མི་ཉག་སྐལ་བཟང་།
རྟ་མདོ་བ་སྐྱེས་ས་རང་ཡུལ་རེད།།
འགྲོ་གོམ་པ་བརྒྱབ་ས་མི་ཡུལ་རེད།།
མཛེས་མེ་ཏོག་ཁྲོད་ཀྱི་ཐང་ཆེན་དེར།།
ཟོག་རྫི་བོ་འགྲོ་སའི་ལམ་ཁ་མེད།།
རྗེ་བླ་མ་འཁྲུངས་ས་རང་ཡུལ་རེད།།
སྐུ་མཛད་འཕྲིན་རྒྱས་ས་མི་ཡུལ་རེད།།
ནོར་རིན་ཆེན་མང་བའི་ཕོ་བྲང་དེར།།
བྱ་བྱིའུ་གྲགས་སའི་ཁོར་ཡུག་མེད། །
ང་བུ་ཆུང་སྐྱེས་ས་རང་ཡུལ་ཡིན།།
སྡུག་དཀའ་ལས་མྱོང་ས་མི་ཡུལ་ཡིན།།
རོགས་ཆུང་འདྲིས་འཕྲད་སའི་རང་ཡུལ་དེར།།
ཁྱིམ་བཟའ་ཚང་སྐྱོང་བའི་ལས་དབང་མེད།།
རིགས་སྤུན་ཟླ་འཛོམས་ས་རང་ཡུལ་རེད།།
སྡུག་སྨྲེ་སྔགས་འདོན་ས་མི་ཡུལ་རེད།།
སྡོད་རང་དབང་མེད་པའི་རང་ཡུལ་དེར།།
ཁྲིམས་དྲག་པོའི་འོག་ནས་བདེ་སྐྱིད་མེད།།
གངས་དཀར་པོ་འབབ་ས་རང་ཡུལ་རེད།།
གངས་སེང་གེ་འགྱིང་ས་མི་ཡུལ་རེད།།
སེང་དཀར་མོ་མེད་པའི་གངས་རི་དེར།།
རྒོད་ཐང་དཀར་འཕུར་སའི་བྱ་ལམ་མེད།།
དུང་ཟླ་བ་ནུབ་ས་རང་ཡུལ་རེད།།
དགུང་ཉི་མ་བརྒལ་ས་མི་ཡུལ་རེད།།
མགོན་ཉི་ཟླ་མེད་པའི་རང་ཡུལ་དེར།།
རིགས་སྤུན་ཟླའི་མིག་ཆུར་རྫོགས་མཐར་མེད།།
སྙན་པོ་བྱུང་སོང་། མིད་པར་མིད་ཡོད།
འདྲ་པོ་འདྲ་པོ་རེད་བསམ་བསམ་ཞིག་བྲིས་འདུག
ང་ཡི་འཇིག་རྟེན་བཞི་པོར།
ང་སྐྱེ་ས་བོད་ཡུལ་འབ་ཆེན་རེད། །
ངས་ཀློག་ས་རྒྱ་གར་དེ་ར་དུན། །
ངས་སྦྱང་ས་བཞུགས་གར་དྷ་ས་རེད། །
ངང་སླེབས་ས་ཡུ་རོབ་ཧང་གྷ་རི། །
ཁྱོད་ཀྱང་ཨ་སླེབས་ལྟོས་དང་།