ཚོར་བའི་མེ་ལྕེ།

རྭ་རྒྱ་གངས་རྡེའུ།
 
ཆུ་བོའི་གཤིས་དེ་ལྡོག་མེད་ཐུར་དུ་རྒྱུག།།
རི་བོའི་བརྟན་བརླིང་རྩེ་མོ་དགུང་དུ་སྙེག།།
དངོས་པོའི་ཆོས་ཉིད་གཅིག་ལས་གཅིག་ལྷག་པའི།།
མདོར་ན་ཀུན་གྱི་རང་བཞིན་གཅིག་དུ་ངེས།།

ཕྱི་ནང་རྐྱེན་གྱིས་དེད་པའི་ནང་གི་སེམས།།
ཚོར་བའི་རླབས་ཕྲེང་གཡོ་བ་ངེས་མེད་གར།།
སྣ་ཚོགས་པུར་གྱིས་བྲིས་པའི་ཚོན་རྗེས་ལྟར།།
དཀར་དམར་སྣ་མང་འཐབ་པའི་རི་མོ་ཞིག།

ལན་རེ་དམར་ནག་ཁྲག་གི་རྐང་རྗེས་འབྲི།།
སྐབས་རེ་ཞི་བདེའི་སྙིང་གི་དར་ཆ་དང་།།
འགའ་ཞིག་ངེས་མེད་གློག་འགྱུ་རི་མོ་ལྟར།།
རང་རང་ཡུལ་གྱི་མཚོན་བྱེད་དུ་མས་ཁྲིད།།

དེ་ན་དགའ་བྱེད་ར་མའི་གཏམ་རྒྱུད་དུ།།
སྲིན་པོའི་གཡུལ་དུ་ཞུགས་པའི་དཔའ་སྙིང་དང་།།
ཨུ་མ་འཛམ་གླིང་བསུ་བའི་བརྩེ་འདང་གི།
སྒྱུ་རྩལ་གཏམ་གྱི་སྙན་ངག་རིང་མོ་འབྲི།།

ཡང་ན་མཁན་སློབ་ཆོས་གསུམ་གདན་འཛོམས་ཏེ།།
ཤཱཀྱའི་རིང་ལུགས་དྲི་མེད་ལུང་གི་ཆོས།།
རྒྱ་བོད་བསྟན་བཅོས་པོ་ཏི་གསེར་བྲིས་མ།།
བོད་དུ་འདྲེན་པའི་ལོ་པཎ་རྟོགས་བརྗོད་འབྲི།།

གཞན་དུ་བཙན་པོའི་དམག་གི་དཔའ་སྙིང་གིས།།
གོང་མ་ཁྲི་ལས་ཕབ་པའི་གཏམ་རྒྱུད་དང་།།
ཀོང་ཇོ་རིག་པས་བསུས་པའི་ལོ་རྒྱུས་ཀྱི།།
ས་ཆེན་དམག་རྟས་འཇལ་པའི་བདེན་གཏམ་འབྲི།།

ཡང་ན་ཨུ་དམ་བཙན་པོར་ཐོད་མདའ་སྤྲད།།
མཁས་པ་མི་གསུམ་མདོ་སྨད་ཡུལ་དུ་བྱོལ།།
བླ་ཆེན་མཆོག་ནས་འདུལ་ཁྲིམས་བསྐྱར་དར་བྱས།།
བསྟན་པའི་མེ་རོ་སྨད་ནས་གསོས་པ་འབྲི།།

ཡང་ན་དེ་རིང་རྡ་སའི་གནམ་ངོ་ཡི།།
སྤྲིན་པ་དཀར་ནག་འཐབ་པའི་ཆར་ཤུགས་ཀྱིས།།
ནང་གི་ཚོར་ཤུགས་གླུ་རུ་ལེན་པ་ཡི།།
འཚོ་བ་དངོས་ཀྱི་མེ་ལོང་རྒྱབ་མདུན་འབྲི།།

2018/08/07ཉིན་བྲིས།