ཨ་འབྲུག་དཀོན་མཆོག
དུས་རྒྱུན་ང་ཚོས་རྒྱ་རིགས་རྩོམ་པོ་ཝང་ལི་ཞུང་ནི། བོད་ཀྱི་གནད་དོན་ཐོག་རྒྱུས་མངའ་ཡོད་པ་དང༌། དྲང་ཕྱོགས་ཀྱི་བསམ་ཚུལ་འཛིན་མཁན། གནས་ཚུལ་རེ་གཉིས་ཐོག་གདུང་སེམས་མཉམ་བསྐྱེད་དང་རྒྱབ་སྐྱོར་གྱི་ལས་དོན་ཀྱང་བྱེད་མཁན་ཞིག་ཡིན་པའི་ངོས་འཛིན་དང་ཚོར་སྣང་ཡོང་གི་ཡོད་མོད། དོན་དངོས་ཐོག་ཝང་ལི་ཞུང་གིས་བོད་ཀྱི་གནད་དོན་ཐོག་ཤེས་རྟོགས་ཀྱིས་འདང་གི་མེད་ལ། དྲང་ཕྱོགས་ཀྱི་ལྟ་ཚུལ་ཡང་དག་པ་ཞིག་ཀྱང་འཛིན་གྱི་མེད། ཕྱི་ཚུལ་དུ་ཁོ་པས་བོད་དང་བོད་ཀྱི་གནད་དོན་ཐོག་བརྟག་ཞིབ་དང༌། དོ་ཁུར་གྱི་རྣམ་འགྱུར་མངོན་པའི་བསམ་ཚུལ་དང་ལས་དོན་རེ་ཤས་བྱས་པ་ཡང་རྒྱ་མི་རིགས་དང་རྒྱ་ནག་རྒྱལ་ཁབ་ཀྱི་གཞི་རྩའི་ཁེ་ཕན་དང་ཉེན་ཟོན་གྱི་བསམ་བློའི་འོག་ནས་བྱུང་བ་ཞིག་ལས་བོད་མི་མང་གི་བསམ་པ་དང་དངོས་པོའི་འཚོ་བའི་གནས་སྟངས་ལ་གཏིང་ཟབ་ས་ནས་རྒྱུས་ལོན་དང༌། ཤེས་རྟོགས་ཀྱི་གནས་ཚད་ལས་བྱུང་བའི་བསམ་ཤེས་དང་གུས་བརྩི་སླེབས་པ་ཞིག་མ་རེད། ང་ཚོས་ཁོང་ཉིད་རྒྱ་ནག་པ་ཞིག་ཡིན་པའི་ཆ་ནས་རྒྱ་རིགས་ལ་དུང་ཞེན་དང༌། གུང་ཁྲན་ཏང་གི་ལྕགས་རིའི་ནང་གི་སྨྱུག་འཛིན་པ་ཞིག་ཡིན་པའི་ཆ་ནས་ཁོང་གི་སྨྲ་བརྗོད་རང་དབང་གི་འཁོར་རྒྱ་ལ་བཀག་སྡོམ་དང་ཚད་ཐིག་ཡོད་པ་ལ་བསམ་ཤེས་ཐུབ་ཀྱང༌། བོད་ཀྱི་གནད་དོན་ཐོག་རང་དབང་གི་ཞིབ་འཇུག་པ་ཞིག་ཏུ་ཁས་འཆེས་པའི་ཆ་ནས་དངོས་ཡོད་ཀྱི་གནས་ཚུལ་རྣམས་ཆ་ཚང་བའི་རྒྱུས་ལོན་བྱེད་དགོས་པ་དང༌། རྩོམ་པོ་ཞིག་ཡིན་པའི་ཆ་ནས་རྫུན་མི་སྨྲ་བའི་ཀུན་སྤྱོད་ཀྱི་ཚད་གཞི་ཙམ་ཡོད་འོས་ཀྱང༌། ད་ཐེངས་བོད་མིའི་གཞི་རྒྱ་ཆེ་བའི་ཞི་རྒོལ་གྱི་ངོ་བོ་དང་དེའི་རྒྱབ་ལྗོངས་ལ་དབྱེ་ཞིབ་དང་ཕྱོགས་བསྡོམས་བྱེད་ཚུལ་དེ་ཆེས་བདེན་དྲང་མིན་པ་དང་ཆ་མི་ཚང་བ་ཞིག་རེད།
ང་ཚོས་རྒྱ་ནག་པ་ཞིག་གིས་དངོས་ཐོག་བདེན་འཚོལ་དང་བློ་རྒྱ་ཆེན་པོའི་ལག་ལེན་གྱི་ཐོག་ནས་བྱེད་མི་ཐུབ་པ་ལ་དེ་ཙམ་ཡ་མཚན་དགོས་དོན་མེད། དེ་ནི་མི་རིགས་འདིའི་གོ་རྟོགས་དང་སྙིང་སྟོབས་ཀྱི་ཚད་གཞིས་ཐག་བཅད་པའི་མི་སྒེར་དང་སྤྱི་ཚོགས་ཀྱི་རྒྱུན་གཤིས་ཤིག་ཡིན་ལ། བཙན་རྒྱལ་རིང་ལུགས་དང་མི་རིགས་རིང་ལུགས་ཆེས་ཆེ་བའི་སྲིད་གཞུང་དང་མི་རིགས་ཤིག་གིས་རང་ཉིད་ཀྱི་བཙན་གནོན་འོག་ཏུ་གནས་པའི་མི་རིགས་ཤིག་གི་སེམས་གཏིང་གི་རེ་འདོད་དང་སྙིང་དབུས་ཀྱི་འབོད་སྒྲ་དེ་མཐོང་རྟོགས་བྱེད་མི་ཐུབ་ལ་བསམ་ཤེས་ནི་དེ་བས་ཀྱང་བྱེད་མི་ཐུབ་པ་དེ་ལོ་རྒྱུས་ཀྱི་ཉམས་མྱོང་དང་དངོས་ཡོད་ཀྱི་དཔང་རྟགས་མང་པོ་ཞིག་གིས་ང་ཚོར་དམར་ཁྲིད་དང་གསལ་བཤད་བྱས་ཡོད་མོད། ཡ་མཚན་པ་ཞིག་ལ་དུས་རྒྱུན་བཙན་རྒྱལ་རིང་ལུགས་ཀྱི་བྱེད་ཕྱོགས་དང་མྀ་རིགས་རིང་ལུགས་ཀྱི་སྤྱོད་ཚུལ་ལ་བློ་མོས་མེད་པའི་རྣམ་འགྱུར་འཛིན་མཁན་གྱི་རྒྱ་རིགས་རྩོམ་པ་པོ་ཝང་ལི་ཞུང་ཡང་བོད་ཀྱི་གནད་དོན་ཐོག་ལྟ་སྐབས་རིང་ལུགས་དེ་གཉིས་ཀྱི་བཀག་རྒྱ་ལས་ཐར་ཐུབ་ཀྱི་མེད། ཇི་སྲིད་རིང་ལུགས་དེ་གཉིས་ལས་མ་ཐར་བ་དེ་སྲིད་དུ་རྒྱ་ནག་པ་ཞིག་གིས་བོད་ཀྱི་གནད་དོན་ཞེས་པ་དེ་གཏིང་ཟབ་མོས་རྟོགས་མི་ཐུབ་ལ་བསམ་ཤེས་ནི་དེ་བས་ཀྱང་མི་ཐུབ། དཔེར་ན་ཝང་ལི་ཞུང་གི་རྩོམ་བྲིས་ཚན་པ་ཞིག་ཏུ། བོད་མིའི་ཞི་རྒོལ་གྱི་ངོ་བོ་དེ་གཏོར་བསྲེག་བཅོམ་གསུམ་ཡིན་ཚུལ་བཤད་འདུག་ལ། ཡང་རྩོམ་བྲིས་གཞན་ཞིག་ཏུ་དེའི་རྩ་བའི་རྒྱུ་རྐྱེན་ནི་བོད་དུ་གནས་སྤོས་བྱས་པའི་རྒྱ་མི་རིགས་དང་ས་གནས་བོད་མིའི་བར་ཚོང་རའི་དཔལ་འབྱོར་གྱི་ཁེ་གྱོང་འགྲན་རྩོད་དང་དེའི་ཤུགས་རྐྱེན་ལས་བྱུང་བའི་ཞེ་འཁོན་དེ་ཡིན་ཚུལ་ནན་བརྗོད་བྱས་འདུག ཚིག་དུམ་འཁྱེར་ནས་གོ་བ་ལོག་སྒྲུབ་བྱེད་པ་དང་བཟོ་བཅོས་བརྒྱབ་ནས་གནད་དོན་གྱི་ངོ་བོ་སྦས་སྐུང་དང་གཡོ་བཅོས་བྱེད་པ་གང་ཡིན་རུང་བཙན་རྒྱལ་རིང་ལུགས་པའི་སྤྱོད་ལམ་ནང་གི་རྒྱུན་སྤྱོད་ཅིག་ཡིན་པ་བཙན་གནོན་འོག་གི་ང་ཚོར་མྱོང་རྒྱུས་དང་ཤེས་རྟོགས་ཟབ་མོ་ཡོད།
དྲང་མོ་བཤད་ན། ད་ཐེངས་བོད་མིའི་ཞི་རྒོལ་གྱི་ལས་འགུལ་ནང་ས་ཁུལ་རེ་ཤས་ལ་ཅུང་གཏོར་བཅོམ་གྱི་རྣམ་པ་ལྡན་པའི་བྱ་སྤྱོད་རེ་ཐོན་ཡོད་དུ་ཆུག་ཀྱང༌། དེས་བོད་མིའི་ཞི་རྒོལ་གྱི་ངོ་བོ་ཡོངས་སུ་མཚོན་མི་ཐུབ་ལ། མ་གཞིའི་ཆ་ནས་བོད་མིའི་ངོ་རྒོལ་གྱི་ངོ་བོའི་མཚོན་རྟགས་དེ་གཞི་རིམ་མང་ཚོགས་ཀྱི་འཚོ་བར་དམིགས་གཏད་པའི་གཏོར་བསྲེག་བཅོམ་གསུམ་ཞིག་གཏན་ནས་མ་ཡིན་པར། དེ་ནི་བོད་མི་ཚོ་ཡང་འགྲོ་བ་མིའི་གྲས་ཤིག་ཡིན་པས་འགྲོ་བ་མི་ལ་ཡོད་འོས་པའི་གཞི་རིམ་གྱི་རང་དབང་དང༌། བོད་འདི་ལོ་རྒྱུས་དང་རིག་གཞུང་གཏིང་ཟབ་ཡོད་པའི་མི་རིགས་ཤིག་ཡིན་པའི་ཆ་ནས་རང་ཉིད་ལ་དགའ་ཕྱོགས་དང་འཚོ་སྟངས་གཞན་དང་མ་་འདྲ་བ་ཞིག་ཡོད་པ་དེ་དག་བཙན་འཕྲོག་བྱས་པའི་དཀའ་སྡུག་མ་བཟོད་པར་ལག་པ་སྟོང་བ་གནམ་ལ་འཕྱར་ནས་རྒྱུན་རིང་གི་དཀའ་སྡུག་དང་སེམས་གཏིང་གི་རེ་འདོད་ཕྱིར་བསྒྲགས་བྱས་པ་འབའ་ཞིག་རེད། འདི་ནི་གཡོ་རྫུན་དང་དྲག་ཤུགས་ཀྱི་རྒྱབ་རྟེན་འོག་འགྲེང་པའི་རྒྱ་ནག་གུང་ཁྲན་ཏང་གི་འོས་འཚམ་མིན་པའི་དབང་སྒྱུར་ལ་ངོ་ལོག་བྱས་པའི་འཚེ་བ་མེད་པའི་ལས་འགུལ་ཞིག་དང༌། རང་གི་ཆབས་འབངས་ས་ཡ་མང་པོ་དམར་གསོད་བྱེད་པའི་སྲིད་གཞུང་དེའི་དབང་སྒྱུར་སྟོབས་ཤུགས་ཀྱི་རྩིག་རྟིང་སྒུལ་བའི་བདེན་པའི་འོས་ལངས་ཤིག་ཡིན་སྟབས། རྒྱ་གཞུང་གིས་དེ་ཉིད་འཚེ་བའི་ལས་འགུལ་དུ་བཅོས་པ་དང༌། འཚེ་བའི་ལས་འགུལ་དུ་ཆེད་བཟོས་བྱས་པ། འཚེ་བའི་ལས་འགུལ་དུ་རྫུན་སྒྲོག་བཅས་བྱས་དང་བྱེད་བཞིན་པའི་སྐབས་སུ་ཝང་ལི་ཞུང་ནས་བོད་མིའི་གཏོར་བསྲེག་བཅོམ་གསུམ་གྱི་ལས་འགུལ་ཞེས་པའི་ངོས་འཛིན་གྱི་འོག་ནས་ཆེད་རྩོམ་སྤེལ་བ་འདིས་ཁོ་བ་ཡང་རིང་ལུགས་གང་ཞིག་གི་སྒྲིབ་ཡོལ་གྱི་འོག་ཏུ་ཡོད་པ་ཤེས་ཐུབ་ལ། ཆོལ་གསུམ་བོད་མི་ཚང་མ་ཀུན་གྱིས་བསམ་ཡུལ་ལས་འདས་པའི་འབོད་སྒྲ་གཅིག་གི་འོག་ནས་ཡར་ལངས་བྱས་ཤིང༌། ཁོང་ཚོ་ཐུན་མོང་གིས་འབོད་སྒྲ་ཞིག་བསྒྲགས་པ་ནི་ྋགོང་ས་སྐྱབས་མགོན་ཆེན་པོ་མཆོག་བོད་དུ་གདན་ཞུ་བྱེད་དགོས་པ། བོད་རང་དབང་དང་རང་བཙན་དགོས་པ། ཀུན་གཟིགས་པཎ་ཆེན་རིན་པོ་ཆེས་གཙོས་པའི་བོད་ནང་གི་ཉེས་མེད་ཉེས་འཛུགས་ཀྱིས་བཙོན་འཇུག་བྱས་པ་རྣམས་གློད་གྲོལ་དགོས་པ་བཅས་རེད།
དགོས་འདུན་དང་འབོད་སྒྲ་དེ་དག་ནི་སྒྲུབ་ཕྱོགས་ནས་བཤད་ན་ལོ་རྒྱུས་ཐོག་གི་བོད་མིའི་ཐོབ་ཐང་ཁག་བསྐྱར་གསོ་བྱེད་དགོས་པ་དང༌། དེ་རིང་ཁ་སང་གི་འདྲ་མཉམ་མིན་པ་དང་མི་རིགས་དབྱེ་འབྱེད་ཀྱི་སྲིད་བྱུས་ཁག་ལེགས་བཅོས་བྱེད་དགོས་པ། བོད་མིའི་དགའ་ཞེན་དང་ཡིད་ཆེས་ལས་བྱུང་བའི་དད་མོས་དང་མངོན་འདོད་ཁག་ལ་བརྩི་བཀུར་བྱེད་དགོས་པའི་རེ་འབོད་ཡིན་པ་དང༌། དགག་ཕྱོགས་ནས་བཤད་ན་ད་ལྟའི་ཁ་བྲལ་དུམ་བགོས་དང༌། བཙན་གནོན་གཞན་སྒྱུར་གྱི་སྲིད་བྱུས་འོག་བོད་མི་རིགས་ལ་བདེ་སྐྱིད་མེད་པ་དང༌། འདོད་བློ་མི་ཁེངས་པ། ཞེ་འཁོན་ཆེ་བ་བཅས་ཀྱི་དབང་གིས་སྲིད་བྱུས་དང་བྱ་ཐབས་དེ་དག་དང་དེ་དག་ལག་བསྟར་བྱེད་པའི་གཞུང་དང་མི་སྣ་ཡོངས་ལ་ངོ་རྒོལ་གྱེན་ལངས་བྱས་པ་ཞིག་རེད། དེར་བརྟེན་འགལ་བ་འདི་དག་གི་ནང་དུ་མི་རིགས་ཀྱི་འགལ་བ་དང༌། རིག་གཞུང་གི་འགལ་བ། ཆབ་སྲིད་ཀྱི་འགལ་བ། འཚོ་གནས་ཀྱི་འགལ་བ་སོགས་སྣ་མང་འགལ་རྩོད་ཀྱིས་ཁེངས་པའི་གཏིང་ཟབ་པའི་དཀའ་རྙོག་ཅིག་གི་མངོན་ཚུལ་ཡོད་པ་ལས་ཁྲོམ་རའི་ཐོག་གི་དཔལ་འབྱོར་གྱི་འགལ་རྩོད་ཙམ་ཞིག་གཏན་ནས་མ་རེད་ལ། བོད་མིའི་ལས་འགུལ་གྱི་སྣེ་ཁྲིད་བྱེད་མཁན་དང་ཆ་ཤས་ལེན་མཁན་མང་ཆེ་ཤོས་གྲྭ་བཙུན་དང་སློབ་ཕྲུག་དག་ཡིན་པས་ཀྱང་བོད་ནང་གི་དཀའ་ངལ་དང་འགལ་བ་དེ་དངོས་པོ་ལས་བསམ་པའི་འགལ་རྩོད་དང་དེའི་དཀའ་སྡུག་ལས་བྱུང་བ་ཆེས་གསལ་སྟོན་བྱས་འདུག དེའི་ཕྱིར་ཝང་ལི་ཞུང་གིས་རྒྱ་ནག་གི་དུས་རབས་ཕྱེད་ཀའི་མི་རིགས་སྲིད་བྱུས་ཕམ་ཉེས་ལ་འགྲོ་དགོས་པའི་རྒྱུ་རྐྱེན་འཚོལ་ཞིབ་བྱེད་འདོད་ན་ངེས་པར་དུ་བོད་མི་རིགས་ཀྱི་ནང་སེམས་ཀྱི་དཀའ་སྡུག་དང་མངོན་འདོད་འཚོལ་ཞིབ་ནས་མགོ་མི་རྩོམ་པར་ཕྱི་དངོས་པོའི་ཐོག་གི་ཁྱད་པར་ཡན་གར་བ་རགས་བརྗོད་བྱེད་པ་དེ་དོན་དངོས་དང་མི་མཐུན་པའི་རྫུན་གཏམ་གྱི་འབྱུང་ཁུངས་རེད།
ངས་ཝང་ལི་ཞུང་གཅིག་པུའི་རྫུན་གཏམ་ལ་རྒྱུ་མ་ཕུ་འདེད་དེ་ཙམ་བྱེད་དགོས་དོན་མེད་ཀྱང༌། གནད་དོན་འདི་ནི་རྒྱ་ནག་དང་རྒྱ་ནག་གི་ཤེས་ཡོན་ཅན་ཞིག་གི་བསམ་བློ་དང་གོ་རྟོགས་ཀྱི་གནས་ཚད་དང༌། ཁོ་པ་ཚོའི་བསམ་བློ་དང་ཀུན་སྤྱོད་དེ་བདེན་དོན་དང་བར་ཐག་རིང་ཐུང་གི་མི་གཞི་དང་བཟང་སྤྱོད་ཀྱི་གནས་ཚད། མ་མཐར་ཡང༌། རྒྱ་ནག་པ་ཞིག་གིས་བོད་ཀྱི་གནད་དོན་ལ་ཇི་ལྟ་བུའི་དྲང་ཕྱོགས་ཀྱི་ལྟ་ཚུལ་འཛིན་ཐུབ་མིན་གྱི་གནས་ཚད་བཅས་ནི་ང་ཚོས་ཚོར་སྣང་སྐྱེན་པོས་ངེས་པར་བལྟ་དགོས་པའི་གནས་ཤིག་ཡིན་ཏེ། རྒྱ་ནག་གིས་ང་ཚོ་གསོད་སྟངས་དེ་མེ་མདའ་དང་ལྕགས་སྒྲོག་གཅིག་པ་མིན་པར་སྨྱུ་གུ་དང་དྲིལ་བསྒྲགས་ཀྱི་ཁྱབ་ཁོངས་སུ་རྣམ་པ་འདྲ་མིན་གྱི་སྲིད་བྱུས་ཡོད་ལ། རྒྱ་ནག་གིས་ང་ཚོ་གནོན་སྟངས་དེ་ཁ་གཏད་དང་རྒོལ་གཏམ་ཁོ་ན་མ་ཡིན་པར་ཞི་འཇམ་དང་སིམ་འཛུལ་གྱི་འཁྲབ་སྟོན་སྣ་ཚོགས་ཡོད་པས་ཡིན་ཞིང༌། ལས་དོན་དང་འཁྲབ་སྟོན་དེ་འདྲའི་ནང་དུ་མི་སྒེར་ལ་སྲིད་གཞུང་གི་མིང་བཏགས་པ་དང་སྲིད་གཞུང་ལ་མི་སྒེར་གྱི་མིང་བཏགས་ཏེ་གཡོ་བྱུས་སྣ་ཚོགས་ཀྱིས་ཁེངས་ཏེ་ཡོད་པས་ཀྱང་ཡིན།
དེའི་ཕྱིར་རྒྱ་ནག་གིས་བདེན་པ་ལག་ཏུ་བཟུང་སྟེ་འཇིག་རྟེན་འདིར་བཟང་སྤྱོད་ཀྱི་འགན་ཞིག་འཁུར་བའི་རེ་བ་དང་ཡིད་ཆེས་ཆེན་པོ་དུས་ཡུན་ཐུང་ངུའི་ནང་དུ་གཏན་ནས་ཡོང་མི་ཐུབ་པ་ང་ཚོས་ཤེས་རྟོགས་ཐུབ་ཀྱི་ཡོད་ནའང༌། འཇིག་རྟེན་དང་མིའི་ལོ་རྒྱུས་ནང་སུས་ཀྱང་གསོད་མི་ཐུབ་ལ་གང་གིས་ཀྱང་བསྒྲིབ་མི་ཐུབ་པ་ཞིག་ཡོད་པ་ནི་བདེན་དོན་ཞེས་པ་འདི་ཡིན་པས། རྒྱ་ནག་པར་བདེན་དོན་གསོད་སྒྲིབ་ཀྱི་ནུས་པ་གཏན་ནས་མེད་པ་མ་ཟད་ཉིན་ཞིག་གཡོ་རྫུན་དང་དྲག་ཤུགས་ཀྱི་གོང་བུ་མཉམ་འཐོར་གྱིས་འཛམ་གླིང་ལ་དག་འབུད་མ་བྱས་ཐབས་མེད་ཀྱི་ཉིན་མོ་ཞིག་ཡོང་རྒྱུ་ཡིན་ཡང་ང་ཚོར་ཡིད་ཆེས་གཏིང་ཟབ་ཡོད། དེའི་ཕྱིར་བོད་མྀ་རིགས་འདི་དུས་ནམ་ཡང་ཕྱི་ནུར་བྱེད་མི་སྲིད་ལ། སྐྱག་རྫུན་དང་དྲག་སྤྱོད་ཀྱི་ཁ་གཏད་དུ་བློ་རིག་དང་སྙིང་སྟོབས་ཀྱིས་འགྲེངས་ངེས། མ་མཐར་མི་རབས་གསར་པའི་བོད་མྀ་ཚོས་རྒྱ་ནག་གི་ནག་ཉེས་དེ་ད་ལྟའི་འཛམ་གླིང་ལ་སྟོན་གྱི་རེད་ལ། མ་འོངས་པའི་མི་རབས་ལ་བརྗོད་ཀྱི་རེད། འདི་ནི་ང་ཚོས་མི་རིགས་འཁོན་སློང་གི་བྱེད་སྤྱོད་ཁྱབ་སྤེལ་བྱེད་པ་མ་ཡིན་ལ། རྒྱ་ནག་པར་དྲང་བདེན་གྱི་སྤྱོད་ཚུལ་འཛིན་པའི་རེ་སྐུལ་བྱེད་པ་དེ་བས་ཀྱང་མ་ཡིན་པར་བདེན་རྫུན་བང་འགྲན་གྱི་འཇིག་རྟེན་འདི་ནས་ནམ་ཞིག་རྫུན་པ་ཉིད་ཕམ་ངེས་ཡིན་པའི་བདེན་པའི་སྟོབས་ཤུགས་དེ་སྟོན་འདོད་པ་ཡིན། འདི་ནི་དྲང་བདེན་གྱི་སྟོབས་ཤུགས་རེད། འདི་ནི་བོད་མི་རིགས་ཀྱི་སྟོབས་ཤུགས་རེད། སྟོབས་ཤུགས་འདིར་རང་གི་ཁ་གཏད་ལས་རྒྱལ་བའི་ནུས་ཤུགས་ཆ་ཚང་ཡོད།
ཨ་འབྲུག་ལགས།
ངས་ད་སོ་མར་རྩོམ་འདི་བཀླགས་པ་ཡིན། བཀླགས་པ་དང་༼བོད་ནི་རྒྱ་ནག་གི་རྩིབས་རུས་མཉེན་མོ༽སོགས་བང་གི་རྩོམ་ཡིག་མང་པོ་ཞིག་གི་ནང་དོན་ངོ་མ་དེ་ཚོར་ཕྱིར་དྲན་བྱས་པ་ཡིན། དྲང་མོར་བཤད་ན། བང་གིས་བོད་དོན་གླེང་སྟངས་དེ་ནི། ནང་སྙིང་གིས་རྒྱ་ནག་གཞུང་གི་དགོས་མཁོ་དང༌། ཕྱི་ཤུན་གྱིས་བོད་དོན་གླེང་ཚུལ་སྤྱད་པའི་རྩོམ་ཡིག་དེ་དག་གིས། ང་ཚོའི་ཁོར་ཡུག་ནང་བཙན་འཛུལ་བྱས་དང་བྱེད་ཀྱིན་པ་རེད་ལ། བཙན་འཛུལ་གྱི་ལམ་ཁ་དེ་ཡང་ང་ཚོས་སྤྲད་དང་སྤྲོད་མུས་ཤིག་ཏུ་མཐོང༌། དེ་ནི་འདི་འདྲ་རེད། ཚིག་གི་ངོ་གདོང་ནས་བོད་ཞེན་ཙམ་སྟོན་པ་དང༌། དོན་གྱི་འབབ་སོ་ཡིས་རྒྱ་ཞེན་སྟོན་པ་འདིས། བང་ནི་བོད་རྒྱའི་བར་གྱི་ཕོ་ཉ་བ་ཞིག་ཏུ་མཐོང་ཚུལ་བྱུང་བ་རེད་སྙམ། འདི་འདྲ་ཞིག་ཨེ་རེད། འདི་ཙམ་གྱིས་ངའི་བསམ་ཚུལ་ད་དུང་བཤད་ཚར་མེད། བང་ལི་ཞུང་ནི་ཨེ་ཤ་ཡ་རང་དབང་རླུང་འཕྲིན་ཁང་གི་སྐུ་མགྲོན་གཙོ་བོའི་ནང་གི་གཅིག་རེད། ག་དུས་ཡིན་ནའང་ཁོས་རྩོམ་ཡིག་སྤེལ་རིམ་བཞིན་རླུང་འཕྲིན་པ་སྐོར་ཞིག་གིས་འཕྲལ་མར་བོད་ཡིག་ཏུ་ཕབ་ནས་སྒྲོག་སྦྱང་བྱེད། རླུང་འཕྲིན་གསལ་མཁན་ཚོས་ཀྱང་དོ་སྣང་ཆེན་པོས་ཉན། གོ་རིམ་འདིའི་ནང་ནས་བང་ནི་བོད་ཀྱི་གྲོགས་པོ་ཞིག་གི་ཚུལ་གྱིས་བོད་མིའི་སེམས་ནང་འཛུལ། ད་འོ་ན། འདི་ཚང་མ། ཉེན་ཁ་རེད་ཟེར་དགོས་རེད་པས། ཡང་ན། ད་ནས་བང་གི་རྩོམ་ཡིག་ཡིན་ཚད་ལ་ཨ་མ་ཡིན་ཤག་དང་ནུ་མ་ནུ་ཤག་བྱེད་རྒྱུ་མེད་པའི་བརྡ་སྟོན་ཇི་ལྟར་བྱེད། འདི་ནི་གནད་འགག་རེད་སྙམ། དཔེར་ན། ༼བོད་ནི་རྒྱ་ནག་གི་རྩིས་རུས་མཉེན་མོ༽ཞེས་པའི་རྩོམ་དེ་བོད་གཞུང་གིས་ཕབ་བསྒྱུར་དང་དཔར་འགྲེམས་བྱས་ཡོད་པ་རེད། འདི་ཙམ་ནི་བང་གི་སྐོར་ལ་བསམ་ཚུལ་ཙམ་ཡིན། ཉེ་བའི་ཆར་བང་གིས་རྩོམ་ཡིག་མང་པོ་སྤེལ་ནས་རྒྱ་ནག་གིས་དུས་མཚམས་ཤིག་ཏུ་ངོས་འཛིན་བྱས་པའི་གསུམ་གཅིག་བཞི་དེ་ཤུགས་ཀྱིས་གླེང་བའི་ཞོར་ལ། མདོ་སྨད་ཁུལ་ནས་བཅོམ་སྲེག་གི་རྣམ་པ་དེ་རྒྱ་ནག་གཞུང་གིས་ངེས་པར་ཤེས་དགོས་ངེས་ཡིན་པ་དང༌། གླེང་རིན་ཡོད་ངེས་ཡིན་སྐོར་གྱི་གསལ་བཤད་ཐེངས་ཁ་ཡར་བྱས་ཡོད་པ་རེད། དོན་དངོས་ཀྱི་ཆ་ནས་བྱས་ན། གནད་འགག་གི་སྐབས་སུ་བང་ནི་རྒྱ་ནག་གི་དགོས་མཁོ་སྒྲུབ་མཁན་ཞིག་ཡིན་པའི་ཁྱེད་རང་གི་ལྟ་ཚུལ་འདི་བོད་ཀྱི་ཤེས་ཡོན་པ་ཡིན་ཟེར་མཁན་ཆ་ཚང་གིས་ཤེས་དགོས་པ་ཞིག་རེད། ཡིན་ནའང༌། བོད་ཀྱི་རྩོམ་པ་པོའི་ཁྲོད་ནས་བང་ལས་ལྷག་པའི་བོད་དོན་དབྱེ་ཞིབ་པ་ཞིག་བཙལ་ནས། ཨེ་ཤ་ཡ་རང་དབང་རླུང་འཕྲིན་ཁང་གི་སྐུ་མགྲོན་དུ་ངོས་སྦྱོར་བྱེད་པའི་དབང་དུ་བཏང་ན། སུ་ཞིག་འོས་སམ། དྲི་བ་འདིའི་ལན་བང་གི་ཁ་གཏད་དུ་འགྲེངས་མཁན་ཞིག་གི་ལག་ལེན་བརྒྱུད་རིམ་ནས་རྙེད་དགོས་པ་རེད། བསམ་ཚུལ་ཤིག་ཤོད་དང༌།
thank you