ཆང་སྐྱེས།
ཁེར་རྐྱང་འཚོ་བའི་སེམས་པ་རླུང་གིས་འཁུར།།
དྲན་གདུང་ལྕི་མོའི་མིག་ཆུ་ལག་པས་ཕྱིས།།
ལོ་དང་ཟླ་བའི་ལོ་རྒྱུས་ཁ་བས་གཡོག།
ཁ་བ་མར་མར་ཀློང་ནས་ཁྱེད་རང་དྲན།།
འཁྲེང་ཞེན་སྙིང་གི་ཕྱི་མིག་རྒྱང་ལ་འཕངས།།
ཞེན་ཆགས་ཟབ་མོའི་དུངས་བ་ཁོག་ཏུ་སྦས།།
ཁྱོད་དང་ངེད་གཉིས་ལེ་བར་སྟོང་གིས་བཅད།།
རྨི་ལམ་ཞིང་ནས་ཁྱེད་ལ་འོ་ཞིག་བྱས།།
ལོ་མ་སེར་ཐིག་ལྷུང་སྟེ་ཙག་གིས་ཁྱེར།།
མཚོ་མོ་འཁྱག་གིས་བསྡམས་ཏེ་ཁྲུང་ཁྲུང་འཕུར།།
འཁོར་ཡུག་རི་བའི་མཛེས་སྡུག་རྨང་ནས་རྒུད།།
སུན་སྣང་ཕར་ལ་གཡུག་ཀྱང་འཁོར་ནས་ཡོང་།།
ཟླ་བ་ཁེར་འགྲོ་མཚན་མོའི་མཁའ་ན་འདུར།།
ཁྱི་ཚོགས་ཟུག་སྐད་ཕྱི་རོལ་ཁྲོམ་ན་ལྡིང་།།
ནམ་གུང་ཡོལ་ནས་སྐྱ་རེངས་ཤར་ལ་ཉེ།།
སྐྱོ་གདུང་རྦ་རླབས་བྲང་ཁོག་སྟོད་ལ་འཕྱུར།།
བརྩེ་འདང་ཡིད་ཀྱི་སྒོ་མོ་ཁྱེད་ལ་གཏད།།
ཁྱོད་ཀྱི་ཡོད་ཚད་བློ་ལ་འཁྱུགས་སེ་ཤར།།
ཁྱོད་ཞལ་འཛུམ་པའི་ཟུར་མིག་སྙིང་ལ་སྡུག།
ལྡེམ་ལྡེམ་ལུས་ཀྱི་འཁྱུག་འགྲོས་ཡིད་དུ་འོང་།།
བསམ་གཞིག་མགོ་བོ་ལག་པའི་ཁུགས་ལ་གླན།།
སེམས་ཀྱི་བུ་ཆུང་གློ་རྒྱག་རྐྱེན་གྱིས་བཀུམས།།
འཇིག་རྟེན་སྣང་བའི་བཟི་ཁ་སྒྱུ་མས་བསླུས།།
ཤུགས་རིང་གཅིག་གིས་མཚན་མོའི་ལྷིང་འཇགས་དཀྲོགས།།