ཚེ་རིང་གཡང་འཛོམས་དང་རྟོག་སྒྲུང་།

རྔ་བ་ཀུན་བཟང་།

ཀློག་པ་པོས་ཁྱེད་ཀྱི་བརྩམས་ཆོས་ལ་འདི་ལྟར་གདེང་འཇོག་བྱས་པ་ནི་ཁུངས་མེད་འུར་གཏམ་ཞིག་གཏན་ནས་མིན། གང་ལགས་ཤེ་ན། ཁྱེད་ཀྱིས་ཕྱི་ལོ་༢༠༢༢ལོར་དཔར་དུ་བསྐྲུན་པའི་བརྩམས་ཆོས་གསར་བ“ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ”(We Measure the earth with our Bodies) ཞེས་པའི་རྟོག་སྒྲུང་འདི་ལུང་པ་མེད་པའི་མི་རིགས་སྣ་ཚོགས་པའི་སྤྱི་ཚོགས་འཕེལ་རིམ་དང་། འཚོ་བའི་འགྱུར་ལྡོག  དམངས་ཀྱི་བདེ་སྡུག་སོགས་ལ་བསམ་གཞིག་ལེགས་པར་བྱས་པས། ཀློག་པ་པོ་མང་པོས་དགའ་མོས་བྱེད་པ་ནི་དོན་ལ་གནས་པའི་དྲང་གཏམ་ཞིག་རེད།

ང་རང་ཡང་བརྩམས་ཆོས་ལ་དགའ་བའི་བུ་མོ་ཞིག་ཡིན་ལ། ཁྱེད་ཀྱི་ལྷན་སྐྱེས་ཀྱི་ངོས་ཐད་ནས་འཆར་ཡིད་ཀྱི་བསམ་བློ་དེས་ལོ་རྒྱུས་ཐོག་ལ་རླབས་ཆེ་བའི་བསམ་གཞིག་གི་རི་མོ་ཞིག་བཀོད་ཐུབ་པ་བྱུང་འདུག ད་དུང་ཚད་ངེས་ཅན་ཞིག་ནས་སའི་གོ་ལའི་མི་རིགས་མང་པོ་ཞིག་ལ་ “སྒྲོལ་མ” དང་ “བཀྲ་ཤིས” ་ཟེར་བའི་ཐ་སྙད་ཙམ་ཞིག་ངོ་སྤྲོད་ཐུབ་པ་བཟང་ཐལ།

ཁྱེད་ཀྱིས་གསར་རྩོམ་“ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ”(We Measure the Earth with Our Bodies)ཞེས་པ་དེ་ཕྱོགས་གཅིག་རྐྱང་ནས་བལྟས་ན་རྟོག་སྒྲུང་ཙམ་རེད། འོན་ཀྱང་། ཀློག་པ་པོ་ཞིག་གི་ངོས་ཐད་ནས་བཤད་ན། རྟོག་པའི་འཆར་སྣང་ཙམ་ཞིག་ཡིན་ས་མི་འགྲོ་བའི་དོན་ཞིག་ཡོད་ངེས་སྙམ་པ་འདུག དེའི་ཕྱིར། ང་རང་གིས་འདི་ལ་<<དངོས་བྱུང་དང་འབྲེལ་བའི་རྟོག་སྒྲུང་>> གི་ཆ་ཡང་མཐོང་སོང་། རྒྱུ་མཚན། ཁྱེད་ཀྱིས་བྱིས་དུས་སུ་བལ་ཡུལ་གྱི་ཁྱིམ་ཚང་དང་། ན་ཚོད་གཞོན་པའི་ཕྱི་རྒྱལ་གྱི་ཁྱིམ་ཚང་། ལོ་ན་མཐོ་བའི་སྤྱི་ཚོགས་ཀྱི་ཁྱིམ་ཚང་གསུམ་གྱི་འཚོ་བའི་ཉམས་མྱོང་ལྡན་ལ། འཆར་ཡིད་ཀྱི་ཆུ་ཚད་མཐོ་བས་རང་སེམས་ཀྱི་གནད་དོན་རྣམས་ཡིག་ངོར་ཕབས་ཐུབ་པ་གཅིག་པོའི་ཁྲོད་ནས། ཁྱེད་ཀྱི་བསམ་བློའི་ཤེས་ཚད་དུས་སྐབས་དང་དོ་མཉམ་པས་གསར་རྩོམ་གྱི་ལས་ཀར་འབྲས་བུ་སྨིན་པ་རེད་འདོད།

ངས་”ལེ་སྀང་(Doris Lessing (1919-2013) ,ལགས་དང་།  “ཁར་ཐེར་(Angela Carter), “ཝེལ་ཧྥྀ་(Virginia Woolf (1882-1941) སོགས་སྐད་གྲགས་ཆེ་བའི་སྐྱེས་མ་རྣམས་ཀྱི་མི་ཚེའི་ལོ་རྒྱུས་དང་། བརྩམས་ཆོས་སྐོར་ཞིག་ལ་ལྟ་མྱོང་།འོན་ཀྱང་། མི་རིགས་གཅིག་པའི་སྐྱེས་མ་ཞིག་གི་བརྩམས་ཆོས་ཀློག་དུས་ཐ་ན་མི་མཐོང་མྱོང་མེད་ཀྱང་། རང་ཉིད་ཀྱི་སྤུན་མཆེད་ཅིག་དང་ཕན་ཚུན་སྐད་ཆ་བཤད་པ་ལྟར་ཚིག་དོན་རེ་རེ་ལ་ཚོར་སྣང་མི་འདྲ་བ་འདུག ངའི་བསམ་པར། འདི་ནི་ཁྱེད་རང་གི་གསར་རྩོམ་གྱི་ནུས་པ་དང་དཔེ་ཀློག་མང་བས་ཡིན་ནམ་སྙམ།

མི་ལོ་“བཅུ”་ཙམ་གྱི་རིང་ལ་དགའ་སྡུག་གི་མིག་ཆུ་རེ་རེ་བཞུར་ཞོར། དེ་རིང་རང་ཉིད་ཀྱི་གསར་རྩོམ་གྱི་དེབ་དེ་ཀུན་གྱི་མིག་མདུན་ལ་དངོས་སུ་བཞག་ནས། ཀློག་པ་པོས་རྗེས་སུ་ཡི་རངས་ཞུ་དུས། ཁྱེད་ལའང་བརྗོད་དཀའ་བའི་དྲན་གསོ་དང་བསུ་དཀའ་བའི་དགའ་སྣང་མང་། གང་ལགས་ཤེ་ན། ང་རང་ཡང་དེབ་ཅིག་ལ་མགོ་འཁོར་ནས་མི་ལོ་བཅུ་གཅིག་སོང་བས་དེབ་ཅིག་བྲིས་ནས་ཀློག་པ་པོའི་སྤྱན་ལམ་དུ་ཕུལ་བའི་བརྒྱུད་རིམ་གྱི་དགའ་སྡུག་གསལ་བོར་ཤེས་ཡོད། 

ལྷག་པར་ཏུ་སྐྱེས་མའི་ཁྲོད་ནས་ཉམས་ཞིབ་མ་དང་། སྙན་ངག་མ། རྩོམ་པ་མོ། གླུ་མ། རི་མོ་མཁན། རོལ་མོ་མཁན་སོགས་གཅིག་རེ་བྱུང་ན། སྔར་ཡོད་ཀྱི་<<བོད་ཀྱི་སྐྱེས་མའི་དཔྱད་རྩོམ་ཕྱོགས་བསྒྲིགས། >> དང་། << དེང་རབས་བོད་ཀྱི་སྐྱེས་མ་རྩོམ་པ་པོའི་དཔེ་ཚོགས། >>  <<གངས་ཅན་སྐྱེས་མའི་ཚགས་པར།  >> སོགས་དུས་དེབ་དང་།བརྩམས་ཆོས་སྐོར་ཞིག་གི་སྟེང་ལ་བུད་མེད་ཅིག་གསར་དུ་སླེབས་པ་རེད་ལ། ཁྱོད་ཀྱི་གསར་རྩོམ་ཁྲོད་ཀྱི་སྒྱུ་རྩལ་མཚོན་ཐབས་དང་། རྟོགས་འཚར་སྐྱེས་ཚུལ།  སྒྲ་དོན་བསྒྲིགས་ཚུལ། མངོན་བརྗོད་མང་ཉུང་། བརྗོད་བྱའི་སྙིང་དོན་སོགས་ཀྱི་སྐོར་ནས་གསར་རྩོམ་གྱི་རྣམ་པ་མང་པོ་མཐོང་ལ། ལོ་རབས་བརྒྱད་ཅུའི་དུས་འགོ་ནས་བོད་དུ་སྒྱུ་རྩལ་རིག་གནས་ཆེས་ཆེར་དར་འགོ་ཚུགས་པ་མ་ཟད། བརྗོད་དོན་སྣ་ཚོགས་པའི་བརྩམས་ཆོས་འབོར་ཆེན་བྲིས་གནང་འདུག

 རེད་དེ། བོད་པ་བཙན་བྱོལ་ལ་ཕེབས་ནས་བཟུང་མི་རབས་གཞོན་པ་གཙོ་བྱས་པའི་བུད་མེད་མང་པོ་ཞིག་གིས་སྒྱུ་རྩལ་བརྩམས་ཆོས་ལ་མོས་པ་ཆེན་པོ་གནང་མེད་པས།“ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ”(We Measure the Earth with Our Bodies)ཞེས་པའི་རྟོགས་སྒྲུང་འདི་དེང་རབས་བོད་ཀྱི་སྐྱེས་མའི་ཁྲོད་ནས་བརྩམས་ཆོས་ལེགས་ཤོས་ཀྱི་གྲངས་ཐོའི་ནང་བཀོད་ཆོག་ལ། བོད་ཀྱི་བུད་མེད་ཅིག་གིས་རྒྱལ་སྤྱིའི་རང་བཞིན་ལྡན་པའི་དབྱིན་ཇིའི་ཐོག་ལ། མི་རིགས་ཀྱི་འཚོ་བ་མཚོན་པའི་རྟོག་སྒྲུང་བྲིས་པ་ཧ་ལམ་ཆེས་ཐོག་མ་དེ་ཆགས་ཡོད་པས། བོད་ཀྱི་སྐྱེས་མ་རྩོམ་པ་མོ་བདེ་སྐྱིད་སྒྲོལ་མ་དང་། ཚེ་རིང་འོད་ཟེར། འཆི་མེད། བདེ་ཆེན་དབང་མོ། བྱང་མོ་མཚོ། ཚེ་རིང་དབྱངས་སྐྱིད། དཔལ་ལྷ། ལུ་གུ་སྐྱིད་བཅས་ཀྱི་སྐུ་ཚབ་བྱས་ནས་ངས་ཁྱོད་ལ་བཀའ་དྲིན་ཆེ་ཞུ་འདོད་བྱུང་།འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན་གྱིས་“མཁས་པ་རང་གི་ཡུལ་བས་ཀྱང༌། །ཡུལ་ཁམས་གཞན་ན་མཆོད་པ་ཐོབ། །ནོར་བྱ་གཞན་དུ་བྲིན་པ་ཙམ། །རྒྱ་མཚོའི་གླིང་དུ་ག་ལ་བྲིན། ཞེས་པའི་ཚིགས་བཅད་ཀྱིས་མཇུག་བསྡུས་པ་ཡིན། བཀའ་དྲིན་ཆེ། 

རྔ་བ་ཀུན་བཟང་གིས་བཀླགས་བྱང་ཙམ་དུ། 

ཕྱི་ལོ་༢༠༢༣། ༠༡།༣༡་ཉིན་གུས་པས་ཕུལ།