-གསེར་སྒོར་གཅིག་ལ་རྗེས་དྲན་དུ།
ཀླུ་སྨྱོན་ཧེ་རུ་ཀ
སྡོམ་གྱི་རྒྱ་ཐག་ལྟ་བུའི་ཀླད་པ་རྙོག་འཛིང་ཆེ་བའི་སྲོག་ཆགས་གཏུམ་པོ་སྐོར་ཞིག་ཡར་ཀླུང་ཁོག་ནས་ལམ་དུ་ཆས་བྱུང་།
ཁོ་ཚོའི་མགོ་ཐོག་གི་ཉི་མར་འོད་སྣང་སེར་པོ་ཞིག་འཕྲོ་བཞིན་ཡོད་པ་ནི་གཡས་གཡོན་གྱི་རི་ཚོགས་གཅེར་བུ་དེ་དག་འགེབ་སྤྱད་ཀྱི་ལྷན་པ་ཐེད་པོ་ཞིག་དང་འདྲ།
ཁོ་ཚོའི་ཁྲོད་དུ་ལུས་སྟོབས་རྒྱས་ཤིང་སེམས་ཁམས་སུ་འཁྲུག་འཛིང་གི་མེ་ལྕེ་མཆེད་པའི་མི་གསུམ་དང་།
ཕྱིའི་གཟུགས་གཞི་ཉམ་ཆུང་ཞིང་ནང་གི་སེམས་པས་ཞི་བདེའི་ཁྱིམ་གཞིས་ཤིག་ལ་རེ་སྨོན་ཆེ་བའི་མི་གསུམ་ཡོད།
ལོ་ངོ་ཅི་ཙམ་ཞིག་ཕྱིན་པ་ཏག་ཏག་བརྗོད་ཐུབ་མཁན་གཅིག་ཀྱང་མེད་པའི་དུས་རབས་ཤིག་ལ།
མི་ཚོགས་དེའི་བླ་དང་རྐང་གིས་བཞེངས་པའི་རྡོ་མཁར་ཚོ་གློ་བུར་དུ་ཕ་རོལ་པོའི་མེ་སྒྱོགས་ཀྱིས་ཐལ་བ་རྡུལ་དུ་བཤིགས་སོང་།
ནམ་རྒྱུན་ནང་འཁྲུག་རྐྱང་རྐྱང་ལ་མགོ་འཁོར་བའི་མི་ཚོགས་དེས་ཡོད་ཚད་ཤུལ་དུ་བསྐྱུར་ནས་ཆེས་མཐོ་བའི་རི་ཚོགས་ཤིག་བརྒལ་ཏེ་བྲོས་ལྡོམ་གྱི་འཚོ་བ་སྐྱེལ་དགོས་བྱུང་།
ཁོ་ཚོའི་རེ་ལྟོས་ཉག་གཅིག་ནི་དཀར་ཟས་ཁོ་ནས་ཉི་མ་སྐྱེལ་བའི་ཕུག་རོན་དཀར་པོ་འགའི་གཤོག་རྡེབ་དང་འཕུར་ལྡིང་གི་གར་སྟབས་ཤིག་རེད།
ཁོ་ཚོའི་ཁྲོད་ཀྱི་མི་སྟོང་ཕྲག་མང་པོ་ཞིག་ཡ་ང་སྙིང་རྗེ་མེད་པའི་བཀྲེས་ལྟོགས་དང་ན་ཚས་རེ་རེ་བཞིན་འཇིག་རྟེན་ཕྱི་མར་ཁྲིད་སོང་།
དེ་ནི་ཁོ་ཚོས་མུ་གེ་སེལ་ཆེད་གོང་ཁེ་བྱས་ནས་བཙོང་བཞིན་པའི་ཕ་མེས་ཀྱི་བླ་གཡུ་དང་བླ་གཟི་རིན་ཐང་བྲལ་བ་དེ་ཚོ་ཡང་ཧ་ཅང་འདྲ།
གངས་རི་དང་ཆེས་རྒྱང་ཐག་རིང་བའི་མྱ་ངམ་ཐང་རེ་རེར་གངས་ཁྲོད་ནས་འོངས་པའི་མི་མང་པོ་ཞིག་གི་རྣམ་ཤེས་ལྡོམ་པོ་ཚོ་བན་བུན་དུ་འཁྱར་ཞིང་རྒྱུ།
དེ་དུས་ཀྱི་ཁོ་ཚོའི་མིག་མདངས་ནི་ཐན་པ་བྱུང་བའི་ཞིང་རྒོད་ཀྱི་ཁུག་སོ་རེ་རེ་དང་འདྲ་པར་མདོག་ཤོར་ཞིང་ཐལ་རྡུལ་གྱིས་ཚོས་ཏེ་བལྟར་མི་བཟོད་ཡ།
གློ་བུར་དུ་མི་ཚོགས་དེའི་ཁྲོད་ཀྱི་བློ་རིག་རྒོད་པ་འགས་རྨི་ལམ་རིང་པོ་ཞིག་རྨིས་སོང་ཞེས་རི་མཐོ་ས་གཙང་ཞིག་ནས་བསྒྲགས་བྱུང་།
དེ་ནི་གཟི་དང་བླ་གཡུའི་ཚབ་ཏུ་གསེར་སྒོར་འཚོལ་སྟངས་ཤིག་སློབ་སྦྱོང་བྱེད་རྒྱུ་དེ་ཡིན་ཞེས་ཞོགས་པ་དང་དགོང་ཁའི་རླུང་བུ་དག་གིས་བར་མེད་དུ་ཟློ་བཞིན་འདུག
གསེར་ཁྲི་བརྗིད་ཉམས་ལྡན་པ་ཞིག་མི་རིང་བའི་སྔོན་རྡོ་མཁར་ཆེན་པོ་ཞིག་གི་ནང་དུ་རྔུལ་ཆུ་དང་ཟུངས་ཁྲག་གི་ཕྲ་རྒྱན་སྤྲས་ཏེ་བཞག་ཡོད་ཅིང་།
ལོ་མང་པོ་ཞིག་རྗེས་ནས་ལེ་དབར་ཁྲི་ཕྲག་གི་ས་མཐའ་ཞིག་ནས་གསེར་སྒོར་གཅིག་ཁོ་ན་རྙེད་པའི་དགའ་བ་ཙམ་གྱིས་རྨི་ལམ་སྐྱིད་པོ་རྨི་ཆོག་ཆོག་ཅིག་ཀྱང་ཡོད།
ཁྲག་ཅེས་པ་ནི་ཚེ་སྲོག་ཅིག་གི་གྲུབ་ཆ་དང་རྒྱུན་ཐག་ཡིན་པའི་ངེས་ཤེས་ཀྱི་གཏིང་རུམ་ན་བཟི་ཞིང་འཁྱོར་བའི་མི་ཚོགས་ཀྱེ།
སྡུག་གི་མཆི་མ་འདོན་ཞིང་སྐྱིད་ཀྱི་དགོད་སྒྲར་རེ་བའི་རི་བོ་སྒང་དྲུག་གིས་མུན་ནག་གི་ཡོལ་བ་རིང་མོ་ཞིག་གྱོན་ཏེ་མུ་ནས་མུ་རུ་ས་ཆེན་གྱི་སྙིང་ཁར་ཟུག་གཟེར་བྱིན།
མེ་ལྕེ་བན་བུན་ཞིག་གིས་ཚེ་སྲོག་གང་མང་ཞིག་ཁྱུར་མིད་དུ་གཏོང་བཞིན་པ་ནི་མུན་ནག་ནི་ཁྲོད་དུ་གློག་དམར་གྱི་སྙན་ངག་འབྲི་བ་དང་ཤིན་ཏུ་མཚུངས་ཤིང་།
ཚོ་ཁག་ཅིག་གི་ཤི་གསོན་གྱི་བསང་དུད་གོ་ལ་ཟླུམ་པོའི་དབུ་རྩེ་རུ་ལང་ལོང་དུ་མཆེད་པར་ལྟ་བཞིན་ཡང་སྐྱར་ཕ་མེས་ཀྱི་བླ་གཟི་བླ་གཡུ་དང་ཕྱི་གླིང་པའི་གསེར་སྒོར་གཅིག་གི་རིན་ཐང་གི་ཁྱད་པར་ཡང་ཡང་དྲན་ཡོང་།
སྔོན་བྱོན་དམ་པའི་ལེགས་བཤད་དུ་གསེར་ལ་རིན་ཐང་མེད་ན་ས་རྡོ་ཡིན་ཞེས་གསུངས་པའི་ཡིག་འབྲུ་དེ་ཚོར་བསམ་གཞིག་གི་གཤོག་པ་རྐྱོང་བཞིན་པའི་ང་ཚོ།
ང་ཚོའི་ཕ་མེས་ཡང་མེས་ཀྱི་བླ་སྲོག་ཟུངས་གསུམ་ཐིམ་པའི་བོད་ཀྱི་གཟི་དང་གཡུ་ཡི་རིན་ཐང་དང་ལོ་རྒྱུས་བརྗེད་བཞིན་པའི་ང་ཚོའི་བུ་རབས་ཚ་བརྒྱུད།
ཁྲག་དམར་དང་རྒུན་ཆང་གི་འབྱུང་ཁུངས་ཙམ་གྱི་རྒྱུན་ཤེས་ཀྱང་སྟོར་བའི་ང་ཚོའི་མི་རབས་འདི་དང་མི་རབས་འདིའི་ངོ་ཚ།
མེ་ཡིས་བསྲེགས་ཤིང་རླུང་གིས་འཁུར་བཞིན་པའི་རི་བོ་སྒང་དྲུག་གི་བླ་སྲོག་ལྡོམ་པོ་ཁྲི་ཕྲག་གི་རེ་སྒུག་རིང་མོའི་མཚན་ལྗོངས་ཀྱི་མར་རེ་ཚེ་འབར་རེ་རེ་སུ་ཡིན་ནམ།