སྲས་འཇིགས་མེད་ནོར་བུ་ལགས་ནི་སྐུ་གཅེན་པོ་ལྟག་མཚེར་རིན་པོ་ཆེ་མཆོག་དང་ཀུན་དབྱངས་ནོར་བུ་རྣམ་གཉིས་ཀྱི་སྲས་ཆུང་བ་ཡིན་ཞིང་། ཁོང་གིས་བོད་རང་བཙན་དང་བོད་མི་ས་ཡ་དྲུག་གི་བདེ་དོན་ཆེད་གཅེས་པའི་ཚེ་སྲོག་བློས་གཏོང་གིས་སྐུ་ཚེའི་འཕེན་པ་རྫོགས་པ་ནི་བོད་མི་གཙོས་པའི་བོད་དོན་རྒྱབ་སྐྱོར་བྱེད་མཁན་ཚོར་མཚོན་ན་གོད་ཆགས་ཆེན་པོ་ཞིག་དང་བློ་ཕམ་གྱི་གནས་ཤིག་ཡིན། ཁོང་ནི་ཡབ་དམ་པ་ལྟག་མཚེར་རིན་པོ་ཆེ་མཆོག་གི་དགོངས་གཞི་རྒྱུན་འཁྱོངས་གནང་མཁན་དང་བོད་ཞེན་ཆེ་བའི་རང་བཙན་འཐབ་རྩོད་པ་ཞིག་ཡིན་པས། ཁོང་གིས་ད་བར་ཨིན་ཌི་ཡ་ན་པོ་ལི་སི་ནས་ཊོ་རོན་ཊོ་དང་ཐེ་ཝན་ཐེ་པེ་ནས་ཀོ་ཞུང་། ཕི་ལ་ཌི་ཕི་ཡ་ནས་ཝ་ཤིན་ཊོན་ཌི་སི་བར་སོགས་ཁྱོན་བསྡོམས་བོད་དོན་ཞི་བའི་གོམ་བགྲོད་དངརྐང་འཁོར་བཞོན་སྐྱོད་ཐེངས་གྲངས་ ༢༡ གནང་ཡོད་ཅིང་མེ་ལི་བརྒྱད་སྟོང་ལྷག་བསྐྱོད་ཡོད་པ་རེད།
ཨིན་ཌི་ཡ་ན་པོ་ལི་སི་ནས་སྨི་ནི་སོ་ཊ་བར་ཞི་བའི་གོམ་བགྲོད་གནང་སྐབས
རི་དྭགས་ཚལ་དགོན་པར་གདུང་སེམས་མཉམ་སྐྱེད་སྣེ་ལེན
ཕྱི་ལོ་ ༢༠༡༠ ཡི་དབྱར་ཁ་ཚ་བའི་ནང་ཁོང་གིས་ཨིན་ཌི་ཡ་ན་པོ་ལི་སི་ནས་སྨི་ནི་སོ་ཊ་བར་ཞི་བའི་གོམ་བགྲོད་གནང་སྐབས་ཝི་སི་ཀོན་སིན་མངའ་སྡེ་མལ་ཌི་སིན་གྲོང་ཁྱེར་བརྒྱུད་ཕེབས་ཤིང་། མལ་ཌི་སིན་གནས་འཁོད་བོད་མི་ཚོས་གདུང་སེམས་མཉམ་སྐྱེད་ཀྱིས་ཉིན་ཤས་རིང་ཁོང་དང་ལྷན་དུ་ཞི་བའི་གོམ་བགྲོད་མཉམ་སྐྱོད་བྱ་རྒྱུའི་སྐལ་བ་བྱུང་ཞིང་ཁོང་གི་བོད་དོན་ཐོག་བཅངས་པའི་འཇིགས་པ་མེད་པའི་སྙིང་སྟོབས་དང་ནོར་བུ་དགའ་འཁྱིལ་ལྟར་བོད་མི་ལ་བཅངས་པའི་བརྩེ་སེམས་ཟབ་མོ་ཤེས་རྟོགས་བྱེད་པའི་གོ་སྐབས་བྱུང་ཡོད།
འདི་ཟླའི་ཚེས་ ༡༩ རེས་གཟའ་སྤེན་པའི་ཕྱི་དྲོ་ཆུ་ཚོད་ ༥ ཐོག་དམ་པ་ཁོང་སྐུ་གཤེགས་པར་མྱ་ངན་དང་ཁོང་གི་རླབས་ཆེན་མཛད་རྗེས་རྣམས་རྗེས་དྲན་བྱེད་ཆེད། ཝི་སི་ཀོན་སིན་བོད་མི་སྤྱི་མཐུན་ཚོགས་པའི་གོ་སྒྲིག་འོག་རི་དྭགས་ཚལ་དགོན་པའི་དགེ་འདུན་པའི་གཙོས་པའི་སེར་སྐྱ་མི་དམངས་རྣམས་རི་དྭགས་ཚལ་དགོན་པར་འདུ་འཛོམས་ཀྱིས་སྨོན་ལམ་འདོན་སྒྲོག་དང་མ་ནི་གསོག་སྒྲུབ་བྱས་ཤིང་། ཕྱི་ཚེས་ ༢༠ རེས་གཟའ་ཉི་མའི་དགོང་དྲོའི་ཆུ་ཚོད་ ༦ ཐོག་ས་གནས་བོད་རང་དབང་སློབ་ཕྲུག་ཚོགས་པ་དང་གཞོན་ནུ་ཚོགས་པའི་གོ་སྒྲིག་འོག་ས་གནས་བོད་མི་ཚོས་སླར་ཡང་ཝི་སི་ཀོན་སིན་གཙུག་ལག་སློབ་གྲྭ་ཆེན་མོའི་དཔེ་མཛོད་མདུན་ཐང་དུ་དམ་པ་ཁོང་གི་ཆེད་མར་མེ་ཁྲོམ་སྐོར་ཞིག་གནང་འཆར་ཡོད་མོད། ཆར་ཞོད་དང་ཁ་བའི་རྐྱེན་པས་ཕྱིར་འཐེན་བྱེད་དགོས་འཁེལ་འདུག
རི་དྭགས་ཚལ་དགོན་པར་སེར་སྐྱ་མི་དམངས་ཀྱིས་སྨོན་ལམ་མ་ནི་གསོག་སྒྲུབ། པར་པ་ཤེས་རབ་རྒྱལ་མཚན།
ཨོཾམཎིཔདྨེཧཱུཾ། ཨོཾམཎིཔདྨེཧཱུཾ། ཨོཾམཎིཔདྨེཧཱུཾ། ཨོཾམཎིཔདྨེཧཱུཾ། ཨོཾམཎིཔདྨེཧཱུཾ། ཨོཾམཎིཔདྨེཧཱུཾ། ཨོཾམཎིཔདྨེཧཱུཾ། ཨོཾམཎིཔདྨེཧཱུཾ།