རྔ་བ་ཀུན་བཟང་།
མྱུར་དུ་ལས་ལ་ཆས་རྒྱུ་ནི་འཚོ་བ་གང་ལ་གྲུབ་འབྲས་ཐོབ་པའི་རྐྱེན་ཐོག་མ་དེ་ཡིན་བ་ངས་ནར་སོན་གྱི་ལོ་ཟླའི་ཁྲོད་ནས་གོ་མྱོང་། རྒས་རྒྱུ་མེད་པའི་སེམས་པ་ཞིག་ཡོད་པའང་འཚོ་བ་དེ་དང་དེའི་ཁྲོད་ཀྱི་བདེ་སྐྱིད་དང་མཛེས་སྡུག་ལྡན་པའི་རྨི་ལམ་གཉིས་ཀྱིས་མཚོན།
དེ་རིང་ཞོགས་པ་འུར་འུར་ཟང་ཟིང་གི་སྲང་ལམ་ནས་ངས་ཚོང་པ་རྒན་པོ་ཞིག་མཐོང་། དེས་ང་འགྲོ་སའི་ལམ་གྱི་གཡས་ཕྱོགས་ས་ཐོག་ན་ལྷམ་དང་། དོར་མ། སྟོད་ཐུང་། ཞྭ་མོ་སོགས་རས་དཀར་ཆེན་པོ་ཞིག་གི་ཐོག་ལ་རེ་རེ་བཞིན་གཙང་མ་བཟོ་བཞིན་འདུག སྐབས་དེར་ངས་རྐང་འཁོར་ཁ་བཀག་ནས་སྐར་མ་འགར་བལྟས་སྡད་པ་ཡིན། འོན་ཀྱང་ཚོང་པ་རྒན་པོ་དེས་ངས་འདི་ལྟར་དོ་སྣང་བྱེད་ཀྱིན་ཡོད་མེད་ག་ལ་ཤེས། ད་དུང་ཁོང་གིས་ཉིན་གཅིག་གི་ཚོང་རྫས་རྣམས་གཙང་མ་བཟོས་ནས་སུ་ལ་ཡང་ལྟ་ཁོམ་མེད།
རེད་དེ། ཚོང་པ་རྒན་པོ་དེ་གོ་རྟོགས་མཐོ་བའི་མི་ཞིག་ཡིན་པ་ཧ་ཅང་གསལ། ཚོང་རྗས་ཉུང་ཡང་བཙོང་ཡུལ་ཧ་ཅང་མང་ལ་ད་དུང་ཡར་མར་གྱི་འགྲོན་པོ་མང་བའི་ལམ་དཀྱིལ་ནས་གདོང་འཛུམ་དམུལ་དམུལ་གྱི་ངང་དུ་གནས།
ཡང་ཅིག་བཤད་ན། ཁོང་རང་གི་ཁྱིམ་གྱི་ཆ་རྐྱེན་ཞན་ཙམ་ཡོད་པ་དང་། ནང་ལ་བྱིས་པ་དང་ལས་མེད་ཀྱི་མནའ་མ་ཞིག་ཀྱང་ཡོད་ནོ་ཁོ་ཐག་རེད། རྒྱུ་མཚན་ནི་ཁོང་རང་གི་གདོང་ལ་བཅོས་མའི་འཛུམ་མདངས་ཙམ་ལས། སྤྲོ་སྐྱིད་དང་སྟོབས་ཤུགས་བཅས་ཀྱི་རྣམ་པ་གང་ཡང་མཐོང་དཀའ།
ད་དུང་། ཁོང་རང་གི་ལག་པ་གཡས་གཡོན་གཉིས་ཀའི་ཐོད་སེར་ཁ་གས་བས། སེམས་བཟང་གི་མི་ཞིག་གིས་མཐོང་ན་བཟོད་དཀའ་བའི་ན་ཟུག་སྐྱེས་ངེས། གལ་ཏེ་ཁོང་གི་བྱིས་པ་དང་མནའ་མ་ཚོས་མཐོང་ན་དེ་བས་ཀྱང་སྙིང་རྗེ་ནི་ཞིག་རེད། སྐུ་གཟུགས་ཐུང་ལ་ཁ་སྤུའི་གཡས་གཡོན་ན་ཟས་སྙིག་ཀྱང་འགོས་འདུག གང་ལྟར་ཁ་སྤུ་ལ་གཅེས་སྤྲས་གནང་མེད་ནོ་ཧ་ཅང་གསལ། རེད་ཡ། ཁྱིམ་ཚང་གི་འཚོ་བ་དང་བདེ་སྐྱིད་ལ་བརྩོད་ལེན་བྱེད་དུས། གནམ་འོག་གི་ཕ་མ་རྣམས་ཀྱིས་རང་ཉིད་འཇིག་རྟེན་ན་ཡོད་མེད་ཀྱང་བརྗེད་མཁན་མང་། ཀུན་ལས་དམིགས་བསམ་ཆེ་བ་ཞིག་ཡོད་པ་ནི། ཁོང་ཚོའི་བློ་དང་འབད་པ་རེད།
མཚམས་དེར་ངས་སྣང་མེད་ངང་རྐང་འཁོར་བཏང་ནས་ཡོང་བ་ཡིན། འོན་ཀྱང་། ད་ལྟ་བསམས་ན་སྲང་ལམ་གཡས་གཡོན་གྱི་ཚོང་པ་ཆུང་ཆུང་རིགས། མི་མང་དཀྱུས་མའི་ཁྲོད་ཀྱི་དཔའ་བོ་རེད་ལ། ཁོང་ཚོའི་བསམ་བློའི་གོ་རྟོགས་མཐོ་བ་དང་། གཞན་ལས་ལྷག་པའི་གུས་བཀུར་དང་མོས་སེམས་བསྐྱེད་དགོས་པའི་རྣམ་པ་མངོན་ནོ།།
2021/2/18
སྲང་ལམ་གྱི་ཟ་ཁང་ནས་བྲིས།
ཡག་པོ་བྲིས་འདུག་།