ལྷ་ལུང་རྒྱལ།
རྫ་སྤང་ནགས་རི་ཚལ་བར་གཤག་ཅིང་དགོ་འབྲོང་རི་དྭགས་མཚོན་ཁར་རྫོགས།།
ཤང་ཤང་གཙང་པོ་དུག་གིས་སྦགས་ཏེ་འབྱིན་རྔུབ་རླུང་ཡང་ནག་པོས་རྒྱུ།།
ཉི་མའི་ཁྱིམ་གྱི་འོད་རླབས་དམར་པོར་བསྐལ་བའི་འཁྱག་རོམ་གདུ་ཞིང་འཁོལ།།
བསིལ་ལྗོངས་སྣོད་ཀྱི་འཇིག་རྟེན་ངུ་བཞིན་ནམ་ཞར་དུ་ཡང་ཁྱོད་ཉིད་གླེང་།།
ཆོས་རིག་ནགས་མ་སྟུག་པོའི་ཀློང་ལ་བསམ་སྦྱོར་ངན་པའི་མེ་ལྕེ་མཆེད།།
རང་སྐད་ལྷད་མེད་གསེར་གྱི་གཤིས་ངོར་མི་སྡུག་རྣོ་ལྕགས་ལྷན་པ་བརྒྱབ།།
ཐུ་བྷོད་སེང་དོམ་སྟག་གི་དཔའ་སྤོབས་དྲག་སྤྱོད་མཚོན་གྱི་འཁོར་ལོར་ལེན།།
གདོང་མར་ཚང་གི་བུ་རབས་ཚ་རྒྱུད་གང་ལ་རེ་བའི་མིག་ཟུང་གཡོ།།
ཁྲི་ཤོར་རྒྱལ་མོའི་རླབས་ཀྱི་ཕོ་ཉས་བརྒྱལ་ལ་ཁད་དུ་ཁྱེད་ཉིད་འབོད།།
སྤོ་འབོར་སྒང་གི་འབྲོང་རྭའི་སྒྲ་སྙན་འགྱུར་ཁུག་དབྱངས་རྟར་ཁྱེད་རང་འགུག།
པོ་ཏ་ལ་ཡི་ཁྲེལ་གཞུང་གིས་ཀྱང་གནམ་སའི་མཐའ་རུ་ཁྱེད་ཉིད་འཚོལ།།
ཨེ་མ་སྐུ་ཡི་རྔམ་བརྗིད་ལྷུན་པོ་ད་དུང་དུ་ཡང་མི་མངོན་ཅི།།
ཆེས་རླབས་ཆེན་གྱི་སྐྱེས་མཆོག་ཁྱེད་་ཡིད་རིང་དུ་སྒུག་་་ཆེས་ཡིད་རིང་དུ་དྲན་་
ད་དུང་་ང་ཆོའི་མིག་ལམ་དུ་གསལ་ལེ་མེད་པས་
སྐྱོ་གདོང་ཀྱི་ཁེངས་ཀྱིན་
སེམས་པའི་གཏིངས་རིམ་ནས་
རེ་སྒུག་བྱེད་བཞིན་ཡོད་ལགས།།