བཀྲ་ཤིས་དོན་འགྲུབ།
གཡོ་འགུལ་མེད་པའི་ལོ་མ་ལྗང་གུ་དེ།།
རླུང་བུའི་འགྱུ་སྟངས་ཤིག་གིས་ཟ་བཞིན་འདུག།
ཁ་དོག་སྣ་ལྔའི་དར་ཚོན་མཛེས་པོ་སྟེ།།
ཉི་འོད་གཙུབ་པོ་འདི་ཡི་མཉེ་བྱ་ཡིན།།
གར་སྟེགས་ལྡིར་བའི་རོལ་མོའི་ཆོམ་སྒྲ་འདི།།
ཅང་མེད་སྟོང་པའི་དབྱིངས་སུ་ཡལ་བཞིན་འདུག།
གཤོག་འགྱུ་རྒོད་པའི་དར་ལྕེའི་ཕེག་སྒྲ་དེ།།
དུས་ཚོད་སྐྱ་བོ་ཞིག་གིས་འདེད་དེ་འགྲོ།།
ཟློས་གར་རྙིང་པ་ཞིག་གི་སྣང་ཡན་དེ།།
སྨིག་སྒྱུའི་འཚུབ་མ་ཞིག་གིས་ཁྱེར་ལ་ཕྱོགས།།
རང་བཙན་ནོར་བུ་ལེན་པར་ཆས་མཁན་འགའ། །སྲིན་པོའི་མཆེ་སྡེར་འོག་ཏུ་འདུག་འདོད་ཆེ། །ལོ་བརྒྱད་དམར་པོའི་འོག་ཏུ་མྱངས་པའི་རོ། །ཕྱི་གླིང་གྱ་གྱུའི་བྲོ་བས་བཅོམ་ཏེ་ཡལ། །
སྐད་ཅིག་མའི་ཆོས་ནི། མི་རྟག་པའི་མཚན་ཉིད་དོ། །