འདས་མཆོད་རིན་ཆེན་སྒྲོན་མེ།

ན་མོ་གུ་རུ་ཧེ་བཛྲ་ཡེ།།

༄༅། །ས་སྐྱ་༧གོང་མ་ཕུན་ཚོགས་ཕོ་བྲང་བདག་ཆེན་འཇིགས་བྲལ་ཕྱོགས་ལས་རྣམ་རྒྱལ་དཔལ་བཟང་པོ་མཆོག་ལ་འདས་མཆོད་རིན་ཆེན་སྒྲོན་མེ་ཞེས་བྱ་བ་བཞུགས་སོ།།

ཀ་དག་རྒྱལ་བའི་དགོངས་པ་དེ་ཉིད་གཟིགས། །
ཁ་སྦྱོར་ཡན་ལག་བདུན་ལ་དབང་འབྱོར་བའི། །
ག་བུར་སྨན་མཆོག་ཇི་བཞིན་དགེ་བའི་བཤེས། །
ང་རྒྱལ་རྣམ་དག་ས་སྐྱ་༧གོང་མ་རྒྱལ། །
ཅ་དག་གོས་དཀར་བསྟན་པའི་རྒྱལ་མཚན་འཛིན། །
ཆ་ཤས་ཡོན་ཏན་ཕུན་ཚོགས་བདག་ཉིད་ཆེ། །
ཇ་ཆང་འདོད་ཡོན་འཇིགས་བྲལ་རྒྱན་ཏུ་ཤར། །
ཉ་གང་ཕྱོགས་ལས་རྣམ་རྒྱལ་རྒྱལ་གྱུར་ཅིག །
ཏ་ཐྰ་ག་ཏའི་བསྟན་པ་རིན་ཆེན་ལ། །
ཐ་ཤལ་ཆོས་བརྒྱད་འཆིང་བས་མ་གོས་པའི། །
ད་ལྟའི་དུས་འདིར་སྔགས་འཆང་མཚན་ཉིད་པར། །
ན་མོ་རྨི་ལམ་དད་གུས་རྒྱན་ཏུ་རོལ། །
པ་ར་མི་ཏའི་ཕྱིན་དྲུག་སྤྱོད་པ་མཛད། །
ཕ་མའི་ཀྱེ་རྡོར་ཟུང་འཛུག་མངོན་གྱུར་པའི། །
བཛྲ་ཐེག་པའི་བརྒྱུད་འཛིན་རིན་པོ་ཆེ། །
མ་ལུས་འགྲོ་བའི་མགོན་དུ་རིང་འཚོ་ཤོག །
ཙ་རི་ཊྰ་སོགས་སྦས་ཡུལ་མཁའ་འགྲོ་གཙོ། །
ཚ་གྲང་འཁོར་བའི་སྡུག་བསྔལ་བསལ་བའི་གཉེན། །
ཛ་ཡའི་བསྟན་པའི་སྙིང་ནོར་འཛིན་པར། །
ཝ་ལེར་སྙིང་གི་རྒྱན་ཏུ་བཞུགས་སུ་གསོལ། །
ཞྭ་མདོག་ཁྱད་མེད་དད་པ་དག་སྣང་མཛད། །
ཟ་མ་མོ་ལ་བདག་མོའི་ཐོབ་ཐང་སྤྲད། །
འ་ཅག་བསྟན་སྲིད་འཛིན་པའི་དཔའ་བོ་ཆེ། །
ཡ་རབས་རྒྱུད་འཛིན་གོང་མ་རིན་ཆེན་རྒྱལ། །
ར་བ་གངས་རིས་བསྐོར་བའི་ཕ་ཁྱིམ་དུ། །
ལ་རྒྱའི་ཆོས་རིགས་སྤེལ་བའི་འདྲེན་པ་མཆོག །
ཤ་ཁྲག་རུས་པའི་གདུང་སྲས་སྐུ་འཁོར་བཅས། །
ས་སྟེང་སྐྱེ་རྒུའི་མགོན་དུ་མྱུར་བྱོན་ཤོག །
ཧ་ཅང་གསལ་བའི་རྨི་ལམ་སྣང་བ་དང་། །
ཨ་ལགས་ཆོས་མཆེད་འགའ་ཡིས་སྐུལ་བའི་ངོར། །
ཧ་ཤང་བླ་མའི་རྟུལ་ཞུགས་དགྱེས་རྡོར་གྱིས། །
ཨ་ཧོ་བདེན་ཚིག་སྨོན་ལམ་དེ་ལྟར་ཐལ། །
ཨི་ལྡན་དབྱངས་གསལ་མཛེས་པའི་འདས་མཆོད་དང་། །
ཨུ་རྒྱན་རིག་འཛིན་བརྒྱུད་པའི་བདེན་སྨོན་གྱིས། །
ཨེ་མ་ས་སྐྱ་ཕུན་ཚོགས་ཕོ་བྲང་ཉིད། །
ཨོ་ཌྰི་ཡ་ནའི་གསང་གསུམ་མངོན་གྱུར་ཤོག །

ཅེས་པ་འདི་ཡང་རབ་རྒྱན་མེ་སྤྲེལ་ནག་ཟླའི་དབང་ཕྱོགས་མཁའ་འགྲོ་འདུ་བའི་དུས་ཀྱི་ཐོ་རངས་ལ་རྨི་ལམ་ཞིག་རྨིས་པའི་རྐྱེན་ལས་སྣང་སྲིད་གླུ་དབྱངས་སུ་ལེན་པར་མཁས་པའི་མཁན་ཆེན་བླ་མ་འམ་རྨི་ལམ་དབང་ཕྱུག་གིས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་ནས་གསོལ་བ་འདེབས་པ་དགེའོ། །