གཞུང་པ་ཚེ་དབང་བསོད་ནམས།
ཕྱི་སྣོད་ཀྱིས་འཇིག་རྟེན་གྱི་ས་གཞི་འདི་ཆགས་པ་ནས་ནང་བཅུད་ཀྱི་སྲོག་ཆགས་འགྲོ་བ་མི་དང་། བདག་ཡོད་དང་བདག་མེད་དུད་འགྲོ་སེམས་ཅན། རི་དགས་གཅན་གཟན། བྱ་བྱེའུ་དང་འབུ་སྲིན་ལ་སོགས་འཇིག་རྟེན་གྱི་ས་གཞི་ལ་བསྟེན་པའི་སྲོག་ཆགས་གྲངས་ལས་འདས་པ་སྐྱེས་འཕེལ་བྱུང་བའི་ནང་ནས་སྨྲ་ཤེས་དོན་གོ་བ་མི་གི་སྤྱི་ཚོགས་ལའང་མི་རིགས་དང་། རིག་རུས། ཤ་མདོག་དང་། སྐད་ཡིག རིག་གཞུང་སོགས་ཁྱད་ཆོས་མ་འདྲ་བའི་མི་རིགས་གྲངས་མང་ཡོད་པ་ནས་མི་རིགས་སོ་སོར་འཇིག་རྟེན་བཀོད་པ་པོའི་སྦྱིན་པའི་མི་རིགས་སོ་སོར་དབང་བའི་ས་ཆ་དང་། མི་རིགས་སོ་སོའི་སྐད། སྐད་ཀྱི་སྒྲ་གདངས་ལ་བརྟེན་པའི་ཡིག་གེ་དང་། སྐད་ཡིག་བརྒྱུད་ནས་དར་བའི་ཆས་གོས་དང་། འགྲོ་སྡོད་སྤྱོད་གསུམ་ལ་བརྟེན་པའི་ཡ་རབས་བཟང་སྤྱོད་དང་། ཡ་རབས་བཟང་སྤྱོད་གོང་འཕེལ་གཏོང་རྒྱུར་ཆོས་དཀོན་མཆོག་གི་ལམ་སྟོ་་འོག་ནས་གཞན་ཕན་གྱི་བྱ་བ་སྒྲུབ་རྒྱུ་དང་རང་དོན་ཞོར་ལ་འགྲུབ་པ་སོགས་མི་རིགས་གསོན་གནས་ཐུབ་པ་ལ་མི་རིགས་དེའི་སྐད་དང་ཡིག་གེ་རིག་གཞུང་དང་བཅས་པ་གསོན་གནས་ཐུབ་དགོས་པ་ནས་མི་རིགས་སྲུང་སྐྱོབས་ཀྱིས་ལས་འགུལ་དེ་སྐད་ཡིག་དང་རིག་གཞུང་སྲུང་སྐྱོབས་ཀྱིས་ལས་འགུལ་གྱིས་སྔོན་དུ་ཕྱིན་ནས་མི་རིགས་དེའི་སྐད་ཡིག་དང་རིག་གཞུང་སྲུང་སྐྱོབས་དགོས་པ་ལས་མི་རིགས་དེ་ཤིང་ནགས་དཀྱིལ་ལ་བྱ་སྤུ་རི་ལ་ཐོར་བ་ནང་བཞིན་དུ་ཐོར་ནས་བསྡད་ནས་མི་རིགས་དེའི་མཐུན་མོང་མ་ཡིན་པའི་སྐད་ཡིག་དང་རིག་གཞུང་སྲུང་སྐྱོབས་ཟེར་བའི་ཁ་གཡང་ཆེན་པོའི་གཏམ་དེ་དུས་ནམ་ཡང་དོན་ལ་གནས་མི་ཐུབ་པ་དང་། ང་ཚོ་བོད་པ་ནི་ཐོག་མ་ཉིད་ནས་ས་རྒྱ་ཆེ་ལ་མི་འབོར་ཉུང་བའི་མི་གི་སྤྱི་ཚོགས་ཧི་མ་ལ་ཡིས་གངས་རིའི་ཁྲོད་དུ་ཕ་སྤྲེའུ་བྱང་ཆུབ་སེམས་པ་འཕགས་པ་སྤྱན་རས་གཟིགས་ཀྱི་རྣམ་སྤྲུལ་དང་མ་བྲག་སྲིན་མོ་རྗེ་བཙུན་འཕགས་མ་སྒྲོལ་མའི་རྣམ་སྤྲུལ་གཉིས་འདུས་པ་ལས་འཕེལ་བའི་བོད་ཀྱི་མིའུ་གདུང་དྲུག་ལས་བོད་མི་ས་ཡ་དྲུག་འཕེལ་བ་ནས་ད་ལྟའི་དུས་སུ་བོད་མི་གཞིས་བྱེས་གཉིས་སུ་གནས་ཡོད་པ་འདི་ཡང་ང་ཚོ་བཙན་བྱོལ་ནང་ཡོད་པའི་བོད་མི་ཚོ་ས་གནས་གཅིག་ཏུ་མཉམ་འདུས་མེད་པ་ལུང་པ་མང་པོའི་ནང་ཁ་ཐོར་ནས་གཞན་གྱིས་སྐད་ཡིག་དང་ལམ་ལུགས་སམ་གོམས་གཤིས་འོག་ཁྱིམ་ཚང་སྒེར་གྱི་འཚོ་བ་བསྐྱེལ་བཞིན་པ་དང་། བོད་ནང་ཡོད་པའི་བོད་མི་ཚོ་རྒྱ་མིའི་བཙན་འོག་ཏུ་ཚུད་ནས་སོ་སོའི་ཕ་མེས་ནས་དར་བའི་སྐད་ཡིག་དང་ལེགས་སྦྱང་ཆས་གོས་གོམས་གཤིས་སོགས་ལ་བདག་དབང་སྤུ་ཙམ་མེད་པ་གཞན་དབང་སྟབས་བསྟུན་འོག་ཁྱིམ་ཚང་གི་འཚོ་བ་ལ་འགན་སྲུང་བྱ་དགོས་པའི་སྐབས་འདིར་ང་ཚོའི་ཕ་མེས་ནས་དར་བའི་བོད་མིའི་མཐུན་མོང་མ་ཡིན་པའི་སྐད་ཡིག་དང་རིག་གཞུང་བཟང་པོ་དེ་དག་མུ་མཐུད་གནས་དགོོས་ན་རིག་གཞུང་སྲུང་སྐྱོབས་ཀྱིས་ལས་གཞིའི་སྔོན་དུ་མི་རིགས་སྲུང་སྐྱོབས་ཀྱིས་ལས་འཆར་དེ་སྔོན་ཐོན་བྱས་ནས་སྤེལ་དགོས་པ་དེ་བརྒྱ་འགྱུར་སྟོང་འགྱུར་གྱི་གལ་ཆེའི་ནང་གི་གལ་ཆེན་ཞིག་ཡིན་པའི་ངོས་འཛིན་ཞུ་གི་ཡོད། མི་རིགས་ཞིག་རྒྱལ་ཁབ་མང་པོའི་ནང་ཁ་ཐོར་ནས་ཁང་པའི་ཞ་ལའི་སྟེང་སྲན་མ་གཏོར་བ་ནང་བཞིན་དང་ཤིང་ནགས་ནང་བྱ་སྤུ་ཐོར་པ་ནང་བཞིན་བྱས་ནས་ཁ་ཐོར་ནས་བསྡད་ནས་མི་རིགས་དེའི་མཐུན་མོང་མ་ཡིན་པའི་སྐད་ཡིག་རིག་གཞུང་ལ་སྲུང་སྐྱོབས་བྱ་རྒྱུ་ཟེར་བའི་གཏམ་དེ་དོན་དངོས་ལག་ལེན་དུ་འཁེལ་རྒྱུ་མེད་པ་ལྷ་སྒྲུང་ལྟ་བུ་མ་རེད་དམ།