མེ་ཕུང་། མེ་ཕུང་། མེ་ཕུང་།

ས་དཀྱིལ་ཚེ་བཀྲ། (བོད་འབྱོར།)

ཉག་ཕྲ་བའི་དུས་སུ། ཚེ་སྲོག་ལས་རྩ་ཆེ་བ་གཟི་བརྗིད་ཉིད།①
མེ་ཕུང་། གཅེས་པར་འོས་པའི་ཐ་ཚིག་ཅིག་སྟེ། སྙིང་ཉེ་བའི་མཆུ་སྒྲོས་ལ་འོད་ཀྱི་གོང་བུ་འཛུམ་པའི་མེ་ཏོག་མང་པོས་ཚ་སྡུག་གི་ཀློང་ནས། མཛེས་སྡུག་སྤར་སོང་། ལང་ཚོ་སྤར་སོང་། བདེན་དོན་སྤར་སོང་། མེ་ལྕེ་དྲག་པོ་འབར་བའི་མེ་ཕུང་རེ་རེ་ནི། ཏག་ཏག ཉི་ཟླའི་སྙིང་ལ་ཚི་ལུ་ཆགས་པའི་གཏམ་རྒྱུད་དག མུན་པའི་ཁྲོད་ཕྱེ་མ་ལེབ་ཁྲ་བོ་དག་གིས་སྒྱུ་རྩལ་གྱི་ལམ་ཁར་བདེན་སྣང་འཚོལ་བ་དང་མཚུངས་ཨང་།
ས་བོན་དང་རྩྭ་ལྗང་མི་སྐྱེ་བར་རྒྱུན་པར་ལོག་མར་ལུས་པའི་ས་ཞིང་གི་ཕར་སྣེ་ནས་དུས་ཡུན་རིང་བོར་ཚེ་སྲོག་རེ་རེ་རྨོན་དོར་ལ་འཕྲུལ་ནས་དཀའ་སྡུག་མང་པོ་མྱངས་ནའང་། ས་ལ་ཟུག་པའི་བཤོལ་མདའི་སྣེ་མོ་ཡི་ཐོང་ལྕགས་དེ་ཟད་མཐའ་མེད་པའི་ཁྱེད་ཀྱི་རུས་པ་ལགས་ན། ཨ་མས་ལག་ཟུང་ཟླུམ་ཕོར་འཁྱུད་པའི་བར་སྟོང་གི་ཚད་ན་ནམ་རྒྱུན་མཆོད་མེ་སྦར་ནས་གསོལ་བ་འདེབས་ཀྱིན་ཡོད།
ཀྭ་ཡེ། ཕོ་ཏ་ལའི་རྩིག་ངོས་ལ་བྲིས་པའི་ལྡེབས་རིས་དག མཉེན་ཞིང་གཡོ་བའི་ལྗོན་ཤིང་བཞིན་ལྕུག་ལྕུག་འདར་བའི་ངང་ཚུལ་གྱིས་རྒྱུད་སྐུད་མེད་པའི་རོལ་དབྱངས་ཤིག་གཏོང་གིན་འདུག མེ་ཕུང་རེ་རེའི་སྔ་རྗེས་སུ།
མི་ཚོགས་བཞུར་བའི་ཁྲོད་ནས་མགོ་བོ་སྒུར་བ་དེ་སྤྱང་ཀི་མཐོང་ནས་བྲེད་སྐད་ཤོར་བ་མ་ཡིན་པར་སྟབས་བདེ་གཞན་ལ་བསྟབས་ནས་དཀའ་ངལ་རང་ལ་བཞག་པ་ཉིད་དེ་གནམ་ས་བསྣོལ་མཚམས་ཀྱི་ཉི་ཟླ་འཆར་ནུབ་ལས་འཕྲོས་པའི་གཟི་འོད་ལགས།
མཚན་མོའི་ལྷིང་འཇགས་ལ་འགྲམ་པ་གླན་ཏེ་སྨྲ་བ་མེད་པའི་རྡོ་བའི་ཚོགས་ལ་མིག་ཆུ་བཞུར་བར་ཡང་ཁག་མི་འདུག་སྟེ། མེ་ཕུང་། མེ་ཕུང་གིས། མེས་པོའི་རྨི་ལམ་དུ་རྣག་འབྱམས་སུ་གྱུར་བའི་རུས་པ་དག་བདེན་པའི་ཨུ་ཚུགས་ཀྱིས་མེ་རུ་བསྲེགས་སོང་།
མེ་ཕུང་། མེ་ཕུང་གིས་ལོ་རྒྱུས་ཀྱི་མིག་ཀོང་ན་དཀག་པའི་ཟུངས་ཁྲག་དམར་པོ་དག་བྱིས་བློ་ཡི་དྭངས་གཙང་བར་ནས་ཀུ་རེ་དང་བཅས་ཟིན་ཐོར་འགོད་ཀྱིན་འདུག
ཀུ་རེ་འདིས། ཨ་མའི་བྱམས་དུངས་ལ་བདེན་པ་རྙེད་པའི་ཀུ་རེ་འདིས།
མུན་པའི་རྒྱབ་ལྗོངས་ལ་ཉི་འོད་འཚེར་བའི་ཀུ་རེ་འདིས།
རི་ར་བའི་ཁང་ཁྱིམ་གྱི་ས་ཆེན་དང་། ནམ་མཁའ་དང་། མི་སེམས་དང་བཅས་པའི་རང་བྱུང་ཁམས་ལ་ན་ཟུག་གཞན་ཞིག་བསླངས་སོང་། དན་རྟགས་གཞན་ཞིག་བཞག་སོང་།
ཉག་ཕྲ་བའི་དུས་སུ། ཚེ་སྲོག་ལས་རྩ་ཆེ་བ་གཟི་བརྗིད་ཉིད།
མེ་ཕུང་། མེ་ཕུང་། མེ་ཕུང་།

མཆན། ①འཇར་མན་གྱི་སྙན་ངག་པ་ཞི་ལེས་ཚིག་ལས་དྲངས།