རྔ་གཡང་ཕྱུག་མོ།
མིག་ཆུ་དང་པོ།
དོན་འགྲུབ་དབང་ཆེན།
ཆེས་འཚོ་བ་དཀྱུས་མ་ཞིག་ནས་ཆེས་རླབས་ཆེན་གྱི་ལས་ཀ་བྱེད་མཁན་ཞིག་སྟེ།ཁོང་གི་མིང་ལ་དོན་འགྲུབ་དབང་ཆེན་འབོད།ཁོང་ནི་བོད་ནས་རྒྱ་གར་དུ་ཡོང་བའི་གསར་འབྱོར་ཞིག་ཡིན་ཅིང་།ཁོང་གིས་བོད་ནང་གི་བོད་མིའི་བསམ་བློ་དངོས་ཇི་འདྲ་ཞིག་ཡིན་པ་དེ་དེ་བཞིན་དུ་རྒྱལ་སྤྱིར་སྟོན་རྒྱུ་ཆེས་གལ་ཆེན་ནང་གི་དོན་ཆེན་ཞིག་ཏུ་མཐོང་སྟེ།རང་སེམས་ནས་ཐག་བཅད་དེ་ཁུ་སིམ་སིམ་ངང་བོད་དུ་བསྐྱོད།ཁྱོད་ཀྱིས་བོད་ནང་བོད་མིའི་གནས་སྟངས་དང་བོད་མིའི་སེམས་བསམ་པའི་གཏིང་གི་རེ་བ་དང་སྡུག་བསྔལ་ཅི་འདྲ་མྱངས་དང་མྱོང་བཞིན་པའི་གནས་ཚུལ་དག་དམར་དམར་རྗེན་རྗེན་དུ་རྒྱལ་སྤྱིར་བསྲིངས།ཡིན་ནའང་ཁྱེད་ཉིད་ཆེས་མུན་ནག་མུན་ནག་གི་བཙོན་དུང་ཞིག་ཏུ་བརྫིངས།
ཁྱོད་ཀྱི་ཆུང་མ་དང་བུ་མོ་སྤོ་བོ་དང་རྨོ་མོ་རྒྱ་གར་རྡ་སར་བསྡད་ཡོད།ཁྱོད་ཀྱིས་ཆུང་མས་པག་ལེབ་བཙོངས་ཏེ་ནང་མིའི་ཁ་གསོ་བཞིན་པའི་གནས་སྟངས་དང་།ཁྱོད་ཀྱི་ཆུང་མ་དང་བུ་མོས་ཁྱོད་དང་ནང་གི་གནས་སྟངས་དངོས་གང་ཡིན་པ་དེ་གསར་ལམ་ཁག་ཏུ་རྗོད་དུས།ངའི་མིག་ཀོང་མཆུ་མས་བཀང་སྟེ་མིག་ཆུ་འཐོར་བ་མ་ཟད་རེ་ཞིག་འདང་རྒྱག་གི་ཀློང་དུ་ལྷུང་།དེ་ནི་ངའི་མི་ཚེའི་ནང་མིག་ཆུ་ཐེངས་དང་པོ་དེ་ཡིན།
མིག་ཆུ་གཉིས་པ།
སྐྱེ་རྒུའི་ས་འགུལ།
ལོ་ངོ་སྟོང་ཕྲག་མང་པོར་ནང་ཆོས་ལ་དད་པ་བྱེད་བཞིན་ཚུལ་མཐུན་ལུགས་མཐུན་ངང་ཆེས་གཉོམ་ཆུང་གི་འཚོ་བ་རོལ་བའི་མི་རིགས་ཞིག་སྟེ་མིང་ལ་བོད་པ་ཟེར།མི་རིགས་འདི་ནང་ཤེས་རིག་གི་ཐད་ཕྱུག་པོ་ཡིན་ཡང་།མིའི་སྤྱི་ཚོགས་ཀྱི་འཚོ་བ་དོན་གཉེར་གྱི་ཐད་ཧ་ཅང་ཧ་ཅང་གི་སྐྱོ་བོ་ཡིན།བོད་ལུང་པ་འདི་རྒྱ་ལག་ཏུ་ཞོར་ཏེ་ལོ་༥༠འདས་ཟིན་ཅིང་།ད་བར་མི་རིགས་འདིའི་རྒྱ་ལག་ནས་མྱངས་དང་མྱོང་བཞིན་པའི་སྡུག་བསྔལ་དག་ནི་ས་ཆེན་འདིའི་ནང་གི་སྡུག་ཤོས་སྡུག་ཤོས་ཀྱི་གྲས་རེད།
སྡུག་བསྔལ་དེའི་སྒང་ལ་སྡུག་གཞན་ཞིག་གནམ་ནས་ལྷུང་སོང་།དེ་ནི་སྐྱེ་དགུ་མདོའི་ས་འགུལ་རེད་ལ་ངའི་སྤུན་ཟླ་སྟོང་ཕྲག་མང་བོ་འཆི་ལམ་དུ་དེད་སོང་།ངའི་སྤུན་ཟླའི་ཕུང་བོ་མེར་སྲེག་གི་དུ་བའི་ཁྲོད་དུ་རང་གི་མ་རྒན་དང་སྤུན་སྲིང་ཚོ་དྲན་གདུང་གི་སྐྱོ་བ་ཡིག་དྲུག་གི་དབྱངས་ལ་འགུགས་པའི་བུད་མེད་དཀྱུས་མ་ཞིག་གིས་འཕགས་པ་སྤྱན་རས་གཟིགས་ཀྱི་ཐུགས་རྗེས་གཟིགས།རྒྱལ་བ་བསྟན་འཛིན་རྒྱ་མཚོ་ཞེས་ཡང་ནས་ཡང་དུ་མཚན་ནས་འབོད་པ་མཐོང་དུས།ངའི་སེམས་ཁམས་ཧྲིལ་བོ་སློང་སློང་བོར་གྱུར་བ་མ་ཟད་མིག་ནས་མཆི་མ་མཁུར་གོང་བརྒྱུད་དེ་མཆུ་འགྲམ་དུ་ཐོན། དེ་ནི་ངའི་མི་ཚེའི་ནང་གི་མིག་ཆུ་ཐེངས་གཉིས་པ་དེ་ཡིན།
མིག་ཆུ་གསུམ་པ།
སྐུ་ཞབས་ཞོགས་དུང་།
ཤེས་ཡོན་གྱི་མིག་ཟུང་དེ་རང་ཉིད་ཁོ་ནས་འཚོ་བར་མ་བཀོད་པར་རང་གི་མི་རིགས་འདིའི་མདུན་ལམ་དང་ཆག་འཇིག་ཐད་དཀོད་མཁན་ཞིག་སྟེ་ཁོང་གི་མིང་ལ་ཞོགས་དུང་འབོད།ཁོང་གིས་ང་ཚོའི་རུས་གསེང་ན་འཐིམས་པའི་ལྟ་སྣང་གི་ཆོས་ལུགས་དང་འདྲེས་པའི་བག་ཆགས་ངན་རུལ་དང་གོམས་གཤིས་གནོད་སྐྱེལ་རིགས་ལ་དྲག་རྡུང་བྱས་ཏེ།བོད་མི་རིགས་འདི་འཇིག་རྟེན་འཚོ་སྡོད་ཐད་རྒྱལ་སྤྱིའི་རྣམ་པའི་གོ་རྟོགས་ངེས་ཅན་ཞིག་ཡོང་བང་ཧུར་ཐག་འབད་ཐག་བྱས།ད་དུང་རྒྱ་གཞུང་གི་བཙན་པོའི་དབང་ཡོད་འོག་མི་རིགས་འདིའི་མྱོང་བཞིན་པའི་དཀའ་སྡུག་དག་ཚེ་སྲོག་གཏའ་མར་བཞག་སྟེ་སྨྱུག་རྩེ་ནས་བཏོན་སོང་།ཡིན་ནའང་ཡོད་ཚད་ལ་དབང་ཤེད་བཀོལ་བཞིན་པའི་རྒྱ་གཞུང་གིས་ཁོང་གི་སྐེར་ལྩགས་ཐག་བསྐོན་ནས་བཙོན་ཁང་དུ་ཁྲིད་སོང་།
ཁྱོད་ཀྱི་ཤུལ་ན་ཆུང་མ་དང་བུ་མོ་ཡོད།ཉིད་ཀྱི་བུ་མོས་སྐུ་ཉིད་བཟུང་བའི་བརྒྱུད་རིམ་དང་སྐུ་གཟུགས་ཀྱི་གནས་བབ།ནང་གི་འཚོ་བ།གཉེན་ཉེ་དུའི་གནས་སྟངས།་དེ་དག་གི་མ་འོངས་པའི་འཚོ་བའི་ཐད་སེམས་ཁྲལ།ངའི་ཨ་ཕ་འཛིན་དགོས་པའི་ནག་ཉེས་ཚད་ལོང་ཞིག་མེད་པར་འདོད་ཅིང་།ཁྲིམས་ཐག་བཅད་སོང་ན་ཁྲིམས་རྩོད་པ་གླ་བ་དང་དེ་དག་གི་འགྲོ་སྟངས་འདུག་སྟངས་ཅི་ཡང་མི་ཤེས།ང་ཚོ་ལ་མི་རྒྱུ་གང་ཐད་ནས་རོགས་པ་བྱེད་མཁན་ཅི་ཡང་མེད།ཨ་ཕ་བཟུང་ཤུལ་ན་ང་ཚོ་བུད་མེད་སྐོར་ཞིག་མ་གཏོགས་མེད་དུས་ཅི་ཞིག་བྱེད་དགོས་མིན་མ་ཤེས་པར་བསྡད་ཡོད་ཟེར་བའི་མོ་སྐད་སྐྱོ་དུང་དུང་ཞིག་གི་དོན་དངོས་ཞིག་དྲང་གཉོམ་གྱིས་བཤད་ཡོང་དུས།ང་ལ་རང་དབང་ཅི་ཡང་མེད་པར་མིག་ཆུ་མིག་གོང་དུ་འཁོར་གྱིན་འདུགདེ་ནི་ངའི་མི་ཚེའི་ནང་གི་མིག་ཆུ་ཐེངས་གསུམ་པ་དེ་ཡིན།