ཟི་ཁྲོན་གྱི་མ་རེད། ཁམས་དང་ཨ་མདོའི་མི་རེད།

ལྡོམ་བུ།
 
དྲ་ཐོག་གི་མི་སྣ་གྲགས་ཅན་གཉིས་དང་འབྲེལ་བའི་གཏམ།

ཉེ་བའི་དུས་སུ་དྲ་གྲོགས་ཚོས་ཚ་ཚ་འུར་འུར་གྱིས་གླེང་བཞིན་པ་ནི་ཁམས་ལི་ཐང་གི་བུ་བསྟན་འཛིན་བརྩོན་འགྲུས་ཀྱི་འཛུམ་མདངས་དང་ཨ་མདོ་རྔ་བའི་བུ་བསོད་ནམས་དར་རྒྱས་ཀྱི་ཁུ་ཚུར་སྣུན་རྩལ་རེད།

བུ་བསྟན་འཛིན་གྱི་འཛུམ་མདངས་ཀྱིས་རྒྱ་ནག་གི་དྲ་བའི་འཇིག་རྟེན་ཟང་ཟིང་དུ་བཏང་པས་རྒྱ་ནག་གི་མི་སེར་ཕལ་པ་མང་པོ་ཞིག་གི་རྣ་བར་ལི་ཐང་ཞེས་པའི་ས་ཆ་དེ་ཐོག་མར་གོ་བས། ཁོ་ཚོ་མང་པོ་ཞིག་གིས་དེ་ནི་བོད་རང་སྐྱོང་ལྗོངས་ཁོངས་ཡིན་ཤག་གིས་དེར་བུ་བསྟན་འཛིན་ཐུག་ཏུ་སོང་སྐད། ཁོ་ཚོ་ལ་ཅི་ཁག་སྟེ་རྒྱ་ནག་གཞུང་གིས་“དུམ་བུར་བྱས་ནས་དབང་སྒྱུར་བྱེད་པའི“ སྲིད་བྱུས་ལག་བསྟར་བྱས་ཏེ་བོད་ཡུལ་དུམ་བུ་ལྔ་རུ་བཏང་ཡོད་པ་ཤེས་ཡོད་མི་སྲིད། དེ་བས་རྒྱ་ནག་གི་མི་སེར་ཕལ་པ་མང་པོ་ཞིག་གིས་བུ་བསྟན་འཛིན་གྱི་འཛུམ་མདངས་ལས་ཁམས་ལི་ཐང་ངོ་ཤེས་ཤིང་། དེ་ལས་བོད་པ་ཞེས་པ་ནི་བོད་ལྗོངས་ཙམ་དུ་མ་ཟད། རྒྱ་ནག་གི་མངའ་སྡེ་གཞན་དུའང་གནས་ཡོད་པ་ཤེས་ཡོད་ངེས་པས་བོད་ལ་ངོས་འཛིན་གསར་པ་ཞིག་ཐོབ་ཡོད་ངེས། ད་དུང་མི་རིང་བར་བུ་བསྟན་འཛིན་དང་༧གོང་ས་མཆོག་གི་མཚན་ལ་འདྲ་བའི་ཆ་ཡོད་པར་ཤེས་ངེས་པས་རྩོམ་པ་པོ་འོད་ཟེར་ལགས་ཀྱིས་“དེང་སང་བོད་ཡུལ་ཁྱོན་དུ་བྱིས་པ་མང་པོའི་མིང་ཏཱ་ལའི་བླ་མ་མཆོག་གི་མཚན་ནས་དྲས་ཏེ་འདོགས་ཀྱི་ཡོད།” ཅེས་པར་བདེན་དཔང་ཞིག་ཀྱང་བྱིན་པ་རེད།

༧གོང་ས་མཆོག་གི་སྐོར་བཤད་དུས་ཨ་མདོ་རྔ་བའི་བསོད་ནམས་དར་རྒྱས་དྲན་སོང་། ཁོང་ཁུ་ཚུར་འགྲན་རྩལ་ར་བར་ཡོང་དུས་སྐེ་རུ་ཁ་བཏགས་གྱོན་ཅིང་། བོད་ཡུལ་གྱི་གླུ་གཞས་གྲགས་ཅན་ཨ་ཁུ་པདྨ་ཡེ་ཞེས་པ་དེ་གཏོང་བཞིན་ཡོང་ཡོད། ང་ཚོ་ཚང་མས་ཤེས་གསལ་ལྟར་ཨ་ཁུ་པདྨ་ཡེ་ཞེས་པའི་གླུ་གཞས་དེ་ནི་གུང་ཐང་རིན་པོ་ཆེས་བརྩམས་ཤིང་རྡུང་ལེན་མཁན་དཔལ་མགོན་གྱིས་བླངས་པའི་༧གོང་ས་མཆོག་གི་བསྟོད་པ་ཞིག་རེད། དུས་ཀྱི་ཆ་ནས་བསྟོད་པ་དེ་ནི་ཧ་ལམ་༧གོང་ས་མཆོག་གི་གླུ་གཞས་ཀྱི་བསྟོད་པ་སྔ་ཤོས་དེ་ཡིན་ངེས་ལ། སྙན་གྲགས་ཀྱི་ཆ་ནས་བཤད་ན་འགྲན་ཡ་མེད་པ་ཞིག་རེད། གླུ་གཞས་དེ་ནི་བོད་ཀྱི་ཆོས་དང་རིག་གཞུང་ལ་བྱས་རྗེས་ཆེན་པོ་བཞག་མྱོང་མཁན་གུང་ཐང་རིན་པོ་ཆེའི་ཐུགས་མཚོ་ལས་འཁྲུངས་པའི་བསྡུས་བརྗོད་ཀྱི་སྙན་ངག་ཅིག་ཡིན་ཞིང་། སྙན་ངག་དེ་བསྡུས་བརྗོད་ཀྱི་ལམ་ནས་འབྲི་དགོས་འཁེལ་བ་དེས་རྒྱ་ནག་གཞུང་གི་གདུག་རྩུབ་མཚོན་ཞེས་བརྗོད་ཀྱང་ཐལ་དྲགས་མེད།

དེ་བས་བསོད་ནམས་དར་རྒྱས་ལགས་གླུ་གཞས་དེ་དང་ལྷན་དུ་འཛིང་རར་ཐོན་པ་དེ་ནི་སྟབས་འཁེལ་བ་ཞིག་མ་ཡིན་པར་དེ་ནི་འཛམ་གླིང་སྐྱེ་བོར་སྤྲད་པའི་བརྡ་ལན་ཆེན་པོ་ཞིག་ཡིན་པ་བཤད་ཅི་དགོས། ད་དུང་ཁོང་གིས་སྐེ་རུ་ཁ་བཏགས་གྱོན་ཅིང་། ལག་པས་ཕྱག་རྒྱ་བྱས་ཏེ་ཁོ་ནི་ཆོས་མེད་ཀླ་ཀློའི་རྒྱལ་ཁབ་ཀྱི་ཙི་ན་བ་ཞིག་མིན་པར་སངས་རྒྱས་བསྟན་པ་ས་དར་རྡོ་དར་གྱི་བོད་ཡུལ་གྱི་བོད་པ་ཞིག་ཡིན་པའི་བརྡ་ལན་གསལ་པོ་སྤྲད་པར་མ་ཟད། རྒྱ་གཞུང་གིས་ཁོ་ལ་སུ་མུ་དར་ཇི་ཟེར་བའི་མིང་ཁྱད་མཚར་ཞིག་བེད་སྤྱད་པར་བསྐུལ་ཀྱང་ཁོང་གིས་ཁོང་གི་མིང་གཞན་ལ་Tibetan Eagle ལམ་བོད་ཀྱི་གླག་རྒོད་ཡིན་ཞེས་གང་ཐུབ་ཅི་ཐུབ་ཀྱིས་རང་ཉིད་གདོང་དམར་བོད་པ་ཞིག་ཡིན་པ་འཛམ་གླིང་སྐྱེ་བོ་ལ་གསལ་བར་བསྟན་སོང་།

མདོར་ན་དྲ་བའི་ཐོག་གི་མི་སྣ་གྲགས་ཅན་དེ་གཉིས་བརྒྱུད་འཛམ་གླིང་སྐྱེ་བོ་སྤྱི་དང་ཡང་སྒོས་རྒྱ་མི་མི་སེར་ཕལ་པ་ཚོར་བོད་ཀྱི་ངོས་འཛིན་གསར་པ་ཞིག་ཐོབ་ཡོད་ངེས་རེད་ལ། མི་སྣ་དེ་གཉིས་ནི་རྒྱ་གཞུང་གིས་ཀྱང་བཀག་མ་ཤེས་པས་ས་གྲགས་གནམ་གྲགས་སུ་འགྲོ་དང་འགྲོ་མུས་རེད།

ཡིན་ཡང་རྒྱ་ནག་གཞུང་གིས་མི་སྣ་དེ་གཉིས་ནི་ཟི་ཁྲོན་གྱི་ཡིན་པ་སྟེ། གཅིག་ནི་ཟི་ཁྲོན་ཨ་པའི་ཡིན་པ་དང་གཞན་དེ་ཟི་ཁྲོན་ལི་ཐང་གི་ཡིན་ཞེས་ལོ་རྒྱུས་ནག་གསུབ་གཏོང་གང་ཐུབ་བྱེད་བཞིན་འདུག་པས། བོད་མི་སྤྱི་བོ་གནམ་བསྟན་ཡོངས་ཀྱིས་བུ་རྒོད་དེ་གཉིས་ནི་ཟི་ཁྲོན་གྱི་མིན་པར་ཨ་མདོ་རྔ་བ་དང་ཁམས་ལི་ཐང་གི་མི་ཡིན་ཞེས་ས་བསྒྲགས་གནམ་བསྒྲགས་བྱ་དགོས་ངེས་སོ། །