བཀྲ་ཤིས་དོན་འགྲུབ།
རི་ལྗོངས་མཚམས་སྤྲིན་དམར་པོས་དྲུད་ནས་ཐོན།།
སེམས་ཀྱི་རྒྱ་ཁྱོན་ནམ་མཁའི་སྲང་ལ་བཞག།
ལྷིང་འཇགས་རླུང་གིས་སྒུལ་བའི་སྲོད་ལམ་ནས།།
ཚོར་བའི་གྲིབ་གཟུགས་གང་ནས་གང་ལ་ཐིམ།།
རྒྱང་རིང་ཟེར་བའི་གཤོག་པ་ཆ་གཅིག་པོ།།
ལ་དང་ལུང་པ་མང་པོས་ཕར་ཕར་བདས།།
མདུན་དུ་ལྷུང་བའི་མིག་ཆུ་དོག་པ་གཅིག།
སེམས་ཀྱི་ལྷ་མོ་བཞུད་པའི་ཞབས་རྗེས་ཡིན།།
མུན་པ་མིག་ལ་བབས་པའི་ནངས་དགོང་དུ།།
རྨི་ལམ་ཁམས་ནས་མེ་ཏོག་རྙིད་ཚུལ་གླེང་།།
ཤོག་ཧྲུལ་ཡན་པོའི་རྣམ་ཐར་བཙལ་བ་ན།།
འགྲུལ་པ་རྒྱུས་མེད་ཅིག་གི་མིང་ཡིག་རྙེད།།
ན་བུན་གསེང་ནས་རྙེད་པའི་གླིང་བུ་དེ།།
སུ་ཞིག་དྲན་པའི་རྟེན་དུ་བཞག་མོད་ཀྱང་།།
སྣང་བ་ཡ་ཡོ་ཞིག་གི་བསླུ་བྲིད་ཀྱིས།།
ཉི་ནུབ་མཚམས་ནས་སླར་ཡང་ཁེར་གླུ་ལེན།།
སྙིང་གི་ཐིག་ལེར་བབས་པའི་ཁོ་མོ་ཡང་།།
དགུང་སྔོན་ངོགས་ཀྱི་སྐར་འབྲུ་ཆ་མེད་ཅིག།
འདུ་འབྲལ་སྐྱེ་འཆིའི་རྦ་རླབས་གཡོས་པ་ཡིས།།
དགུ་ཚིགས་མཚོ་མོའི་ཀློང་དུ་བདག་ཉིད་འབྱམས།།
རི་སྐྱེས་རི་ལ་ཆས་པའི་སྔ་གཞུག་ཏུ།།
གཙང་པོས་སྐྱོ་གཞས་འཐེན་པའི་གཟུགས་རིས་གྲུབ།།
ཁྲུང་ཁྲུང་ལྷོ་ལམ་སྙེགས་པའི་སྤྲོ་སྣང་ནི།།
བྱང་ཐང་སྐྱ་བོར་ཞེན་པའི་ལན་ཆགས་ཙམ།།
སང་ཉིན་འདི་ནས་ཐོན་རྒྱུའི་མི་ལྡོམ་དེ།།
ཁ་སང་འབྱོར་བའི་ཁོའམ་ཁོ་མོ་སྟེ།།
ང་ཁྱོད་ཟེར་བའི་མདུན་རྒྱབ་གཉིས་པོ་འདི།།
མཆི་མས་གྲུབ་པའི་མཛུམ་མདངས་མངོན་ཆུང་ཞིག།
མེ་ཏོག་མཚར་པོ་ཞིག་གི་གཏམ་རྒྱུད་ལ།།
བརྩེ་དུང་ཞེས་པའི་ཁ་ཡིག་མངོན་འདུག་ཀྱང་།།
སྟོང་པའི་ཁམས་ཀྱི་ཇག་པ་བསླེབས་སོང་ན།།
དེ་ཡང་སྟོང་པའི་ཞལ་དུ་བསྟབ་ངེས་ཡིན།།