ཀོ་ལི་གྷ་གཞིས་ཆགས་གཞུང་པ་ཚེ་དབང་བསོད་ནམས།
དེང་དུས་ཚན་རིག་ཀླད་རྩ་རྣོ་བའི་སྐབས།།
མི་རྣམས་རང་མཁེ་རང་མིང་གྲགས་ལ་བརྩོན།།
འཇིག་རྟེན་ས་ཡི་ལོ་ཚད་མ་རྫོགས་གོང་།།
ཚན་རྩལ་རིག་པས་ཉེན་མཁའི་ནང་དུ་བཞག།
ཚན་རྩལ་རིག་པའི་ལག་རྩལ་མཐོ་པོའི་འོག།
འཇིག་རྟེན་མི་རྣམས་དངོས་པོའི་འདོད་པས་བཟི།།
གནས་བདེ་རོལ་ནས་གཏན་གྱི་མདུན་ལམ་ཤོར།།
ཚན་རྩལ་རིག་པའི་ཀུན་སློང་མ་ནོར་ཞིག།
ཚན་རྩལ་རིག་པའི་བསམ་སྦྱོར་བཟང་པོ་བརྒྱུད།།
འགན་འཁུར་བླང་ནས་འཇིག་རྟེན་བདེ་བའི་ཕྱིར།།
ཞི་བདེ་་སླར་གསོ་བསྐྲུན་པའི་ཐབས་ཤེས་སུ།།
ཚན་རྩལ་རིག་པས་སྙིག་དོར་བཅུད་ལེན་བགྱིས།།
མི་ཡི་བདེ་བ་རྒྱུ་དང་རྐྱེན་གྱི་སྒྲུབ།།
རྒྱུ་དང་རྐྱེན་གཉིས་མ་ནོར་ཚན་རིགས་ཚོ།།
མི་ཡི་བདེ་བ་ཐབས་ཤེས་བཟུང་ནས་སྒྲུབ།།
ཐབས་དང་ཤེས་རབ་མ་འཆོལ་ཚན་རིག་ཚོ།།
ཞི་བདེར་འགན་འཁུར་སྐྱེ་འགྲོ་ཡོངས་ལ་ཕན།།
མི་བསད་ཁྲག་སྦྱོར་རང་གཞན་ཕུང་བའི་རྒྱུ།།
བདེ་དང་སྡུག་བསྔལ་ངོས་འཛིན་ཐུབ་པ་ནས།།
ཚན་རྩལ་རིག་པའི་དམིགས་ཡུལ་ནོར་མི་ཉན།།
གདོན་མའི་སྤྱི་ཚོགས་རྡོ་དང་ལྕགས་ཀྱི་བསྐྱངས།།
ཚན་རྩལ་རིག་པས་དུས་རབས་སྔོན་འཐོན་བྱས།།
ཀླད་རྩ་རྣོ་ནས་གསར་གཏོད་དངོས་པོ་མང་།།
མི་རྣམས་འདོད་པའི་རྒྱུ་ཡི་བསླུས་པ་འདྲ།།
དམག་ཆེན་གཉིས་པའི་རྒོད་ཆགས་གཏུག་པོའི་ནང་།།
ཉེས་མེད་སྲོག་ཆགས་གྲངས་ཀྱི་མཐའ་ལས་འགལ།།
ཚེ་སྲོག་དམར་པོ་ཤོར་བའི་གཏམ་བརྒྱུད་འདིའི།།
ཚན་རྩལ་རིག་པའི་བློ་འགྱོད་ག་དུས་རྫོགས།།
ཤེས་བྱའི་གནས་ལུགས་རྟོགས་ན་ཤེས་བྱ་ཡིན།།
ཤེས་བྱའི་རིན་ཐང་མ་རླག་ཚན་རིག་ཚོ།།
ཤེས་བྱའི་རིག་པ་མཐའ་དང་མུ་མེད་ལ།།
ཤེས་བྱ་ལམ་ལོག་མ་འཁྲིད་ཚན་རིག་ཚོ།།
ཁ་བརྡ་དྲ་རྒྱ་བརྒྒུད་ནས་ཁ་བརྡ་ཕུལ།
ཁ་བརྡ་ངྲ་རྒྱའི་རླབས་ཆེན་འགན་འཁུར་འོག།
ཁ་བརྡ་མང་བའི་རེ་བ་ཅུང་ཅམ་ནས།
ཁ་བརྡ་ལམ་སྟོན་དུས་ཀྱི་གནད་ལ་བསྔོ།