(ལས་དོན་ཇི་འདྲ་ཞིག་ཡིན་ཡང་གང་འཚམ་རྒྱུན་སྲིང་གི་རྗེས་དེས་དོན་གནད་ཅིག་ར་སྤྲོད་ཀྱི་ཡོད་པ་ཚོར་དགོས།)
འཇིགས་མེད་བློ་གྲོས།
ཀིརྴི་ན་མུར་ཏིས། སྲིད་དོན་པ་ཚོས་ཚ་དམག་མི་རྒྱག་པའི་གོ་སྐབས་སྲིད་ཀྱང་དཔལ་འབྱོར་གྱི་དམག་འཁྲུག་རྒྱུན་དུ་བརྒྱབ་སྟེ་འཛམ་གླིང་གཅིག་སྒྲིལ་ནམ་ཡང་བྱེད་མི་སྲིད་པར་བཤད། ད་ལྟ་འཛམ་གླིང་ནང་དཔལ་འབྱོར་འགྲན་རྩོད་ཀྱི་དམག་འཁྲུག་ཤིག་འཁྲུག་ཆ་དོད་པོས་རྒྱག་གིན་ཡོད་ཅིང་། འཁྲུག་ཆེན་འདིའི་ནང་ཆེས་འབུར་གཟུགས་སུ་ཐོན་པའི་ཁ་གཏད་གཉིས་ནི་ཨ་རི་དང་རྒྱ་ནག་གཉིས་ཡིན། རྒྱལ་ཁབ་འདི་གཉིས་ཀྱི་གཞི་རྩའི་ལྟ་གྲུབ་དང་ཆབ་སྲིད་ཀྱི་སྒྲོམ་གཞི། རིག་གཞུང་གི་ངོ་བོ་སོགས་མངོན་གསལ་དོད་པོའི་ཁྱད་པར་ཆེན་པོ་དེས་འཁྲུག་ཆེན་གྱི་ངོ་བོ་ཛ་དྲག་ཏུ་གཏོང་གིན་ཡོད་ཅིང་། ཕན་ཚུན་ཡིད་ཆེས་མེད་པའི་གནས་བབ་དང་ཕྱོགས་ཕན་ཚུན་གྱི་རང་རློམ་དང་ཁེངས་དྲེག་གི་སྟོབས་ཤུགས་ངོམས་རེས་བྱེད་པའི་རྣམ་པ་དེས་སྐབས་རེ་རྒྱལ་སྤྱིའི་ཁྱོན་ལ་སེམས་འཚབ་ཀྱང་སློང་གི་ཡོད།
དེང་སྐབས་རྒྱ་ནག་གི་ཆབ་སྲིད་མི་སྣ་ཚོས་འཁྲུག་ཆེན་འདི་ལས་རྒྱལ་ཐབས་ཀྱི་ཧུར་བརྩོན་ལ་བློ་རྩེ་གཅིག་སྒྲིམ་གྱིས་ཞུགས་ཀྱིན་ཡོད་ཅིང་། ལོ་ངོ་སུམ་བཅུའི་དུས་ཡུན་རིང་དཔལ་འབྱོར་རྩོལ་སྒྲུབ་ཀྱི་མཆོངས་སྐྱོད་ཆེན་པོའི་ཐོད་བརྒལ་གྱི་གྲུབ་འབྲས་སུ་འཛམ་གླིང་དཔལ་འབྱོར་ཨང་གཉིས་པའི་གནས་བབ་བགེགས་བར་མེད་པར་ཐོབ་པ་དེས་ཁོང་ཚོར་གདེང་སྤོབས་ཐོལ་པ་ཞིག་དང་ཧུར་བརྩོན་གྱི་སྤྲོ་སེམས་གསར་པ་ཞིག་ཀྱང་རྙེད་ཡོད། ད་དུང་ཞིབ་འཇུག་པ་འགས་མི་རིང་བའི་དུས་སྐབས་ནང་སྟོབས་ཤུགས་དང་དཔལ་འབྱོར་གྱི་འགྲན་རྩོད་ཆེན་པོའི་ལམ་ཆེན་སྟེང་རྒྱ་ནག་ཨ་རིའི་སྔོན་ལ་ཤོར་སྲིད་པའི་ཚོད་དཔག་བྱེད་ཀྱིན་ཡོད། འོན་ཀྱང་འཁྲུག་ཆེན་འདི་ལས་རྣམ་པར་རྒྱལ་བར་འགོག་ཐབས་མེད་པའི་གདོང་ཐུག་མང་པོར་ཁ་གཏད་བཅར་དགོས་པ་ལས་ལས་སླ་པོ་གཏན་ནས་མེད།
ད་ལྟའི་རྒྱ་ནག་གི་དབང་འཛིན་པས་འབྱུང་འགྱུར་རྒྱ་ནག་གི་རྒྱལ་ཁར་རྨང་གཞིའི་བར་ཆད་བྱེད་པའི་རྒྱུ་རྐྱེན་གལ་ཆེ་ཤོས་ཅིག་ནི་བོད་དང་ཤིན་ཅང་སོགས་ནུབ་ཕྱོགས་ས་ཁུལ་དུ་ཡོང་བཞིན་པའི་འཐབ་རྩོད་དེར་ངོས་འཛིན་བྱེད་ཀྱི་ཡོད། ཁོང་ཚོས་འཐབ་རྩོད་འདི་རིགས་ལ་དཀྱིལ་ཤར་ཡུལ་གྲུའི་ཡོ་འཁྱོམ་ལྟ་བུའི་སྒུལ་ཤུགས་ཡོད་པར་མཐོང་གི་ཡོད་ཅིང་དཔལ་འབྱོར་རྒྱལ་ཕམ་འགྲན་རྩོད་ཀྱི་ལམ་ཆེན་ནས་གོམ་ཁ་ཕྱིར་འཐེན་བྱེད་པའི་ནུས་ཤུགས་ཡོད་པར་མཐོང་གི་ཡོད། དེར་བརྟེན་འཐབ་རྩོད་འདི་རིགས་མངོན་འགྱུར་ལྟ་ཅི་ཕྱིའི་རྟགས་མཚན་ཙམ་མངོན་ན་ཡང་ལམ་སེང་འབུར་འཇོམས་བྱེད་པའི་སྲིད་བྱུས་འཛིན་གྱི་ཡོད།
བོད་མིའི་ཤ་ཁྲག་འཚིག་པའི་མེ་ལྕེ་དམར་པོ་འཕྲལ་མར་གདུག་རྩུབ་ཀྱིས་བསད་དེ་འབར་རྒྱུན་སྲིང་བའི་གོ་སྐབས་མེད་ཀྱང་། མེ་ལྕེ་འདིས་ཏང་གི་རྒས་གཉེར་ཐེབས་པའི་གདོང་རིས་དང་རུལ་སུངས་སུ་གྱུར་པའི་ནང་ཆ་ཡོངས་རྫོགས་འཛམ་གླིང་ལ་གསལ་པོར་བསྟན་པ་དང་། ཁ་བ་རི་པའི་མི་རབས་གསར་པའི་སྙིང་སྟོབས་དང་ལ་རྒྱ་མངོན་པར་མཚོན་པར་བྱས་ཤིང་། དཀར་ནག་བདེན་རྫུན་གྱི་བདར་ཤ་གཙང་མར་བཅད་ཡོད། བྱུང་རབས་ཀྱི་དེབ་ཐེར་ནང་དུ་གཟི་བརྗིད་ཀྱི་ཟུབ་མེད་ཟིན་ཐོ་བཀོད་ཟིན། དེར་བརྟེན་ད་ལྟའི་རྒྱལ་སྤྱིའི་ཁོར་ཡུག་གི་གནས་བབ་དང་རྒྱ་ནག་གི་བྱ་སྤྱོད་འཁྱེར་སོ། རང་རེའི་མདུན་དུ་ལྷགས་པའི་མདུན་ལྗོངས་ཀྱི་རྒྱ་ཁྱོན་གང་ལ་གཞིགས་ཀྱང་གཞིས་བཞུགས་སྤུན་ཟླ་ཚོས་ཐེངས་འདིའི་ཚེ་སྲོག་མེར་སྒྲོན་གྱིས་བདེན་པ་བདར་བའི་ལས་འགུལ་དེ་དུས་དང་གནས་སྐབས་ཀྱིས་སྦྱིན་པའི་སྐབས་བབ་ཀྱི་དགོས་མཁོ་གྲུབ་ཟིན་པའི་ངོས་འཛིན་གྱིས་རེ་ཞིག་མཇུག་བསྡུའི་ཕྱོགས་ལ་དགོངས་བཞེད་གནང་རྒྱུ་གལ་ཆེར་མཐོང་བཞིན་ཡོད།
དཔལ་འབྱོར་གྱི་རླབས་ཆེན་རྒྱལ་ཁར་རྔམས་སེམས་ཧ་ཅང་ཆེ་བའི་དུས་སྐབས་ནང་རྒྱ་གཞུང་གིས་དེའི་འགལ་ཟླར་འགྱུར་རུང་གི་བྱ་དངོས་ཅི་འདྲ་ཞིག་ཡིན་ཡང་ཐོལ་སྐྱེས་རྦད་གཅོད་བྱེད་རྐྱང་ལས། རྒྱུ་རྐྱེན་དང་རྒྱབ་ལྗོངས་ལ་རྟོག་ཞིབ་ཀྱིས་དཀའ་རྙོག་གཙང་སེལ་བྱེད་པའི་ལམ་ཁ་བསྟེན་མི་སྲིད། ཐ་ན་ལམ་ཁ་འདི་རིགས་བསྟེན་པ་དེ་ཀ་འགལ་རྐྱེན་གྱི་གཙོ་བོར་ངོས་འཛིན་བྱེད་ཀྱི་ཡོད། དེས་ན་ད་ལྟ་ནི་ཕུགས་འཕེར་འབྲས་ཅན་གྱི་ལས་འགུལ་ཞིག་སྤེལ་དགོས་པའི་ཕྱོགས་ནས་བཤད་ན་ང་ཚོའི་མདུན་དུ་ལྷགས་པའི་གོ་སྐབས་ནི་སོ་སོའི་འཇོན་ཚོད་ཀྱིས་མི་རིགས་ཀྱི་ངོ་རྟགས་རྒྱུན་འཛིན་བྱེད་པའི་དུས་སྐབས་ཡིན། རང་དབང་བསྐྱར་གསོ་བྱུང་བའི་ཁོར་ཡུག་ནང་སྤྱི་ཚོགས་འཛུགས་སྐྲུན་གྱི་རྨང་གཞིར་གྱུར་པའི་དེང་རབས་ཤེས་ཡོན་སྦྱོང་བའི་གནས་སྐབས་ཡིན། གལ་ཆེའི་ལས་དོན་འདི་གཉིས་ལ་ང་ཚོས་ནམ་ཡང་སྣང་ཆུང་དུ་གཏོང་མི་རུང་ཞིང་། ལས་དོན་འདི་གཉིས་ལ་ཧུར་བརྩོན་གྱིས་ཞུགས་ནས་ཕྱིན་ན། དུས་དང་གནས་སྐབས་ཀྱིས་ནམ་ཞིག་ང་ཚོར་ཡར་ལངས་བྱེད་པའི་གོ་སྐབས་སྤྲོད་ངེས། སྐབས་དེ་དུས་ང་ཚོས་དུས་དང་ཁོར་ཡུག་གིས་དང་ལེན་བྱ་ངེས་ཀྱི་ཡར་ལངས་བྱེད་ཐུབ།
ད་ལྟའི་བོད་ཁམས་སུ་ང་ཚོའི་ཡར་ལངས་ལ་དང་ལེན་བྱེད་པའི་ཁོར་ཡུག་མི་འདུག ང་ཚོའི་ཤ་ཁྲག་བསྲེགས་པའི་མེ་ལྕེ་དམར་པོས་སྐར་ལྔའི་དར་དམར་བསྲེགས་པའི་ཁོར་ཡུག་མི་འདུག བོད་ཁམས་ཀྱི་ཁོར་ཡུག་དང་གོ་སྐབས་ཡོངས་རྫོགས་དམར་དམག་དང་མེ་མདས་ཟིན་འདུག རྒྱལ་སྤྱིའི་ཁྱོན་གྱི་ཁོར་ཡུག་ཡོངས་རྫོགས་དཔལ་འབྱོར་དང་དམག་ཤུགས་ཀྱི་ནུས་པས་བཟུང་འདུག ཐ་ན་ང་ཚོའི་ཡར་ལངས་ལ་དང་ལེན་བྱེད་པའི་ཁོར་ཡུག་ཅིག་བསྐྲུན་རྒྱུའི་ཁོར་ཡུག་ཀྱང་མི་འདུག ངས་རྒྱལ་ཞེན་གྱི་སྙིང་སྟོབས་གཅོག་གི་མེད་ཅིང་། རླབས་ཆེན་གྱི་ཡར་ལངས་ལ་ལེ་བདའ་བྱེད་ཀྱིན་མེད། ངས་རང་གི་འཆར་སྒོ་ཞིག་སྦས་འགེབ་མེད་པར་སྙན་སྒྲོན་ཞུ་བཞིན་ཡོད།
ང་ཚོར་བཙན་གནོན་མནར་གཅོད་ཀྱི་ན་ཟུག་ཇི་འདྲའི་ཆེ་ན་ཡང་། ཟུག་སྐད་རྒྱག་པའི་དུས་སྐབས་ནམ་ཡིན་ལ་མཉམ་འཇོག་བྱེད་དགོས་ཀྱི་འདུག རླབས་ཆེན་གྱི་ཚེ་སྲོག་གསོན་པ་མེ་ལྕེའི་ཤུལ་ནས་དུ་བ་ལྟར་ཡལ་སྲིད་པའི་ཚོད་དཔག་བྱེད་དགོས་ཀྱི་འདུག ངའི་བསམ་པར་རྒྱ་ནག་གི་ཞིང་ཆེན་འགར་ཡུལ་མིའི་ཡར་ལངས་ཆེན་པོ་བྱེད་པའི་དུས་སྐབས་སམ། རང་བྱུང་ཁོར་ཡུག་གི་ཉམས་ཉེས་ཆེན་པོ་ཞིག་གློ་བུར་དུ་མངོན་པ། བོད་ཁུལ་དུ་དམག་མིའི་གྲངས་འབོར་ཅུང་ཟད་ཉུང་དུ་སོང་ཞིང་། སོ་ལྟ་དང་ཆབ་སྲིད་ཀྱི་ཚོར་སྣང་ཅུང་ལྷོད་པའི་དུས་སྐབས་དང་ཁོར་ཡུག་ནི་ང་ཚོའི་ཡར་ལངས་ལ་དང་ལེན་བྱེད་པའི་གནས་སྐབས་ལེགས་ཤོས་དེ་ཡིན་ངེས། དེ་དུས་ང་ཚོས་སྡེབ་ལངས་བྱས་ཚེ་དཀྱིལ་ཤར་ཡུལ་གྲུའི་ཡར་ལངས་ལྟ་བུ་ཞིག་གི་འགུལ་སྐྱོད་བསླེབ་སྲིད། གང་ལྟར་ཡང་ང་ཚོས་ཁོར་ཡུག་གི་གདམ་ཀ་ཐུབ་རུང་གི་ལས་འགུལ་སྤེལ་དགོས་པ་ལས། སྙིང་སྟོབས་དང་ཆོད་སེམས། ལྷག་བསམ་དང་བདེན་སྐྱོང་གི་ནུས་ཤུགས་རྐྱང་པས་འགྲོ་ལམ་གཏོད་ཐུབ་པ་དཀའ་བར་སྣང་།
ཚེ་སྲོག་མེར་སྒྲོན་གྱི་རླབས་ཆེན་ཞི་རྒོལ་ནི་འདས་དོན་གསལ་བྱེད་ཀྱི་མེ་ལྕེ་དང་ཁ་བའི་ལྗོངས་ཀྱི་བློ་ལྡན་གཞོན་ནུ་ཚོར་འབྱུང་འགྱུར་གྱི་མདུན་ལྗོངས་གསལ་སྟོན་བྱེད་པའི་སྒྲོན་མེ་ཡང་ཡིན། དེ་ལྟ་ན་ཡང་མེ་ལྕེ་འདིས་ད་དུང་དོན་དག་གཞན་ཞིག་སྟོན་བཞིན་ཡོད་པ་ནི་གཅིག་ལས་གཉིས་མཆེད་ཀྱི་རྒྱུན་མཚམས་དེ་རེ་ཞིག་འཇོག་པ་གལ་ཆེ་བ་དེ་ཡིན།
ཁོ་བོས་ཉེ་ཆར་གྱི་རྩོམ་ཡིག་ཅིག་གི་ནང་རང་རེའི་དཔའ་རྒོད་ཚོར་ལས་འགུལ་མཚམས་འཇོག་གནང་རོགས་ཞེས་པའི་འབོད་སྐུལ་ཞུ་རྒྱུ་ལས་རྒྱ་གཞུང་ལ་ཉེས་མེད་བོད་མི་དམར་གསོད་གཏོང་རྒྱུ་མཚམས་འཇོག་དགོས་པའི་འབོད་སྐུལ་ཤུགས་ཆེ་བ་བྱེད་དགོས་སྐོར་བཤད་ཡོད་ཀྱང་། དེ་རིང་དེ་ལས་ལྡོག་སྟེ་བྱ་དགོས་བྱུང་།
དྲ་གྲོགས་དགའ་བོ། ཡང་ཁྱོད་མགོ་ཡོམ་འཁོར་གྱིན་ཡོད་པ་འདྲ།
དྲྭ་གྲོགས་བོན་རྒྱ་ལགས། ཕྱོགས་ངོས་གང་ནས་བསམས་ཀྱང་ད་ལྟའི་ང་ཚོའི་གདམ་ག་ནི་རི་བོང་ལས་སྡོད་ཙོག་པ་ཞིག་བྱ་རྒྱུ་དེ་ཡིན་པར་མཐོང་གི་འདུག
རི་བོང་བྲོས་ནས་སོང་ན་ཙོག་ནས་བསྡད་ན་རྔོན་པས་ལག་རྡོ་བྱེད་པ་ལ་ཁྱད་པར་མེད་པས། ཝ་རྔ་མ་ཤུལ་ལེ་འབྲོ་བ་ལས་སྟག་འཛུམ་དྲུག་གྱི་ལིར་ཤི་ན་མི་དགའ་འམ།
སྤྱང་ཐལཤོར་བའི་རྔོན་པ་ཡིས། །
རི་བོང་ཙོག་པ་རྡོ་རུ་འཁྲུལ། །
རྔོན་པ་དེ་ཚོས་རྡོ་ལ་མེ་མདའ་རྒྱག་གི་མ་རེད།
བོན་རྒྱ་ཁྱོད། བརྡ་ལུ་ཁ་ཤོམས་ཆེ་ན་དཔའ་བོ་དགྲ་ཁ་གཡུགས་ཟེར་བ་དེ་མ་སོང་ངམ། རྒྱ་ལ་མི་ཐུབ་པར་བོད་ཀྱི་ཆོས་དང་མི་རིགས་ལ་གནོད་ཚབས་ཆེ་ཤོས་དེ་རང་སྲོག་གཅོད་པའི་མེ་བསྲེག་ལས་འགུལ་འདི་རེད། ད་མཚམས་བཞག་ན་བཟང་།
རྩོམ་ཡིག་འདི་འབྲི་མཁན་དེ་སྔ་ནོར་གླིང་ཉམས་ཞིབ་ནང་བསྡད་མྱོང་བའི་མགོ་ལོག་འཇིགས་མེད་བློ་གྲོས་མིན་པ་འདྲ། བོན་རྒྱ་བླ་རྒན་འདི་འཁྲུལ་གྱི་ཡོད་མེད་འགྲོ།
དྲ་གྲོགས་ཚོ་ང་ཚོའི་མེར་བསྲེག་གི་ལས་འགུལ་འདི་ལ་འདི་གྱིས་དང་འདི་མ་གྱིས་བཤད་ས་ཤིག་མི་འདུག་
ང་ཚོ་ལས་བོད་ནང་གི་བོད་མི་ཚོ་ཚོར་བ་རྣོ་ལ་གནས་སྟངས་རྒྱུས་ལོན་ཆེ་བར་འདུག
མ་ཟད་ས་ཡ་དྲུག་གི་ལས་དོན་ཆེད་ལས་འགུལ་སྤེལ་བ་ལ་ཁ་གཏད་ཀྱི་འགྲེལ་བཤད་ནང་བཞིན་ང་ཚོས་མ་རྒྱབ་ན་ཡག་པོ་འདུག་
མེ་བསྲེགས་གཏོང་ཆོག་དང་མི་ཆོག་ཅེས་བོད་ནང་གི་སྤུན་ཟླ་ཚོ་ལ་དབང་བ་ལས་བཙན་བྱོལ་གྱི་ཁ་མཁས་ཚོ་རེ་སྐུལ་ཙམ་ཞུ་རྒྱུའི་ཐོབ་ཐང་ལས་མེད།
མེ་ལྩེ་དམར་པོའི་ཚ་ངར་ཁྲོད་འགྱེལ་བཞིན་པའི་སྤུན་ཟླ་ཚོར་གདུང་སེམས་མཉམ་སྐྱེད་ཀྱི་བསམ་པ་བཅོས་མིན་ཞིག་ཡོད་ཚེ་ཁོང་ཚོའི་བདེན་པ་བདར་བའི་ཞི་རྒོལ་འདི་མུ་མཐུད་རྒྱུན་སྲིང་དགོས་མིན་ཐད་ལྟ་ཚུལ་འདོན་རྒྱུར་བོད་མི་ཞིག་ཡིན་པའི་ཆ་ནས་འོས་བབ་ཡོད་པ་ཙམ་དུ་མ་ཟད་འགན་འཁྲི་ཞིག་ཀྱང་ཡོད།
ཁོང་ཚོའི་རླབས་ཆེན་བློས་གཏོང་ལ་མཚམས་འཇོག་དགོས་མིན་ཤོད་པ་ཁོང་ཚོར་མི་གུས་པ་དང་ཡང་ན་ཀུན་སྤྱོད་དང་མི་མཐུན་པ། འགན་འཁྲི་དང་འོས་བབ་མེད་པ་སོགས་ཀྱི་ལྟ་ཚུལ་འདོན་པ་ནི་དོན་དུ་གུས་སྲོལ་བྱེད་སྟངས་མ་ཤེས་པའི་སྐྱོན་ཆ་ཞིག་རེད།
རླབས་ཆེན་ཞི་རྒོལ་ལ་ཞུགས་པའི་སྤུན་ཟླ་ཚོས་རྒྱ་ནག་ལ་རྒོལ་ཞིང་ཡོད་ཅིང་། རྒྱལ་སྤྱི་ལ་རེ་བཞིན་ཡོད། བཙན་བྱོལ་དུ་ཡོད་པའི་སྒྲིག་འཛུགས་ལ་རེ་བཞིན་ཡོད། རྒོལ་ཡུལ་དང་རེ་ཡུལ་འདི་དག་གི་དབར་ནས་ཁོང་ཚོའི་དགོས་འདུན་འགྲུབ་པའི་མངོན་རྟགས་ཤིག་ཐོན་གྱི་ཡོད་མེད་དེ་སྒྲོ་སྐུར་མེད་པར་དྲང་བརྗོད་བྱ་དགོས་ཀྱི་རེད།
ཞི་རྒོལ་མུ་མཐུད་པར་དགེ་མཚན་ཆེ་བ་གཟིགས་མཁན་ཚོས་ཞི་རྒོལ་མུ་མཐུད་ཀྱི་རེ་བ་འཆང་དགོས་ཤིང་དགེ་མཚན་གྱི་ཆེ་བ་སྒྲོག་དགོས། ཞི་རྒོལ་མུ་མཐུད་རྒྱུ་དུས་སྐབས་དང་མ་རན་པར་འདོད་མཁན་ཚོས་ཞི་རྒོལ་མཚམས་འཇོག་གི་རེ་སེམས་འཆང་དགོས་ཤིང་། རྒྱུ་མཚན་དང་ཤེས་བྱེད་ཀྱི་ཁུངས་ལུང་འདྲེན་དགོས། ལེགས་ཉེས་རྣམ་དཔྱོད་ཀྱི་བློ་རྩལ་བརྡར་བའི་བརྒྱུད་རིམ་ལས་བོད་ཕྱི་ནང་གི་རྒྱལ་གཅེས་འཐབ་རྩོད་ཀྱི་ཁ་ཕྱོགས་དམིགས་འདུན་དང་ཉེ་རུ་འགྲོ་ཡི་རེད།
རྒྱལ་གཅེས་སྤུན་ཟླའི་རླབས་ཆེན་ཚེ་སྲོག་མེ་ལྕེའི་ཚ་ངར་གྱིས་བཞུད་པའི་དུས་སྐབས་འདི་འདྲར་བོད་མི་ཞིག་དང་རྩོམ་འབྲི་བ་ཞིག་གིས་རང་རང་གི་ས་ནས་བསམ་བློའི་འཆར་སྒོ་འདོན་པ་དུས་ལ་བབ་ཅིང་འདོར་མེད་ཀྱི་འགན་འཁྲི་ཞིག་ཏུ་བསམ་དགོས། ལེགས་ཉེས་རྣམ་པར་དཔྱོད་པའི་བློའི་འཁོར་ཚོད་ཀྱིས་འགྲོ་ལམ་གང་དུ་ཕྱོགས་དགོས་མིན་གྱི་ལྟ་ཚུལ་འདོན་དགོས། རིགས་པ་འདོན་དགོས། དགེ་སྐྱོན་ལ་སྦྱངས་བཤད་བྱེད་དགོས། འདི་ལྟའི་གླེང་སློང་གི་བྱ་བས་བོད་ནང་གི་སྤུན་ཟླའི་སྙིང་སྟོབས་དང་ཆོད་སེམས། རྣམ་དཔྱོད་དང་བློ་རིག་ལ་ངར་སྟོབས་དང་རྣོ་ངར་གསར་པ་ཞིག་བསྐྱེད་པར་བྱེད་ཀྱི། ཁོང་ཚོའི་སྤྱོད་ཚུལ་གྱི་འགལ་ཟླར་འགྲོ་གི་མ་རེད། ཁོང་ཚོར་དམིགས་པའི་གུས་སྲོལ་གྱི་འགལ་ཟླར་འགྲོ་གི་མ་རེད།
རྣམ་དཔྱོད་ཀྱི་ལྟ་ཚུལ་འདོན་རྒྱུ་ལས་ལྡོག་ཏེ་ཚོར་སྣང་གི་བསྟོད་པ་ཙམ་དང་བསྔགས་པ་ཙམ་འབྲི་བ། ཡང་ན་ཁ་བཙུམས་ནས་འདུག་རྒྱུ་ཁོང་ཚོའི་རེ་སྙེག་མིན་ཅིང་འགག་རྩའི་དུས་འཕྲང་འགྲིམ་པའི་རྩོམ་འབྲི་བ་ཞིག་གི་འགན་འཁྲི་དེ་བས་ག་ལ་ཡིན།
བོད་ནང་གི་དཔའ་རྒོད་ཚོས་ངེད་ཅག་བཙན་བྱོལ་དུ་ཡོད་པའི་བོད་མི་ཚོ་རྒྱལ་སྤྱིར་ཕྱོགས་པའི་ཁོང་ཚོའི་རྒྱང་སྒྲོག་གི་ཕོ་ཉ་ཞིག་དང་ནང་གཏམ་རྗེན་པ་སྨྲ་བའི་འཐབ་གྲོགས་ཤིག་ཏུ་ངོས་འཛིན་བྱེད་ཀྱི་ཡོད་ཕྱིར་ང་ཚོས་ཀྱང་ལས་འགུལ་འདི་གཉིས་ཡང་ལྕི་མེད་པར་དོ་སྙོམ་གྱིས་འཁྱེར་དགོས།
གྲོགས་པོ་སྣ་བོ་ཆེ་ལགས་མཛུབ་མོ་མེད་ཀྱང་མཛུབ་སྣོན་མགྱོགས་སེའེ་བྱུང་ང་།
མཚམས་བཞག་ཟེར་མཁན་ཚོ་ནི་བོད་ནང་གི་འཐབ་རྩོད་པ་དག་ལ་ཁ་གཏད་གཅོད་མཁན་རེད། བཙན་བྱོལ་ནས་མི་འདི་འདྲ་མང་ན་བོད་ནས་དེ་བས་མང་བ་རེད། བོད་དོན་འཐབ་རྩོད་པ་ལ་རྒྱ་མ་དགོས་བོད་ཀྱིས་འདུག་འཇུག་ས་མ་རེད།
འདི་ནི་བདག་གི་དྲ་གྲོགས་འཇིགས་བློ་ཡི་སྐད་རེད།
ཁ་བརྡའི་ཐོག་ཏུ་བཞུགས་ཡོད་པའི་སྐུ་ཞབས་འཇིགས་མེད་བློ་གྲོས་ཞུ་བ་ལགས་སུ་ཞུ་དོན། ལོ་ཤས་སྔོན་ནས་བཟུང་སྐུ་ཉིད་ཀྱིས་རྩོམ་ཡིག་འགའ་རེ་འཇིགས་མེད་བློ་གྲོས་ཞུ་བའི་མཚན་ཐོག་ནས་སྤེལ་བཞིན་འདུག་སྟབས་ཁོ་བོས་རང་གི་མིང་ཆ་ཚང་བཀོལ་ནས་འཇིགས་མེད་བློ་གྲོས་རྒྱལ་མཚན་ཞེས་བྲིས་པ་ཡིན། འོན་ཀྱང་ད་དུང་ཉིད་ཀྱིས་རྩོམ་རེ་སྤེལ་སྐབས་མི་མང་པོས་ཁོ་བ ོ་ཡིན་ཤག་བྱེད་ཀྱི་འདུག་སྟབས། རྗེས་སུ་སྐུ་ཉིད་ཀྱིས་མཚན་གྱི་དབུར་དཔེར་ན་གཡུ་བྲག་པ་འཇིགས་མེད་བློ་གྲོས་ཟེར་བ་ལྟ་བུ་ཕ་ཡུལ་གྱི་མིང་ངམ། ཡང་ན་དེ་ལས་གཞན་པའི་ཐབས་ཤེས་ཤིག་གནང་རོགས་ཞུ་བ་ཡིན། གང་ཡིན་ཞུ་ན་རྩོམ་པ་པོ་རྣམས་ལ་རང་རང་སོ་སོ་ལ་ལྟ་གྲུབ་མི་འདྲ་བ་རེ་ཡོད་པས་རྩོམ་པ་པོ་རྣམས་ཀྱི་མིང་གཅིག་པ་བཀོལ་ན་སྐབས་རེ་ཕྱོགས་མང་པོ་ནས་སྟ བས་མ་བདེ་བ་རེ་ཡོང་བཞིན་འདུག་པས་དེ་ལུགས་ཐུགས་ལ་འཛིན་རོགས་ཞུ་བ་ཡིན། དགོངས་པ་མ་ཚོམས་རོགས། ཕྲན་གྱིས་ཉོབ་སྣང་སེལ་ཆེད་བོད་ཡིག་གི་དྲ་རྒྱ་ཁག་ཀློག་བཞིན་ཡོད་ཀྱང་གནས་སྐབས་དྲ་ཞབས་སུ་མཆན་གང་ཡང་མི་འབྲི་བར་དམ་བཅའ་བྱས་ནས་ཡུན་རིང་འགོར་ཟིན། དེ་བས་ཡིག་ཆུང་འདི་དྲ་གྲོགས་བོན་རྒྱ་ལགས་བརྒྱུད་ནས་ཕུལ་གྱི་ཡོད། ད་དུང་ཞུ་རྒྱུ་ཞིག་ལ། སྐུ་ཉིད་ངའི་གྲོགས་པོ་རྙིང་པ་གཡུ་བྲག་པ་འཇིགས་མེད་བློ་གྲོས་ཡིན་ནམ། གལ་ཏེ་ཡིན་ན་ངའི་ངོ་དེབ་ཀྱི་ཐོག་ཏུ་ཕེབས་རོགས་གནང་། ཐུགས་རྗེ་ཆེ། མགོ་ལོག་འཇིགས་མེད་བློ་གྲོས་ཀྱིས་ཕུལ།
མགོ་ལོག་འཇིགས་མེད་བློ་གྲོས་ལགས། ལོ་གསར་ལ་སྐུ་ཁམས་བཟང་།
ངེད་གཉིས་མིང་གཅིག་པ་ཡིན་པ་དེས་ཀློག་པ་པོ་རྣམ་པར་འཁྲུལ་གཞི་ཡོང་བཞིན་ཡོད་ན་ད་ལྟ་ཁོ་བོ་རིགས་ལམ་སློབ་གཉེར་ཁང་དུ་ཡོད་པའི་ཆ་ནས་ངའི་མིང་གི་འགོར་རིགས་སློབ་ཅེས་སྦྱར་ཆོག དེ་སྔོན་ཁོ་བོས་གསང་མིང་སྤྱད་དེ་ཁ་བརྡའི་དྲྭ་ཐོག་ཏུ་རྩོམ་ཡིག་འགའ་རེ་བཀོད་ཅིང་གཞན་རྩོམ་ལ་མཆན་འདེབས་ཀྱང་བྱེད་ཀྱི་ཡོད། འོན་ཀྱང་རང་དབང་ལུང་པར་ངོ་གདོང་སྦས་འགེབས་ཀྱིས་སྐད་ཆ་བཤད་རྒྱུ་དེ་མི་གཤིས་ཀྱི་ཆ་ནས་འགྲིག་གི་མེད་པའི་མཐོང་ཚུལ་ཤུགས་ཆེ་བྱུང་སྟབས་ཉེ་ཆར་ནས་རྩོམ་ཡིག་འགོད་པ་དང་མཆན་བུ་འདེབས་པའི་གནས་སྐབས་གང་དུ་ཡང་དངོས་མིང་བེད་སྤྱོད་བྱ་རྒྱུའི་ཆོད་སེམས་བཟུང་ཡོད།
ངའི་རྩོམ་ཡིག་གི་ལྟ་ཚུལ་མི་འདྲ་བའི་ཐད་ནས་ཁྱེད་ལ་ཁ་བརྡུང་གཏོང་མཁན་བྱུང་ཡོད་ན་དགོངས་སེལ་ཞུ།
དྲྭ་གྲོགས་གཞན་དག་ཁག་ཅིག་ཀྱང་ཕེབས་ནས་དགོངས་ཚུལ་གསུངས་པར་གུས་བརྩི་ཡོད། འོན་ཀྱང་རྒྱ་མིའི་གླ་རྔན་རེག་བཞིན་ཡོད་ས་རེད་ཟེར་མཁན་ཚོར་ཁ་ཡ་བྱེད་ལོང་མེད་པས་དགོངས་དག
ངས་རྒྱུ་མཚན་ཇི་མཐོང་སྦས་འགེབ་མེད་པར་རྩོམ་ཡིག་ཏུ་བྲིས་ཏེ་ཞི་རྒོལ་མཚམས་འཇོག་གི་རེ་བ་འདོན་བཞིན་ཡོད་པ་རེད། རླབས་ཆེན་གྱི་ཚེ་སྲོག་མུ་མཐུད་ནས་འཆི་ལམ་དུ་བསྐྱོད་རྒྱུར་མི་བཟོད་པའི་ཆ་ནས་ཞི་རྒོལ་མཚམས་འཇོག་གི་རེ་བ་འདོན་བཞིན་ཡོད། བཙན་བྱོལ་གཞུང་ནས་ཞི་རྒོལ་མཚམས་འཇོག་ཆེད་བཀའ་གཏོང་དགོས་ཀྱི་རེད་ཞུ་རྒྱུ་མ་བྱུང།
ཁྱེད་ཚོས་ཞི་རྒོལ་མཚམས་འཇོག་གི་རེ་བ་འདོན་ཆོག་གི་མ་རེད་ཟེར་གྱི་ཡོད་ན་ནི་དེའི་ཐད་ང་ལ་ཞུ་རྒྱུ་གང་ཡང་མེད།
“ནོར་རིགས་འདྲ་རིག་ན་འཁོན་སྐྱེད། །མི་རིགས་འདྲ་རིག་ན་དགོད་སྐྱེད། །” ཟེར་བ་ཞིག བོད་སྐད་ལ་ཡོད་པ་རེད། ད་དེའི་སྟེང་ལ་”མིང་རིགས་འདྲ་རིག་ན་འཁྲུག་སྐྱེད”ཟེར་བ་འདི་སྣོན་དགོས་པ་འདྲ། ཀུ་རེ་ཡིན་ཏེ། ངས་ཀྱང་དྲ་གྲོགས་འཇིགས་བློ་ཡིན་རྒྱུ་བསམ་བསྡད་མོད། རྩོམ་ཕྱི་མ་འདི་ལ་ངའི་དྲ་གྲོགས་འཇིགས་བློ་ཡི་ཐོས་རྒྱ་དང་རྩོམ་རྩལ་མེད་པ་འདྲ་ཞིག་ཀྱང་འདུག གང་ལྟར་ཡང་ང་བར་ནས་ཕོ་ཉ་བྱས་པ་ལེགས་འགྲུབ་བྱུང་ནས་ཁྱོད་ལ་བརྡ་འཕྲོད་འདུག་པས། དེ་མིན་ཡང་གན་གཉན་འདུག་བྱས་ནས་ང་ལས་སླ་བོར་འཇོག་གི་མ་རེད། ཀུ་རེ་ཡིན། ཧ་ཧ་་་་་གང་ལྟར་ལྟ་ཚུལ་ལ་རང་དབང་དགོས་ནི་རེད། མི་སྟེར་ན་ཅག་ཅག་བྱས་ནས་སྤེལ་དགོས་པ་རེད།