དགའ་དགའ།
བདག་གི་ཡིད་ཀྱི་ནམ་མཁའ་དེ་ཉིད་དུ།།
ཁ་བ་བུ་ཡུག་སྔར་བཞིན་འབབ་ན་ཡང་།།
ནང་གི་སྣོད་དྲུག་ཤུགས་ཀྱིས་སྐྱོམ་སྟངས་དེས།།
ལུས་ཀྱི་ཕྱི་ནང་རྔུལ་ཆུས་ཡང་ཡང་བརླན།།
སྟོན་མཇུག་ལོ་མ་སེར་པོ་ལྷུང་སྐབས་དང་།།
དགུན་ཁར་ལྷགས་རླུང་འདྲེས་མ་འཚུབ་པའི་དུས།།
ཅི་ཞིག་བོར་བརླག་སོང་བའི་ཚོར་འདུ་རེས།།
བདག་གིས་རྒྱང་རིང་ཁྱེད་ཉིད་དྲན་གྱིན་ཡོད།།
མི་ཡུལ་ས་མཐའི་ལོ་ཟླ་མང་པོ་ཞིག །
སེམས་པས་བརྒལ་ཞིང་ལུས་ཀྱིས་མྱོང་ན་ཡང་།།
རི་ཆུ་སྟོང་ཕྲག་ཆོད་པའི་ཡོལ་རས་འདི།།
མིག་ཆུའི་མཚོ་མོ་བཀག་སའི་ལག་རས་ཡིན།།
མཛངས་མའི་ཁ་དོག་ལྐོག་གྱུར་མིན་ན་ཡང་།།
བདག་གི་ཁྱོད་ནི་དབང་པོའི་ཡུལ་ལས་འདས།།
མི་ཚེའི་གཏམ་རྒྱུད་རིང་མོ་སུ་ལ་བཤད།།
དྲན་པའི་ངོས་སུ་ད་དུང་མངོན་གྱིན་འདུག།
སྤྱི་གཙུག་སྟེང་གི་ཉི་མ་སེར་པོ་དེས།།
མཁའ་ལམ་བརྒྱུད་ནས་སྨག་རུམ་བསལ་ཐུབ་ཀྱང་།།
སེམས་ཀྱི་མུན་པ་ཇེ་སྟུག་ཇེ་སྟུག་རེད།།
ལས་ཀྱི་རྒྱལ་མོས་བཀོད་པ་ཡིན་ནམ་ལགས།།
རང་ཉིད་རང་གི་གྲིབ་མ་མཉམ་དུ་འགྲོགས།།
ཀུན་གཞིའི་གྲོང་ན་རྒྱུ་བའི་བྱིའུ་ཆུང་དེ།།
འཕུར་གྱིན་གཟེབ་ཏུ་ཚུད་པ་མ་ཡིན་ན།།
ནམ་མཁའ་སྟོང་པར་མཐའ་ཞིག་གང་ན་འཚོལ།།
ཕྱི་ཚུལ་བཅོས་མའི་སྒེག་ཆོས་མཛེས་ན་ཡང་།།
ནང་ཁོག་གློ་བ་དམར་པོ་རུལ་ཟིན་པའི།།
དེང་གིས་དུས་སུ་སྣང་བ་གྲངས་མེད་ཀྱང་།།
འཆལ་པོ་བདག་གི་མིག་ནང་གྲ་མ་ཡིན།།
རྐང་ལམ་ཕྲ་མོར་བཀྱེད་ཅིང་སོང་གྱུར་ཀྱང་།།
འདོད་པའི་ཕུན་ཚོགས་འཇའ་ལྟར་ཡལ་འགྲོ་བས།།
ཡར་ཐོད་རི་མོ་དགུ་བརྩེགས་མེད་པ་ཀུན།།
དྲན་དགུ་བརྒྱད་ཅུ་གྱ་གཅིག་ཉུང་ཙམ་མཛོད།།
སེམས་ཀྱི་བྱང་ངོས་ལྡེབས་སུ་དྲན་ཐོ་བཀོད།།
ཚེ་རབས་མང་པོར་ནག་བསུབ་མ་ཐུབ་ཅིང་།།
ད་ལན་ས་སྒང་འདི་ན་ཤེས་བཞིན་དུ།།
རྗེས་མ་ཟེར་བས་མཐའ་ཞིག་ཡོད་ཚོད་མེད།།
ཁེར་རྐྱང་ཚོར་བ་རླུང་ལ་སྤུར་བཞིན་དུ།།
སྙན་ངག་དམར་པོ་ཕྱི་རོལ་སྟོན་པ་ཡིན།།
མདུན་རྒྱབ་ཟེར་བ་ཤེས་པའི་བློ་མེད་ཀྱང་།།
སྨྱོན་པ་ཡིན་པའི་རྟགས་མཚན་ཡིན་དོགས་མེད།།