གངས་བཙན་པོ།
འཁོར་བའི་ཞགས་ཐག་རིང་པོ་རང་ས་ནས་སྐམ་སྟེ།།
རང་དང་གཞན་ལ་སྡང་བའི་འཕར་རྩ་དེ་འགུལ་བྱུང་།།
མི་སྡུག་ཚེར་མ་གསོན་པོའི་སྣང་བརྙན་དེ་སྒོམ་ན།།
མ་དག་ལས་ཀྱིས་བཀོད་པའི་ཆོས་ཉིད་ལ་འཐིམས་བྱུང་།།
འཁོས་ཆུང་ཞེན་ཆགས་ཝུ་བའི་སྤྲིན་ནག་དེས་སྒྲིབ་ཀྱང་།།
ལོ་ཟླའི་ངོ་གདོང་རིང་མོ་ཡིད་སེམས་ཀྱིས་མ་ཁོག།
ཨུ་ཚུགས་ལྕི་མོ་ཞིག་གིས་བྲང་ཁ་ལ་སྦྱར་ཀྱང་།།
བློས་བསླངས་སྒྱུ་མའི་ངང་ཚུལ་རང་བྱུང་དུ་གྲུབ་ཡོང་།།
སྐྱེ་འཆི་ཐ་གུ་གཉིས་ཀྱི་སྒུལ་ཚིགས་ཀྱི་བར་ན།།
འཚོ་བའི་ཕྱི་ཐག་རིང་མོ་གསལ་ལེར་དུ་ངོམས་ཀིན།།
ཆུ་རྙོག་གོར་མོས་ཤེལ་བུའི་འདམ་བརྗིས་སུ་བསྒྱུར་ཅིང་།།
འོད་ཀྱི་སྐུད་པའི་བར་ཁ་དབང་མེད་དུ་འཐོར་འགྲོ།
ཀུན་རྟོག་རི་མོའི་འཕྲེང་གླིང་གཞན་ཡུལ་ལ་བསྟུན་ཀྱང་།།
རྣམ་དོགས་འཁྲུལ་མ་ཞིག་གིས་མི་ཚེ་ལ་འཐིམས་དུས།།
ཚོར་འདུས་བྲང་ཁ་གཤགས་པའི་རྣམ་ཐར་དག་སྒོམ་ཚེ།།
སྲེད་པའི་འདྲུད་འཐེན་ཞིག་གིས་ཕྱི་ཤུན་དེ་བཏོན་ཡོང་།།
རྨོངས་བའི་མུན་པའི་དཀྱིལ་ནས་ང་རྒྱལ་དེ་བསྒྲེང་དུས།།
རེ་བའི་ཀློང་ནས་དོན་ཆེན་དབང་མེད་དུ་ཡལ་འགྲོ།
ལྐོག་འགྱུར་མཚོན་གྱི་མདའ་མོ་རང་གཞུང་ལ་འཕྱུར་བ།།
རྟེན་འདིར་བཞད་པའི་དུས་ངན་རྒུད་པ་ཉིད་རྒྱལ་ལོ།།
ཡིད་སུན་ངོ་གདོང་ལྕི་མོ་གླེགས་བམ་ལ་གཏད་ཀྱང་།།
ཆུ་རྙོག་གོར་མོ་དེ་ཡི་ནང་རོོལ་དུ་གསལ་ཚེ།།
གཉུག་གཤིས་རང་བློར་འཚམ་པའི་སྐྱེ་བོ་དང་མཐོང་དུས།།
གཡའ་མའི་ནད་ཡམས་ཤིག་གིས་རང་རྟགས་རེ་ངོམས་ཡོང་།།
མི་གཤིས་དྲང་པོ་ཡིན་ན་གཏན་ཚིགས་རང་མ་ཡལ།།
ཡོད་ཚད་གཞན་བསྟེན་ཞིག་གི་རྨི་ལམ་དག་མ་གཏོང་།།
རྡོག་ལམ་མཐོང་བའི་འཐོར་རླུང་ཧམ་སེམས་ཀྱིས་མ་གཡུགས།།
ངག་འཆལ་སྨྲེ་ངག་འདོན་པ་ཅ་ཅོ་ཡི་མཚང་བརྟོལ།།
2015.10.21