སྤོབས་པ་མཐའ་ཡས།
དྲྭ་གྲོགས་ཚོར་ཀྲ་ཤིས་བདེ་ལེགས་ཞུ། གློག་ཀླད་བེད་སྤྱོད་མ་བྱས་ནས་ཉིན་འགའི་རིང་ངས་ཁྱོད་ཚོ་དངོས་གནས་དྲན་བྱུང༌། ངས་སྔོན་མ་ཞིག་ལ་ཟམ་གདོང་སྤྲུལ་སྐུ་མཇལ་བྱུང༌། ངས་འདི་ལྟར་བཤད་སྐབས་ཁྱེད་ཚོའི་སེམས་ལ་ངས་ཆེད་དུ་མགོ་སྒུར་དང་སྒྱིད་པ་གུག་གུག་གིས་་གྱིས་སྙན་ཞུ་ཐུང་ཐུང་ཞིག་དང་རྔན་པ་ཆུང་ཆུང་ཞིག་ཁྱེར་ནས་ཟམ་གདོང་སྤྲུལ་སྐུའི་དྲུང་དུ་བཅར་བའི་ཚོད་དཔག་བྱེད་རྒྱུ་རེད། དེ་ངས་ཤེས་ཀྱི་ཡོད། ཡིན་ན་ཡང་དོན་དངོས་སུ་དེ་འདྲ་ཞིག་མ་རེད། ཞོགས་པ་ཞིག་ལ་ང་སྨན་རྩིས་ཁང་གི་སྒོ་འགྲམ་བརྒྱུད་ནས་རྡ་རམ་ས་ལ་ཤོད་དུ་འགྲོ་བཞིན་པའི་སྐབས་སུ་སྨན་རྩིས་ཁང་གི་སྒོ་འགྲམ་ལམ་ཁུག་དཀྱོག་དེའི་མཚམས་སུ་གདོང་གཏུག་གིས་ཐུག་བྱུང༌། ངས་རྒྱུན་དུ་ནམ་རྒྱུན་ཁོང་དང་མཉམ་དུ་སྐུ་སྲུང་དང་སྐུ་འཁོར་ཡོད་པར་རློམ་བཞིན་ཡོད་ཀྱང་ཞོགས་པ་དེར་ཁོ་རང་ཁེར་རྐྱང་དུ་ག་ལེར་གངས་ཅན་སྐྱིད་གཤོང་གི་ལས་ཁུངས་ཁག་གི་ཕྱོགས་སུ་ཕེབས་ཀྱིན་འདུག ངས་མ་གཞི་ཁོང་ཚོགས་འདུའི་སྐབས་དང་དེ་མིན་གློག་བརྙན་ནང་ཁོ་ན་ནས་མཐོང་མྱོང་སྟབས་གློ་བུར་དུ་ཐག་ཉེ་དེ་འདྲ་ཞིག་ནས་ཐུག་སྐབས་འདི་ཟམ་གདུང་སྤྲུལ་སྐུ་ཡིན་ནམ་མ་ཡིན་སྙམ་པའི་སྣང་བ་ཞིག་ཀྱང་བྱུང་སོང༌། དེ་ལྟར་བྱུང་སྟབས་གུས་པ་མཚོན་པའི་འཚམས་འདྲི་ཞིག་བྱེད་དགོས་མོད་གང་ཞིག་ཤོད་དགོས་པ་དང་རྣམ་འགྱུར་གང་འདྲ་ཞིག་སྟོན་དགོས་པ་ཡང་ཤེས་ཀྱིན་མི་འདུག ཁོང་ལ་ཐུག་རིག་ཧ་ཅང་གྲུང་པོ་ཞིག་ཡོད་ངེས་རེད། ངའི་གདོང་ལ་གི་རྣམ་འགྱུར་སྟོན་སྟངས་ཞིག་ལས་ཁོང་གིས་ངའི་སེམས་པ་ཡོངས་རྫོགས་མཐོང་སོང༌། ཁོང་གི་ཞལ་ལས་བྱམས་བརྩེའི་ཉམས་ཞིག་མངོན་བཞིན་མཛུམ་མདངས་ཤིག་ཤིག་གནང་བྱུང༌། དེར་ངས་ཀྱང་རིན་པོ་ཆེ་ཞོགས་པ་བདེ་ལེགས་ཞེས་པ་ཞིག་ཁ་ནས་ཐོན་ལ་མི་ཐོན་གྱིས་སྨྲས་པ་ཡིན།
རྒྱུ་མཚན་དེས་ངས་བསམ་གཞིག་མང་པོ་ཞིག་བྱེད་དགོས་བྱུང་སོང་ལ་ད་དུང་ཡང་མཚམས་མཚམས་སུ་ཉམས་རྒུད་དུ་ཐེབས་པའི་མི་རིགས་འདིའི་ལས་དབང་དང་མཉམ་དུ་ཞོགས་པ་དེའི་ཟམ་གདོང་སྤྲུལ་སྐུའི་སྣང་བརྙན་དེ་ཡང་ཚོར་བ་མངར་སྐྱུར་འདྲེས་མ་ཞིག་གི་ངང་ནས་མངོན་ཡོང་གིན་འདུག ཆོས་རྒྱལ་ཁྲི་སྲོང་གིས་སུམ་གཉིས་ས་ལ་མངའ་དབང་བསྒྱུར་སྐབས་ཀྱི་རྟ་དམག་ཁྲི་ཕྲག་གིས་བསྐོར་ཞིང་ཕྱོགས་བཞིའི་རྒྱལ་ཕྲན་སྟོང་གི་གཙུག་རྒྱན་ལ་ཞབས་ཀྱི་པདྨོ་འགོད་པའི་དྲག་ཤུགས་དེ་དང་དཔལ་ལྡན་ས་སྐྱས་བོད་ཆོལ་ཁ་གསུམ་ལ་ཀའ་ལུང་གི་སྤྲིངས་ཡིག་འགྲེམ་པའི་རྫོགས་ལྡན་གྱི་དུས་རབས་དེ་དག་དང་དེ་རིང་གི་ཟམ་གདོང་སྤྲུལ་སྐུ་ལས་ཁུངས་སུ་ཕེབས་སྟངས་བསྡུར་སྐབས་དུས་ཡུན་མི་རིང་མི་ཐུང་ཞིག་ལ་རང་རེའི་རྒྱལ་ཁབ་དེ་འདི་འདྲ་བའི་ཐབས་སྐྱོ་བོ་ཞིག་གི་གནས་སུ་གྱར་འདུག་པ་ཡང་མིག་མཐོང་གི་ལམ་ནས་ངོ་འཕྲོད་བྱུང༌། གངས་ཅན་སྐྱིད་གཤོང་གི་ཐལ་རྡུལ་སྟུག་པོ་དེའི་ཁྲོད་ན་གྲོགས་མེད་ཁེར་རྐྱང་གིས་ཞོགས་པའི་གྲང་རླུང་གདོང་གིས་བསུས་ནས་འདུར་བཞིན་པའི་གནས་བསྟན་བགྲེས་པོ་འདི་ནི་བོད་དང་བོད་ཆེན་པོ་ཞེས་ཡོངས་སུ་གྲགས་པའི་རྒྱལ་ཁབ་དེའི་དེ་རིང་གི་ཆེས་མཐོའི་དབུ་ཁྲིད་རེད།
ཁོང་ནི་དམངས་གཙོའི་ལམ་ལུགས་ལྟར་མི་དམངས་ཀྱིས་ཐད་ཀར་འོས་འདེམས་བྱས་པའི་དབུ་ཁྲིད་ཐོག་མ་དེ་རེད་ལ་གོང་ས་སྐྱབས་མགོན་ཆེན་པོའི་ཐུགས་ཀྱི་རེ་བ་གཏོད་སའི་རྒྱལ་ཚབ་དེ་ཡང་རེད། ས་ཆའི་ཚོད་ཀྱི་རི་དྭགས་ཀྱི་དཔེ་བཞིན་ཁོང་དབུ་ཁྲིད་དུ་སླེབས་པའི་ཉིན་ནས་བཟུངས་དཔལ་འབྱོར་བསྲི་ཚགས་དང༌། ལས་བྱེད་དག་སྒྲིག བོད་ཡིག་གི་སྤྱོད་སྒོ་ཆེར་བསྐྱེད། ཤེས་ཡོན་ལམ་ལུགས་བཅོས་བསྒྱུར། གཞིས་ཆགས་ཀྱི་གནས་སྟངས་ལ་གཟིགས་ཞིབ་སོགས་ལ་ཕྱི་ནང་གི་གནོན་ཤུགས་བརྒྱ་ཕྲག་གདོང་ལེན་བྱས་ནས་སྐྱབས་བཅོལ་བའི་སྒྲིག་འཛུགས་ཆུང་ཆུང་འདིར་ལྟོས་འཇོག་གིས་བཤད་ན་དབུ་ཁྲིད་སྔོན་མ་གཞན་སུ་དང་ཡང་མི་འདྲ་བའི་ཡར་རྒྱས་གང་ལེགས་བྱུང་བར་བསྙོན་དུ་མེད། བཙ་ན་བྱོལ་བོད་གཞུང་འདི་བོད་ཀྱི་རང་དབང་སླར་གསོ་དང་རིག་གཞུང་རྒྱུན་འཛིན་ཆེད་དུ་བཙུགས་པར་ཡིད་ཆེས་ཡོད་ན་ཟམ་གདོང་སྤྲུལ་སྐུའི་ལག་རྗེས་དེ་ཡང་བོད་ཀྱི་དཀའ་རྙོགས་སེལ་བའི་དངོས་རྒྱུ་མིན་ཡང་བརྒྱུད་རྒྱུ་རེད་ཅེས་ཁས་ལེན་དགོས་རྒྱུ་རེད་སྙམ།
ཨོ་རེད། ད་ང་ཚོ་རྒྱ་གར་ལ་གཞིས་ཆགས་བྱེད་དུ་ཡོང་བ་མ་རེད། སློབ་གྲྭ་འཛུགས་སུ་ཡོང་བ་མ་རེད། ཆོས་སྤེལ་དུ་ཡོང་བ་མ་རེད། ང་ཚོ་རྒྱལ་ཁབ་ཅིག་གི་རང་དབང་སླར་གསོ་བྱེད་དུ་ཡོང་བ་རེད། འོ་ན་ཟམ་གདོང་སྤྲུལ་སྐུ་དེ་བརྒྱ་ཡི་ནང་ནས་བརྒྱད་དང་བརྒྱད་ཀྱི་ནང་ནས་གཅིག་གདམས་ཏེ་དབུ་ཁྲིད་དུ་བསྐོ་བཞག་བྱས་པ་དེའི་ཕྱོགས་ལ་མངོན་གསལ་དོད་པོའི་ལག་རྗེས་ཅི་འདུག་ལྟ་སྐབས་ཕལ་ཆེར་ཀླད་ཀོར་ཞིག་ཏུ་གྱུར། འོ་ན་ང་ཚོའི་ངོས་ནས་ཟམ་གདོང་སྤྲུལ་སྐུ་ལ་རྒྱལ་ཁབ་སླར་གསོའི་དབང་ཚད་ག་ཚོད་ཅིག་སྤྲད་ཡོད་ཅེ་ན་དེ་ཡང་ཕལ་ཆེར་ཀླད་ཀོར་ཞིག་ཏུ་གྱུར། དེ་ལས་ཀྱང་ང་ཚོས་ཁོང་ལ་འོས་ཤོག་བླུགས་ནས་དབུ་ཁྲིད་ཀྱི་ཁྲི་སྟེང་ལ་བསྐྱལ་མོད་ཁོང་གི་ཕྱག་ལས་ལ་རྒྱབ་སྐྱོར་དང་རོགས་རམ་ག་ཚོད་ཅིག་བྱས་ཡོད་མེད་ལྟ་སྐབས་དེ་ལས་ཀྱང་ངོ་གནོང་དགོས་པ་ཞིག་རེད། ཟམ་གདོང་སྤྲུལ་སྐུ་ལ་ང་ཚོས་དབང་ཚད་ཅིག་སྤྲད་པ་དེ་ཡང་མཐར་གཏུག་ན་གཞིས་ཆགས་ལ་ལྟ་རྟོགས་དང༌། ཤེས་ཡོན་སློབ་གསོ། རིམ་གྲོ་བསྒྲུབ་པ་སོགས་ཆོས་ཀྱི་བྱེད་སྒོ་སྤེལ་བ་དེ་ཙམ་རེད། དེ་ཡང་དཔེ་མཚོན་གསལ་ཤོས་ཤིག་ནི་ང་ཚོས་རྒྱ་ནག་ལ་རྒྱ་རི་བློ་གྲོས་རྒྱལ་མཚན་སྐུ་ཚབ་ཏུ་གཏོང་སྟངས་དེ་ཁོ་ནས་ཀྱང་ཟམ་གདོང་སྤྲུལ་སྐུའི་རྒྱལ་ཁབ་སླར་གསོའི་དབང་ཚད་དེ་གསལ་པོར་མངོན་ཡོད། དངོས་གནས་བྱས་ན་བོད་མི་དམངས་ཀྱི་སྐུ་ཚབ་ཡིན་ན་བཀའ་ཤག་གིས་གཏོང་དགོས་པ་རེད། རབ་ན་ཟམ་གདོང་སྤྲུལ་སྐུ་ཁོང་རང་ཉིད་ཕེབས་དགོས་པ་རེད། ཡིན་ན་ཡང་དམིགས་བསལ་སྐུ་ཚབ་ཕེབས་སོང༌། དམིགས་བསལ་ཟེར་བའི་དམིགས་བསལ་དེ་གང་ཞིག་གི་དམིགས་བསལ་ཡིན་ནམ། དམིགས་བསལ་དེ་བོད་རྒྱ་ཞི་མོལ་གྱི་དམིགས་བསལ་མ་རེད། དེ་རྒྱལ་བ་རིན་པོ་ཆེ་སྐུ་སྒེར་གྱི་དམིགས་བསལ་སྐུ་ཚབ་རེད། རྒྱལ་མཚན་རྣམ་གཉིས་རྒྱ་ནག་ལ་མ་ཕེབས་སྔོན་ནས་གཅིག་ཡུ་རོབ་དང་གཅིག་ཨ་མེ་རི་ཁར་བཅའ་སྡོད་རྒྱལ་བ་རིན་པོ་ཆེའི་དམིགས་བསལ་སྐུ་ཚབ་ཏུ་བསྐོ་བཞག་བྱས་ཟིན་པའི་མི་སྣ་རེད།
ངས་ཟམ་གདོང་སྤྲུལ་སྐུའི་ལག་ལ་དབང་ཚད་ཆ་ཚང་སྤྲད་ཡོད་ན་ད་ལྟ་བོད་ཀྱི་དཀའ་རྙོགས་འདི་སེལ་ཚར་ཡོད་པའམ་སེལ་བའི་ལམ་ལ་ཉེ་ཡོད་ཅེས་ཀྱང་ལར་ནས་ཤོད་ཀྱིན་མེད། ངས་འདིར་ཤོད་བཞིན་པ་ནི་ང་ཚོས་ཁོང་ལ་དབང་ཚད་ག་ཚོད་ཅིག་སྤྲད་འདུག་ཅེས་ཕྱི་མིག་ཅིག་བལྟས་པ་ཙམ་ཡིན། དེ་བཞིན་ད་ལྟ་རང་རང་གི་ངོས་ནས་འདི་ཡིན་དང་དེ་ཡིན་གྱི་འགན་མི་འཁུར་བར་ད་དུང་དབུ་མའི་ལམ་ལ་བསྐྱར་ཞིབ་དང་རང་བཙན་གྱི་ལམ་དུ་བསྐྱོད་གོས་ཚུལ་གྱི་ཨུ་ཚུགས་རྒྱག་མཁན་ཚོས་ལབ་སྟངས་ལྟ་བུར་སྐྱོན་ཡོད་ཚད་དབུ་མའི་ལམ་གྱི་མགོར་ཡང་འགེལ་འདོད་མེད་ལ། དབུ་མའི་ལམ་དེའི་རྗེས་སུ་ཤར་རྒྱག་གིས་འབྲངས་བར་བརྩམས་པའི་ཟམ་གདོང་གཞུང་ལ་ཡང་འགེལ་གྱིན་མེད། དེ་བཞིན་དབུ་མའི་ལམ་འགྲེལ་བཤད་རྒྱག་ཆེད་རྒྱ་ནག་ཏུ་སོང་བའི་སྐུ་ཚབ་རྣམ་པའི་མགོར་ཡང་འགེལ་འདོད་མེད། དབུ་མའི་ལམ་ཞེས་པ་འདི་ལེགས་པར་བསམ་ན་སྐྱིད་དྲགས་ནས་ལམ་དེ་གདམ་པའམ་འོད་སྟོང་ལྡན་པའི་ལམ་ཞིག་མཐོང་ནས་དེར་བསྐྱོད་མགོ་བརྩམས་པ་མིན། དེ་ནི་རང་རེ་སྒང་བ་བོད་པ་ཚང་ལ་མི་སྐྱེ་སར་ཁྱི་སྐྱེས། ཤིང་ཙན་དན་སྐྱེ་སར་ཚེར་མ་སྐྱེས་ནས་དེ་རིང་གི་ང་ཚོ་སྐྱག་ཕྲུག་ཚོའི་འཇོན་ཐང་དང་བསྟུན་ནས་ཨུ་ཐུག་ཐབས་ཟད་དེ་དབུ་མའི་ལམ་ཟེར་བ་ལྟ་བུ་སངས་རྒྱས་སྟོང་གི་རིང་ལ་མ་དར་བ་ཞིག་བན་དེ་གཅིག་གི་རིང་ལ་ལམ་ཁ་དེ་འདེམས་དགོས་བྱུང་བ་ཞིག་རེད། མ་འགྲིགས་པ་དེ་མི་རབས་གོང་མ་འགའ་ཞིག་གི་བྱས་ཉེས་དང་དེ་རིང་གི་ང་ཚོ་སྒང་བ་བོད་ཚང་གི་སྐྱག་ཕྲུག་ཚོའི་ཁ་སྟབས་སྐྱོ་དྲགས་པ་འདི་བཞི་བརྒྱ་ནད་ཀྱི་རྩ་བར་འདོད་བཞིན་ཡོད།
མི་རིང་བར་དམིགས་བསལ་འཚོགས་ཆེན་འཚོགས་རྒྱུ་རེད། སྔོན་བརྡ་འདིར་བརྟེན་ནས་དྲྭ་གྲོགས་མང་པོས་ད་ནི་ལམ་དབུ་མ་ལ་བསྐྱར་ཞིབ་ཀྱིས་ཕལ་ཆེར་རང་བཙན་གཙང་མའི་ལམ་དུ་ཤར་བསྐྱོད་བྱེད་དགོས་མདོག་ཤོད་བཞིན་འདུག ཁོང་ཚོའི་རྒྱུ་མཚན་གཅིག་ནི་གཞོན་ནུ་ཚོགས་པའི་བརྡ་རྙིང་དེ་རང་བཙན་ང་ཚོའི་ཐོབ་ཐང་རེད་ཞེས་པ་དེ་རེད། དེ་ཐོས་སྐབས་སྔོན་མ་ངའི་ཞང་པོ་བྱིས་པའི་དུས་སུ་ཁྱིམ་ཚང་དབུལ་པོ་ཚོས་ཅིས་ཕྱིར་མཛོ་མོ་མི་ཉར་བ་རེད་ཅེས་བཤད་མྱོང་བ་རེད་ཟེར་བ་དེ་དྲན་ཡོང་གིན་འདུག ཐོབ་ཐང་ཡོད་མེད་ནས་གླེང་ན་དེ་དངོས་གནས་རེད། མཛོ་མོ་ཉར་ཆོག་པ་དེ་ཁྱིམ་ཚང་དབུལ་ཕྱུག་མེད་པར་ཚང་མར་ཐོབ་ཐང་ཡོད་རེད། ཡིན་ན་ཡང་མཛོ་མོ་ཉར་ཐུབ་མཁན་ཞིག་ཡིན་ན་དེ་ཁྱིམ་ཚང་དབུལ་པོ་མ་རེད། དེ་བཞིན་རང་བཙན་དེ་ང་ཚོའི་ཐོབ་ཐང་རེད། ཡིན་ན་ཡང་རང་བཙན་ལེན་ཐུབ་པའི་གདེངས་ཚོད་དང་ཐབས་ལམ་རང་ངོས་ནས་གང་ཙམ་ཡོད་མེད་གླེང་རྒྱུ་དེ་སྔོན་དུ་འགྲོ་དགོས་པ་ཞིག་རེད། དེ་བཞིན་རྒྱུ་མཚན་གཞན་པ་ཞིག་ཡོད་པ་དེ་གཞིས་ལུས་མི་མང་གི་རེ་འདོད་རེད་ཟེར། དེ་གཞིས་ལུས་མི་མང་མ་ཟད་བྱེས་གྱར་མི་མང་གི་རེ་འདོད་ཀྱང་རེད་མོད། གདེངས་ཚོད་ཐབས་ལམ་མེད་པའི་བཙན་ཚུགས་ཀྱི་རེ་བ་ཙམ་དེ་རྨོངས་དད་ཙམ་དུ་ཟད། གཞིས་ལུས་པས་བྱེས་གྱར་བ་ལ་ནུས་པ་ཆེན་པོ་ཡོད་པས་ཨ་མེ་རི་ཁའི་དམག་ཁྲིད་ཡོང་གི་རེད་དང་མཉམ་འབྲེལ་རྒྱལ་ཚོགས་ཁ་ལོ་སྒྱུར་གྱི་རེད་སྙམ་པའི་རེ་བ་ཆེན་པོ་ཞིག་དང་ཡུལ་གྱར་བས་གཞིས་ལུས་མི་མང་གིས་རང་སྲོག་བློས་བཏང་གིས་རྒྱ་ནག་གཞུང་འདར་སིག་རྒྱག་དགོས་པ་བཟོ་ངེས་རེད་སྙམ། མི་ཁ་བཤད་ལ་བྱངས་བ་འགའ་ཞིག་གིས་ཅིག་བྱེད་དགོས་ཀྱི་རེད་དང་ཉིས་བྱེད་དགོས་ཀྱི་རེད་ཅེས་འུད་རྗོད་ཆེན་པོ་བྱས་བྱས་མཐར་སྒོ་ང་བྲག་ལ་བརྒྱབ་པ་བཞིན་བོད་ཕྱི་ནང་གི་སྙིང་སྟོབས་ཅན་གྱི་དྲང་པོ་འགའ་ཞིག་ལ་གྱོང་གུད་བློ་ཡུལ་ལས་འདས་པ་རེ་ཕོག་པ་དེ་རེད། དེ་ལྟར་ཡིན་སྟབས་ཟམ་གདོང་སྤྲུལ་སྐུའི་ཞི་བདེ་ཁོ་ནའི་ལམ་ཁོ་ན་ལས་བསྐྱོད་རྒྱུའི་སྐུལ་སློང་བྱས་པ་དེ་ཡང་རང་རེའི་ཁ་སྟབས་དང་བསྟུན་ནས་ཨུ་ཐུག་ཐབས་ཟད་དེ་ལམ་འདི་འདེམས་དགོས་བྱུང་བ་དེ་ཤེས་དགོས་ལ། གལ་སྲིད་རང་བཙན་གཙང་མའི་ལམ་ཁ་འདེམས་འདོད་ཡོད་མཁན་ཚོས་ཀྱང་ཐོག་མར་རང་བཙན་ད་ལེན་པའི་ཐབས་ལམ་དང་གདེངས་ཚོད་གང་འདྲ་ཞིག་དང་ག་ཚོད་ཅིག་ཡོད་མེད་དེ་གསལ་སྟོན་གནང་རྒྱུ་ཧ་ཅང་གལ་ཆེན་པོ་རེད། དེ་ལྟར་ཡིན་སྟབས་སྐུ་ཞབས་ཞོགས་དུང་གིས་མི་བུ་རང་ཉིད་ནས་མགོ་བཙུགས་དགོས་ཞེས་གསུངས་པ་བཞིན་ཁྱོད་ཚོས་རང་རང་གི་ངོས་ནས་བྱེད་ཐུབ་པ་གང་ཞིག་འདུག རང་ཉིད་ཀྱིས་བྱེད་ཐུབ་པ་དེ་གཞི་རྩར་བཞག་ནས་ད་གཟོད་གཞན་ལ་ལམ་སྟོན་དང་སྐུལ་བྱ་འདོད་པ་གང་ཞིག་འདུག
དཔེར་ན་ཉེ་སྔོན་དྲྭ་རྒྱའི་སྟེང་དུ་མི་ལ་ལས་ཟམ་གདོང་གཞུང་གིས་ཅིག་ཅིག་ཅིག་ཅིག་མ་བྱས་ན་དང་བླངས་དཔྱ་ཁྲལ་འབུལ་རྒྱུ་མིན་ཚུལ་བྲིས་འདུག མ་གཞི་མི་དེ་རིགས་ཀྱིས་དོན་དངོས་ཐོག་ལ་དང་བླངས་དཔྱ་ཁྲལ་འབུལ་བཞིན་ཡོད་མེད་མི་ཤེས། ཕལ་ཆེར་ཡོད་རྒྱུ་མ་རེད་སྙམ། མི་དེ་རིགས་ལ་ཨ་མེ་རི་ཁར་འགྲོ་བའི་རྒྱལ་ཤོག་དཀྲུག་རྒྱུ་རེད་འདྲ་ལབ་ན་དེ་ནས་དང་བླངས་དཔྱ་ཁྲལ་ལོ་ག་ལྔ་བཅུ་ཐམས་པ་ཆད་ཡོད་ན་ཡང་ཉིན་དེར་ཆད་ལུས་མེད་པར་འབུལ་གྱི་རེད། མི་ངན་ལ་ལ་སྔོན་དུས་བོད་གཞུང་གིས་གོ་སྒྲིག་ཐོག་ཨ་མེ་རི་ཁར་གཏོང་སྐབས་རང་རང་གི་ལམ་གྲོན་ཚུན་བོད་གཞུང་གིས་བསྐྱི་གཡར་བྱས་པ་ད་དུང་ཡང་ཚུད་མ་འཇལ་བར་བསྡད་ཡོད་པ་ལྟ་བུ་རེད། དང་བླངས་དཔྱ་ཁྲལ་འཇལ་རྒྱུ་དེ་སྤྱིར་བོད་གཞུང་གི་དཔལ་འབྱོར་ཡོང་ཁུངས་གི་རེ་ལྟོས་ཆེ་ཤོས་ཡིན་ཐོག་རང་ཉིད་ཀྱང་ཏཱ་ལའི་བླ་མའི་ཕྱོགས་གཏོགས་ཡིན་པར་མཚོན་བྱེད་ཅིག་ཀྱང་ཡིན་པ་ངོས་ཟིན་ཐོག་གཞི་ནས་དང་བླངས་དཔྱ་ཁྲལ་འབུལ་དང་མི་འབུལ་གྱི་སྐོར་གླེང་ན་ཡག་ཤོས་རེད། འདི་ནི་རང་ཉིད་ཏཱ་ལའི་བླ་མའི་ཕྱོགས་སུ་འགྲོ་རྒྱུ་ཡིན་དང༌། ཡང་ན་རྒྱ་ནག་གཞུང་གི་ཕྱོགས་སུ་འགྲོ་རྒྱུ་ཡིན། དེ་མིན་ན་ཕྱི་རྒྱལ་གྱི་མི་སེར་རྣལ་མ་ཞིག་ཆགས་རྒྱུའི་རེ་བ་ལས་གང་ཡང་མེད་པར་བྱེད་པའི་གདམ་ཀ་ཞིག་ཀྱང་རེད།
ཨོ་ད་ཡིན་ན་འདི་ནས་མཚམས་འཇོག ངའི་སྐད་ཆ་དེ་མགོ་མེད་མཇུུག་མེད། ཆ་མིན་ཡ་མིན། ར་མིན་ལུག་མིན་ཞིག་ཏུ་གྱུར་སོང༌། དེས་ནི་ངའི་ཚེ་དང་མཚུངས་ཐོག་ངའི་གཤིས་ཀ་དེ་ཡང་མཚོན་ཐུབ་ཡོད་ངེས་རེད། གྲོགས་པོ་ཚོ་ཡང་བསྐྱར་མཇལ་ཡོང༌།
ཨ་་ཨ་་་ཨ་་་་་་ཁྱོའི་འདི་འདྲའི་གླེང་བརྗོད་རེ་སྤེལ་འཇོག་པ་སེམས་པའི་གཏིང་ནའང་མེད། ད་ཡིན་ན་ཅི་ཟིག་ཟེར་དགོས་མིན་ཡང་མི་ཤེས་ཀི ཡིག་ནོར་རེ་གཉིས་མ་གཏོགས་ཆུ་ལ་ཆུ་བཞག་མིན་ནའང་བསམ་བློ་གཏོང་སྟངས་ཕལ་ཆེར་གཅིག་པ་འདྲ་ཞིག་རེད། བྱས་ཙང་དམིགས་བསལ་གྱི་མཆན་འདེབས་དགོས་ས་ཅང་མི་འདུག མུ་མཐུད་དུ་ཤོད། ཨ་མའི་བུ་ག་རེ་བཤད་དགོས་ན་ཐོགས་པ་མི་འདུག མྱ་ངན་ལམ་གོལ་འཕྱན་པ་རྣམས་ལ་ཁྱོད་འདྲ་འདྲའི་ལམ་འཁྲིད་འཇོན་པོའི་དགོས་གལ་མི་ཆེ་ན་གནམ་གན། ཐུགས་ཆེ་གནང་།།