ཛ་དྲག་གིས་མཚམས་འཇོག་ལྔ་དགོས་ངེས་རེད།

ཨེ་མ་ཧོ།
 

གཅིག གསོན་བསྲེག་གི་ལས་འགུལ་མཚམས་འཇོག

དེང་དུས་ཆོས་དང་རིག་གཞུང་ལ་ཤེས་ཡོན་ཆེན་པོ་མེད་པ་དག་གིས་མི་དང་མིས་བར་ལ་ཕུ་ཤུགས་རྒྱག་ནས་ལ་རྒྱ་ཟེར་བའི་ཚིག་སྐམ་ཙམ་ལ་བསྟེན་ནས་དོན་འབྲས་གང་མེད་པར་ཞེ་སྡང་ལས་གྱུར་བའི་སྟོབས་ཀྱིས་དལ་བརྒྱད་འབྱོར་བཅུ་ཚང་བའི་མི་ལུས་རིན་པོ་ཆེ་ཡང་གནོད་བྱེད་ཀྱིས་རང་སྲོག་གཅོད་པའི་གསོན་བསྲེག་འདི་ངེས་པར་མཚམས་མ་འཇོགས་ན་མ་འོངས་ཉམ་ཆུང་གྲངས་མེད་གཅིག་གི་ཚེ་སྲོག་ལ་ཆུད་ཟོས་སུ་འགྲོ་ངེས་པས་རྒྱ་གཞུང་དང་བཙན་བྱོལ་དབུ་ཁྲིད་དང་རྒྱ་དམར་ཚོས་ཛ་དྲག་ངང་ལས་འགུལ་ཞིག་སྤེལ་ནས་མཚམས་འཇོག་དགོས་ངེས་རེད་བཞག།

གཉིས། ཆབ་སྲིད་ཀྱི་ཏང་སྤྲུལ་མཚམས་འཇོག

ཐོབ་དང་གོ་ས་ཅན་གྱི་མི་ངན་འགའ་རེས་རྒྱ་བོད་ཟུང་གིས་གཞུང་འབྲེལ་གྱི་སྒོ་ནས་རང་རྒྱལ་དང་གཞན་ཕམ་གྱི་ལས་འགུལ་གྱིས༧གོང་གི་བླ་དཔོན་དང་འོག་གི་མི་དམངས་མགོ་སྐོར་གྱིས་སྒེར་མི་རེ་ཟུང་གི་ཨང་སྟེགས་དང་ཞྭ་གོས་མིང་གྲགས་ཀྱི་ཆེད་དུ་ཆགས་སྲེད་ལས་རྒྱལ་བསྟན་སྤྱི་དང་དྲང་བདེན་ལ་རྒྱབ་འགལ་གྱི་སྤྲུལ་རྩོད་ཀྱི་ཆགས་ཞེན་རྒྱའི་གཞུང་གི་ངོས་འཛིན་པའི་སྤྲུལ་སྐུ་དང་བོད་གཞུང་གི་འཚོ་བའི་ཆེད་དུ་བཟོས་པའི་སྤྲུལ་སྐུ་མིང་འཛིན་པ་འདི་རིགས་སོགས་ནི་ང་ཚོའི་སྤྱི་ཚོགས་ཀྱི་སྲི་ཕོ་ལོང་ལྟ་བུ་ནད་རིགས་གསོ་སྐྱོང་བྱེད་པ་འདིས་རིགས་ཕན་པ་ལས་དྲང་བདེན་ལ་གནོད་པ་མང་པས་ངེས་པར་དུ་ཕྱོགས་སོ་སོས་ངོས་ནས་ཕན་ཚུལ་གཟུར་གནས་བློ་གྲོས་ལྡན་པས་བཟོད་གསོལ་དང་བདག་ལས་གཞན་གཅེས་བསམ་པས་ཐུན་སྒྲིལ་དགོས་ངེས་རེད་བཞག།

གསུམ། ཆོས་སྤོང་གི་ལས་ངན་མཚམས་འཇོག

འཛམ་བུ་གླིང་གི་སྤྱི་ནོར་དམ་པ་བཀུར་འོས་པའི་ཡིད་བཞིན་ནོར་བུ་དངོས་དེ་དམ་པའི་ཆོས་མདོ་སྔགས་ཁོ་ན་ལ་འཆད་ཉན་སྒོམ་པས་ཉམས་སུ་ལེན་པ་དེ་རེད། དམ་པའི་ཆོས་ཀྱི་སྙིང་པོ་འཚེ་བ་མེད་པའི་ལས་འབྲས་ལ་རྩི་འཇོག་དང་གཞན་ཕན་སྒྲུབ་པ་དེ་ཡིན་ན་དེང་དུས་དེ་ལས་ལྡོག་ནས་ཆོས་མེད་དམར་པོའི་རིང་ལུགས་དང་ཆོས་ཡོད་སྒེར་སྤྱོད་པ་དག་གིས་དམ་པའི་ཆོས་འདི་ཚོང་ལས་ཙམ་དང་སྒེར་གྱི་དཔུང་ཤུགས་འགྲན་རྩོད་ཀྱི་ཆ་ལག་བཟོས་ལས་འབྲས་མེད་པར་གཞན་ཕམ་རང་རྒྱལ་གྱིས་ལྷག་བསམ་ཁ་ལ་ཁྱེར་རང་དོན་ཕུག་ཏུ་བཅུགས་པ་འདི་དག་མཚམས་འཇོག་མེད་ན་ནམ་ཞིག་ཁ་ཆེ་དམར་གསོད་རིང་ལུགས་ལས་ཐབས་སྡུག་ཏུ་ཆགས་ངེས་པར་འདུག་པས་མཚམས་འཇོག་དགོས་བཞག།

བཞི། ས་རྡོའི་འགྲན་བསྡུར་མཚམས་འཇོག

ཐོས་བསམ་སྒོམ་པའི་བཤད་སྒྲུབ་ཕྲིན་ལས་སོགས་སྣང་མེད་བཞག་ནས་དཔལ་འབྱོར་དང་དཔུང་ཤུགས་སུ་ཆེ། རླངས་འཁོར་དང་ཁྱབ་བསྒྲགས་སུ་མང་། སྨོན་ལམ་དང་འཚོགས་འདུ་སུ་བརྫིག འཇིག་རྟེན་ཆོས་བརྒྱད་ཁོ་ནས་ཕྲག་དོག་ཆེན་པོས་གནས་སྐབས་ཉི་ཚེ་བ་ཞིག་ལ་བསྟོད་འུར་རྒྱག་ནས་ཉི་མ་རེ་གཉིས་ལ་ཁྱབ་བསྒྲགས་ཙམ་ལས་དོན་གྱིས་སྟོད་ཀྱི་རི་ཁྲོད་ལ་རྣལ་འབྱོར་བས་དབེན་པ། བར་དུ་ལྷ་ཁང་ལ་གྲྭ་ཚང་གིས་སྟོང་པ། གྲོང་གི་སློབ་ཁང་ཕལ་ཆེར་ནང་ན་སློབ་ཕྲུག་གིས་སློབ་བརྩོན་པ་ཉི་མོའི་སྐར་མ་བཞིན་དུ་འགྱུར་བས་ཁང་སྟོང་བརྫིག་པོ་འདི་དང་། ཁྱད་པར་བོད་མི་ནང་འཁོར་ནས་བོད་མི་ཞིག་འབུར་དུ་ཐོན་ན་སྐད་ཡིག་དང་བསྟན་སྲིད་ལ་ཕན་པ་རླབས་ཆེན་པོ་ཞིག་འབྱུང་གི་ཡོད་ན་དེ་ཉིད་སུན་ཅི་ནུས་དང་ངན་སྨད་དང་མིང་ངན་སྣ་ཚོགས་བཏགས་ནས་ཕྱོགས་རིས་ཁོ་ན་བྱེད་པ་འདི་དག་མཚམས་འཇོག་དགོས་བཞག

ལྔ། གཉའ་གནོན་དང་ནང་རྩོད་མཚམས་འཇོག

སྔར་མེད་ཀྱི་ལོ་རྒྱུས་རྫུན་བསྒྲིགས་དང་ཆོས་ལུགས་ཕྱོགས་རིས། ཆོལ་ཁ་ཕྱོགས་འཐེན། རང་ལྟ་ཆོག་འཛིན་གྱིས་མཆོད་འོས་བསླུ་ཞིང་འགྱོད་མེད་འགྱོད་པ་བསྐྱེད་པའི་ཁྲེལ་མེད་བྱས་ནས་གསར་འགྱུར་དང་དྲ་བའི་རྒྱུད་ལམ་ཁག་ན་ངོ་ཚ་དང་ལས་འབྲས་མེད་པས་འཛམ་གླིང་གི་མི་སྣ་འཛོམས་སར་ཆགས་སྡང་རྨོངས་གསུམ་གྱི་ལྟས་ངན་སྣ་ཚོགས་པ་ཞིག་སྟོན་བཞིན་པ་འདི་དག་དང་རྒལ་ཚིགས་བཀུག་ཏུ་མེད་པར་དད་གུས་དག་སྣང་གང་ཡང་མེད་པར་མངོན་སུམ་སྟོན་ན་ཡང་། ཁ་ནས་རིས་མེད་དང་ཆིག་སྒྲིལ། མཐུན་ལམ་དང་དབུ་མ་དང་གཅིག་མཚུངས་ཀྱི་ཁ་ཡག་གིས་བཤད་པ་ལས་དོན་གྱིས་ལག་ལེན་མེད་པར་དགེ་ལུགས་གཉིས་སུ་རྩོད ཀཾ་ཚང་ལ་གཉིས་སུ་འཁྲུགས། རྫོགས་ཆེན་ལ་གཉིས་སུ་གྱེས། བན་བོན་གཉིས་སུ་ཕྱེས། ཕྱི་ནང་ལ་གཉིས་འཐེན་པ་སོགས་ནང་འགལ་མི་མཐུན་པ་ཉི་ཟེར་གྱི་རྡུལ་ལས་མང་བའི་ང་རྒྱལ་གྱིས་འཛམ་གླིང་གི་མི་དམངས་ལ་མགོ་བོ་གདུགས་བཞིན་བསྐོར་བའི་ཁ་ཁོག་མི་མཚུངས་པའི་ལས་ཀ་འདི་དག་ངེས་པར་མཚམས་འཇོག་དགོས་བཞག

མདོར་ན་དུག་ལྔའི་གཞན་དབང་དུ་སོང་བའི་བྱ་བྱེད་ངན་པ་དག་མཚམས་འཇོགས་བྱས་ནས་སྡང་ཆགས་གཏི་མུག་ཕྲག་དོག་ང་རྒྱལ་མེད་པའི་ཞི་དུལ་དང་ཞི་བདེའི་ངང་ནས་ཆིག་སྒྲིལ་དང། རང་ཁ་རང་གསོ། གསར་གཏོད་གསུམ་པོས་ངོ་ལྐོག་མཚུངས་པའི་་མཐུན་ལམ་གྱི་ཐབས་ལ་ཚུལ་བཞིན་ཏུ་འབད་ན་ངེས་པ་དོན་གྱི་གངས་ལྗོངས་རང་དབང་གཙང་མ་ཞིག་འབྱུང་བར་གདོན་མི་ཟའོ།།