ཕྱི་ལོ་༢༠༡༢་ལོའི་ལོ་མགོར་བོད་མདོ་སྨད་མགོ་ལོག་དབལ་ཤུལ་གསེར་རྟའི་ས་ཁུལ་ནས་རྒྱ་ཆེའི་རོང་འབྲོག་མང་ཚོགས་ཀྱིས་རྒྱ་དམར་སྲིད་གཞུང་གི་གདུག་རྩུབ་གཉའ་གནོན་དང་བཙན་དབང་ཐུབ་ཚོད་སོགས་ཀྱི་སྲིད་ཅུས་ལ་ཞི་བའི་ངོ་རྒོལ་གྱི་ལས་འགུལ་འདྲ་མིན་སྤེལ་བའི་སྐབས་ཞི་རྒོལ་ནང་སུ་ཞིག་ཞུགས་ཡོད་མེད་སོགས་རྒྱ་གཞུང་གིས་རྩད་གཅོད་ཀྱིས། གསེར་རྟ་རྫོང་ཉེན་རྟོག་ལས་ཁུངས་ཀྱིས་རྫོང་དེའི་ཁྱབ་ཁོངས་ས་གནས་སོ་སོའི་འདི་ལོ་ཞི་རྒོལ་ནང་ཞུགས་པའི་མི་ཁག་གཅིག་གི་མིང་སོགས་ཁྱབ་བསྒྲགས་བྱས་ཏེ། ཁོང་ཚོ་ཕྱི་ཟླ་༥་བའི་ཚེས་མགོ་ནས་གསེར་རྟ་རྫོང་ཉེན་རྟོག་ཁང་དུ་འབྱོར་དགོས་པ་དང་། དེ་ནས་ཉིན་༡༠་ལ་ཁོང་ཚོར་ཞི་བའི་སློབ་གསོ་རྒྱག་གི་ཡིན། རྣམ་འགྱུར་སོགས་ལེགས་པོ་བསྟན་ན་འཛིང་རྡུང་རིགས་གང་ཡང་མེད། གལ་ཏེ་དུས་ཐོག་ཉེས་ཅན་པ་སུ་ཞིག་མ་ཡོང་ན། རྗེས་ནས་དེ་རིགས་གང་དུ་ཟིན་ཡང་བཙོན་བཅུག་བྱ་རྒྱུ་དང་། གང་དུ་སྟབས་འགྲིག་ན་དམར་གསོད་གཏང་ངེས་ཡིན་ཞེས་འཇིགས་སྐུལ་བྱས་པར་བརྟེན། གོང་ཚེས་ཉིན་གསེར་རྟ་ཡོངས་ཀྱི་ཁྱབ་ཁོངས་ཀྱི་མི་༥༠་༦༠་ཙམ་ཡོང་ཡོད་པ་དང་། རྒྱ་དམར་གྱིས་གོ་སྒྲིག་བྱས་པའི་ཁང་སྟོང་རེའི་ནང་ལ་བོད་མི་རྣམས་རུ་ཁག་སོ་སོར་བགོས་ཏེ། དེ་སྔོན་གསེར་རྟ་ས་ཁུལ་གྱི་མང་ཚོགས་ཡར་ལངས་སྐབས་བརྙན་འཕྲིན་དང་། པར་དུ་སུ་ཞིག་གིས་གང་ནས་བརྒྱབས་ཀྱང་མ་ཤེས་པའི་པར་དང་། བརྙན་འཕྲིན་སོགས་མི་རེ་རེ་བཞིན་དོ་བདག་སོ་སོར་བསྟན་ཏེ། འདི་ཁྱོད་མ་རེད་དམ། ཁྱོད་རྒྱལ་ཁབ་ཀྱི་ཐོག་ལ་འདི་འདྲའི་ངར་ལངས་དགོས་པ་གང་ཡིན་ཟེར་བ་སོགས་ཚིག་རྩུབ་འདྲི་གཅོད་སྣ་ཚོགས་དང་བཅས་ཉིན་གྲངས་༢༠་ཙམ་རེའི་རིང་རྡུང་རྡེག་མནར་གཅོད་ཚད་མེད་བཏང་བར་མ་ཟད། བཟའ་བཏུང་གང་ཡང་མ་སྤྲད་པར་བཀྲེས་སྐོམ་ཚད་མེད་མྱོང་བཅུག་རྗེས་མི་རེར་རྒྱ་སྒོར་༣༥༠༠་རེའི་ཉེས་ཆད་བཅད་རྗེས་ད་ལྟ་རིམ་གྱིས་གློད་བཞིན་ཡོད་འདུག
དཔེར་ན། གོང་གསལ་རྡུང་རྡེག་ཚ་ནན་དང་། ཉེས་ཆད་བཏང་རྗེས་གློད་བཀྲོལ་ཐོབ་པའི་གྲས་སུ་གསེར་རྟ་རྫོང་སྙི་སྟོད་ཤིང་གི་བླ་རྒྱ་ཚོ་བའི་ལོ་༣༠་ནང་ལ་སླེབས་པའི་སྨན་སྐྱབས་ཡོད་པ་དང་། སྨན་སྐྱབས་ནི་ཕྱི་ལོ་༢༠༠༨་ལོའི་ས་བྱི་ཞི་རྒོལ་ཆེན་མོའི་སྐབས་ཀྱང་རྒྱ་གཞུང་གིས་འཛིན་བཟུང་བཙོན་བཅུག་གིས་ལོ་ཤས་སུ་ཁྲིམས་ཆད་དང་། རྒྱ་སྒོར་འབུམ་ཁ་ཤས་ཀྱི་ཉེས་ཆད་བཅད་ཡོད་པ་དང་། སླར་ཡང་འདི་ལོ་ཁོང་རྒྱ་གཞུང་གིས་དོ་དམ་བཀག་ཉར་ཐེངས་གཉིས་པ་དེ་ཆགས་ཡོད། གཞན་ཁེས་སྐོར་ཡུལ་ཚོའི་མགོ་མཆོག་སྡེ་བའི་དགེ་འདུན། ལོ་༢༠་ནང་། ཁེེས་སྐོར་ཡུལ་ཚོའི་རྟ་ཤུལ་སྡེ་བའི་བུ་མོ་ཚེ་དབང་སྐྱིད། ལོ་༡༩། ཁེས་སྐོར་ཡུལ་ཚོའི་ཚེ་ཤུལ་སྡེ་བའི་འབྲུག་ལོ། ལོ་༢༠་ནང་། ཚེ་ཤུལ་སྡེ་བའི་ཆོས་དགའ། ཚེ་ཤུལ་སྡེ་བའི་ལོ་༢༠་ཅན་གྱི་བུ་མོ་འབོ་རིས་བཅས་རེད།
འོན་ཀྱང་གོང་ཚེས་ཉིན་རྒྱ་གཞུང་གིས་སྐད་གཏང་སར་འགྲོ་མི་ཕོད་མཁན་ཡང་གང་མང་ཞིག་ཡོད་འདུག་པ་དང་། ཁོང་ཚོ་འགྲོ་མི་ཕོད་དོན་ནི་རྒྱ་གཞུང་གིས་རྟག་ཏུ་མང་ཚོགས་མགོ་སྐོར་གཏོང་བཞིན་པར་བརྟེན། ཐེངས་འདིར་ཡང་ཞི་བའི་སློབ་གསོ་གཏང་གི་ཡིན་ཟེར་བ་ཁ་ཙམ་ལས། དོན་ལ་རྡུང་རྡེག་ཚ་ནན་དང་། ཁྲིམས་ཆད་འདྲ་མིན་གཅད་པར་དོགས་པས་ཡིན་པ་རེད།
དེར་བརྟེན་གསེར་རྟ་རྫོང་ཉེན་རྟོག་པ་སོགས་རྒྱ་གཞུང་འབྲེལ་ཡོད་ཀྱིས་ཐེངས་འདིར་ཁོང་ཚོས་སྐད་གཏང་སར་མི་ཡོང་མཁན་ཚོ་ལོག་སྤྱོད་པ་དང་། ཁ་བྲལ་བ་ཡིན་པ་དང་། དེ་ཚོ་རྩ་མེད་གཏང་དགོས་ཡོད་ཅེས་ཚ་ཚ་འུར་འུར་བྱེད་བཞིན་པར་བརྟེན། གོང་གསལ་རྒྱ་གཞུང་གིས་སྐད་གཏང་སར་དུས་ཐོག་མི་འགྲོ་མཁན་རྣམས་ཀྱང་དེང་སྐབས་རི་སྒང་སོགས་གང་སར་བྲོས་བྱོལ་ལ་འགྲོ་བཞིན་ཡོད་པ་རེད། །གནས་ཚུལ་མཁོ་སྤྲོད་པ་བོད་མི་མང་སྤྱི་འཐུས་ཟུར་བ་གསེར་རྟ་ཚུལ་ཁྲིམས་འོད་ཟེར་གྱིས་གུས་ཕུལ། །