མིག་ཆུ་དང་འཁྲེང་སེམས།

༼མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་བསྟན་འཛིན་ཚེ་རིང་ལགས་གློ་བུར་ཏུ་སྐུ་གཤེགས་པའི་མྱ་ངན་ཞུ་ཚིག༽

གཅན་མེ་སོན།

ཉིན་དེ་ནི་ཁོ་བོས་བརྗེད་ག་ལ་སྲིད་དེ། གཟའ་སྐར་ལ་མུན་པས་སྒྲིབ་པའི་སྤྱི་ཟླ ༢ པའི་ཚེས ༢༣ ཉིན་རེད། ཁོ་བོ་ཕ་ཡུལ་ན་སོ་ནམ་པའི་ཆས་སུ་ཞུགས་ཏེ་ས་ཞིང་རྨོ་འདེབས་བྱེད་པའི་ལས་ལ་བྲེལ་གྱིན་པའི་ཏག་ཏག་སྐབས་དེ་ལ། སློབ་གྲོགས་ཞིག་གིས་གློ་རྡེག་ཏུ་ཁ་པར་ཐོན་ཏེ་ད་ནངས་སྔ་དྲོའི་དུས་ཚོད ༡༠ སྟེང་། རང་རེའི་བོད་ཡིག་སྡེ་ཁག་གི་སྡེ་གཙོ་གཞོན་པ་དགེ་རྒན་བསྟན་འཛིན་ཚེ་རིང་ལགས་མ་འཚམས་པའི་གཏམ་དེ་ཉིན་དེའི་གྲང་རླུང་དང་འདྲ་བར་ངའི་རྣ་བའི་བུ་ག་དང་ལུས་པོའི་སྦུབས་སུ་ཟུག་ནས་བུད་སོང་། ཁོ་བོས་དོན་དེ་ནི་རྨི་ལམ་ཞིག་ཏུ་འཁྲུལ་ཞིང་འདི་ནི་མངོན་སུམ་ལ་བསྙོན་བཏིང་བའི་གཏམ་ཞིག་མིན་ནམ་སྙམ་ནས་ཡིད་ཆེས་བྱ་དཀའ་བར་གྱུར་ལ། ཀུན་བཏགས་གདོན་གྱིས་བཟུང་བའི་གཅོང་ནད་ཕོག་པ་ནང་བཞིན་ཁོ་བོའི་ལུས་སེམས་ཡོངས་རྗོགས་ལྗིད་ཏིག་གེར ་གྱུར་ནས་རེ་ཞིག་ལ་ཞིང་ཚིགས་ནས་ཅི་ཡང་བྱེད་མ་ནུས་པར་ལུས་སོང་། མི་རིགས་སློབ་གསོ་ལ་ཤ་ཞེན་ཆེ་ཞིང་བྱམས་སེམས་དང་རྒྱུ་འབྲས་བློ་མིག་མངའ་བའི་ལོ་ན་བཞི་བཅུར་སོན་མ་ཐག་པའི་འོ་སྐོལ་གྱི་ཐོ་རེངས་སྐར་ཆེན་འདྲ་བའི་དགེ་རྒན། ང་རང་དངོས་སྦྱོང་ལ་སོང་ཤུལ་ནས་ཐེངས་གཅིག་ལའང་མཐོང་མ་ནུས་པའི་དགེ་རྒན་ཁོང་ལགས་འདི་ལྟར་འཇིག་རྟེན་དཀར་ངོགས་ནས་ང་ཚོ་དང་གཏན་དུ་གྱེས་ཕྱག་ཕུད་པ་ནི་ཇི་འདྲའི་ཡིད་སྐྱོ་ཞིང་ཕངས་སེམས་ལ་འགྱོད་གདུང་གིས་ཁེངས་པ་ཞིག་རེད་ཨང་།

ཁྱེད་ཅག་གིས་ག་ལ་ཤེས་ཏེ། ན་ནམ་ཞ་ཞར་ཁོ་སློབ་ཁང་དུ་འོངས་ནས་གདོང་ལ་འཛུམ་གྱིས་ཁེངས་བཞིན་སྐད་གསེང་མཐོན་པོ་དང་ཏན་ཏན་ཏིག་ཏིག་གིས་ང་རང་ཚོར་སློབ་ཁྲིད་གནང་བཞིན་པའི་རྣམ་པ་དེ་ངའི་ཡིད་ལ་ཝ་ལེར་འཆར་བྱུང་ལ། ལྷག་དོན་མཚོ་སྔོན་དགེ་ཐོན་སློབ་ཆེན་དང་ཆབ་ཆ་ན་ཡོད་པའི་རང་རེའི་མཚོ་སྔོན་མི་རིགས་དགེ་འོས་ཆེད་སྦྱོང་སློབ་གླིང་གཉིས་ཟླ་སྒྲིལ་ཏེ། བདག་ཅག་གི་སློབ་ཆེན་སློབ་མ་ཚོས་ཆུའི་སློབ་གྲྭ་ཞེས་པའི་ཐབས་ཆག་ཉམ་ངའི་ཁོར་ཡུག་དེ་རུ་སྡོད་ཐབས་ཟད་དེ།རྒྱ་མིའི་སློབ་མ་ཚོ་དང་གཅིག་མཐུན་གྱི་བགོ་སྐལ་དང་ཁེ་དབང་གི་ཕྱིར་དུ། བདེན་དོན་གྱི་ང་རོ་ཐེངས་གཉིས་ལ་བསྒྲགས་ཏེ་བོད་པ་ཚོ་མགོ་བོ་དམའ་བའི་སློབ་གྲྭ་འདིའི་གཞུང་ནས་བོད་ཡིག་གི་དཔའ་གདེང་ཅན་གྱི་མི་བུ་ཚོར་ཉེས་ཆད་ལྕི་མོ་གཅོད་པར་རྩོམ་དུས། སློབ་གླིང་ནས་སྡེ་ཁག་གཞུང་ལ་ངོས་ནས་ཅིས་ཀྱང་མི་བུ་དེ་ཚོར་ཐག་གཅོད་བྱེད་དགོས་པའི་བཀའ་བཙན་པོ་བབ་དུས། ཁོང་ལགས་གཙོ་བྱས་པའི་དགེ་རྒན་ཁ་ཤས་ཀྱིས་ལྡོག་སྟེ་རང་ཉིད་ཀྱི་མ་འོངས་པའི་མདུན་མར་རེ་ཐག་ཆད་དེ་སེམས་པ་ནག་རོག་གེར་གྱུར་བའི་མི་བུ་ཚོའི་རྒྱབ་ནས་ཀ་བཞིན་དུ་འགྲེང་ཏེ་སེམས་སྐྱ་མོ་དྲོད་ཀྱིས་གསོས་པ་དང་། རེ་བ་ལ་རྟག་བརྟན་གྱི་ ཉི་ཟེར་འཆར་དུ་བཅུག་པ་རེད། དོན་དེ་ནི་བར་སྐབས་དེ་ལ་ཆེས་གླེང་རིན་མངའ་བ་ཞིག་ཏུ་ཆགས་པའང་དོན་ལ་བདེན་དོན་གྱི་སྤྱན་ཟུང་མངའ་བའི་དགེ་རྒན་ཁོང་དང་ཁོང་དང་འདྲ་བའི་དགེ་རྒན་དག་གི་འབྲས་རྟགས་ཉིད་དུ་ཟད། དེར་མ་ཟད།ཉི་ཟེར་འདིའི་འོད་སྣང་གིས་ན་ནིང་ལོ་མཇུག་ལ། སྒེར་གཅོད་སྲིད་གཞུང་གིས་ཅི་མི་སྙམ་པར། འོ་སྐོལ་གྱི་བོད་སྐད་བོད་ཡིག་གི་མིད་ཐག་རྩ་བ་ནས་གཅོད་པར་རྩོམ་དུས་མ་ཡུམ་སློབ་གྲྭ་སྟེ། མཚོ་སྔོན་དགེ་ཐོན་སློབ་ཆེན་ནས་བོད་ཡིག་སྡེ་ཁག་གི་མི་བུ་ཚོ་གཞི་བྱས་པའི་ཆེས་གཞི་རྒྱ་ཆེ་བའི་རྔམ་སྟོན་ཁྲོམ་སྐོར་བྱས་ཏེ་མཐའ་གཅིག་ཏུ་ངོ་རྒོལ་དང་གྱེན་ལོག་བྱ་བར་རྩོམ་དུས་སྡེ་ཁག་གཞུང་གིས་འགན་ཁུར་གཅིག་ལྕོགས་སུ་བབ་པའི་ཁོང་གིས་ཤེས་ཡོན་པའི་རྒྱུ་འབྲས་བློ་མིག་གིས་རྒྱང་རིང་ལ་གཟིགས་ཏེ་ཅི་མི་སྙམ་པར་དེ་ལ་མངོན་ལྐོག་གང་རུང་ནས་རྒྱབ་སྐྱོར་དང་རྟིང་སྐུལ་བྱས་པ་དང་། ཁོང་གིས་དངོས་སུ་མི་བུ་ཁ་ཤས་ལ་མི་རིགས་སྐད་ཡིག་གི་ཕྱིར་དུ་སྲོག་ལ་བབ་ཀྱང་ཨམ་གཙིགས་བསྡམ་ཏེ་བདེན་དོན་གྱི་ངར་སྐད་འདོན་རྒྱུ་ནི་ང་ཚོ་རབས་འདིའི་འགན་འཁྲི་ཡིན་གསལ་འདེབས་ཡང་ཡང་བྱས་པ་རེད།

དེའི་ཕྱིར་ཁོང་ནི་བདེན་དོན་གྱི་ཕྱིར་དུ་དཔའ་དང་སྤོབས་པའི་གཟེངས་མཐོ་བའི་མི་བུ་ཚོའི་སེམས་གཏིང་གི་ཐོ་རེངས་སྐར་ཆེན་ཞིག་ཏུ་གྱུར་ཡོད་པ་དང་། སྒྲིག་འཛུགས་ཀྱི་རྒྱ་རུ་མི་ཚུད་པའི་སློབ་མ་པྲ་ཆལ་ཚོའི་སེམས་ནང་གི་བྱམས་ལྡན་གྱི་ཨ་ཕ་ཞིག་ཏུ་གྱུར་ཡོད་པ་སྟེ། ཁོང་གིས་གདོང་ལ་འཛུམ་གྱིས་ཁེངས་ནས་འོས་འཚམ་གྱིས་གཤེ་གཤེ་གཏོང་རྒྱུ་ལས་ཤེས་རབ་མི་དོད་པའི་ལས་ནི་གཏན་ནས་མི་བྱེད་རེད། མ་ཡུམ་སློབ་གྲྭའི་ནང་ཁོ་བོའི་མི་གཞིའི་ཐད་ལ་རྗེས་སུ་ཡི་རང་བྱེད་སའི་དགེ་རྒན་ཞིག་གི་དཔེ་མཚོན་ཅན་གྱི་སྣང་བརྙན་ཡང་ཏག་ཏག་དྲན ་ན་སེམས་སྨྲེང་བའི་དགེ་རྒན་བསྟན་གོ་ཡིན།

དེ་ལྟ་ནའང་། ཁོང་འདི་ལྟར་བུད་སོང་། ཁོང་འདི་ལྟར་ཁུ་སིམ་མེར་བུད་སོང་བས་ད་ནི་ངས་ཅི་ཞིག་བྱེད་འོས། ངས་ཅི་ཞིག་ནུས་སམ། ངས་ཁོང་ཡིད་ལ་དྲན་ཞིང་སེམས་ལ་སྒོམ་བཞིན་མིག་ཆུ་དང་ལྷན་དུ་སྐྱོ་གདུང་གི་སྙན་ངག་ཅིག་འབྲི་རྒྱུའམ། མཆོད་མེ་ཁ་ཤས་སྒྲོན་ཏེ་ཐག་རིང་ཐག་རིང་ཞིག་ལ་སྨོན་ལམ་འདེབས་རྒྱུ་ལས་ཅི་ཞིག་ནུས་ཏེ།གང་ཡང་མི་ནུས་སོ།།
དངོས་གནས་ངའི་མ་ཡུམ་སློབ་གྲྭར་ཤོར་རྒྱུ་མང་དྲགས་སོང་།འབུམ་རམས་པ་ཟླ་བ་ལགས་དང་། ཨ་རི་བ་ཁེར་ཝུན་སི་ཐུའུ་ཡ་ཐོ་ལགས། སྙན་བཟང་བ་དགེ་འདུན་ཀྱི་མཚོན་པའི་མི་བོ་ཆེ་མང་པོ་ཞིག་སློབ་གླིང་འདི་དང་ཁ་གྱེས་ནས་གཞན་དུ་སོང་ཤུལ་དུ། ད་དུང་ཁོང་ང་ཚོ་དང་འདི་ལྟར་གཏན་བྲལ་དུ་གྱུར་བ་ཇི་འདྲའི་ཕངས་ཨང་། དྭ་ཕྲུག་གི་རྣམ་ཐར་སྐྱོང་བཞིན་པའི་ང་ཚོ་ལ་སུ་ཞིག་གིས་མགོན་སྐྱབས་དང་དཔུང་གཉེན་བྱེད་ཨང་། སུ་ཞིག་གིས ……

ཟླ ༣ པའི་ཚེས ༢ ཉིན་སློབ་གྲྭའི་ནང་བྲིས།