དུར་བྱང་།
གོ་ལའི་སྐྱེ་འཆིའི་འཇིགས་པ་བརྩེ་བས་གཟིགས།།
མགོན་བྲལ་སེམས་ཅན་དག་ནི་ཉེ་བར་བཟུང་།།
སྣོད་བཅུད་གང་ལའང་བྱམས་བརྩེས་མ་ལྷོད་པ།།
འཇིག་རྟེན་ཀུན་སྐྱོབ་ཆེན་པོར་ཕྱག་འཚལ་ལོ།།
ཕན་ཚུན་གཅིག་ཏུ་བརྟེན་པའི་འོ་སྐོལ་ཚོས།།
འབྱུང་བཞིའི་རྒུད་པ་ཞིབ་མོ་བློ་ཡིས་དཔྱད།།
ཉེན་བཟློག་དུས་སུ་བབས་པ་ཡང་དུ་ཡང་།།
འཛམ་གླིང་མཁས་རྒུའི་ཚོགས་ལ་གཏམ་དུ་བྱས།།
འཇིག་རྟེན་རྒུད་པ་མཐའ་དག་རྒྱུ་ལས་བྱུང་།།
རྒྱུ་རྐྱེན་གང་ཡིན་འཚོལ་ལ་འབད་པར་བགྱི།།
རང་གིས་བྱས་པའི་ཉེར་ལེན་ལས་བྱུང་བའི།།
རྐྱེན་ངན་ཐོག་ཏུ་བབས་པ་བསམ་པར་རིགས།།
ཉེན་ཁའི་ཕྱོགས་སུ་ལྷུང་བའི་སྲིད་པའི་ཁམས།།
ཕན་ཚུན་ཁག་འགེལ་བྱེད་པ་བླུན་པོའི་ལུགས།།
དཀའ་བས་དཀའ་བ་དང་དུ་ལེན་ནོ་ཞེས།།
ནུས་པ་གཅིག་བསྡུས་མཛད་པ་ཁྱོད་ལས་སུ།།
སྔོ་ལྗང་རྩི་ཤིང་འདེབས་ལས་ལ་སྐུལ་བ།།
དྭངས་གསལ་གཙང་ཆབ་གྲོན་དུ་སྐུལ་བ་ཀུན།།
མདོར་ན་གཞན་དོན་ཡིན་གྱི་གཞན་གྱིས་མིན།།
སྣོད་ཀྱི་འཇིག་རྟེན་སྐྱོབ་མཛད་ཁྱོད་ལ་འདུད།།
སྣོད་བཅུད་ཟུང་ཡང་རྟེན་འབྲེལ་ཉིད་ལས་བྱུང་།།
བདེན་པའི་གཤིས་སུ་གྲུབ་པ་བསྙོན་དུ་དབེན།།
དེས་ན་ལེགས་ཚོགས་མ་ལུས་འབྱུང་བའི་གནས།།
བརྩེ་བས་རང་རྒྱུད་ཟིན་གལ་ཡང་ཡང་གསུངས།།
ཆོས་ལུགས་གང་ལའང་འབྲེལ་བ་མ་ངེས་པའི།།
ལྷན་སྐྱེས་སེམས་དོན་རིག་པའི་བཟང་སྤྱོད་འདི།།
བསླབ་པའི་ཚན་ཁག་ཅིག་ཏུ་རྒྱུན་ཆགས་ན།།
བྱམས་བརྩེའི་འཇིག་རྟེན་འབྱུང་བ་ཞལ་གྱིས་བཞེས།།
ཡུམ་ཆེན་ལས་བྱུང་བྱམས་བརྩེའི་ས་བོན་ཉིད།།
གཅེས་པར་འོས་པའི་ནོར་གྱི་མཆོག་ཡིན་ཞེས།།
འཛམ་གླིང་སྐྱེ་འགྲོའི་ཚོགས་ལ་གདམས་པ་ཡིས།།
རེ་བའི་འབྱུང་འགྱུར་གནངས་པ་བཀའ་དྲིན་ཆེ།།
ཆོས་དང་མ་འབྲེལ་ཁྲིམས་ལུགས་ཡོད་ཆོག་པ།།
ཆོས་ལུགས་མེད་པར་བཟོ་འདོད་གཏན་མ་ཡིན།།
སྨྲ་བ་སྣ་ཚོགས་བྱུང་བ་སྣ་ཚོགས་པ།།
ཀུན་ཁྱབ་སེམས་ཁུར་བསྔགས་པའི་ཡུལ་དུ་དྲངས།།
ཆོས་འདོད་རྣམས་ལ་ཆོས་ཀྱི་ཆེ་བ་འཆད།།
ཆོས་མིན་རྣམས་ལའང་བཟང་བོ་སྤྱོད་པ་བསླབས།།
ཀུན་གྱི་རྩ་བ་བྱམས་བརྩེའི་འཇིག་རྟེན་ལ།།
རེ་བའི་ཉམས་ལེན་ནམ་མཁའི་མཐའ་རུ་ཁྱབ།།
“གང་ལ་གང་འདོད་དེ་ལ་དེར་སྟོན་པ།།”
འདོད་རྒུ་འབྱུང་གནས་བདག་གི་ལྷ་ཆེན་པོ།།
བྱ་དཀའི་མཛད་འཕྲིན་མིག་གིས་མཐོང་བཞིན་དུ།།
ད་དུང་ངོ་མཚར་མ་བྱུང་བདུད་ཀྱིས་བསླུས།།
དོན་མིན་དོན་དུ་འཁྲུལ་བ་འགའ་ཞིག་གིས།།
མཁས་པའི་ཚོགས་ལ་ནམ་ཡང་ཀྱལ་ཀ་སློང་།།
འདི་འདྲའི་བྱས་པ་ཕྲན་ཚེགས་ལ་བརྟེན་ནས།།
དགེ་བའི་ལམ་སྣ་ཟིན་པར་བྱིན་གྱིས་རློབས།།
གཟིགས་དང་ཉམ་ཐག་འགྲོ་བ་ང་ཅག་ལ།།
སྐྱབས་དང་རེ་ས་ཁྱོད་ལས་གཞན་མེད་ན།།
ཁྱེད་སྐུ་སྐད་ཅིག་ཙམ་ལའང་དྲན་པ་ཡིས།།
བདེ་དགའ་དཔག་མེད་སྦྱིན་ལ་གསོལ་བ་འདེབས།།
ཉེ་བའི་ཆར་༸གོང་ས་མཆོག་གིས་ཁོར་ཡུག་སྲུང་སྐྱོབ་དང་འབྲེལ་བའི་བཀའ་སློབ་ཁག་ཅིག་འཛམ་གླིང་ན་སྙན་གྲགས་ཆེ་བའི་ཧར་ཝིར་ཊི་གཙུག་ལག་སློབ་གྲྭའི་དཔལ་འབྱོར་རིག་པའི་སློབ་དཔོན་ཆེན་མོ་དང་སློབ་ཕྲུག་ཚོགས་ལ་བཀའ་སློབ་གནང་བ་ཁག་ཅིག་ལ་མཇལ་རྗེས། སློབ་མའི་གྲལ་ཙམ་དུ་གཏོགས་པ་དུར་བྱང་ཞེས་འབོད་པས་ཨོ་གླིང་གི་མཚོ་འགྲམ་ནས་བརྗེད་ཐོའི་ཚུལ་དུ་བྲིས་པ་དགེའོ།། 2021/2/1 ཉིན།
བསྟོད་དོ་དུར་བྱང་ཆེད་རྩོམ་འདི་ལ་བསྟོད།
མགོན་པོ་མཆོག་གིས་གོ་ལ་སྤྱི་ཡོངས་ལ།
བྱམས་དང་བརྩེ་བ་ཅན་གྱི་གདམས་ངག་འདི།
འགྲོ་བ་སེམས་ཅན་ཀུན་གྱི་བདེ་རྩར་ཕན།
གོ་ལར་བདག་གཅེས་གནང་རྒྱུ་བརྗེད་མི་རུང།
སྤྱི་ནོར་༧ གོང་ས་མཆོག་གི་གདམས་པ་རྣམས་འཛམ་གླིང་སྐྱེ་འགྲོ་ཀུན་གྱི་འདི་ཕྱིའི་འདོད་དོན་ཆེད་གནང་བ་དང་། བཀའ་སློབ་གནང་སའི་གནས་ཡུལ་དང་གནང་སའི་ཞིང་སུ་ཡིན་ལ་ཁྱད་མེད་པས་ཚང་མར་འབྲེལ་ཆགས་ཡོད་ན་ཉམས་སུ་ལེན་ཆོག་པ་དང་ལེན་དགོས་གལ་ཡིན། ལྷག་པར་དུ་ཤ་རྩ་གདོང་དམར་གྱི་བརྒྱུད་པ་རང་རེ་བོད་མི་རྣམས་ནས་ངེས་པར་དུ་བཀའ་བཞིན་བསྒྲུབས་པ་མཆོད་པའི་རབ་གཉེས་པའི་རྟེན་འབུལ་ཞིག་ཞུ་དགོས་གལ་ཡང་། སོ་སོའི་དགོས་དབང་ལས་དེ་ལྟར་མ་ཞུ་མཁན་མི་ཉུང་བ་ཡོད་འདུག དཔེ་ན་། ༧ གོང་ས་མཆོག་གི་བུད་མེད་ཀྱི་དཔལ་ཡོན་ལ་ཆེ་བསྟོད་རྟག་ཏུ་གནང་བ་མ་ཟད་ལྷག་དོན་འཛམ་གླིང་དབུ་ཁྲིད་ནང་བུད་མེད་མང་དག་ཅིག་ཕེབས་ཐུབ་ན་འཛམ་གླིང་བདེ་སྐྱིད་དང་བྱམས་བརྩེ་ལྡན་པའི་གནས་ཞིག་ཀྱང་བསྐྲུན་ཐུབ་པའི་ཐུགས་རེ་ཆེན་པོ་གནང་གི་ཡོད་ཀྱང་། ཁོང་གིས་བཀྲིན་ལས་ཚེ་འདིའི་ལྟོ་གོས་གནས་གསུམ་དང་ཕྱི་མའི་ལམ་སྣ་འདྲེན་པའི་ཞལ་དུ་དཀའ་བའི་བཀྲིན་གྱི་འཚོ་བའི་གང་ཟག་ཞིག་ཡིན་ནའང་ ༢༠༢༡ སྲིད་སྐྱོང་གི་འོས་མི་ནང་འོས་མི་གཞན་ལས་ཁྱད་དུ་འཕགས་པ་མེད་ནའང་གཞན་ལས་དམན་པ་ཅི་ནས་ཀྱང་མེད་པའི་བུད་མེད་ཀྱི་འོས་མི་ལ་མང་པོས་འོས་འདེམས་ཞུས་མེད་པ་མཐོང་ཆོས་དེ་རེད། དེ་ལས་ལྡོག་ཏེ་མང་པོ་ཞིག་ནས་ ༧ ཁོང་ཐུགས་འགལ་གྱི་གནས་ཡུལ་སྤེན་པ་ཚེ་རིང་སྲིད་སྐྱོང་འོས་མིར་འོས་ཞུས་ཡོད། ཤེས་བཞིན་དུ་ཁྱད་གསོད་ཞུས་མ་རེད་དམ། ཆོས་བྱེད་པ་ཡིནནའང་རེད། འཛིག་རྟེན་པ་ཡིན་ནའང་རེད་བཀྲིན་བསམ་ཤེས་མ་ཐུབ་མཁན་རེད་སྙམས།།
ཕྱོགས་ཚོགས་ཚོང་དོན་ལ་སངས་རྒྱས་ཕམ་པར་བྱེད་པོ།
རང་དོན་སྙན་གྲགས་ལ་སངས་རྒྱས་ལག་ཆ་བྱེད་པོ།
འཇིག་རྟེན་མགོ་སྐོར་ལ་སངས་རྒྱས་གདན་ཞུ་བྱེད་པོ།
འདིའི་མགོ་མཇུག་གི་གཏེ་བོ་གཏེ་མོ་ཚང་མར་སངས་རྒྱས་མ་མཏོགས་གུས་ཞུ་མེད།
སངས་རྒྱས་སླུ་པའི་ཚོགས་ལ་ནམ་ཡང་མགོ་མ་མཁོར། སྟོད་མ་འཐེན།
ཚེ་བརྟན་འགྱུར་མེད་ལ་ཞུ་དོན། ཁྱེད་རང་གི་ལྟ་ཚུལ་དང་ངའི་རྩོམ་ཡིག་གཉིས་ཀ་འབྲེལ་བ་ཅི་ཡང་མི་འདུག སྐབས་འདི་འདྲ་ལ་ད་གཟོད་རང་སེམས་ཞི་བར་གནས་པ་གལ་ཆེའོ།།