ཞི་བདེའི་དེད་དཔོན།

ཨ་འདུས་མིག་ཆུ།

ཞི་བདེའི་དེད་དཔོན་རྣམ་པ་ལྔ།།
འཛམ་གླིང་ཁྱོན་ལ་སྐུ་དྲིན་ཆེ།།
སྒོས་སུ་༸རྒྱལ་མཆོག་བཅུ་བཞི་པ།།
མགོ་ནག་མི་ལ་སྐུ་དྲིན་ཆེ།།

ཞི་བདེའི་དེད་དཔོན་ཡིན་པ་ལ།།
ཁྱད་པར་ཅུང་ཟད་མེད་ན་ཡང་།།
ཉམ་ཐག་བོད་མིའི་དཀའ་སྡུག་ལ།།
ལྷག་ཏུ་གཟིགས་པ་༸རྒྱལ་མཆོག་ཉིད།།

ཞི་བདེའི་ལས་དོན་མཛད་པ་ལ།།
སྔ་ཕྱིའི་ཁྱད་ཙམ་ལོས་ཡོད་ཀྱང་།།
བོད་འབངས་ཐུགས་ཀྱིས་སྐྱོང་མཁན་ནི།།
སྐྱབས་མགོན་ཡིད་བཞིན་ནོར་བུ་ཉིད།།

རླབས་ཆེན་སྐྱེས་བུ་འདི་དག་ནི།།
བྱང་སེམས་ཡིན་ལ་ཁྱད་མེད་ཀྱང་།།
བོད་མིའི་དཀའ་སྡུག་སྣ་ཚོགས་ཀུན།།
ཁུར་ཏུ་བཞེས་མཁན་༸རྒྱལ་བ་ཉིད།།

ཞི་བདེའི་དེད་དཔོན་འདི་དག་ཀུན།།
དད་གུས་ཆེན་པོས་བརྩི་བཀུར་བྱེད།།
སེམས་ཀྱི་དད་འདུན་གཙོ་བོ་ནི།།
རྒྱལ་མཆོག་ཉིད་ལ་དབུལ་རྒྱུ་ཡིན།།

འཛམ་གླིང་སྐྱེས་ཆེན་འདི་དག་ནི།།
འགྲོ་བ་ཀུན་ལ་བྱམས་མོད་ཀྱང་།།
ང་ལ་དམིགས་ཀྱིས་བྱམས་པ་ནི།།
རྒྱལ་དབང་བསྟན་འཛིན་རྒྱ་མཚོ་ཡིན།།

སྐྱེས་ཆེན་གསེར་ནག་རི་འདྲ་བས།།
ས་ཆེན་འདི་ལ་གང་གྱུར་ཅིང་།།
བདག་གི་འདི་ཕྱིའི་མགོན་སྐྱབས་ནི།།
བསྟན་འཛིན་རྒྱ་མཚོ་གཅིག་པུ་ཡིན།།

སྟོན་པ་དབུ་འོད་དང་བཅས་ཏེ།།
གོ་ལའི་ཁྱོན་ལ་ཕེབས་ན་ཡང་།།
བདག་གི་ཡ་ཆུང་སེམས་པ་ན།།
བསྟན་འཛིན་རྒྱ་མཚོའི་ལྷག་གཅིག་མིན།།

སྤྱན་ཤེལ་རྫིག་པོའི་འོག་རོལ་ནས།།
ཤེས་མདོག་ལམ་སྟོན་མང་བྱས་ཀྱང་།།
ང་ལ་༸རྒྱལ་བའི་དབང་པོ་ཡི།།
བཀའ་སློབ་ཉིད་ལས་དགོས་པ་མེད།།