མི་ཉག་དུང་བརྡ།
གཅིག
མེ་ལྕེ་འདི་དམྱལ་བའི་གཏིང་རྡོ་ནས། སྲིད་པའི་རྩེ་མོ་ནས། ཕྱོགས་བཞི་མཚམས་བརྒྱད་ནས་འབར་ཡོང་གི མེ་ལྕེ་འདི་ལས་འབྲས་དཔང་དུ་བཙུགས་ནས། མཆོག་གསུམ་སྐྱབས་སུ་བཟུང་ནས། སྐྱེ་བ་སྔ་ཕྱི་ཚད་གྲུབ་བཟུང་ནས་འབར་ཡོང་གི མེ་ལྕེ་འདི་མི་གྲངས་དུང་ཕྱུར་བདུན་ཅུའི་སེམས་ཁམས་ནས་མཆེད་ཅིང་། དུས་རབས་ཉེར་གཅིག་པར་བསགས་པའི་སེམས་ཀྱི་འབག་བཙོག་ཐམས་ཅད་འཚིགས་ནས་འབར་ཡོང་གི མེ་ལྕེ་འདིས་ཤར་ཕྱོགས་པ་དང་ནུབ་ཕྱོགས་པའི་རང་རང་གི་ཆོས་པ་དང་སྲིད་སྐྱོང་དབུ་ཁྲིད་སོགས་ལ་རང་ལྟ་མཆོག་འཛིན་དང་འཐེན་འཁྱེར་སྡང་སེམས་ཀྱིས་ཕོག་པའི་དུག་གི་འདབ་ལོ་ཡོད་རྒུ་རྨང་ནས་འཚིགས་ཡོང་གི མེ་ལྕེ་འདིས་ང་དང་ཁྱོད་ཀྱི་བར་ཐག་གི་གྱང་རྙིང་དེ་འཚིགས་ཡོང་གི ཁོ་དང་ཁོང་གི་བར་གྱི་ཉེ་རིང་གི་རས་ནག་གྲུ་གང་མ་དེའང་འཚིགས་ཡོང་གི མེ་ལྕེ་འདིས་དེ་རིང་གི་འཛམ་གླིང་མི་དམངས་ཡོངས་ཀྱི་སེམས་ངོགས་ན རང་དབང་དང་མང་གཙོ། དྲང་བདེན་སོགས་ཀྱི་སླད་མེད་པའི་ས་བོན་ཞིག་བཏབ་ཡོང་གི མེ་ལྕེ་འདིས་འགྲོ་བ་ཐུན་མོང་ལ་མཁོ་བའི་ཕན་ཚུན་བསམ་ཤེས་དང་སེམས་འགུལ་ཐེབས་པའི་སྙིང་དབུས་ན་ཚ་ཤུར་ཤུར་གྱི་ཟུག་གཟེར་རེའང་རྒྱས་སུ་བཅུག་ཡོང་གི
གཉིས
མེ་ལྕེ་འདིས་བོད་མི་རིགས་ཀྱི་ཁྱད་ནོར་ཆོས་དང་རིག་གཞུང་། ལེགས་བྱང་སློབ་གསོ་དང་བཅས་པ་ཐལ་རྡུལ་དུ་བརླག་འདོད་ཀྱི་རྣམ་ཤེས་ནག་པོ་དེ་འཚིགས་ཡོང་གི མེ་ལྕེ་འདིས་རྔམ་རྔམ་བརྗིད་བརྗིད་ཀྱི་བོད་མིའི་སེམས་པ་གཙང་མ་དེ་མཁའ་རུ་བཏེགས་ཡོང་གི མེ་ལྕེ་འདིས་ཆོལ་གསུམ་སྤུན་ཟླ་མིང་སྲིང་ཚོའི་ལག་རྡང་དམ་དུ་བཅིངས་ཤིང་འཆམ་མཐུན་གྱི་སེམས་ཁམས་དྭངས་མ་འདི་ལྷོད་ལ་བབ་ཏུ་བཅུག་ཡོང་གི མེ་ལྕེ་འདིས་སྔར་ལས་ལྷག་པའི་སྤུན་ཟླ་ཕན་ཚུན་གྱི་མཛའ་བརྩེ་དང་ཡིད་ཆེས སྙིང་སྟོབས། ཆེར་མཐོང་སོགས་ཀྱི་སྟོབས་ཤུགས་ཟབ་ཏུ་བཏང་ཡོང་གི མེ་ལྕེ་འདིས་འུ་ཚོ་རྩམ་ཟན་བོད་རིིགས་ཡོངས་ཀྱི་ཕུགས་འདུན་གཅིག་དང་རྨི་ལམ་གཅིག།རྐང་ལམ་གཅིག འཚོོ་བ་གཅིག་གི་ངོས་འཛིན་ཇེ་གསལ་དུ་བཏང་ཡོང་གི མེ་ལྕེ་འདིས་བོད་མི་ས་ཡ་དྲུག་གི་རྣམ་ཤེས་གཅིག་དང་བསམ་བློ་གཅིག འཆི་སེམས་གཅིག སྐྱེ་བ་གཅིག་གི་དཔང་པོ་བྱེད་དུ་བཅུག་ཡོང་གི མེ་ལྕེ་འདིས་བོད་མིའི་སེམས་ཁམས་དམར་ལྡིང་འདི་ཤཱཀྱ་སེང་གེ་ནས་མཆེད་ཅིང་སེམས་པ་ཆེན་པོ་མང་པོ་མང་པོ་ཞིག་བརྒྱུད་པའི་འཚེ་མེད་ཀྱི་མི་གཤིས་བླ་ན་མ་མཆིས་པ་ཞིག་ཡིན་པར་དེ་རིང་གི་འཛམ་གླིང་མི་དམངས་ཡོངས་ལ་ར་སྤྲོད་བྱེད་དུ་བཅུག་ཡོང་གི མེ་ལྕེ་འདིས་ས་སྒང་ཆེན་མོ་འདིའི་སྟེང་དུ་དེ་ལས་ལྷག་པའི་འཐབ་རྩོད་ཀྱི་ནུས་ཤུགས་བརྟན་ཅིང་གུ་ཡངས་ཀྱི་བསམ་བློ་སླད་མེད་ཅིག་དང་། སྐྱེ་འགྲོ་ཡོངས་ཀྱི་རང་གཤིས་དང་མཐུན་པའི་དཔུང་འདེགས་ཤིག་མེད་པར་ངེས་པ་ཆེན་པོ་རྙེད་དུ་བཅུག་ཡོང་གི མདོར་ན་མེ་ལྕེ་འདི་ནི་འཁོར་བའི་བླ་སྲོག་ཡིན། ཞི་བའི་འཚོ་བཅུད་ཡིན།
གསུམ
མེ་ལྕེ་འདི་གནམ་བདེ་སྒོ་མོ་ཆེ་ནས་མཆེད་ཅིང་རྒྱ་ནག་མི་མང་ཚོགས་ཁང་ཆེན་མོ་ནས་འབར་ཡོང་བའི་མི་ཡུལ་ལ་མཐོང་དཀོན་པའི་མེ་ལྕེ་ཞིག མེ་ལྕེ་འདི་ཡི་རྩ་བ་དེད་དེ་རྩེ་མོར་བསྙེགས་ན། སངས་རྒྱས་ཆོས་ལུགས་ཀྱི་བཤད་ཚུལ་ཞིག་སྟེ། མ་རིག་པའི་དགྲ་བོས་འབར་བའི་མེ་ལྕེ་ཞིག་ཡིན་ཟེར། ཡིན་ནའང་། ང་ཚོ་སོ་སོ་སྐྱེ་བོ་ཚུར་མཐོང་ཚོའི་སྣང་ཚུལ་ལ། འཛམ་གླིང་རྒྱ་ཆེ་མི་མང་གིས་མཐོང་ཚུལ་ལ། མའོ་ཡི་ཀླད་གཞུང་ནས་བརྒྱུད་དེ་ཏིང་གི་སྙིང་ཁམས་དང་། ཅང་གི་སྲོག་རྩ། ཧུའུ་ཡི་ལག་མགོ་ནས་འབར་ཡོང་བའི་དམར་ལྷོག་ལྷོག་གི་མེ་དཔུང་སོ་ལྔ་ཞིག མེ་ལྕེ་འདི་རྒྱ་རིགས་མི་གྲངས་དུང་ཕྱུར་བཅུ་གསུམ་གྱི་མིག་མདུན་ནས་འབར་ཡོང་བའི་དྲང་བདེན་མ་ཡིན་པའི་སྲིད་དབང་སྒེར་སྤྱོད་རིང་ལུགས་ཀྱི་ཐེར་འདོན་གྱི་མེ་ལྕེ་ཞིག མེ་ལྕེ་འདི་པེ་ཅིང་དམར་ལུགས་དང་རྡ་སའི་རིང་ལུགས་གཉིས་ཀྱི་འགལ་འདུ་སྟོན་པའི་མ་འོངས་པའི་རྨི་ལམ་ཞིག མེ་ལྕེ་འདི་ནམ་ཡང་རྒྱ་རྒྱ་ཡུལ་ན་སྐྱིད བོད་བོད་ཡུལ་ན་སྐྱིད་པའི་ལོ་རྒྱུས་ཀྱི་དན་རྟགས་ཀྲོང་ངེར་བསླངས་པའི་མེ་རི་ཞིག མེ་ལྕེ་འདི་ནམ་ཡང་རྒྱ་གུང་ཁྲན་ལ་མི་དབང་བའི་བོད་པ་ཚང་གི་མེ་ལྕེ་ཞིག མེ་ལྕེ་འདི་པེ་ཅིང་གཞུང་གིས་དུས་རབས་ཉེར་གཅིག་པའི་རྒྱ་རིགས་ན་གཞོན་རྣམས་ལ་མི་འདོད་བཞིན་དུ་གཞན་ལ་སྟོན་དགོས་བྱུང་བའི་བཙན་འོག་གི་ཚ་ལུམ་ལུམ་ཀྱི་ངོ་པགས་སྲ་མོ་ཞིག མེ་ལྕེ་འདི་དྲང་བདེན་གྱིས་འཚོ་བའི་རྒྱའི་མི་བུ་དག་ལ་སེམས་འགུལ་ཐེབས་པའི་མེ་རླབས་ཤིག མེ་ལྕེ་འདི་སྒེར་གཅོད་སྲིད་གཞུང་ཞིག་གི་སྙིང་རྩ་གས་པའི་སྔ་ལྟས་ཤིག
མི་ཉག་པ་ཁྱེད་ཀྱི་རྩོམ་ཡིག་དེ་ལ་རིན་ཐང་དང་གཟི་བརྗིད་ཀྱི་འོད་སྣང་རབ་ཏུ་འཚེར་གྱིན་འདུག་་་་་་་་་་་་་་
མུ་མཐུད་བཞིན་དུ་འབྲི་རོགས་ཞེས་འབོད་བསྐུལ་ནན་གྱིས་ཞུ་བཞིན་ཡོད་ཐུགས་ལ་འཇགས་རོགས་ཨ་་་་་་་་་་་་་་་་་་་་་་་་་་ཚོར་ཤུགས་ཀྱི་བྲོ་བ་ལྡན་པ་སེམས་ཁམས་ལ་སྙིང་སྟོབས་ཀྱི་རྦ་རླབས་དྲག་ཏུ་གཡོ་བའི་ནུས་ཤུགས་ཤིག་རང་བཞིན་གྱིས་གཏེར་གྱིན་འདུག་་་་་་་་་མི་ཉག་པ་ད་དུང་་་་་་་་་་་ད་དུང་་་་་་་་་་་་་་་་་་་ད་དུང་་་་་་་་་་་་་་་་་
དྲ་གྲོགས་ལགས
ཁྱེད་ཀྱིས་བདག་གི་བསམ་ཚུལ་ལ་ཐུགས་སྣང་དང་བསྔགས་བརྗོད་བྱས་འདུག་པས། སྙིང་དབུས་ནས་ཐུགས་རྗེ་ཆེ་ཞུ། ཕྲན་ལ་མཚོན་ན་རྩོམ་རིགས་ཀྱི་སྐོར་ལ་ཉམས་མྱོང་དང་། བྱང་ཆ་སོགས་གང་ཡང་མེད་ཀྱང་ཉེ་ཆར་བོད་ཀྱི་སྣོད་བཅུད་དང་བཅས་པ་འཇིག་ལ་ཉེ་བའི་གོད་ཆག་ཁྲོད། ཁོང་རྣམ་པས་ལུས་ངག་ཡིད་གསུམ་གྱི་བློས་བཏང་འདིར་ཅི་མི་སྙམ་པའི་སེམས་ཚོར་དྲག་པོས་ཁ་བརྡ་ཙམ་ཡིན།
མེ་ལྕེ་འདི་ཧི་མ་ལ་ཡའི་ཕར་རྒྱབ་ནས་དྲག་ཏུ་མཆེད་པའི་ལོ་མང་སྡུག་གི་མནར་བ་ཞིག མེ་འདིས་མདོ་དབུས་ཁམས་གསུམ་གྱི་དཔུང་པ་གཅིག་ཏུ་སྒྲིལ་ཏེ་འདི་ཕྱིའི་སྐྱབས་གནས་ལ་དད་སེམས་བཅོས་མིན་སྐྱེས་པའི་བདེན་རྟགས་གཤའ་མ་ཞིག མེ་ལྕེ་འདི་ཚེ་སྲོག་ཞུན་སྡོང་བྱས་པའི་གོ་ལའི་ཡང་སྟེང་གི་ཚེ་འབར་སྔར་མེད་ཅིག མེ་ལྕེ་འདི་ཡོད་པས་བྱམས་བརྩེ་ཡི་རྟོག་པ་བརྙེས་པའི་དབུ་ཁྲིད་དག་གིས་འཕྲིན་པ་བརྗིད་པོ་ཞིག་ཧུའུ་ལ་བཏང་ཡོད མེ་ལྕེ་འདི་ཡོད་པས་བདེན་པ་ར་སྤྲོད་ཀྱི་གསར་འགོད་པའི་བརྙན་ལམ་ནས་ཉམ་ཆུང་བོད་མིའི་སྣང་བརྙན་ཚེ་སྲོག་ལ་བརྩི་མཐོང་བྱེད་མཁན་དག་གི་མིག་ལ་བསྟར་ཡོད
གོང་གི་མི་ཉག་དུང་བརྡ་ཞེས་བའི་གསར་་བྱུང་རྩོམ་པ་པོ་ཞིག་གི་རང་ཉིད་ཀྱི་རྣམ་དཔྱོད་ལས་བྱུང་བའི་རྩོམ་ཐུང་འདི་མཐོང་ནས་བདག་གིས་ཀྱང་ཁོང་གི་རྩོམ་ཡིག་དེའི་སྐོར་ལ་སྐད་ཆ་འགའ་བཤད་འདོད་བྱུང་། སྤྱིར་རྩོམ་པ་པོ་ཞིོག་ཡིན་ན་རང་ཉིད་ཀྱི་སེམས་འདུ་ཡོད་ཚད་པྱི་རུ་བཏོན་ནས་སྙན་ངག་འབྲི་རྒྱུ་ནི་སྙན་ངག་པས་ཁྱད་ཆོས་ཡིན་ལ་རྩོམ་པ་པོ་ཁོང་གིས་ཀྱང་རང་ཉིད་ཀྱི་སེམས་ཚོར་ལས་བྱུང་པའི་རྩོམ་ཡིག་འདི་ལ་བརྗོད་བྱ་དང་རྗོད་བྱེད་གཉིས་ཀྱི་ཆ་ནས་འབུར་དུ་ཐོན་འདུག་ལབ་ན་འུད་ཤོད་དུ་མི་འགྲོ་སྙམ། འོན་ཀྱང་རྩོམ་པ་པོའི་གོང་གི་ལྷུག་རྩོམ་དེ་ལ་ག་ལེར་བལྟས་ནས་བཤད་ན་རྩོམ་པ་པོས་མིང་ཚིོག་འགར་བོད་ནང་གི་རྩོམ་པ་པོ་རེ་ཟུང་གི་ཤུགས་རྐྱེན་ཐེབས་མེད་དམ་སྙམ་པའི་ཚོར་སྣང་བྱུང་། གང་ཡིན་ཟེར་ འཆམ་མཐུན་གྱི་ སྤྱི་ཚོིགས་དང ་ཞེས་པ་ལ་སོགས་དམར་ཕྱོགས་ཀྱི་ལྟ་བ་གོམས་པའི་རྩོམ་པ་པོ་ཁ་ཤས་ཀྱི་ཁ་ན་ནམ་རྒྱུན་འདི་ལྟར་སྣང་མོད་ད་དུང་ངས་བལྟས་ན་ཚིག་འདི་དག་ནི་རྒྱ་ནག་གི་ཆབ་སྲིད་ཀྱི་ཐ་སྙད་རེ་མིན་ནམ་སྙམ། གོང་གི་འདི་དག་ནི་བདག་གི་རྩོམ་པ་པོ་ལ་བསམ་ཚུལ་གྱི་ཚུལ་དུ་བྲིས་པ་མ་གཏོགས་མཐའ་གཅིག་ཏུ་ནོར་འདུག་ཟེར་བ་མིན་ལ་ཉིད་ཀྱི་རྩོམ་ཐུང་འདིའི་གོ་རིམ་དང་སྐད་ཆའི་སྒྱུ་རྩལ་སོགས་ལ་བདག་གིས་གདང་འཇོག་ཚད་མཐོན་པོ་བྱེད་གྱི་ཡོད།
ངས་བལྟ་སྟངས་ནོར་མེད་ན་གོང་གི་རྩོམ་ཡིག་འདི་སྐུ་ཞབས་ ཨ་འཇམ་ གྱི་རྩོམ་གཤིས་ཡིན་པ་འདྲ།
ཁྱེད་ཀྱིས་ལྟ་སྟངས་ནོར་མི་འདུག
མུ་མཐུད་ནས་ལྟ་རོགས