བདེ་ཆེན་སྒྲོལ་མ།
༼རླུང་དམར་འུར་འུར༽་ཞེས་པའི་སྒྲུང་རིང་འདི་ནི་བོད་ནང་གི་བརྩམས་སྒྲུང་རྩོམ་མཁན་གྲགས་ཆེན་ཚེ་རིང་དོན་གྲུབ་ལགས་ཀྱི་སྒྲུང་རིང་ཨང་གསུམ་པ་དང། སྒྲུང་དེབ་འདི་ལ་སྔ་དུམ་དང་ཕྱི་དུམ་ཞེས་ཚན་པ་གཉིས་སུ་བགར་འདུག་ལ། ཚན་པ་དང་པོ་ཤོག་ངོས་དང་པོ་ནས་བརྒྱ་དང་གྱ་ལྔའི་བར་དང། ཚན་པ་གཉིས་པ་ཤོག་ངོས་བརྒྱ་དང་གྱ་དགུ་ནས་སུམ་བརྒྱ་གྱ་གཉིས་བར་ཏེ། བསྡོམས་ཤོག་གྲངས་སུམ་བརྒྱ་དང་གྱ་གཉིས་ཀྱིས་ཡོངས་སུ་གྲུབ་འདུག
སྒྲུང་རིང་འདིའི་བརྗོད་བྱ་གཙོ་བོ་ནི་ང་བརྒྱད་ལོ་དང་རིག་གནས་གསར་བརྗེའི་སྐབས་ཀྱི་རྩེ་གཞུང་ས་ཆའི་ཆེས་དཀའ་སྡུག་དང་ཆེས་སྡུག་རྩུབ་ཀྱི་ལོ་རྒྱུས་བྲིས་ཏེ་སྐབས་དེའི་བོད་ཡུལ་གྱི་གནས་ཚུལ་དངོས་ཟུར་བལྟས་ལེབ་མཐོང་དང། ཁ་གསལ་གཏིང་གསལ་དུ་བྱས་འདུག། དེ་ཡང། སྒྲུང་གི་ཚན་པ་དང་པོ་སྔ་དུམ་ནི་ང་བརྒྱད་ལོར་རྩེ་གཞུང་ས་ཆར་རྒྱ་ནག་གི་བཙན་འཛུལ་སླེབས་སྟངས་ནས་རྒྱ་དམག་གིས་ཅི་ལྟར་བོད་མི་བསད་རྨས་འཛིན་བཟུང་བྱས་ཚུལ་དང། རྨ་ཆུའི་ཁུག་བར་ནས་རྒྱ་དམག་གིས་འབྲོག་པ་ཚོ་སྡེབ་གསོད་བྱས་ཚུལ། འུ་ཐུག་གི་སྐབས་སུ་འབྲོག་པ་བཟའ་བ་མཉམ་རུབ་ཀྱིས་ཆུ་ལ་ལྕེབས་ཚུལ། སྐྱེས་བ་ཚོ་ཉེས་མེད་དུ་བཙོན་ལ་དེད་ཚུལ། བཙོན་དོང་ནས་ཡ་ང་སྙིང་རྗེ་མེད་པར་ངལ་རྩོལ་བསྒྱུར་བཀོད་བྱས་ཚུལ། ཕ་ཡུལ་ལ་མུ་གེ་བྱུང་ནས་བོད་མི་ཚོ་གཅིག་ཤི་ཉིས་ཤི་དང། བཅུ་ཤི་བརྒྱ་ཤི་བྱུང་ཚུལ་སོགས་དང།
ཚན་པ་གཉིས་པ་ཕྱི་དུམ་ནི་རྩེ་གཞུང་མི་དམངས་ཀྱིས་རིག་གནས་གསར་བརྗེའི་སྐབས་སུ་རྒྱ་ནག་གུང་ཁྲན་ཏང་གི་དབང་བསྒྱུར་ཅི་ལྟར་མྱང་ཚུལ་དང། གྲལ་རིམ་བར་ལ་འཐབ་རྩོད་ཛ་དྲག་བྱས་ཚུལ། དགོན་པ་དང་ལྷ་ཁང་ཆོས་དཔེ་གཏོར་བཤིག་དང་མེ་ལ་བསྲེག་ཚུལ། ཕ་མ་བུ་ཕྲུག་དང་བླ་མ་སློབ་མའི་བར་ལ་ཕན་ཚུན་གཅུན་པ་བླུད་ཚུལ། བླ་མ་དང་གྲྭ་བ་རྐང་བཙུགས་ནས་སྐྱ་སར་ཕབ་ཚུལ་སོགས་སྐབས་དེའི་ལོ་རྒྱུས་ཀྱི་གནས་ཚུལ་ངོ་མ་གསོན་འབྲི་བྱས་ཡོད།
སྒྲུང་རིང་ནང་གི་མི་སྣ་གཙོ་བོ་ནི་ཨ་ལགས་འབྲོང་དང་བློ་བཟང་རྒྱ་མཚོ་སོགས་ཡིན་ལ། མི་སྣ་འདི་དག་ལ་རང་རང་གི་མཚོན་དོན་གསལ་བོ་རེ་འབྲི་བཞེངས་བྱས་བའི་ལག་ཐབས་ནི་འགྲན་དུ་མེད་པ་ཞིག་རེད།
༼གསལ་བཤད། གོང་གི་ངོ་སྤྲོད་ཐུང་ཐུང་འདི་ནི་རང་གིས་སྒྲུང་རིང་འདི་ཉིད་ཐེངས་གཅིག་བཀླགས་པའི་ཟིན་ཐོ་ཙམ་ལས་སྒྲུང་དཔྱད་དང་རང་གི་ཚོར་སྣང་གིས་སླད་པའི་ཆེ་བཤད་ཆུང་བཤད་སོགས་ཅི་ཡང་མེད། ཕྱོགས་གཅིག་ནས་རང་ཉིད་ལྟ་བུ་བོད་ཡིག་ལ་དགའ་བའི་དྲ་གྲོགས་ཡོངས་ལ་དཔེ་དེབ་འདི་ངོ་སྤྲོད་ཙམ་དང། ཕྱོགས་གཞན་ནས་དཔེ་དེབ་འདི་ང་ཚོས་མ་བཀླག་ཐབས་མེད་ཀྱི་བོད་ཡིག་གི་དཔེ་དེབ་གསེར་གྱི་རི་བོ་ཆེན་པོ་ཞིག་ལ་གྲུབ་འདུག་པས་ཆེད་དུ་འདིར་བཀོད་པ་ཡང་ཡིན། ཐུགས་རྗེ་ཆེ།༽
༢༠༠༩། ༧། ༡༥ཉིན་དཔེ་མཛོད་ཁང་དུ་བྲིས།