རླུང་དམར།
“བདེ་སྐྱིད”་ནི་འགྲོ་བའི་ཁམས་བདེ་ཉག་ཅིག་ཡིན་ལ། དེ་ལས་འཐུས་ཤོར་ཁ་ཆག་སྣ་རལ་ལ་བུད་སོང་ན་འགྱོད་གདུང་གི་བློ་སྣེ་ཚར་སོང་བ་རེད། རྨི་ལམ་གྱི་འགྲོས་ནས་ཁྱོད་ཀྱིས་རྙེད་མི་སྲིད་པ་ཞིག་རྙེད་ངེས་ཡིན་ནའང་། རྙེད་སྲིད་པ་ཞིག་མི་རྙེད་པའང་ཡིན། དེ་ལྟ་ན། འགྲོ་བའི་བདེ་བ་ཆེ་རུ་གཏོང་དགོས་ཤིང་འགྲོ་བའི་སྡུག་བསྔལ་ཆུང་དུ་གཏོང་དགོས་པས། འདི་ནི་བདེ་ཁམས་ཤིག་ལོས་ཡིན། སེམས་པ་ནག་པོ་ཞིག་ག་ལ་ཡིན། འཇིག་རྟེན་སྐྱེ་འགྲོའི་སེམས་པ་དེ་སྔར་ཐོག་ལ་དཀར་པོའི་དྭངས་ཤ་ཆེ་ཞིང་སྐྱོན་རིག་གིས་མ་བསྒྲིབ་པ་ཞིག་རེད་འདུག
ཡིན་ཏེ། འཕྲུལ་རིག་སྒྱུ་ཁྲམ་གྱི་འཁོར་བའི་ངོགས་ནས་ང་ཚོ་སད་མ་སད་དང་། གཉིད་མ་གཉིད། ཤེས་མ་ཤེས། མཐོང་མ་མཐོང་། ཡིན་མ་མིན། རང་བརྩི་གཞན་འདོར་གྱི་རོལ་རྩེད་ལ་ཞེན་ཆགས་ཆེ་བས་ཡོད་ཚད་བརླག་གིན་མཆིས་ན། བདེ་ཁམས་ཤིག་གང་ན་ཡོད།འགྲོ་བའི་ཚོགས་ནི་རང་འདོད་གཞན་དམན་གྱི་བསམ་བློར་དགའ་བའི་དབང་གིས་ཡར་སེམས་མེད་པའི་བློ་ནི་ཆད་པོ་ཞིག་ཏུ་གྱུར། དེའི་ཐད་ནས་འགྲོ་བའི་བདེ་ཁམས་སྲོག་མེད་འཕྲུལ་རིགས་ལ་བཅོལ་ནས་འབྲེལ་མེད་ཀྱི་ཟམ་ཆེན་ཞིག་མི་སྒེར་གྱི་རྐང་འོག་ལ་བརྩིགས་ཏེ་མང་པོ་བོར་འདུག གོ་ལ་ཇི་ལྟར་བདེ་སྐྱིད་དགོས་ན་དེ་ལྟར་སེམས་པ་བཟང་པོའི་སྤྱི་ཚོགས་ཤིག་དང་། མི་གཤིས་རང་དོགས་མིན་པའི་སྐྱེ་འགྲོའི་འཁོར་ཞིག་ཡོད་ན། བདེ་བའི་བདེ་བ་འཐོབ་པ་ཡིན་ལ། བདེ་ཁམས་ཤིག་གི་འཚོ་ནོམ་ཆེན་པོ་ཡོད།རང་དབང་ཆེ་བའི་སྐྱེ་འགྲོ་ཞིག་ཡོད་ཀྱང་། ཁྲིམས་མེད་ཀྱིས་འགལ་འཛོལ་ཆེ་བའི་ཉིན་འཁྱོལ་མཚན་འཁྱོལ་བྱེད་ཀྱིན་འདུག་ན། ཕྱི་བལྟས་ནས་ཡག་པོ་རྫིག་པོ་རེད།
ནང་སེམས་ཀྱི་རུལ་དྲི་ནི་ང་རྒྱལ། ཕྲག་དོག ཁོང་ཁྲོ། ཞེ་ནག རྫུན་བཅས་ཀྱི་དད་པར་འཇུག་ཆེ་བས་བདེ་ཁམས་མེད་པའི་ལྷ་སྒྲུང་ཞིག་གི་འཇིགས་སྣང་དེ་ག་ལེར་འཚོ་བའི་ཟ་ཟུར་ནས་མངོན་དུས་འུ་ཚོ་སླར་ཡང་རེ་བ་ཤི་རོའི་ལུགས་སུ་འཁུམས། ད་བདེ་འགྲོ་ཞིག་མེད་ཐག་རེད་ལ།དེའང་། གཏམ་ལྕེ་ལ་རྣོ་ཐོགས་ཤིང་ལས་འབྲས་གཙུག་ཏུ་བཀུར་ཆེ་ན། ང་ཚོས་བདེ་ཁམས་ཤིག་འཚོལ་ཕྱིར་རང་ཉིད་ནས་འོས་ལངས་བྱས་ཏེ་བགྲོད་དགོས། བློ་དཀར་གྱི་མི་གཤིས་བཟང་པོ། རིང་ལུགས་སྤྱི་མཐུན་གྱི་བདེན་པ། ཀུན་ཕན་ལྟ་ཚུལ་སོགས་ཀྱི་ཐད་ནས་གླེང་བྱ་བགྱིས་ཏེ། ལག་ལེན་དངོས་ཀྱི་ཐོག་ལ་ནུས་སྟོབས་སྤེལ་ན་ད་གཟོད་ཡར་ཐོན་གྱི་རིག་དངོས་ཤིག་འབྱོར་ཐུབ་ལ། ཤེས་རིག་བློ་གྲོས་ཀྱི་གནད་སྨིན་ཤེས་བྱ་ལས་ང་ཚོའི་ནང་སེམས་ལ་འགྱུར་བ་ལེགས་པོ་ཡོད་པར་བརྩོན་དགོས། གོ་ལའི་སྒྱུ་འཕྲུལ་གྱི་ཕྱིའི་དངོས་པོ་ཇེ་བཟང་ཇེ་ལེགས་སུ་སྔོན་ཐོན་ཤུགས་ཆེ་ནའང་། ནང་བསམ་བློའི་ཁ་ཕྱོགས་ནི་འཐོར་བཤིག་དང་ལོག་སྤྱོད་ཀྱི་གནས་སུ་བྱུང་ན། འགྲོ་མིའི་བདེ་སྐྱིད་ནི་རྨང་ནས་ཡལ་ངེས་པ་རེད།
བྱས་ཙང་། འུ་ཚོ་མི་སྒེར་གྱི་སྟེང་ནས་ཉིན་རེའི་འཚོ་བའི་ཁྲོད་ནས་བྱ་དངོས་ཅི་ཞིག་བསྒྲུབ་ཀྱང་། དེར་དོ་ཁུར་གང་ལེགས་བྱས་ཏེ་འཐུས་ཤོར་རིགས་ལ་ཁ་སྐོང་བྱེད་ཐུབ་དགོས་ཤིང་། བསམ་གཞིགས་ཡག་པོ་རེའི་སྣེ་ཁྲིད་འོག་ནས་ང་ཚོ་འགྲོ་མིའི་ཀླད་པ་ངོ་མཚར་ཅན་འདི་ཉིད་བེད་སྤྱོད་ལེགས་སར་བགྱི་ཐུབ་པར་ཀུན་སློང་རྣམ་དག་རེ་མངའ་ན། འགྲོ་བའི་བདེ་ཁམས་ཤིག་གི་སྙིང་བོ་རྟོགས་པ་ཡིན། རེད་ཡཱ། སྟབས་བདེའི་ལམ་ལ་ཇི་ལྟར་ཞུགས་ན་དེ་ལྟར་སྡུག་བསྔལ་མང་པོ་ཞིག་སེལ་ཐུབ་ཀྱི་འདུག་མོད། ཡིན་ཡང་། སེམས་པའི་བདེ་སྐྱིད་ངོ་མ་ཞིག་ནང་སྙིང་ལ་ཡོད་དགོས་ན། རང་ཉིད་ཀྱི་འཁོར་བའི་ལས་སྣེའི་ཉམས་མྱོང་གཞི་ལ་བཅོལ་ནས་ཕན་འབྲས་ཡོངས་མི་མང་ལ་བཀོལ་སྤྱོད་ཀྱི་རྒྱུ་རུ་གཏོང་ཐུབ་དགོས། དེ་ལྟར་གནང་ཐུབ་ན་ཡ་རབས་ཚུལ་མཐུན་གྱི་མིག་དཔེ་ཞིག་ཡོད་པ་དངོས་མཐོང་ལག་ཟིན་རེད་འདུག དེ་བཞིན་དུ་ཞི་བདེའི་དཔལ་ཡོན་དར་བའི་མཚོན་རྟགས་ཤིག་ཀྱང་རྨི་ལམ་གསར་བའི་ཚུལ་ལྟར་འཆར་སྣང་ངོ་མཚར་གྱི་གཟུགས་སུ་སྐྱེས་པ་རིགས་ཀུན་བདེ་ལ་བྱོན་པར་འགྱུར་ངེས་སོ།
ཤེས་བྱ་སྣ་ཚོགས་མང་པོ་ཞིག་ང་ཚོའི་སེམས་ཀྱི་ལེགས་སྐྱེས་སུ་ཡོད། དེ་དུས། འགྲོ་མིའི་བྱ་སྤྱོད་ལ་སྡིག་གྲིབ་དྲི་ནག་གིས་མ་བསླུས་པའི་གོམས་གཤིས་བཟང་པོའི་ཆ་ལུགས་ཡོད་ན། སྔར་བཞིན་ང་ཚོ་མདུན་དུ་བསྐྱོད་ཐུབ་ལ། “བདེ་ཁམས”ཀྱི་སྤྱི་ཚོགས་ཤིག་ཡོད་པ་ཡིད་སེམས་ཀྱི་རྒྱན་ཆ་རེད། དེ་ལྟ་ནའང་། གཞན་ལ་གནོད་འཚེ་མི་བྱེད་པར་གཅེས་སྐྱོང་གི་ལྟ་ཚུལ་འཛིན་དགོས་པ་ལས་དགྲ་མགོ་ཐོ་བརྡུང་གིས་ཐམས་ཅད་བརླག་པར་བྱས་ན། ང་ཚོ་ལ་རེ་བ་མེད་ལ། ང་ཚོ་ལ་སང་ཉིན་དང་བདེ་ཁམས་ཀྱི་གཞིས་ཁྱིམ་ཡོད་མི་སྲིད་པས། བདེ་ཁམས་འཚོལ། བདེ་སྐྱིད་ཚོལ་་་་།
༢༠༡༩/༠༩/༢༩ཉིན།