བཀྲ་ཤིས་དོན་འགྲུབ།
གྲིབ་མ་ནག་པོས་མདུན་ནས་མདུན་དུ་བསུ།།
རྐང་རྗེས་རབ་རིབ་རྒྱབ་ནས་རྒྱབ་ཏུ་ལུས།།
བུ་ཡུག་འཚུབ་མས་སྡང་བའི་དགུན་གཞུང་ལ།།
མི་རྐྱང་ལམ་ལ་ཆས་པའི་གཏམ་རྒྱུད་ཡོད།།
སྨུག་པའི་རྒྱ་མཚོ་འཁྱིལ་བའི་ཕ་མཐའ་ནས།།
མེ་ཏོག་ཞིང་ཁམས་བསྐྲུན་པའི་རྨི་ལམ་གྱིས།།
སྣོད་བཅུད་དབྱངས་སུ་བསྐྱིལ་བའི་བློས་བསླངས་འདི།།
ཐག་རིང་ཐག་རིང་བརྒལ་བའི་ལམ་རྒྱག་ཡིན།།
རྒྱང་བཞུད་སྤྲིན་པ་དཀར་པོའི་འགུལ་སྟབས་ལ།།
རེ་བའི་ཡིག་ཆུང་བསྐུར་བར་གྲངས་ཤིག་མེད།།
སྲོད་དང་ཐོ་རངས་ཤར་བའི་དུས་ཚིགས་ལ།།
འགྲུལ་པས་བགྲོད་མཚམས་བཞག་པའི་སྐབས་ཤིག་མེད།།
མུན་པའི་ཡོལ་རས་ནག་པོའི་ལྟག་རྒྱབ་ན།།
འོད་ཀྱི་མཛེས་པ་འཕྲོག་པའི་ལྐོག་བྱུས་ཡོད།།
ཟླ་བའི་ཟེར་ལ་ཆགས་པའི་སེམས་པ་འདིས།།
སུ་ཡི་གསང་བ་ལྷང་ལ་ཕུད་ཡོད་དམ།།
སྙིང་གི་འཕར་ལྡིང་རླབས་ཀྱི་འགྲོས་ལ་འཁྲིལ།།
སྡུག་གི་རྒྱ་མཚོ་འཁྱོམ་པའི་བར་གླགས་ནས།།
གདུང་བའི་ཆར་པ་སེམས་སུ་བབས་པ་ཡང་།།
བརྩེ་དུང་མིག་ཆུའི་བཞུར་སྟངས་གཞན་ཞིག་ཡིན།།
ཀྱག་ཀྱོག་བརྒྱུད་ལམ་བཟུང་བའི་གཙང་ཆེན་དེ།།
མི་རྐྱང་ལམ་ལ་ཆས་པའི་རི་མོ་ཡིན།།
སེམས་ཀྱི་རི་བོ་བརྒལ་བའི་རྗེས་ཐོགས་ན།།
ལྗང་མདོག་རྦ་རླབས་གཡུགས་པའི་མཛེས་ལྗོངས་ཡོད།།
ང་ཡང་འདི་འདྲ་ཞིག་འབྲི་སྙིང་འདོད།
སེམས་ཀྱི་གསང་བ་མ་གློད་གཏིང་ལ་སྦས་ནས།།
གདོང་ལ་བཅོས་མའི་ཛུ་བག་ནན་གྱིས་གཏོད་ཀྱང་།།
སྙིང་ལ་སིམ་པའི་ལྷན་སྐྱེས་ཚོར་བ་རྣོན་པོ།།
མིག་དང་སྨྲ་ལྕེའི་ཟུར་ནས་ཡང་ཡང་ཐལ་གྱི།།
འགྲུལ་བཞུད་ཀྱི་གྲོགས་དང་ནོར།
སྔར་ལས་དཀར་ནག་འཁྱེར་ནས་ཡོང་བའི་དུས། །
གཅིག་བུར་སྐྱེས་པ་གཅིག་བུར་འགྲོ་རྒྱུ་རེད། །
ཕྱི་ལས་་དཀར་ནག་བསགས་ནས་འགྲོ་བའི་དུས། །
ལག་སྟོང་སྐྱེས་ནས་ལག་སྟོང་འགྲོ་རྒྱུ་རེད། །