ཚུལ་ཁྲིམས་ཟླ་བ།
སྙིང་རྗེའི་དབང་ཕྱུག་བསྟན་འཛིན་རྒྱ་མཚོ།།
རིང་བའི་སྤྱན་གྱི་འོད་ཞགས་ཟླུམ་པོས།།
དད་པའི་རྗེས་འགྲོ་གངས་ཅན་པ་ཡི།།
སྡུག་གི་མུན་པ་སེལ་རོགས་གནང་ཞིག།
གངས་རིའི་ཨ་ཕ་བསྟན་འཛིན་རྒྱ་མཚོ།།
འཇམ་པའི་ཕྱག་གི་གཡབ་མོ་ཞིག་གིས།།
གོག་འགྲོས་བྱིས་པ་གངས་ཅན་བོད་ཀྱི།།
འཆོལ་བའི་གོམ་ཁ་བསྐྱོར་རོགས་གནང་ཞིག།
བྱམས་ལྡན་ཨ་མ་བསྟན་འཛིན་རྒྱ་མཚོ།།
དྲོད་ཁོལ་ཆེ་བའི་རུམ་ཁ་ཞིག་ནས།།
ལོ་གསུམ་བུ་ཆུང་གངས་ཅན་བོད་པའི།།
མདུན་གྱི་ལམ་ཁ་མཛུབ་སྟོན་གནང་ཞིག །
དུས་གསུམ་སྒྲིབ་མེད་བསྟན་འཛིན་རྒྱ་མཚོ།།
ལུགས་ཟུང་གཟིགས་པའི་མཁྱེན་རབ་གཅིག་གིས།།
ཤི་མ་གསོན་པའི་གངས་ཅན་བོད་ཀྱི།།
ལོ་རྒྱུས་གས་ཁ་བསྲུབ་རོགས་གནང་ཞིག །
བྱམས་པའི་ལྷོ་སྤྲིན་བསྟན་འཛིན་རྒྱ་མཚོ།།
བརྩེ་བའི་སྦྲང་ཆར་སིལ་མ་བབ་ཏེ།།
ཚེ་སྲོག་འབར་བའི་གངས་ཅན་བོད་ཀྱི།།
སྡུག་གི་མེ་ལྕེ་བསད་རོགས་གནང་ཞིག །
ཐབས་མཁས་མགོན་པོ་བསྟན་འཛིན་རྒྱ་མཚོ།།
གཞན་ཕན་གོམ་པའི་སྟངས་སྟབས་ཤིག་གིས།།
ངུ་དྲི་བྲོ་བའི་གངས་བུའི་གདོང་ལ།།
དགའ་བའི་འཛུམ་ཀོང་གཏོད་རོགས་གནང་ཞིག །
དབང་བཅུ་ཐོབ་པའི་བསྟན་འཛིན་རྒྱ་མཚོ།།
བསྟན་འགྲོར་སྨན་པའི་འཕྲུལ་ཐབས་ཤིག་གིས།།
དམར་པོ་རི་ལ་སྣུམ་མདོག་གཡོག་ཅིང་།།
རེ་སྒུག་སེམས་ཁ་བཀོང་རོགས་གནང་ཞིག །
ཞི་བདེའི་སྣ་འདྲེན་བསྟན་འཛིན་རྒྱ་མཚོ།།
འཚེ་མེད་ལྟ་སྤྱོད་ཟུང་དུ་འཇུག་པས།།
བརྡུང་བསྲེགས་འཕྲོག་གསུམ་འཚང་ཁ་དར་བའི།།
དབུ་ནག་ཚང་ལ་ཞི་བདེ་སྐྲུན་ཞིག །
མཁས་པའི་རྒྱལ་པོ་བསྟན་འཛིན་རྒྱ་མཚོ།།
གནའ་དེང་སྦྱོར་བའི་སློབ་ཁྲིད་ཅིག་གིས།།
ཕྱུག་རྗེས་སྙེགས་པའི་གངས་ཅན་བོད་ཀྱི།།
རྨོངས་པའི་ཞྭ་མོ་ཕུད་རོགས་གནང་ཞིག །
ཤྭཀྱའི་དགེ་སློང་བསྟན་འཛིན་རྒྱ་མཚོ།།
གནང་བཀག་གྱང་གི་ར་བ་བཙན་པོས།།
གངས་ཅན་བོད་ཀྱི་བསྟན་པའི་རྐུན་པོ།།
དེང་སང་མང་བས་སེལ་ཐབས་གནང་ཞིག །
དད་པའི་སྤུ་ལོང་གཡོས་དང་ཆབས་ཅིག །
དགའ་བའི་མཆི་མ་འཁྲུག་དང་ཆབས་ཅིག །
སྡུག་གི་སེམས་ཁམས་མྱོས་དང་ཆབས་ཅིག །
དགའ་སྡུག་ངུ་རྒོད་ཤོར་དང་ཆབས་ཅིག །
ཆུ་ཚོད་གཅིག་གིས་ཚོར་འདུ་རྣོན་པོ།།
ཆུ་ཚོད་གཅིག་ལ་མཚོ་བྱུང་དགའ་བློས།།
སྨྱུ་གུའི་སོ་ཁ་འདི་ན་བསྒྱུར་བས།།
སྨྱུག་ཐོགས་པ་རྣམས་དགྱེས་དགུར་རོལ་ཅིག །
2013.1.22
མགུར་ལྗིད་པོ་ཞིག་གི་ཚོར་བ་བསྟེར། ཡིད་འགུག་པོ་བྱུང་། ཚོར་བ་སྐྱེན་པོ་འདུག། ཡག་པོ་འདུག།
རྒྱལ་བ་རིན་པོ་ཆེ་རྣམ་དཔྱོད་ལྡན་པའི་བླ་མ་ཞིག་ཏུ་ཕེབས་པར་ང་ཚོར་ཤིན་དུ་ཕན་ཐོགས་པོ་འདུག། ཁོང་ལ་དཔྱད་པ་བྱེད་པའི་རིག་པ་ཤིན་དུ་རྣོན་པོ་ཞིག་འདུག། ཕལ་ཆེར་དགེ་བཤེས་ཚོས་རོགས་པ་བྱས་ནས་ཡོན་ཏན་འདི་འཁྲུངས་སྲིད།
བླ་མ་འདི་པས་མཐའ་ན་རྫོགས་ཆེན་གྱི་ཁྲིད་སྐྱོན་སྐབས། རིགས་པ་དང་དཔྱད་པ་ཤིན་དུ་ནས་ཕྲ་མོ་བཀོལ་ནས་རྫོགས་ཆེན་གསུངས་པ་འདི་གསུང་ཆོས་ཉན་གྱིན་ལུས་ཀྱི་བ་སྤུ་ཚང་མ་གནམ་ལ་གཟེངས་པར་བྱེད། ང་རང་ཐེངས་གཅིག་རྒྱལ་བ་རིན་པོ་ཆེས་རྫོགས་ཆེན་གྱི་གསུངས་ཆོས་ཤིག་གཡུ་ཐོག་Youtubeནས་བལྟས་པ་ཡིན། དེའི་འོག་ལ་མཆན་བཀླགས་དུས་རྫོགས་ཆེན་གྱི་སློབ་དཔོན་ཆེན་མོ་བླ་མ་སུར་ཡ་lamasurya་ཞུ་མཁན་དེས་མཆན་ཞིག་བཀོད་འདུག། དེའི་ནང་དོན་ནི། གོང་ས་མཆོག་གི་རྫོགས་ཆེན་ཁྲིད་སྟངས་དེ་སྔར་བྱུང་མྱོང་མེད་པའི་བློ་རྩལ་མཐོན་པོའི་ཉམས་ཁྲིད་ཤིག་ཡིན་པ་དང་། ཁོང་གིས་སྔོན་མ་འདི་ལྟ་བུའི་བློ་རྩལ་ཅན་གྱི་སེམས་ཁྲིད་གོ་མྱོང་མེད་ཟེར།
ཡིད་བཞིན་ནོར་བུ་མདུན་ན་ཡོད་ཀྱང་ནོར་བུའི་ནོར་ངོ་མི་ཆོད་ཅིང་། །
སྙིང་གཏམ་གསོན་པོ་རྒྱུན་དུ་གསུངས་ཀྱང་བོང་བའི་རྣ་བར་ཆོས་འདྲ་ལ། །
མདུན་ལ་སླེབས་དུས་གུས་ཉམས་ཆེ་ལ་གོམ་གང་ཕར་ལ་སོང་བ་ན། །
རང་དོན་ཙམ་ལས་གཞན་གང་མི་འདོད་བསོད་ཟད་ཁ་བ་གངས་ཅན་པ། །
ཧཧཧ། ཟུར་གནས་ཟེར་བ་ནས་ཙི་ཙིས་རི་རྒྱལ་པང་དུ་མཇལ་བའི་སྟོང་སྐད་ཅིག་རྒྱག་འདུག་པ་རང་ཉིད་ངོ་ཚ མི་ཤེས་པ་སྙིང་རེ་རྗེ།
༸བསྟན་འཛིན་རྒྱ་མཚོ།
ཤྰཀྱའི་གདུང་ཚབ་༸བསྟན་འཛིན་རྒྱ་མཚོ། །
སྲོང་བཙན་ཡང་སྤྲུལ་༸བསྟན་འཛིན་རྒྱ་མཚོ། །
གངས་ཅན་མགོན་པོ་༸བསྟན་འཛིན་རྒྱ་མཚོ། །
ཞི་བདེའི་དེད་དཔོན་༸བསྟན་འཛིན་རྒྱ་མཚོ། །
བསྟན་འཛིན་རྒྱ་མཚོའི་སྐུ་ཚེ་བརྟན་ཅིང་།།
གཞིས་བྱེས་མཉམ་འཛོམས་དགའ་བདེ་རོལ་ནས།།
གངས་བུ་ངས་ཀྱང་སྐྱིད་པའི་གླུ་དབྱངས།།
གང་འདོད་ལེན་པའི་དུས་ཚིགས་ཚེས་ཤོག།
བསྟན་འཛིན་རྒྱ་མཚོ་སྐུ་ཚེ་གསལ་ཐང་ཡིན་པས་སྐྱིད་པོ་ཐོངས།
བསྟན་འཛིན་རྒྱ་མཚོ་མཛད་འཕྲིན་སྔར་ལས་དར་བ་སྐྱིད་པོ་ཐོངས།
བསྟན་འཛིན་རྒྱ་མཚོའི་བྱམས་བརྩེ་ཀུན་ལ་ཁྱབས་པས་སྐྱིད་པོ་ཐོངས།
བསྟན་འཛིན་རྒྱ་མཚོས་ཁ་བརྡ་ཀློག་བཞིན་ཡོད་པས་སྐྱིད་པོ་ཐོངས།
གངས་ཅན་མགོན་པོ་བསྟན་འཛིན་རྒྱ་མཚོ་ཡི།
མཛད་པ་དྲན་པས་གདུང་དབྱངས་འབོད་པ་ཡིས།
གཞན་དག་ལ་ལང་དད་བསྐུལ་འབྱུང་ངེས་ན།
བོད་སྤྱིའི་སྐད་ཉིད་བཀོལ་བ་གལ་ཆེ་ཡིན།།
་
རོགས་གནང་ཞིག་ཅེས་པ་ཁ་སྐད་ཡིན།
དེའི་ཚབ་་མཛོད་ཅིག་ཅེས་པ་བོད་སྤྱིའི་སྐད།
བོད་ཡོངས་གཅིག་ཏུ་སྒྲིལ་བྱེད་ཆོས་སྐད་ཡིན།
ཆོས་སྐད་རྒྱས་ན་རྒྱལ་བའི་མཛད་པ་རྒྱས།།