འགྱུར་བཞིན་པའི་བོད་མི།

རྡོ་རོང་ཕྲུག

བོད་ཀྱི་སྲོལ་རྒྱུན་ནམ་འཚོ་གནས་ཀྱི་གོམས་གཤིས་སུ་བླ་མར་མཇལ་ཟེར་དུས་རང་ཉིད་ཀྱི་ལུས་ངག་ཡིད་གསུམ་གྱི་གུས་པ་དང་དད་པ་ཕྱོགས་གཅིག་ཏུ་བསྡུས་ནས་ལག་པ་གཉིས་ཐལ་མོ་རྒྱག་རྒྱུ་ནི་བོད་དུ་ནང་པའི་ཆོས་དར་ནས་ད་ལྟའི་བར་དུ་འཚོ་གནས་ཀྱི་གོམས་གཤིས་སམ་ཡང་ན་རྩམ་གཟན་ཞིག་གི་ཐོད་ལ་བཀོད་པའི་འདུ་ཤེས་ཤིག་རེད། བླ་མ་དང་སྤྲུལ་སྐུ་ཟེར་བའི་མིང་ཐོབ་པ་ནས་བཟུང་དད་ལོག་དང་ཚིག་རྩུབ་སོགས་མི་བྱེད་པའི་བོད་རང་གི་སྲོལ་རྒྱུན་དེ་ལོ་ངོ་སྟོང་ཕྲག་ལྷག་ཅིག་གི་རིང་ལ་གསོན་གནས་ཐུབ་པ་མ་ཟད། འཚོ་གནས་ཀྱི་གོམས་གཤིས་བཟང་པོ་དེས་རང་མི་རིགས་ཀྱི་སྤྱི་ཚོགས་འཚོ་བ་དང་མིའི་ཀུན་སྤྱོད། མི་བུའི་མཐུན་ལམ་སོགས་ཕྱོགས་གང་ཅིའི་ཐད་ལ་ཕན་ཐོགས་ཆེན་པོ་བྱུང་ཡོད་པར་སེམས།  དེ་བཞིན་བླ་མ་དང་སྤྲུལ་སྐུ་དག་གིས་ཀྱང་རང་གི་འཇོན་ཚད་ཀྱིས་སྤྱི་ཚོགས་སུ་དུས་རབས་དེ་དང་མཐུན་པའི་ཞབས་འདེགས་གང་ཐུབ་ཞུས་དང་ཞུ་བཞིན་ཡོད་པ་ཀུན་གྱིས་མཐོང་གསལ་དུ་སྣང་།

བོད་ཀྱི་སྤྱི་ཚོགས་གསར་རྙིང་གཉིས་སུ་གནས་བབ་ཆེན་པོ་བཟུང་ཡོད་པའི་བླ་སྤྲུལ་དག་གིས་བོད་ཀྱི་སྤྱི་ཚོགས་ཧྲིལ་བོར་འགན་ཞིག་ལེན་ཐུབ་ཀྱི་ཡོད་པ་སྨྲོས་མེད་རེད། བོད་སིལ་བུར་འཐོར་ནས་ལོ་ངོ་༤༡༡་སྔ་རྗེས་སུ་བོད་འདི་ཆབ་སྲིད་ཀྱི་ཐོག་ལ་དཀའ་ངལ་ཆེན་པོ་ཅི་འདྲ་ཞིག་འཕྲད་རུང་། རང་གི་སྐད་ཡིག་དང་ཡུལ་མིའི་གོམས་གཤིས་སོགས་རྩ་བརླག་ཏུ་སོང་མེད་པ་དེ་ནི་བོད་ཀྱི་བླ་སྤྲུལ་དང་ཆོས་ལུགས་མི་སྣ་དག་གིས་དགོན་སྡེ་ཁག་ནས་གཅེས་སྲུང་བྱས་ཐུབ་ཡོད་པ་ལས་ཤེས་ཐུབ་ལ། བོད་ཀྱི་སེར་མོ་བའི་སྡེ་ནི་བོད་ཀྱི་ཆོས་སྲིད་གཉིས་ཀྱི་སྲོག་ཤིང་རེད་ཅེས་ཁ་ཚོད་བཅད་ནས་བཤད་ཀྱང་མི་ཆོག་རྒྱུ་མེད་པར་སེམས།

དུས་ཀྱི་འགྱུར་བ་དང་བསྟུན་ནས་ཚན་རིག་གི་འཕྲུལ་ཆས་སམ་དྲ་རྒྱའི་རྒྱུད་ལམ་འཛམ་གླིང་གོ་ལ་འདིའི་སྐྱེས་སུ་འཁྲུངས་པ་ནས་བཟུང་བོད་ཕྱི་ནང་གཉིས་སུ་བོད་ལ་གསར་བརྗེ་དགོས་ཀྱི་འདུག་ཟེར། ད་རུང་རྙིང་གཏོར་ཟེར་བའི་ཚིག་ཅིག་བོད་ཕྱི་ནང་གི་སྤྱི་ཚོགས་ཁྱོན་ཡོངས་སུ་ཁྱབ་ཀྱིན་འདུག  ངས་གོ་བ་ལྟར་ན་རྙིང་གཏོར་ཟེར་བའི་དོན་ནི་བོད་ཀྱི་ཕ་མེས་ནས་དར་བའི་ནང་པའི་ཆོས་དེ་དང་བླ་སྤྲུལ་དག་གཏོར་དགོས་པར་གོ་བ་ལས་གཞན་གང་ཡང་མེད་པར་སེམས།  བོད་མི་རིགས་འདི་ནི་ལད་ཟློས་ལ་དགའ་བའི་མི་རིགས་ཤིག་ཡིན་པས་མི་བུ་ཁ་ཤས་ཤིག་ནས་རང་ཉིད་སྤྱི་ཚོགས་སུ་མིང་དུ་གྲགས་འདོད་པ་ཙམ་གྱིས་རྙིང་གཏོར་བྱེད་དགོས་ཚུལ་དང་བོད་ཀྱི་སྲོལ་རྒྱུན་རིག་གནས་ཀྱིས་བོད་སྤྱི་ཚོགས་ཁྱོན་ཡོངས་སུ་ཡར་རྒྱས་དང་དེང་རབས་ཅན་དུ་བསྐྱོད་པར་བགེག་བྱེད་ཚུལ་སོགས་མང་དུ་བཤད་པའི་སྐབས་འདིར། ལང་ཕྱོགས་དང་ལྟ་བ་གང་ཡང་མེད་པའི་ལད་ཟློས་ལ་དགའ་བའི་གར་མཁན་མང་པོ་ཞིག་གིས་ཀྱང་སྔ་ཕྱིའི་དོན་ལ་མི་དཔྱོད་པ་དང་། རང་ཉིད་ལ་འཚོ་བའི་ཁ་ཕྱོགས་ཙམ་ཡང་མེད་པ་དེ་དྲན་ཡུལ་དུ་གྱེས་ནས་རིག་གནས་ཤིག་དང་ཆོས་ལུགས་ཤིག་ལ་ཁག་དཀྲུ་གང་ཐུབ་བྱེད་བཞིན་ཡོད་པར་ཡིད་རེ་སྐྱོ།

དེ་བཞིན་ཕྱི་སྡོད་བོད་པའི་མི་རབས་གསར་རྙིང་རྣམས་ཀྱང་གཅིག་མཚུངས་སུ་མཆིས་ཏེ། ཁོང་ཚོར་ཆོས་ལུགས་དང་མི་རིགས་ཀྱི་བདེ་སྡུག་རྩོད་པའི་འགན་ལེན་གྱི་སྙིང་སྟོབས་དང་སེམས་ཤུགས་ཡོད་མེད་ཀྱང་ཐེ་ཚོམ་དུ་ཡོད།  ཁོང་ཚོས་བོད་ཀྱི་བརྡ་སྤྲོད་རིག་པར་བརྡལ་ཤ་མི་ཆོད་པ་དེ་ཡར་རྒྱས་དང་གོང་འཕེལ་སུ་ཅི་ལྟར་གཏོང་དགོས་རྒྱུར་མི་དཔྱོད་པར་བོད་དུ་འཛམ་གླིང་ཀུན་ལ་མེད་པའི་ཁྱད་ཆོས་ལྡན་པའི་ཆོས་དང་རིག་གཞུང་ཞིག་ཡོད་ཟེར་ནས་ང་རྒྱལ་སྟོང་བ་ཞིག་ནམ་རྒྱུན་སྐྱེས་བཞིནའདུག  དེ་ལས་ཡ་མཚན་དགོས་པ་ཞིག་ལ་ཁོང་ཚོས་ནམ་རྒྱུན་༧གོང་ས་མཆོག་ལ་དད་པ་ཡོད་ཚུལ་དང་ཁོང་གི་སྐུ་པར་མཐོང་ན་ཡང་དད་པའི་སྤུ་ལོངས་གཡོ་བར་བྱེད་ཀྱི་འདུག་པའི་རྣམ་པ་དེར་རྒྱུས་ལོན་མེད་པའི་མི་ཞིག་ཡིན་ཚེ་ཕྱི་སྡོད་བོད་མིའི་དད་པའི་ཀུན་སློང་དང་འཁྲབ་ཚན་གྱི་ལེའུ་དེ་དག་གིས་ཁྱེད་ལ་འཁྲུལ་སྣང་གི་ཟློས་གར་ཐེངས་ཤིག་སྟོན་ཁོ་ཐག་རེད།

སྐྱབས་མགོན་རིན་པོ་ཆེ་སུད་སིར་ཕེབས་ནས་གསུངས་ཆོས་དང་སྒྲོལ་དཀར་གྱི་དབང་སོགས་བསྐུར་བར་ཕྲན་ཡང་འགྲོ་རྒྱུའི་གོ་སྐབས་བྱུང་། སྐབས་དེར་ཕྲན་གྱིས་རྣམས་པ་མི་འདྲ་བའི་དེང་རབས་ཕྱི་སྡོད་བོད་མིས་བླ་མར་མཇལ་སྟངས་དང་། ཁོང་ཚོའི་སེམས་ཁམས་སུ་ཡོད་པའི་བླ་མའི་རིན་ཐང་ལ་རྒྱུས་ལོན་བྱས་རྒྱུའི་གོ་སྐབས་ཐོབ། གསུངས་ཆོས་ཉིན་དང་པོ་དང་གཉིས་པ་སོགས་སུ་བོད་པའི་མི་གྲངས་ཧ་ཅང་ཉུང་པ་ཡིན་ཙང་ཚོགས་ཁང་སོགས་སུ་སྐད་ཅོར་རྒྱག་མཁན་མེད་ལ་འཇམ་ཐང་ངེར་འདུག   ཆོས་ཞུ་བ་བརྒྱ་ཆའི་དགུ་བཅུ་ཡུལ་གྲུ་འདྲ་མིན་ནས་ཕེབས་པའི་ཕྱི་རྒྱལ་བ་ཁག་ཅིག་རེད་འདུག་ལ་ཁོང་ཚོས་༧གོང་ས་མཆོག་གིས་ཅི་གསུངས་ཀྱིན་པ་ཡིག་ཐོག་ཏུ་ཡི་གེར་འགོད་རྒྱུར་བྲེལ་ཞིང་འཚུབ།   རིན་པོ་ཆེ་ཆིབས་བསྒྱུར་གྱི་སྐབས་སུ་ཁོང་ཚོར་དད་པ་ཡོད་མེད་མི་ཤེས་ཀྱང་མི་རིགས་དེའི་སྲོལ་རྒྱུན་གྱི་ལུགས་སྲོལ་བཟང་པོ་དེར་བརྩི་འཇོག་གིས་ལག་ཏུ་ཁ་བཏགས་སོགས་བཟུང་ནས་ལག་གཉིས་ཐལ་མོ་སྦྱོར་བཞིན་པ་གློག་རྡུལ་དུས་རབས་ཀྱི་མཐོང་ཆོས་སུ་གྱུར་ཡོད་ན་འདིར་མང་དུ་མི་འགྲེལ་ལོ།

དེ་ལས་ལྡོག་སྟེ་དེར་འདུས་ཀྱི་བོད་མི་རྣམས་ནི་བོད་ཀྱི་སྲོལ་རྒྱུན་གྱི་ལུགས་སྲོལ་ལ་ཞེན་ལོག་ཅིང་ཐང་ཆད་པ་ཡིན་ནམ་ཡང་ན་ནུབ་ཀྱི་སྤྱི་ཚོགས་ཀྱི་སྙིང་བཅུད་ཅིག་རྙེད་པ་གང་ཡིན་ཆ་མ་འཚལ།  ཕྱི་ཕྱོགས་སུ་འཚར་ཞིང་ལོངས་པ་ཡིན་ནའང་འདྲ། བོད་དང་རྒྱ་གར་ནས་འབྱོར་བ་ཡིན་ན་ཡང་རུང་། གང་ལྟར་ནུབ་ཕྱོགས་སུ་སླེབས་རྗེས་རང་གི་ཡོད་ཚད་ནུབ་ཕྱོགས་སྤྱི་ཚོགས་ཀྱི་རྗེས་སུ་འགྲོ་གང་ཐུབ་བྱེད་ཀྱི་ཡོད་པར་ཡ་རེ་མཚན།  དེ་ལས་ཀྱང་ཧང་སངས་དགོས་པ་ཞིག་ལ་ནུབ་ཕྱོགས་ཀྱི་འབུར་ཏུ་ཐོན་པའི་རིག་གནས་དང་ཁོར་ཡུག་སོགས་མི་རིགས་གཞན་གྱི་དགེ་མཚན་ཆེ་བ་རྣམས་ལྷུར་ལེན་མི་བྱེད་དོན་ཅི་ཡིན་ནམ།

ད་ལྟའི་ཕྱི་སྡོད་བོད་མིས་བླ་མ་མཇལ་སྟངས་ནི་བོད་ཀྱི་སྲོལ་རྒྱུན་གྱི་གོམ་གཤིས་མེད་པའི་ཁར་འགྲོ་བ་མིའི་ཀུན་སྤྱོད་ཀྱི་ཆ་ཡང་མེད་པར་ཕོ་མོ་རྒན་གཞོན་དབྱེར་མེད་ཏུ་ཁ་པར་དང་པར་ཆས་སོགས་སུ་རང་མི་རིགས་ཀྱི་བླ་ན་མེད་པའི་རྩ་བའི་བླ་མ་དེ་པར་རྒྱག་རྒྱུ་ལས། བོད་པ་ཞིག་གི་ངོས་ནས་བླ་མར་མཇལ་བཞིན་པའི་ཀུན་སློང་དང་སྤྱོད་པ། དད་པ་སོགས་ནི་ཉིན་མོའི་སྐར་མའི་ཚུལ་དུ་སྣང་། འདི་ནི་ཡོ་རོབ་བོད་སྤྱི་ཚོགས་སུ་ཡོད་པའི་ཐུན་མོང་མ་ཡིན་པའི་ཁྱད་ཆོས་གཅིག་པོ་ཡིན་པར་སེམས།

ནང་པ་མིན་པའི་ཕྱིའི་རྒྱལ་ཁབ་ཀྱི་མི་རིགས་དག་ནི་༧རྒྱལ་བ་རིན་པོ་ཆེའི་ཆིབས་བསྒྱུར་གྱི་སྐབས་སུ་ཆོས་ལུགས་ཀྱི་དད་པ་མེད་རུང་འགྲོ་བ་མིའི་བཟང་སྤྱོད་སྤེལ་མཁན་ཞིག་ཡིན་པས་ཆ་ནས་གཞན་ལས་ལྷག་པའི་བརྩི་བཀུར་དང་བོད་མིའི་སྲོལ་རྒྱུན་གྱི་ལུགས་ལྟར་ལག་ཏུ་ཁ་བཏགས་བཟུང་ཞིང་ཐལ་མོ་སྦྱར་ནས་རིན་པོ་ཆེ་སྔུན་བསུ་ཞིང་བསྐྱེལ་མ་བྱེད། ཆེད་ལས་པ་དག་གིས་ཁོང་ཉིད་སྐུ་པར་སྒྲོམ་པ་སོགས་བྱེད་པ་ལས་སྤྱིར་བཏང་གི་གསུངས་ཆོས་ཞུ་མཁན་མང་ཆེ་བས་གུས་མེད་དེ་ལྟ་བུ་མི་བྱེད་པ་དེ་ནི་ཅི་འདྲིའི་ཡིད་དུ་འོང་པ་ཞིག་རེདའང་།

བོད་པ་དག་ནི་རྒྱལ་བ་རིན་པོ་ཆེར་དད་པ་བརྟན་དྲགས་པ་ཡིན་ནམ། ཡང་ན་རྒྱལ་བ་རིན་པོ་ཆེར་བརྩེ་བ་ཆེ་དྲགས་པ་གང་ཡིན་མི་ཤེས་མོད། ཁྱོད་དང་ང་མེད་པར་རྒྱལ་བ་རིན་པོ་ཆེར་ཕྱག་ནས་འཇུ་བ་དང་། གཟན་ཤམ་སོགས་སུ་འཐམས་པ། ཁོང་དང་མཉམ་དུ་སྐུ་པར་སྒྲོམ་པ། གཞན་རང་ཉིད་ཀྱི་པར་ཆས་དང་ཁ་པར་སོགས་སུ་རིན་པོ་ཆེ་པར་འཇུག་བྱེད་པ་སོགས་ཀྱི་རྣམ་པ་ལ་ལྟོས་ན་མི་རིགས་གཞན་གྱི་མཁས་པ་ཞིག་གམ་ཡང་ན་སྐད་གྲགས་ཅན་གྱི་གློག་བརྙན་འཁྲབ་སྟོན་པ་ཞིག་བོད་ཀྱི་སྤྱི་ཚོགས་སུ་གདན་འདྲེན་ཞུས་པ་དང་གཉིས་སུ་མ་མཆིས། རྒྱལ་བ་རིན་པོ་ཆེའི་གསུངས་མི་བརྩི་བར་སྐུ་ལ་འདི་འདྲིའི་བརྩི་དགོས་པའི་དགོས་པ་དེ་གང་ཡིན་པའི་དྲི་ཚིག་ཅིག་མ་ཡིན་ནམ། གཅིག་བྱས་ན་རྒྱལ་བ་རིན་པོ་ཆེའི་མཉམ་དུ་པར་སྒྲོན་ཐུབ་པ་ཡིན་ན་གཞན་མགོ་སེར་སྤྱི་ཚོགས་སུ་ཆེ་མཐོང་ཡོད་སྲིད་པ་མིན་ནམ།

ནང་པའི་ཆོགས་ལུགས་ཀྱི་དྲི་མ་ཡལ་མེད་ལ་བོད་སྲོལ་རྒྱུན་རིག་གནས་ཀྱི་རོ་བཅུད་འཐུང་མྱོང་པའི་བོད་པ་ཞིག་གི་ངོས་ནས་བཤད་ན་བྱེད་སྟངས་འདི་ནི་བླ་མར་འཇལ་བའི་རྣམ་པ་དང་གཏན་ནས་འགལ་བར་སེམས། སྤྱིར་བླ་མ་དང་དད་པ་སོགས་ཀྱི་ཕྱོགས་ནས་མི་གླེང་པར་༧རྒྱལ་བ་རིན་པོ་ཆེ་མིའི་རིགས་སུ་བྱོན་པའི་འགྲོ་བ་མིའི་ལུས་རྟེན་གྲུབ་ཡོད་པའི་དངོས་ཡོད་ལ་དཔྱོད་ཤེས་ཀྱི་མིག་ཟུང་ཆེར་ཕྱེ་དགོས་པར་བསམ། ཁྱེད་ཅག་ཁོང་དང་མཉམ་དུ་པར་རྒྱག་རྒྱུ་དང་སྐུའི་མདུན་དུ་བཅར་རྒྱུར་སྐོམ་པ་ཆུ་འདོད་ལྟར་ཡིན་པ་ཟློག་ཏུ་མེད་ན་ཡང་། མི་ལོ་བརྒྱ་བཅུར་ཕེབས་ལ་ཉེ་ཞིང་རྒས་ཞིང་ཁོག་པའི་རྣམ་པ་དེར་བོད་མི་ཙམ་མ་ཡིན་པར་འགྲོ་བ་མིའི་ཡོངས་ཀྱི་ཐུན་མོང་གིས་བསམ་ཤེས་བྱེད་དགོས་པ་ཞིག་པ་ཞིག་མ་རེད་དམ།