ཀླུ་སྨྱོན།
འཆི་བ་ནི་ཁྱེད་ཀྱི་སྒེའུ་ཁུང་ཕྱི་ལོགས་སུ་འབབ་བཞིན་པའི་དབྱར་གཞུང་གི་ཆར་བ་དེ་དང་འདྲ་བས།
དེས་ཁྱེད་ཀྱི་སྐྱིད་ལ་སྡུག་པའི་མི་ཚེའི་ལོ་མ་ལྗང་ཁུ་དེ་ཚོ་གཙང་མར་བཀྲུ་ལ།
དེས་ཁྱེད་ཀྱི་བྱ་བ་གང་ཞིག་མ་འགྲུབ་པའི་སུན་སྣང་ཁྲོད་ཀྱི་ས་རྡུལ་དག་ཀྱང་སེལ་བར་བྱེད།
འཆི་བ་ནི་ཁྱེད་ཀྱི་རྐང་འོག་གི་ལམ་ཕྲན་གྱ་གྱུ་མ་དེ་དང་འདྲ་བས།
དེའི་གཡས་གཡོན་དུ་ཆེས་མཛེས་པའི་མེ་ཏོག་གི་སྐྱེལ་ཚལ་དང་དེ་ལས་འཐུལ་བའི་བསུང་ཞིམ་ཡོད་ལ།
དེའི་མཐའ་སྣེ་རུ་ཧ་ཅང་ལྷིང་འཇགས་ཡིན་པའི་གནའ་བོའི་གྲོང་གསེབ་སྐྱིད་པོ་ཞིག་ཀྱང་ཡོད།
འཆི་བ་ནི་ཁྱེད་ཀྱི་མགོ་ཐོག་གི་ནམ་མཁའ་སྔོན་པོ་དེ་དང་འདྲ་བས།
དེའི་དཀྱིལ་འཁོར་དུ་བྱེ་བ་ཕྲག་བརྒྱའི་འཇིག་རྟེན་སྣ་ཚོགས་ཀྱི་ངོ་མཚར་བྱུར་བུར་སྤུངས་ཡོད་ལ།
དེའི་དབྱིངས་རུམ་དུ་གྲངས་མེད་པའི་རྣམ་ཤེས་ཀྱི་ཁ་བ་བུ་ཡུག་ཀྱང་འཚུབ་བཞིན་ཡོད།
འཆི་བ་ནི་ཁྱེད་ཀྱི་ལྕགས་ཐབ་ནང་གི་མེ་ལྕེ་དམར་པོ་དེ་དང་འདྲ་བས།
དེས་ཁྱེད་ལ་དགུན་དུས་སུ་དྲོད་ལམ་ལམ་གྱི་བདེ་སྐྱིད་རྫོགས་མེད་ཅིག་སྦྱིན་ཐུབ་ལ།
དེས་ཁྱེད་ལ་དབྱར་ཁར་དཀར་ལྷོག་ལྷོག་གི་འོ་ཇ་མངར་མོ་རེ་ཡང་སྐོལ་བར་བྱེད།
འཆི་བ་ནི་ཁྱེད་ཀྱི་ར་སྐོར་ནང་གི་ཁ་བ་དཀར་པོ་དེ་དང་འདྲ་བས།
དེས་ཁྱེད་ལ་ཆེས་མཛེས་སྡུག་ལྡན་པའི་སྙན་ངག་གི་བརྗོད་བྱ་ཟབ་མོ་ཡང་ངོ་སྤྲོད་བྱེད་སྲིད་ལ།
དེས་ཁྱེད་ལ་ཆེས་གཏིང་མཐའ་བྲལ་བའི་གཏམ་རྒྱུད་ཀྱི་མ་ཕྱི་གང་མང་ཞིག་ཀྱང་མཚམས་སྦྱོར་བྱེད་ནུས།
འཆི་བ་ནི་ཁྱེད་ཀྱིས་མདང་དགོང་བལྟས་པའི་ལྷོ་ཁོ་རེ་ཡའི་གློག་བརྙན་དེ་དང་འདྲ་བས།
དེས་ཁྱེད་ཀྱི་སེམས་ངོས་སུ་ཡལ་བ་མེད་པའི་བརྩེ་དུང་གི་ཐམ་ཀ་དམར་པོ་ཞིག་རྒྱག་སྲིད་ཅིང་།
དེས་ཁྱེད་ཀྱི་མིག་མཐའ་རུ་ཡང་ཕྱིས་ཡང་འབབ་དང་རློན་ཆབ་ཆབ་ཀྱི་མཆི་མ་དྲན་པོ་རེ་ཡང་བསྐྱིལ་ནུས།
འཆི་བ་ནི་ཁྱེད་ཀྱིས་ལོ་ཟླ་དུ་མའི་གོང་དུ་བསྐྱུར་ཟིན་པའི་སྙིང་སྡུག་མཛའ་མོ་དེ་དང་འདྲ་བས།
དེས་ཁྱེད་རང་སེམས་པ་མི་སྐྱིད་དུས་དྲན་ཤིང་གི་མཚོ་འཇིངས་སུ་ཐེངས་ཤིག་འཁྲིད་པར་བྱེད་ལ།
དེས་ཁྱེད་རང་ཁེར་རྐྱང་ཡིན་དུས་སུ་འཕུར་ཟིན་པའི་སྟོན་ལོ་སེར་པོ་ཞིག་གི་ཁུག་ཏུ་གཅུད་ན་ཡང་ཐང་།
འཆི་བ་ནི་ཁྱེད་ཀྱི་མདུན་ཅོག་སྟེང་གི་གློག་གཞུ་དམར་པོ་དེ་དང་འདྲ་བས།
དེས་ཁྱེད་ཀྱི་མཚན་ལྗོངས་སུ་ནམ་ཡིན་ཡང་ཁྱེད་ལ་རེ་སྒུག་བྱས་ནས་བསྡད་ཡོད་ལ།
དེས་ཁྱེད་ཀྱི་མི་ཚེའི་ཤོག་ལྷེ་རེ་རེ་བཞིན་འོད་ཀྱིས་བརྒྱན་བཞིན་འཆི་སྲིད།
འཆི་བ་ནི་ཁྱེད་ཀྱི་སྒེའུ་ཁུང་ལས་འཕྲོས་པའི་ཉི་འོད་བན་བུན་དེ་དང་འདྲ་བས།
དེས་ཁྱེད་ཀྱི་རྒྱབ་གཞུང་ལ་བརྗེད་དཀའ་བའི་དྲོད་འཇམ་རེག་བྱ་ཞིག་འཁྱེར་ཡོང་ལ།
དེས་ཁྱེད་ཀྱི་མུན་ཁྱིམ་ཧྲིལ་བོར་ཡང་འོད་གསལ་གྱི་སྙན་ངག་རིང་མོ་ཞིག་ཀྱང་འབྲི་བར་བྱེད།
འཆི་བ་ནི་ཁྱེད་ཀྱི་མདང་སྐྱེས་ཀྱི་བྱིས་པ་ཆུང་ཆུང་དེ་དང་འདྲ་བས།
དེས་ཁྱེད་ལ་མཚན་དཀྱིལ་རེ་རེ་བཞིན་ངུ་ངག་གི་དབྱངས་རྟ་སྙན་པོ་ཞིག་དཀྲོལ་བར་བྱེད་ལ།
དེས་ཁྱེད་ལ་ལོ་ཟླ་ཞག་གསུམ་ཇི་ལྟར་བཞུད་པ་ཡང་མི་ཤེས་པའི་སྒྱུ་འཕྲུལ་ཞིག་ཀྱང་སྟོན་པར་བྱེད།
འཆི་བ་ནི་ཁྱེད་ཀྱི་ཨམ་ཕྲག་ནང་དུ་ཡོད་པའི་ཟིན་ཐོ་རྙིང་ཧྲུལ་དེ་དང་འདྲ་བས།
དེས་ཁྱེད་ཀྱི་འདས་ཟིན་པའི་ལོ་ཟླ་གང་མང་ཞིག་གི་བྲོ་བ་མངར་སྐྱུར་ཁ་གསུམ་ཉར་བསྡད་ཡོད་ལ།
དེས་ཁྱེད་ཀྱིས་གཞན་ལ་སྤྲོད་དགོས་པ་དང་གཞན་གྱིས་ཁྱེད་ལ་སྤྲོད་དགོས་པའི་བུ་ལོན་གང་མང་ཞིག་གི་དཔང་རྟགས་ཀྱང་བྱེད་ཆོག་ཆོག་ཏུ་ཡོད།
འཆི་བ་ནི་ཁྱེད་ཀྱི་ཉལ་ས་དྲོན་མོའི་ནང་གི་མཛེས་སྡུག་གཞོན་ཤ་ཆགས་པའི་སྙིང་གི་མཛའ་མོ་དེ་དང་འདྲ་བས།
དེས་ཁྱེད་ཀྱི་ལུས་ཟུངས་ཡོད་ཚད་ནམ་གུང་གི་མུན་ཁྲོད་ནས་ལྷག་མ་མེད་པར་འཇིབས་ནས་འགྲོ་བར་བྱེད་ལ།
དེས་ཁྱེད་ཀྱི་དངུལ་ཁུག་ནང་གི་སྒོར་རྡོག་ཆ་བོ་མ་ཤེས་མ་ཚོར་བའི་ངང་ནས་བར་སྣང་སྟོང་བའི་དབྱིངས་སུ་འཐིམ་པར་ཡང་བྱེད།
འཆི་བ་ནི་ཁྱེད་ཀྱིས་ཕ་ཡུལ་གྱི་གྲོང་གསེབ་དེ་ནས་བཞག་པའི་ཨ་མ་རྒན་མོ་དེ་དང་འདྲ་བས།
དེས་ཉི་མ་རེ་རེ་བཞིན་ལག་པ་ཐོད་ལ་བཞག་སྟེ་ཁྱོད་ཨེ་ཡོང་གི་རེ་སྒུག་གྲངས་མེད་ཅིག་བྱེད་བཞིན་ཡོད་ལ།
དེས་དུས་ཚོད་རེ་རེ་བཞིན་ཁྱོད་དྲན་པའི་མཆི་མ་བཙན་གྱིས་མིད་ཞོར་ཁྱེད་རང་ཁོ་ནས་སེམས་ཁོང་དུ་ཉར་ནས་བསྡད་ཡོད།
འཆི་བ་ནི་མ་གཞི་ནས་ང་ཚོའི་གཡས་གཡོན་དང་མདུན་རྒྱབ་གང་ཞིག་ན་དུས་རྟག་ཏུ་ཡོད་པའི་གྲིབ་གཟུགས་རིང་མོ་དེ་དང་འདྲ་བས།
དེས་ཁྱེད་རང་སོང་ས་བསྡད་ས་ཐམས་ཅད་ན་གྲག་འགུལ་མེད་པར་ཉི་མ་རེ་རེ་ཟིན་ཐོ་རུ་འབྲི་བཞིན་ཡོད་ལ།
དེས་ཁྱེད་ཀྱིས་བསགས་པའི་དགེ་སྡིག་གི་འགུལ་སྐྱོད་ཐམས་ཅད་འཆི་བདག་གཤིན་རྗེ་ལ་རྩིས་སྤྲོད་བྱེད་རྒྱུར་བྲེལ་བ་ཁོལ་ནས་བསྡད་ཡོད།
འདུ་ཤེས་ཀྱི་མཆོག་ནི། འཆི་བའི་འདུ་ཤེས་སོ། ཞེས་པ་ལྟ་བུ་ཞིག་དྲན་ཡང་ཁུངས་བརྗེད་ཚར་འདུག
འཆི་བ་མགོར་མ་སླེབས་བར་དུ་འཇིགས་སུ་རུང་བའི་འཆི་ལམ་དེ་མི་དྲན། འཆི་བ་རང་གི་མགོར་སླེབས་དུས་གསོན་སྐབས་ཀྱི་ལོ་རྒྱུས་ལས་མི་དྲན། གང་ལྟར་གསོན་ལམ་ནས་འཆི་ལམ་རྒྱུད་དགོས་པ་ངེས་གཏན་ཡིན་དུས་གསོན་ངོགས་ན་ཡོད་དུས་ལས་རྒྱུ་འབྲས་ལ་དོ་སྣང་ཡག་པོ་བྱེད་དགོས་པ་གལ་ཆེ། ང་ཡང་འཆི་རྒྱུ་ཡིན།
ལས་རྒྱུ་འབྲས་ལས་ལྷག་པའི་རྩི་ཁ་དཀའ་མོ་ཞིག་འཇིག་རྟེན་འདི་ན་མི་འདུག ལས་རྒྱུ་འབྲས་ལས་ཕྲ་ཞིང་ཞིབ་པ་ཞིག་ཀྱང་མི་འདུག ཨ་ལས་ངན་ཚོ། སྟོན་པ་ཞལ་བཞུགས་དུས་ཀྱང་ལས་རྒྱུ་འབྲས་ཀྱི་རྣམ་གཞག་འདི་ཁོང་གི་བུ་ཆེན་ཚོས་ཀྱང་སྟོན་པ་རང་ལ་བཀའ་འདྲི་ཞུ་གི་རེད་ཅེས་གསུངས་འདུག་ག དཔེར་ན་ཁྱིམ་བདག་རྒན་འཁོག་ཅིག་ལ་རབ་ཏུ་བྱུང་བའི་བསོད་ནམས་ཡོད་མེད་མཆོག་ཟུང་ལྟ་བུས་ཀྱང་མ་རྙེད་པར་སྟོན་པས་གཟིགས་པ་ལྟ་བུ་རེད། ལས་རྒྱུ་འབྲས་རྩི་མ་ཐུབ་ནས་ང་ཚོ་ད་ལྟ་བར་དུ་འཁོར་བ་སྡུག་བསྔལ་གྱི་རྒྱ་མཚོ་འདིའི་ནང་དུ་ལྷགས་སོང་བ་རེད་ཡ།
གང་ལྟར་གང་ལ་ཡང་བསམ་བློ་གཏོང་གི་མེད། ནམ་ཤི་ན་ཤི ངས་འཆི་བ་དང་གཉིད་པ་གཅིག་འདྲ་རེད་བསམ།