ཨ་དམར་པོ།
མང་བ་རྒྱལ་ཞིང་ཉུང་པ་ཕམ་པའི་དུས་རབས་དང་། མང་བར་མོས་ཤིང་ཉུང་བར་ལོག་པའི་འདུ་ཤེས་གྱིས་འཇིག་རྟེན་དུ་སྡོམ་ཚིག་སྲ་མོ་ཞིག་བཀོད་ཡོད་པ་ནི་མང་ཉུང་གི་རྩིས་གཞི་ལ་མཆོག་དམན་དང་། རྒྱལ་ཕམ། གྲལ་རིམ་དབྱེ་འབྱེད་ཀྱི་ནུས་སྟོབས་ཡོད་པ་དེའོ།།
འུ་ཚང་གི་གསར་བརྗེ་བློ་འབྱེད་པ་ཐོག་མ་དགེ་ཆོས་ཀྱིས་བཅུ་ཡི་བདེན་པ་བརྒྱ་ཡིས་བསུབ་ཏེ་མང་གྲངས་ལ་རྒྱལ་ཁ་ཐོབ་པ་དང་། ཉུང་གྲངས་ཕམ་པའི་བསམ་བློའི་འདུ་ཤེས་དེ་རྨོངས་བློར་ཤེས་ཏེ་ཐ་སྙད་ཚད་གྲུབ་འཇོག་ལ་བློ་བདེ་མྱོང་མེད། ཡིན་ནའང་། ལོ་ངོ་སྟོང་ཕྲག་ཁྲི་ཕྲག་ཏུ་མཁྲེགས་གཟུགས་སུ་ཆགསཤིང་། སྲ་བརྟན་གྱི་རི་བོ་མི་གཅིག་གི་ཤེད་སྟོབས་ཀྱིས་བསྙེལ་མ་ཐུབ་པར་ད་ལྟའང་མང་གྲངས་ལ་ཡིད་ཆེས་དང་རེ་བ་བྱས་ཏེ། ཉུང་གྲངས་ལ་བློ་ཕམ་ཡིད་ཆད་ཀྱི་མཇུག་འབྲས་སྨིན་གྱི་ཡོད། དེའི་ཕྱིར་ཉུང་གྲངས་མང་གྲངས་སུ་བསྒྱུར་རྒྱུ་ནི་རླབས་ཆེན་གྱི་བྱ་བཞག་ཏུ་འཁུམས། གནས་སྟངས་དེའི་རྐྱེན་པས་གྲངས་ཉུང་མི་རིགས་ཞེས་ཐ་སྙད་འདིས་ཉམས་ཆུང་ནུས་ཞན་གྱི་རང་གཤིས་མཚོན་ཀྱིན་ཡོད། མང་གྲངས་རྒྱལ་ཞིང་ཉུང་གྲངས་ཕམ་པའི་དབང་གིས་མདོ་དབུས་མཐོ་སྒང་གི་སྲིད་གཞུང་གི་ཐོབ་ཐང་། མི་རིགས་ཀྱི་རང་དབང་ལྔ་བརྒྱད་ལོར་ཤོར་སོང་བ་རེད། འདི་ནི་ཉུང་གྲངས་གི་ལས་དབང་དུ་བསྒོམ་ན་འོས་ཤིང་འཚམ།
དེ་ལྟར་ལོ་རྒྱུས་ཀྱི་ཉུང་གྲངས་ལ་ད་དུང་འཐེན་རྟགས་བཀོད་ན་མཐའ་མར་ཅི་ཙམ་ལྷག་འོང་སྙམ་པའི་རྩིས་འབྲས་ལ་བློ་ཁ་མི་ཕྱོགས་རང་ཕྱོགས་རེད། མཚམས་མཚམས་ལ་ཅི་ཡང་མེད་པའམ་སྟོང་པ་མཚོན་པའི་གོར་ཐིག་རེ་མིག་ལམ་དུ་གསལ་ལེར་ཤར་ཚེ་འཇིགས་སྐྲག་ཆེན་པོས་བ་སྤུ་བསྐུལ་ཏེ། རང་ཉིད་སྟོང་གི་ཡོད་པ་རང་འཕྲོད་འོང། དེ་དུས་སྡོམ་གྱི་ཚུལ་དུ་ལེགས་ཉེས་དང་དགེ་སྐྱོན་གསལ་བོ་རྟོགས་ཡོད་ཀྱང་འཆི་ལྟས་མཐོང་ནས་ཤི་བར་འཇིགས་པ་ལྟ་བུ་ལས་གཞན་ཅི། ལྷ་རྗེ་མེད་པའི་ནད་པ་ཞིག་དང་འདྲ། སྐྱོབ་ཐབས་རྩ་ནས་དབེན་པའི་འཕྲང་ལ་བཅར་ཡོད། དེ་དག་ནི་ད་ལྟའི་གནས་ཚུལ་ཀྱི་ཤུགས་བསྟན་རེད། ཤུགས་བསྟན་དེའི་འཇིགས་དངངས་འོག་ནས་མ་འོངས་པའི་གོད་ཆག་ཟློག་པའི་སྟ་གོན་ལ་བྲེལ་བ་ནི་མིའི་ཆོས་ཉིད་དུ་འཁུམས་པས། འུ་ཚང་གི་མི་འབོར་ཉུང་ནས་ཉུང་དུ་ཕྱིན་པར་བློ་ཚབས་ཆེན་པོས་བསམ་གཞིག་གྲོས་འགོ་འདོན་བཞིན་ཡོད་དེ། བོད་གཞུང་དམངས་འདུ་འཛོམས་ཆེན་མོ་བྷེ་གོབ་ཏུ་ཚོགས་པའི་གྲལ་དབུས་སུ་སམ་གདོང་བླ་མས་མི་འབོར་ཐད་ནས་བཀའ་སློབ་གསུང་བཤད་གནང་སོང་། དེ་ནི་བསམ་གཞིག་གི་འཇིགས་སྣང་ཡིད་མོད། ཉིན་ཞིག་ད་ལྟ་བའི་གོད་ཆག་གཅིག་ཡིན་ངེས། རྒྱུ་མཚན་དེའི་ཕྱིར་འུ་ཚང་གིས་རང་ཉིད་ཀྱི་ཉུང་གྲངས་མི་འབོར་ལ་འཐེན་རྟགས་མུ་ནས་མུ་མཐུད་དེ་འགོད་པར་བསམ་གཞིག་མི་བྱེད་ག་མེད་རེད།
འདི་ལྟར་གཞིགས་ན། འུ་ཚང་གི་གྲངས་ཉུང་མི་འབོར་ལ་འཐེན་རྟགས་འགོད་སྟངས་རིགས་མི་འདྲ་བ་བཞི་ཡོད་དེ།
གཅིག དེང་རབས་རྫས་སྦྱོར་ནུས་པར་བསྟེན་ནས་རིགས་རྒྱུད་གཏན་འགོག་བྱེད་པ་དང།
གཉིས་པ། ཀོ་ཀོ་གཡག་གི་བུ་རབས་ཚ་རྒྱུད་གཞན་རིགས་སུ་བསྟིམས་པ།
གསུམ་པ། མི་རབས་རེ་གཉིས་ཀྱིས་རྗེས་སུ་རིགས་ཀྱི་ཁྱད་ཆོས་མེད་པར་གྱུར་བའི་མི་རབས་བྱུང་བ།
བཞི་བ། ཨ་མ་ལག་དམར་དུ་སྤྲུལ་ནས་མངལ་གྱི་བུ་ཕྲུག་གསོད་པའི་སྦྱོར་བ་བཤམས་པ་བཅས་སོ།།
འཐེན་རྟགས་རྒྱག་པ་དེ་དག་ནི་རང་ཉིད་ཀྱི་འཚོ་བའི་དགོས་མཁོ་དང་། དེང་དུས་ཀྱི་མི་ཚུལ་རིག་པའི་ཆོས་ཉིད་ཡིན་ལ། འཛམ་གླིང་མི་དམངས་སྤྱི་མཐུན་གྱི་གནས་བབ་ལས་མ་འདས། འུ་ཚང་གི་ཁེར་རྐྱང་གི་བྱེད་སྟངས་གཏན་ནས་མིན། ཡིན་ནའང་། ཆ་མི་སྙོམས་པའི་འཇིག་རྟེན་འདིར་ཐམས་ཅད་འདྲ་མཉམ་མིན་པས་ཕན་གནོད་ཀྱི་ནུས་པ་ཐ་དད་དུ་འགྱུར་སྲིད། འུ་ཚང་ལ་རིགས་ཀྱི་གྲངས་འབོར་ལོ་རྒྱུས་ཀྱི་ས་ན་ཉུང་བ་མ་ཟད། ད་ལྟའི་གནས་བབས་ལ་ཡང་ཉུང་གྲངས་ལས་ཉུང་གྲངས་སུ་ལྷུང་ཡོད་པས་གཞན་རིགས་ཚོའི་བསམ་བློའི་ལྡོག་ཕྱོགས་སུ་ལྟ་དགོས། འཐེན་རྟགས་བརྒྱབ་པའི་མཇུག་འབྲས་ལ་དཔག་ཏེ་འཐེན་རྟགས་ནི་བསྣོན་རྟགས་སུ་བཅོས་བསྒྱུར་བྱེད་དགོས། གྲངས་ཉུང་གྲངས་མང་དུ་འཕར་ལྡིང་བྱེད་དགོས།
དུས་རབས་བཅུ་གསུམ་པའི་སྐབས་ཙམ་ལ་སོག་པོས་བོད་ཀྱི་མི་འབོར་ཞིབ་གཤེར་སྐབས་ས་ཡ་དྲུག་ལོན་པའི་དབང་གིས་དེང་སང་བོད་མི་ས་ཡ་དྲུག་ཅེས་ཁ་བྱང་ལག་བྱང་དུ་སོང་ཡོད་ནའང། རྒྱ་གཞུང་གིས་བོད་མི་ས་ཡ་ལྔ་དང་ལྷག་ཙམ་ཡོད་པ་གསལ་བསྒྲགས་བྱས་ཡོད་པས་ལོ་ངོ་འདི་དག་གི་རིང་ཡར་རྒྱས་ལས་ཉམས་རྒུད་དུ་གྱུར་བ་གསལ་བོར་ཆགས་ཡོད། ལྷག་པར་དུ་རྒྱ་གཞུང་གིས་འཆར་ལྡན་བུ་སྐྱེས་ཀྱི་ལས་གཞི་ལག་བསྟར་བགྱིས་པས་ཉུང་ནས་ཉུང་དུ་བཏང་བ་སྨྲ་མི་དགོས། དེ་ནི་གཞན་དབང་དུ་གྱུར་བའི་འཇུག་འབྲས་ཡིན་ལ། དེང་དུས་གྱི་འཚོ་བའི་བྱས་ཉེས་ཤིག་ཀྱང་རེད་སྙམ། གྲངས་མང་མི་རིགས་སྲིད་ཇུས་ནི་གྲངས་ཉུང་མི་རིགས་སྟེང་ལ་ལག་བསྟར་གནང་བས་འུ་ཚང་གི་མི་འབོར་གྱོང་གུད་ཐེབས་པར་སེམས་ཆོག དེའི་ཕྱིར་གྱོང་གུས་ཁ་བསབ་ནི་ལྡོག་ཏུ་མེད་པའི་འུ་ཚང་གི་འགན་འཁྲི་རེད། བཙན་བྱོལ་དུ་བུ་མང་སྐྱེས་པའི་ཁྱིམ་བདག་ཨ་ཕ་དང་ཨ་མར་གཞུང་ངོས་ནས་གཟེངས་བསྟོད་ལེགས་སྐྱེས་འབུལ་བའི་ཕྱག་སྲོལ་ཡོད་པའང་། བོད་ཀྱི་ཨ་མ་རྣམས་ལ་བུ་མང་སྐྱེས་ན་ཕན་རླབས་ཆེ་བའི་སློབ་གསོ་དང་བསླབ་བྱ་གནང་བ་ལོས་ཡིན།
ཡིན་ནའང་། རིགས་ཀྱི་རྩ་དོན་ལ་རྒྱང་མིག་མེད་མཁན་གཅིག་ཡིན་ན་རང་ཉིད་ཀྱི་འཚོ་བ་ཁོ་ནའི་མགོ་རྔར་གཟིགས་ཏེ། སྟབས་བདེ། སླ་ཆོས་ལ་ཞེན་ནས་བུ་ཉུང་ལས་བུ་མང་སྐྱེས་པར་དང་དོད་ཆུང་བ་མ་ཟད། ཕྲུག་གུ་གཅིག་རེ་སྐྱེས་ནས་འདོད་འདུན་ཡོངས་སུ་འགྲུབ་བར་ཐག་བཅད་དང་གཅོད་ཀྱི་ཡོད། རྒྱ་གཞུང་སྲིད་ཇུས་དང་། བོད་གཞུང་གི་ཕྱག་སྲོལ་གཉིས་ཚ་གྲང་ལྟ་བུའི་འགལ་ཟླར་ལངས་བས་ཀྱང་གལ་ཆེན་གནད་དོན་ཅི་ཞིག་གསལ་བཤད་བགྱིས་ཡོད་དམ། འུ་ཚང་གི་གྲངས་ཉུང་གྲངས་མང་དུ་བཅོས་བསྒྱུར་བྱེད་རྒྱུ་བོད་ཀྱི་དགོས་མཁོ་དང་། རྒྱ་ནག་ལ་འགལ་རྐྱེན་འབའ་ཞིག་གོ འདི་འདྲའི་འགལ་ཟླར་གྱུར་བ་ནི་མི་རིགས་སོ་སོ་རྩ་བའི་ལངས་ཕྱོགས་འགལ་ཟླར་གྱུར་བས་ཡིན། འདིས་ང་ཚོར་གསལ་ཁ་འདོན་ཀྱིན་པ་ནི་གྲངས་ཉུང་དུ་ཟག་པ་བོད་ཀྱི་ཉམས་རྒུད་དང་། གྲངས་མང་དུ་འགྱུར་བ་འཕེལ་རྒྱས་ཡིན་པ་དེ་མཚོན།
དེས་ན་གྲངས་ཉུང་ལ་འཐེན་རྟགས་རྒྱག་སྟངས་ག་གེ་མོ་དེ་དག་བཀག་འགོག་དང་། གཏོར་ཞིག་བཏང་སྟེ། བསྣོན་རྟགས་ཀྱི་བྱེད་ཐབས་བསྐྱེད་དེ་གྲངས་མང་དུ་བཅོས་བསྒྱུར་བྱེད་རྒྱུ་ནི་བོད་ཀྱི་ཕ་མ་དག་གི་སྤྱི་དོན་གྱི་འགན་འཁྲིའོ།། བྱོལ་དང་གཡོལ་མི་ཆོག་པའི་རིགས་ཞེན་གྱི་ཁྱད་ཆོས་ཡིན། རིགས་ཀྱི་རུས་སྒྲོམ་འཐོར་བའི་རིགས་འཚོང་བ་དང་། བར་དོ་བ་ཞིག་ཡིན་པ་མ་གཏོགས་རིགས་ཀྱི་སྤྱི་དོན་ལ་དད་པའི་རུས་ཚིགས་ཅན་ཡོངས་ཀྱི་ལས་འགན་ནོ།། ཅིས་ཀྱང་འཐུས་ཤོར་དང་། བྱས་ཉེས་ཀྱིས་མཐའ་རིག་མི་ཉན། དེ་ནི་མི་ཆོས་ལས་འདས་པའི་དུས་འགྲོའི་ཁྱད་ཆོས་དང་གཉིས་སུ་མེད་དོ།།
དེང་སྐབས་ཕྱོགས་མང་པོ་ཞིག་ཇེ་ཉུང་ཇེ་ཉུང་དུ་འགྲོ་བ་འདི་ནི་ཟློག་ཏུ་མེད་པའི་ཉེན་ཁ་ཞིག་རེད།
བོད་མི་ས་ཡ་དྲུག་དེ་ས་ཡ་གསུམ་དུ་འགྱུར།
ས་ཡ་གསུམ་དུ་འབུམ་གསུམ་དུ་འགྱུར།
འབུམ་གསུམ་དེ་་་་་་་་་་་
གཟིགས་དང་། དཔྱོད་དང་། སོམས་དང་།
བཅོས།
ས་ཡ་གསུམ་དེ་འབུམ་གསུམ་དུ་འགྱུར།
རྩོམ་འདི་འདྲ་ན་བྲོ་བ་འདུག