ཐེ་འོད་ཟེར།
མདོ་ཁམས་རྟ་ཡི་ཆོལ་ཁ་ཡངས་པོར་སྐུ་ཡི་བཀོད་པའི་མེ་ཏོག་བཞད།།
ལྷ་ལྡན་ཕོ་བྲང་པོ་ཏ་ལ་རུ་ལུཊ་གཉིས་ཁྲི་འཕང་བརྗིད་ཀྱིས་མནན།།
སྲིད་ཀྱི་ན་བུན་ལང་ལོང་འཁྲིགས་པའི་མུན་ནག་མཚན་མོའི་སྐར་འོད་འོག།
སྐྱོ་གདུང་སྤྱན་ཆབ་བཙན་གྱིས་མིད་བཞིན་ཞབས་སོར་འཕགས་ཡུལ་ཕྱོགས་སུ་བསྒྱུར།།
ཟབ་གསང་ཐུགས་ཀྱི་ལྷ་ལམ་ཡངས་པོར་ཐབས་ཤེས་ཉི་ཟླའི་རྣ་ཆ་འཛིན།།
འཕགས་ཡུལ་ས་ཡི་ཐིག་ལེ་ཡངས་པོར་དེང་རབས་ཤེས་བྱའི་རྨང་གཞི་བཏིངས།།
སྲིད་ལུགས་ཀུན་གྱི་དྭངས་མར་གྱུར་པའི་མང་གཙོའི་གསོལ་རས་འབངས་ལ་གནང་།།
མཁའ་ལྟར་ཡངས་པའི་མཁྱེན་རྒྱ་ཟབ་མོས་གཉིས་སྨན་དབུ་མའི་ལམ་བཟང་བསྐྲུན།།
བྱམས་དང་སྙིང་རྗེས་ཀུན་ནས་བསླངས་ཏེ་དད་ལྡན་འགྲོ་ལ་ཆོས་འཁོར་བསྐོར།།
མི་རིགས་དཀར་ནག་རིས་སུ་མེད་པར་ཡ་རབས་བཟང་སྤྱོད་ལམ་སྟོན་མཛད།།
འཛམ་གླིང་ཆེ་དགུས་གཙུག་ཏུ་བཀུར་བའི་ཞི་བདེའི་རྟགས་མ་ཕྱག་ཏུ་བཞེས།།
སྟོབས་ཆེན་ཨ་རིའི་ཕོ་བྲང་དཀར་པོར་ཞབས་ཟུང་འཁོར་ལོ་ལན་མང་བཀོད།།
གང་གི་གསང་གསུམ་མཛད་པ་འཕྲིན་ལས་རྒྱ་ཆེན་འཁྱིལ་བའི་རྒྱ་མཚོ་ལས།།
བློ་དམན་ཁོ་བོས་ཆུ་ཐིགས་ཙམ་ཞིག་དད་པའི་སྙིམ་པར་བླངས་པའི་དགེས།།
བསྟན་དང་འགྲོ་ལ་གཅིག་ཏུ་སྨན་པའི་གང་གི་ཐུགས་དགོངས་འགྲུབ་པ་དང་།།
སྐུ་ཚེ་བསྐལ་བརྒྱར་བརྟན་པའི་སྨོན་འདུན་ལྷན་ཅིག་འཁྲུངས་སྐར་རྟེན་འབྲེལ་ཞུ།།
མདོ་སྨད་རྟ་ཡི་ཆོལ་ཁ་ལབ་ན་ག་འདྲ་འདུག།
གཅིག་པ་འདྲ་ཞིག་མིན་ནམ།