འབའ་སྲས།
ལང་ཚོའི་མྱོས་བུམ་དུད་པའི་ཁུར།།
ཆགས་རྒྱས་སྙིང་གི་ལུས་ཕྲ་མ།།
ཤར་ཕྱོགས་དུང་རིའི་ཟླ་བ་བཞིན།།
འཛུམ་དཀར་འོད་ཀྱིས་འཁྱུད་པ་མཐོང་།།
གཟུགས་ཀྱི་ཙན་དན་རྒྱས་པ་རུ།།
ཁྱབ་པའི་དྲི་བཟང་ལྡང་བ་ནི།།
བསིལ་རླུང་རྐང་པའི་འཕེན་རྩལ་གྱིས།།
དྲི་འཛིན་ཀློང་ཆེན་དོག་པར་བྱས།།
རྐང་ཞབས་ས་ལ་དྲུད་པའི་རྡུལ།།
དེ་ཡང་རླུང་གིས་བསྐྱེལ་བ་ན།།
རིང་བའི་ཆགས་ཅན་སྙིང་གི་བུས།།
གསེར་བྱེ་འཛིན་པའི་དཀའ་བ་བརྟེན།།
ཞལ་བཟང་ཟླ་བའི་དཀྱིལ་འཁོར་ནི།།
བརྣག་དཀའི་མུན་པ་སྟུག་པོའི་གཏིང་།།
རྨང་ནས་སེལ་བའི་རེ་བ་རུ།།
ལུས་ཅན་ཀུ་མུད་དག་གིས་ལྟ།།
བྲང་སྐྱེས་རིན་ཆེན་ཤ་རྡོག་ཟུང་།།
དལ་གྱིས་བགྲོད་པས་ལྡེམ་པ་ནི།།
འཇིགས་ཤིང་ཞུམ་པའི་ཁོག་གི་སྙིང་།།
ནུ་མའི་རྟེན་དུ་ལྡིང་བ་འདྲ།།
བིམ་པའི་ཁ་སྒོ་འཛུམ་པའི་ལྟེར།།
ལྕེ་ཡི་ཟེའུ་འབྲུ་དགོད་པ་ནི།།
སྦྲང་མའི་མཆུ་ལ་དོགས་པ་ཡིས།།
སོ་ཡི་འདབ་མ་རྒྱས་པས་བསྲུངས།།
ཟླ་བའི་གདོང་ལ་མཛེས་པའི་སྤྱན།།
ཨུཏྤལ་ནགས་ཀྱི་འདབ་མ་རིངས།།
ས་ཡི་གདུ་བུ་ང་ཡིན་ཞེས།།
མིག་གི་དགྲ་རུ་བསླེབས་པ་བཞིན།།
སྣུམ་པོ་སྐྲ་ཡི་ནགས་ཚལ་ལ།།
རྒྱན་གྱི་མཛེས་བྱེད་འཛིན་པ་ནི།།
ལྷ་ཡི་དགའ་ཚལ་ཁོར་ཡུག་ཏུ།།
གསེར་གྱི་མེ་ཏོག་འཁྲུངས་སམ་སྙམ།།
བདག་གི་མིག་གི་མཁའ་ལ་ནི།།
མིག་ཡངས་ཟླ་བ་འདི་ཤར་བས།།
ཡིད་ཀྱི་མྱ་ངན་སེལ་བའི་སར།།
སྙན་ངག་ཀུན་ད་འདི་བཞད་དོ།།
མྱོས་བུམ་དུད་པ་དྲུད་པའི་དོན་ཅན་རེད།
ཐུར་ལ་དྲུད་པའི་ནུ་ཤ་བླུགས་བླུགས་ལ།།
ལང་ཚོ་རྒྱས་བའི་མཛེས་མར་འདོད་པ་འདི།
ས་སྟེང་གནམ་གྱི་འོག་ན་ཁྱེད་མྱིག་ཙམ།།
ཧ་ཧ་ཧ།
བརླ་རྐང་སྐེ་མདའ་སྐད་པའི་སྦོམ་རིང་དང་།།
རྐུབ་ཤ་གཞོགས་འདོམས་ཚོ་སྙི་སྙོམ་པ་ལ།།
མྱིག་གི་ཟུར་ཙམ་གཡོ་བར་མི་བྱེད་པར།།
གདོང་རུས་རྐམ་པོར་ཆགས་པ་ཁྱེད་ཉིད་ཙམ།།
ཧ་ཧ་ཧ།