ཁ་བའི་རྣམ་ཤེས།
རྨད་བྱུང་ངོ་མཚར་ལྟ་ན་སྡུག་པའི་གྲུ་འཛིན་ཞིང་གི་བཀོད་པ་བཤམས།།
གངས་རིའི་མགོན་པོ་རྒྱལ་བ་ཡབ་སྲས་རྫུ་འཕྲུལ་རྐང་པས་ས་ལ་བབ།།
རྣམ་དཀར་འཕྲིན་ལས་བསིལ་བའི་ཟེགས་མ་ཕྱོགས་ཀྱི་འཁོར་ལོའི་མཐའ་རུ་འཕྱོ།།
ཞལ་གྱི་དཀྱིལ་འཁོར་མཐོང་བ་དོན་ལྡན་འཛུམ་པའི་འོད་ཀྱིས་ཁྱོད་ལ་སྲུངས།།
ཁྱོད་དང་ང་ཡི་བར་ཐག་རིང་མོར་ལེ་བར་སྟོང་གིས་བསྐལ་ཀྱང་རུང་།།
ལས་ཀྱི་རྣམ་སྨིན་དྲན་བཞིན་དྲན་བཞིན་མཚན་མོའི་གཉིད་ཐེབས་ཆད་ཀྱང་རུང་།།
སྐྱོ་གདུང་མིག་ཆུ་བར་མེད་བཞུར་བས་བྲང་གི་སྟོད་ཁོག་བརླན་ཀྱང་རུང་།།
ནམ་ཞིག་ཁྱེད་ལ་ཕུལ་བའི་ཞུ་འཕྲིན་ཕུག་རོན་དཀར་པོས་གཤོག་ཟུང་ངོམ།།
མཐོན་མཐིང་གངས་ཀྱི་རྒྱལ་མོའི་མཛེས་ཞལ་ནག་ནོག་དྲེག་པས་ཁེབས་ཀྱང་རུང་།།
ལྷུང་ལྷུང་འབབ་པའི་ཁ་བབ་རྣམ་བཞི་ཀྱག་ཀྱོག་ཡུར་བས་དྲངས་ཀྱང་རུང་།།
དྭངས་ཤིང་བསིལ་བའི་ཡན་ལག་བརྒྱད་ལྡན་རྫས་ངན་དྲི་མས་བསླད་ཀྱང་རུང་།།
ནམ་ཞིག་མཐའ་ཡི་རྒྱ་མཚོ་ཆེ་ལས་སྤྲིན་དཀར་གསར་པ་གྱེན་དུ་འཕྱུར།།
དུས་ཀྱིས་བསུས་པའི་མུན་པ་སྟུག་པོས་སྣང་བའི་ལམ་བུ་བསྒྲིབས་ཀྱང་རུང་།།
ངམ་ནག་ཆུ་ཁུར་བརྩེགས་པའི་དབུས་སུ་གློག་དམར་དྲག་པོ་གཡོས་ཀྱང་རུང་།།
འཇིགས་རུང་འབྲུག་སྒྲ་གནམ་ས་འགེངས་བས་རྣ་བའི་བུ་ག་གཏོར་ཀྱང་རུང་།།
ནམ་ཞིག་ལྷ་ལམ་ཡངས་པོའི་མཐའ་ནས་སྐྱ་རེངས་གསར་པའི་རུ་སྣ་འདྲེན།།
མི་བཟོད་དགུན་གྱི་གྲང་བའི་རེག་བྱ་སྤུ་གྲི་ངར་མས་བཏུབ་ཀྱང་རུང་།།
ལྷན་སྐྱེས་གཤིས་བཟང་དལ་འགྲོའི་རྒྱུ་བ་འཁྱག་རོམ་སྦུབས་སུ་ཚུད་ཀྱང་རུང་།།
མི་བདེན་རྫུན་གྱི་རླུང་བུའི་ཤུར་སྒྲ་བར་མེད་འུར་འུར་བསྒྲོགས་ཀྱང་རུང་།།
ནམ་ཞིག་ནོར་འཛིན་བུ་མོའི་པང་དུ་སྨྱུ་གུ་གསར་པའི་ཞལ་ཁ་འབྱེད།།
གོམ་འགྲོས་ཅན་གྱི་མདོ་བ་རྟ་ཡི་རྨིག་བཞི་སྒྲོག་གིས་བསྡམས་ཀྱང་རུང་།།
རྩུབ་སེམས་ཆེ་བའི་བདག་པོ་དེ་ཡིས་ཉིན་བཞིན་ལྕག་གིས་བྲབས་ཀྱང་རུང་།།
ཟས་དང་སྐོམ་གྱི་གདུང་བས་མནར་ཏེ་ལོ་ཟླ་རིང་མོ་འདས་ཀྱང་རུང་།།
ནམ་ཞིག་ཨ་ཆེན་བདེ་མོའི་ཐང་དུ་རྟ་ཕྲུག་དར་མས་བང་རྩལ་འགྲན།།
བག་ཡངས་རྒྱུ་བའི་བྲེ་སེར་འབྲོང་རྒོད་རི་ཡི་གཤམ་དུ་ཕབ་ཀྱང་རུང་།།
གཅེས་པའི་སྲོག་གི་རིན་ཐང་དེ་ཡང་སྒོར་མོའི་གྲངས་ལ་བཅལ་ཀྱང་རུང་།།
མི་ལག་བསྒྲིགས་ཏེ་ཤ་དང་པགས་པར་ཅི་དགར་ལོངས་སུ་སྤྱད་ཀྱང་རུང་།།
ནམ་ཞིག་ཡངས་པའི་རྩྭ་ཐང་དཀྱིལ་དུ་བྲོང་ཕྲུག་དར་མས་རྭ་རྩེ་རྡར།།
འཛུམ་དྲུག་རྒྱས་པའི་རྒྱ་སྟག་ཁྲ་བོ་ལྕགས་ཁྲའི་ནང་དུ་ཚུད་ཀྱང་རུང་།།
གཞན་སྡེ་འཇོམས་པའི་མཆེ་སྡེར་རྣོན་པོ་བཙན་པོའི་ཤེད་ཀྱིས་ཕུད་ཀྱང་རུང་།།
སྟོབས་རྩལ་རྫོགས་པའི་རང་གི་ལུས་ལ་འགྲོ་འདུག་རང་དབང་མེད་ཀྱང་རུང་།།
ནམ་ཞིག་ནག་ཀླུང་ཕྱུག་མོའི་དབུས་སུ་སྟག་ཕྲུག་དར་མས་མཆོངས་གར་རྩེན།།
ནམ་འཕང་སྤྱོད་པའི་ཐང་དཀར་རྒོད་པོའི་རྐང་པ་རྙི་ལ་ཐེབས་ཀྱང་རུང་།།
གནམ་སའི་རྒྱ་ཁྱོན་ཡུད་ཀྱིས་འཇལ་བའི་འཕྲུལ་གྱི་མིག་ཟུང་དྲུས་ཀྱང་རུང་།།
སྤུ་སྡུག་བཀྲ་བའི་གཤོག་པ་ཟུང་ལ་འཕུར་འདོད་རང་དབང་མེད་ཀྱང་རུང་།།
ནམ་ཞིག་བྲག་རི་མཐོ་པོ་རྩེ་རུ་རྒོད་ཕྲུག་དར་མས་ལྡིང་སྐོར་བྱེད།།
ཀུན་སྙོམས་དྲོ་སྐྱིད་གསེར་གྱི་ཉི་མ་ནུབ་རིའི་ཕག་ཏུ་ཡིབས་ཀྱང་རུང་།།
ཞི་བསིལ་ཕན་བདེ་མཚན་མོའི་མགོན་པོ་ལྷ་མིན་དབང་པོས་བཟས་ཀྱང་རུང་།།
ནམ་འཁའི་མཛེས་རྒྱན་སྐར་ཚོགས་ཁྲ་མོ་མི་མངོན་དབྱིངས་སུ་བདས་ཀྱང་རུང་།།
ནམ་ཞིག་དུས་ཀྱི་འཁོར་ལོའི་མཛེས་སྡུག་མིག་གི་ལམ་དུ་འཆར་བར་ངེས།།
གཡུལ་ངོར་ཕམ་པའི་དཔའ་བོའི་ཁྱུ་ཚོགས་ལྔ་པའི་ལམ་དུ་ཆས་ཀྱང་རུང་།།
མེས་པོ་དམ་པའི་ཕ་མཁར་བཙན་པོ་ཐལ་བའི་རྡུལ་ལ་ཐིམས་ཀྱང་རུང་།།
གཅེས་པའི་རིག་གཞུང་ནོར་བུའི་བང་མཛོད་དམར་པོའི་མེ་ཡིས་བཟས་ཀྱང་རུང་།།
ནམ་ཞིག་མི་རབས་གསར་པའི་ལོ་རྒྱུས་ཁྲག་གི་ཐིགས་པས་སླར་ཡང་འབྲི།།
བྱམས་སེམས་མེད་པའི་རྗེ་བོ་ཞིག་གི་དབང་བསྒྱུར་འོག་ཏུ་ཚུད་ཀྱང་རུང་།།
དྲང་བདེན་མེད་པའི་ཁྲིམས་ལུགས་ཤིག་གིས་གཉའ་བའི་དཀྱིལ་ནས་མནན་ཀྱང་རུང་།།
སྙིང་རྗེ་མེད་པའི་དམག་དཔུང་ཞིག་གིས་ཉི་མཚན་བར་མེད་བསྡིགས་ཀྱང་རུང་།།
ནམ་ཞིག་མི་རྟག་སྒྱུ་མའི་ཟློས་གར་ལས་ཀྱི་མེ་ལོང་ནང་དུ་གསལ།།
ལྷོ་ཕྱོགས་ཞི་བདེ་རྒྱ་མཚོའི་འགྲམ་དུ་བྱེ་མའི་ཐང་ལ་ངལ་གསོ་བྱས།།
གནམ་ས་འདྲེས་མའི་འཚམས་སུ་བལྟས་པས་ཕུག་རོན་ཁྱུ་ཞིག་འཕུར་བ་མཐོང་།།
ཡུན་རིང་བདག་གིས་སྙིང་ལ་ཉར་བའི་འཕྲིན་འདི་ཁྱོད་ལ་བསྐུར་ན་འདོད།།
རང་དབང་གཤོག་ཟུང་ཅི་དགར་རྩེན་པའི་ཁྱེད་ཀྱི་འགྲུལ་བཞུད་བདེ་བར་སྨོན།།