མིག་ཤེལ་ནག་པོ།

དང་ཐོག་ཁོ་ལ་གཟུགས་འཛིན་མིག་ཤེས་གསལ་པོ་ཞིག་ཡོད།
ལོ་ནའི་ཚར་ལོང་དང་བསྟུན་ནས།
ཆེས་འཇིག་པའི་རབ་རིབ་ཅིག་ཁོའི་མིག་ཤེས་ལ་ཐོགས་སོང༌།
དེ་ནི་མིག་ཤེལ་ནག་པོ་གྱོན་པ་བཞིན།
མཐོང་སྣང་ཡོད་ཚད་ནི་ནག་རོག་གེ་བ་རེད།

མིག་ཤེལ་དེ་ནི།
ཁོས་རང་ལ་ཆེད་དུ་བདམས་ནས་ཉོས་པ་དང་མཚུངས།
མིག་ཤེལ་དེ་དང་ཁོའི་མིག་ཤེས་གཉིས་ངོ་བོ་གཅིག་ཏུ་གྱུར་ཟིན།
མིག་ཤེལ་དེ་གྱོན་པ་ནས་ཁོ་འཇིག་རྟེན་གྱི་དཀར་ཆ་དང་བྲལ་སོང༌།
འོ་ དེ་ནི་ཁོས་ཡོན་ཏན་སྦྱངས་པའི་གོ་རིམ་ཁྲོད་ཐོབ་པ་ཞིག་ཡིན་ནམ།

མིག་ཤེལ་དེ་གྱོན་པ་ནས་ཁོའི་མཐོང་སྣང་ནག་པོ་འབའ་ཞིག་ཡིན་པས།
སྡོམ་ཚིག་ནག་པོ་འགའ་ཤས་ཀྱང་ཨུ་ཚུགས་ཀྱིས་བརྒྱབས་སོང༌།
སློབ་ཕྲུག་འུག་པ་ལྟ་བུ་ཚོར་མུན་པའི་ལེའུ་ཞིག་གི་འགྲེལ་བཤད་བརྒྱབས་སོང༌།
འུག་པ་ལྟ་བུའི་སློབ་མ་ཚོས་ཀྱང༌།
མཚན་སྨག་ཀློང་ནས་ཁ་དོག་ནག་པའི་སྡོམ་ཚིག་གང་མང་བརྒྱབས་སོང༌།

འགྲེལ་བཤད་དང་སྡོམ་ཚིག་རྒྱག་དགའ་བའི་ཁོ་ཚོ།
གཡའ་དག་པའི་སེམས་ཁམས་ལ་ནག་ནོག་འབྱུག་པར་ཐོགས་པ་མི་འདུག
ཤེས་རིག་གི་སྒྲོན་མེས་ཀྱང་བསལ་མ་ཐུབ་པའི་མུན་ནག་དེ་ཚོ།
ང་མཐོ་ང་ཆེའི་ནད་འབུ་དང་འགྲོགས་ནས།
ཁོ་ཚོའི་ཀླད་པར་ཚང་བཅས་ཟིན།

མིག་ཤེས་དེ་རིགས་ཀྱིས་དཀར་རྐྱང་གི་དངོས་པོ་ཞིག་མཐོང་བ་ནི།
ཉི་འོད་འོག་གི་མཆོད་རྟེན་དཀར་པོ་བཞིན་གཟི་འོད་འབར་བའི་རང་ཉིད་རེད།
རང་ཉིད་ཁོ་ན་དཀར་པོར་མཐོང་ཆེ་བས།
འཇིག་རྟེན་འདི་དེ་བས་ཀྱང་ནག་པོ་ནག་རྐྱང་ཞིག་ཏུ་གྱུར་སོང༌།