བསོད་ནམས་ནོར་བུ།
—–སེམས་ཀྱི་ཚོར་བ་ཚིག་གི་སྐུད་པར་བརྒྱུས།
དོན་ཡོད་དོན་མེད་བསམ་བློའི་ཁྱད་པར་ཙམ།།
སྙན་དང་མི་སྙན་སོ་སོའི་མྱོང་རོལ་ཙམ།།
དགའ་དང་མི་དགའ་རང་གི་འཛིན་སྟངས་ཙམ།།
བསམས་ན་ཐམས་ཅད་རང་ལ་ཐུག་པར་འདོད།།
ཁོ་བོའི་སེམས་པ་གྲོགས་ཀྱི་འཚོ་བར་དུང་།།
གྲོགས་པོའི་ཐུགས་བློ་མཛེས་མའི་མདངས་ལ་ཤོར།།
ཕར་སེམས་ཚུར་ཡོང་མེད་པའི་བརྔན་པ་འདིས།།
འཁྱམ་པོའི་སྙིང་ཤ་དུམ་བུ་དགུ་རུ་གས།།
གནམ་ལ་བལྟས་ན་ཉི་ཟླ་མཉམ་འགྲོ་རེད།།
ས་ལ་སོང་ན་རི་ཆུ་ལྷན་འཛོམས་རེད།།
གྲོགས་དང་ཐུག་ན་རྡོག་སྒྲ་ཆ་འགྲིག་རེད།།
འདི་དག་བསམས་ན་ང་རང་ཁེར་རྐྱང་རེད་།།
སེམས་འདི་ངོ་མ་ལ་ཁའི་དར་ལྕོག་འདྲ།།
ཀུན་རྟོག་རླུང་བུས་བརྡབས་ལ་གྲངས་ཀ་མེད།།
མི་རྐྱང་ལུས་འདི་སྲང་མདོའི་གད་སྙིགས་འདྲ།།
ད་ལྟ་བོར་ཡང་སུ་ཡིས་མིག་གཡུགས་བྱེད།།
བསམས་ན་མི་ཚེར་དོན་སྙིང་མ་མཆིས་མོད།།
གཟན་སྣེ་རླུང་གིས་སྤུར་བའི་གྲོང་མདོ་ནས།།
རང་གི་རྡོག་སྒྲ་རང་གིས་རྣ་བར་གཏད།།
ཀྱག་ཀྱོག་འཚོ་བའི་ལམ་འཕྲང་བརྒལ་བཞིན་འགྲོ།།
འཛུམ་ཤོར་གདོང་ལ་འཛུམ་དཀར་མི་འདུག་སྟེ།།
སེམས་དཀར་གྲོགས་ལ་སེམས་ཀྱིས་ཞབས་འདེགས་ཞུ།།
མིག་ནས་མིག་ཆུ་རྫོགས་པའི་སྐྱོ་བ་འདི།།
བཤད་ན་གྲོགས་ཀྱང་ཡིད་ཆེས་མི་འོང་སྙམ།།
༡༥/ ༢/ ༢༠༡༣/བལ་ཡུལ་G cafe ནས།
སྙན་པོ་རེད།
དགེ་ཆོས་ཀྱི་རྩོམ་ཉམས་བསླེབ་ལ་ཁད་ཟིག་རེད།
ཤི་རེ་བྱོས།
ཚིགས་བཅད་འདི་འདྲ་བ་ཞིག་གི་ལམ་ནས་བྲིས་ན། སྙན་པོ་ཡོད་ལ། བོད་སྐད་ཡང་ཡིན། དེ་མིན་མིང་ཚིག་འདྲ་མིན་ཅོ་བརྒྱད་བཙན་སྒྲིག་གི་ལམ་ནས་ཚིགས་བཅད་འབྲི་བ་ནི་བོད་སྐད་དང་བརྡ་སྤྲོད་ལ་རྡབ་སྐྱོན་གཏོང་སྤྱད་རང་རེད། དེ་ལས་ཕར་ལ་བོད་སྐད་གཙང་མ་ཞིག་བྲིས་ནས་གོ་བརྡ་མ་ནོར་བ་ཞིག་བསྟན་ན་སྐྱིད་པ་ཨ།