ཟས་བཅད་ངོ་རྒོལ་ལོ་༡༦གི་རྗེས་སུ་མཇུག་བསྒྲིལ་བའི་རྒྱ་གར་བུད་མེད།

–ལོ་ཡག་གིས་བསྒྱུར།
༢༠༡༦༌༧༌༢༧

 
རྒྱ་གར་གྱི་བུད་མེད་ལས་འགུལ་བ་རྣོ་ལྕགས་ངར་མ་(Iron Lady)ཞཱར་མི་ལཱ་ཆཱ་ནུ་(Sharmila Chanu)ཡིས་གཞུང་ཁྲིམས་ལ་བགྲང་བྱ་ ༡༦ རིང་ཟས་བཅད་ངོ་རྒོལ་གནང་མཐར་མཚམས་འཇོག་གི་ཐག་གཅོད་གནང་ཡོད་འདུག གསལ་བསྒྲགས་འདི་ནི་ཁ་སང་ཐོན་ཅིང་དེ་རུ་ཁོ་མོས་ཟས་བཅད་ངོ་རྒོལ་འཆར་ཟླ་བརྒྱད་པའི་ཚེས་ ༩ ཉིན་མཚམས་འཇོག་གནང་རྒྱུ་ཡིན་པའི་གསལ་བསྒྲགས་བསྐྱངས། དེ་ནས་མོ་ཡིས་ས་གནས་ཀྱི་གདམ་བརྐོ་ཁག་ཏུ་སྒེར་ཚུགས་རང་བཞིན་གྱི་འོས་མིའི་ལས་འགུལ་གཉེར་རྒྱུ་ཡིན་འདུག

བྷི་བྷི་སི་(BBC) བརྒྱུད་ལམ་གྱི་གསར་སྤེལ་བ་ཞིག་ན་རེ་ “ལྕམ་ཆཱ་ནུས། ‘དམིགས་བསལ་སྟོབས་ཤུགས་ལག་བསྟར་མཚོན་ཐོགས་རུ་དཔུང’(Armed Forces Special Powers Act) ཅེས་དམག་མི་ཚོར་གཙང་ཕྱག་གི་དབང་ཆ་སྟེ། བཀའ་རྒྱ་མེད་བཞིན་དུ་འཛིན་བཟུང་བྱས་ཆོག་པར་མ་ཟད། གནས་སྟངས་ངེས་ཅན་དུ་སླེབས་ན་མེ་འཕེན་དམར་གསོད་ཀྱང་བྱ་ཆོག་པའི་ཁྲིམས་དེ་ལ་ངོ་རྒོལ་གནང་བཞིན་པ་རེད།” ཅེས་ཟེར་ཞིང་། མོས་ཕྱི་ལུགས་ ༢༠༠༠ ལོར་རྒྱ་གར་གྱི་དམག་མིས་མི་སེར་ ༡༠ རྐྱེན་ལམ་དུ་བཏང་བ་ནས་བཟུང་ལས་འགུལ་འདི་ད་ལྟའི་བར་སྤེལ།

ལོ་བཅུ་ཕྲག་གཅིག་ལྷག་གི་རིང་དུ་བཙན་ཤེད་ཀྱིས་ སྦུ་གུ་སྤྱད་དེ་མོའི་སྣ་ཁུང་བརྒྱུད་ནས་བཟའ་བཏུང་དྲངས་པ་ལ་བརྟེན་ནས་ཁོང་མོ་ད་ལྟ་བར་འཚོ་ཞིང་གནས་ཡོད། ‘དམིགས་བསལ་སྟོབས་ཤུགས་ལག་བསྟར་མཚོན་ཐོགས་རུ་དཔུང’ (AFSPA) ནི་ད་ལྟ་ད་དུང་ཡང་ཞཱར་མི་ལཱའི་མངའ་སྡེ་མཱ་ཎི་པཱུར་(Manipur) ཙམ་དུ་མ་ཟད། ཇཱ་མུ་དང་ཀཱ་ཤི་མཱིར་ (Jammu and Kashmir) གྱིས་མཚོན་པའི་རྒྱ་གར་གྱི་མངའ་སྡེ་ཁ་ཤས་ནང་དུ་ལག་བསྟར་བྱེད་མུས་ཡིན། ལྕམ་ཆཱ་ནུས་ད་ལྟ་གནད་དོན་འདི་ལ་ཆབ་སྲིད་ཀྱི་ལྡིངས་ཆའི་སྟེང་ནས་རྩོད་ལེན་གནང་རྒྱུའི་དམ་བཅའ་བཞག

ལྕམ་ཆཱ་ནུས “ང་རང་གི་འཐབ་ཇུས་ལ་འགྱུར་བ་བཏང་ཡིན། ‘དམིགས་བསལ་སྟོབས་ཤུགས་ལག་བསྟར་མཚོན་ཐོགས་རུ་དཔུང’ (AFSPA) ནག་བསུབ་ཀྱི་ཆེད་དུ་ང་ལས་གཞི་འདི་འཆང་ནས་གདམ་བརྐོ་འགྲན་སྡུར་ལ་ཞུགས་རྒྱུ་ཡིན། ང་ལ་ངའི་ལས་གཞི་འདིའི་གྲུབ་འབྲས་རང་ཉིད་མ་ཤི་གསོན་པའི་རིང་ལ་མཐོང་འདོད་ཡོད། བདག་གི་འཐབ་ཇུས་གསར་བ་ནི་དམངས་གཙོའི་སྟོབས་ཤུགས་བེད་སྤྱོད་རྒྱུ་དེ་ཡིན” ཅེས་རྣོ་ལྕགས་ངར་མ་ (Iron Lady) ཞེས་བཟང་གྲགས་ཆོད་པའི་ལྕམ་ཆཱ་ནུས་བརྗོད།

འདེམས་བརྐོ་ཡི་ཕྱིར་དུ་ལས་གཞི་འདི་མགོ་རྩོམ་རྒྱུ་ཡིན་པ་དང་། ད་དུང་ མོ་རང་ཆང་ས་ཡང་བསྐྱོན་རྒྱུ་ཡིན་འདུག་ཅིང་། མག་པ་སུ་ཡིན་སྤྱི་ཟླ་བརྒྱད་པའི་ཚེས་ ༠༩ རྗེས་ཏག་ཏག་ལ་ཕྱིར་བསྒྲགས་གནང་རྒྱུ་ཡིན་པའི་ཚོད་དཔག་བྱེད་དོ། །

འབྲེལ་ཐག   http://www.tibetanjournal.com/index.php