—མཚམས་སྦྱོར་བ། གངས་འདབས།
རྗར་མེ་ནི་གྲོང་ཁྱེར་ལབ་རྫེག་དུ་རྒྱལ་སྤྱིའི་གཞོན་ནུའི་བོད་རིག་པའི་གྲོས་ཚོགས་ཐེངས་བཞི་པ་སྐོང་ཚོགས་ཀྱི་སྐབས་ལ་རྗར་མེ་ནི་བོད་ཀྱི་ཁང་པས་བོད་ཀྱི་རིག་གཞུང་མཚན་ཚོགས་ཤིག་ཚོགས་ཞུགས་པ་ཚོར་དམིགས་བཀར་གོ་སྒྲིག་ཞུས་སོང་།
ད་ལམ་གྱི་རིག་གཞུང་མཚན་ཚོགས་དེའི་མིང་ལ་༼འཆི་བ་མེད་པའི་རིག་གཞུང་།༽ ཞེས་བཏགས་ཤིང་། གྲགས་ཅན་སྙན་ངག་མཁན་ལྗང་བུའམ་ལྕེ་ནག་ཚང་རྡོ་རྗེ་ཚེ་རིང་མཆོག་ཆེད་མངགས་གདན་འདྲེན་ཞུས་པ་དང་། བོད་ཀྱི་གནའ་དེང་གི་རོལ་དབྱངས་མཁན་དོན་གྲུབ་མཆོག་དང་། དགེ་འདུན་བཟང་པོ་གཉིས་ཡང་ཆེད་མངགས་གླུ་ལེན་པར་གདན་ཞུས་ཐོག་ཁོང་རྣམ་གཉིས་ནས་བོད་ཀྱི་སྲོལ་རྒྱུན་དང་། དེང་རབས་མཚོན་པའི་གཞས་སྣ་གཉིས་བཏང་གནང་ཡོད།
སྐུ་ཞབས་ལྗང་བུ་མཆོག་གིས་རང་ཉིད་ཀྱིས་བརྩམས་པའི་གཟི་མིག་དགུ་པའི་དེབ་ལས། ༼སྲོག་ཆགས་གསུམ།༽ཞེས་པའི་སྙན་ངག་དེ་སྒྲོག་སྦྱངས་གནང་བ་དང་། འདི་ནས་༼དབྱར་རྩྭ་རིན་པོ་ཆེ།༽ འབོད་པའི་གློག་བརྙན་དེ་ཚོགས་ཞུགས་པ་རྣམ་པར་སྤྱན་འབུལ་ཞུས་ཡོད།
གོ་སྒྲིག་ཚོགས་ཆུང་ནས་སྐུ་མགྲོན་རྣམ་པར་འཚམས་འདྲི་སྒྲུབ་མཚམས་བོད་ཀྱི་ཁང་པའི་མིང་ཐོག་ནས་འདུས་བྱུང་ཕུན་ཚོགས་ཚེ་རིང་གིས་བོད་ཀྱི་ཁང་པའི་ལས་རིམ་སྤྱི་དང་། ལྷག་པར་ཤེས་རིག་དང་། སྒྱུ་རྩལ་གྱི་མཛད་རིམ་རྣམས་ངོ་སྤྲོད་ཞུས་པའོ།