ཚོར་ཉིན་རེར་ལས་གླ་རྒྱ་སྒོར་ ༥༠ རེ་ཡིན་ཞེས་བྲིས་འདུག
བོད་ནང་ལ་རྒྱུན་སྡོད་བྱེད་མཁན་གྱི་བོད་པ་ཞིག་ལ་ཆ་མཚོན་ན་གནས་ཚུལ་དེ་རྩ་བ་ནས་ཐབས་སྡུག་མ་རེད། ཚོང་བའི་བདག་པོ་དེས་བོད་པར་བསམ་གཞིགས་བྱས་ནས་སྒོར་༣༠་སྤྲོད་ཀྱི་ཡིན་ཟེར་སྟབས་ཁོང་མི་སྡུག་པ་མ་རེད།
དེ་མིན་ལྷ་སར་བོད་མིར་མཐོང་ཆུང་བྱེད་མཁན་གཙོ་བོ་དེ་ཚོ་བོད་པ་རེད་འདུག དཔེར་ན། བོད་པའི་ནང་ལ་ཤིང་ཆས་ཞིག་བཟོ་དགོས་ན་རྒྱ་མིའི་ཤིང་བཟོ་བ་གདན་འདྲེན་ཞུ་བ་ལས་བོད་པའི་ཤིང་བཟོ་བ་སྐད་གཏོང་བའི་སྲོལ་མིན་འདུག བོད་པའི་ཁང་པ་རྒྱག་མཁན་མང་ཆེ་པ་རྒྱ་མི་རེད། བོད་པ་ཚོས་བོད་པར་མཐོང་ཆུང་བྱས་ནས་རྩ་བ་ནས་བོད་པར་ལས་ཀ་སྤྲོད་ཀྱི་མེད།
ངས་བལྟས་ན་རྒྱ་མིའི་ཚོང་པ་དེ་བོད་པར་ཤ་ཚ་ཏོག་ཙམ་ཡོད་མཁན་ཞིག་རེད་འདུག བྱས་ཙང་དེ་ལ་མི་དགའ་བ་མ་བྱེད་རོགས། ཁོས་སྡུག་ཤོས་བོད་པར་ལས་ཀ་ཞིག་དང་དངུལ་སྤྲོད་ཀྱི་ཡོད། དེ་མིན་བོད་པ་མང་ཆེ་བས་བོད་པར་ལས་ཀ་རྩ་བ་ནས་སྤྲོད་ཀྱི་མེད། ཁོང་ཚོར་ཁྱོད་ག་རེ་ཤོད་རྩིས་ཡོད། ངས་དཔེ་ཞིག་ཤོད་རྒྱུར། ལྷ་སར་བོད་པ་ཁྱིམ་ཚང་མང་ཆེ་བའི་ནང་ལ་བུ་རྫི་བ་ཉར་ཡོད། དེ་ཚོར་ཟླ་བ་གཅིག་ལ་སྒོར་༡༠༠ལས་སྤྲོད་ཀྱི་མེད། ད་དུང་ཉེས་བརྡུང་དང་ཐུབ་ཚོད་མང་པོ་མྱོང་དགོས། རྒྱ་མི་དེས་ཉིན་གཅིག་ལ་སྒོར་༣༠་སྤྲོད་སྟབས་ཟླ་བ་གཅིག་ལ་སྒོར་༩༠༠རེད། བོད་པ་ཉམས་ཐག་པ་ཚོར་མཚོན་ན་རྒྱ་རིགས་དེར་དགའ་མོས་བྱ་ཡུལ་རེད།
འདི་ངས་སྔོན་མ་ཞིག་ནས་ག་ཤེད་ཅིག་ཏུ་མཐོང་བྱུང་། མི་རིགས་དབྱེ་འབྱེད་ཀྱི་དཔང་རྟགས་གཞན་མང་པོ་ལས་སླ་པོར་རྙེད་ཐུབ། དཔེ་བཞག་ན། འགེངས་ཤོག་དང་ལག་ཁྱེར་སོགས་གཞུང་གི་ཡིག་ཆ་ཕལ་ཆེ་བའི་ནང་། མི་རིགས་གང་ཡིན་འབྲི་དགོས་པ་དེ་ཡང་མི་རིགས་དབྱེ་འབྱེད་རེད། ཁེ་ན་ཌ་ལྟ་བུར་མཚོན་ན། གལ་སྲིད་མི་ཞིག་ལས་ཀ་འཚོལ་ཏུ་ཕྱིན་ན། སྦྱིན་བདག་གིས་ཁྱེད་རང་རྒྱལ་ཁབ་གང་ནས་ཡིན་ཞེས་དྲིས་ན་དེ་ནི་ཁྲིམས་འགལ་དང་མི་རིགས་དབྱེ་འབྱེད་ཡིན་པ་རེད། ཁྱེད་རང་གིས་སྐད་གང་ཤོད་ཀྱི་ཡོད་ཅེས་དྲིས་ན་ཁྲིམས་མཐུན་རེད།
ལོ་ཤས་ཀྱི་སྔོན། ངས་རྒྱལ་སྤྱིའི་བོད་དོན་ལས་འགུལ་ཁང་ནས་ལས་མི་ཞིག་དགོས་པའི་ཁྱབ་བསྒྲགས་ཤིག་མཐོང་བར་དེའི་ནང་བོད་མི་ཞིག་དགོས་ཞེས་བཀོད་འདུག དེ་ངས་ཡག་པོ་མཐོང་མ་སོང་། མི་རིགས་དབྱེ་འབྱེད་རེད། བོད་ཡིག་བོད་སྐད་ཤེས་པ་དང་བོད་ཀྱི་གནས་སྟངས་ཤེས་པ་ལྟ་བུའི་ཚང་དགོས་པའི་ཆ་རྐྱེན་བཀོད་པ་ཡིན་ན་ལན་པོར་མཐོང་། འབབ་ས་དེ་ཕལ་ཆེར་བོད་མི་ཞིག་གི་ཐོག་ཏུ་འབབ་རྒྱུ་ཡིན་པས་དེ་ལ་ཁྱད་པར་མེད་པ་ལྟ་བུར་མཐོང་སྲིད་ཀྱང་ཁྲིམས་ཐོག་ནས་དེ་ལ་ཁྱད་པར་ཞིག་ཡོད་པ་འདྲ།
ག་གེ་མོ་དང་ཆེ་གེ་མོ།
འདིར་རྩོམ་པ་པོ་ག་གེ་མོ་ཞེས་བྲིས་འདུག ངས་གོ་ཐོས་ལ་གང་ཟག་ལ་ཆེ་གེ་མོ་འབྲི་ཞིང་། ས་ཆ་ལ་ག་གེ་མོ་འབྲི་ཞེས་གསུངས། དོན་ཆུང་འདི་དག་ལ་ཡང་ཐུགས་སྣང་གནང་དགོས་རྒྱུ་འདུག་སྙམ། དེང་སང་ཡོངས་གྲགས་ཀྱི་དབྱིན་བོད་ཚིག་མཛོད་ཅིག་ཏུ་ ག་གེ་མོ་ཞེས་པ་ནི་བོད་ནང་གི་ས་ཆ་ཞིག་རེད་ཅེས་བྲིས་འདུག དེ་ཙམ་ཡིན།