འཕེལ་ཟད་འཁྲུགས་གསུམ་གྱིས་མནར་བའི་བོད་ཡིག

རྩེཿམུན་སེལ།

དང་པོ། རང་ངོས་ནས་སྐད་ཡིག་ལ་འཇོགས་པའི་འདུ་ཤེས་མཚོན་པ།

སྐད་དང་ཡི་གེ་ནི། རིག་གཞུང་གསོན་གནས་ཀྱི་གཞི་རྩ་དམ་པ་ཞིག་ཡིན་པ་མ་ཟད། རང་རེའི་མི་རིགས་ཀྱི་རྒྱུད་པ་གཞན་དུ་མི་འགྱུར་བར་བྱེད་པའི་མཐུན་རྐྱེན་ཞིག་ཀྱང་རེད། ཅེས་གནའ་དེང་གི་མཁས་པ་མང་པོ་ཞིག་གིས་བསྒྲགས་དང་སྒྲོག་གིན་ཡོད་པ་རེད་ལ་དོན་དུ་ཡང་དེ་ལྟར་ངེས།  རིན་ཐང་ཅན་གྱི་གསུང་དེ་དག་གིས་གཙོ་བ་ཅི་ཞིག་བསྟན་ཡོད་དམ། ཞེ་ན། དེས་ནི། མི་རབས་ཕྱི་མ་དང་ཕྱི་མའི་རིག་གཞུང་བཅས་ཀྱི་རྒྱུན་དེ་ཅི་ལྟ་བུ་ཞིག་ཏུ་འགྱུར་མིན་ནི། མི་རབས་སྔ་མ་ཚོའི་འཇོན་ཐང་ལ་རག་ལས་པར་བསྟན་ཡོད་པའང་གསལ་བཤད་བྱེད་མི་དགོས་པ་ཞིག་རེད། འོ་ན། སྐད་ཡིག་ཡུན་གནས་དང་ནུས་པ་ཇེ་མཐོར་འགྲོ་བར། ཐབས་གང་དང་ཅི་ཞིག ཡོད་དམ་སྙམ་ན། དེ་ནི། སྔར་བྱུང་ཐ་སྙད་ཀྱི་རིགས་རྒྱུན་འཛིན་དང་། སྦྲགས་མིའི་སྐད་ཡིག་ལ་མཆོག་ལྟའི་འདུ་ཤེས་འདོར་བ། ཐ་སྙད་གསར་བཟོའི་ལས་འགུལ་གྱི་རྣམ་གྲངས་ཇེ་མང་དུ་གཏོང་བ་སྟེ། གསུམ་ལས་ལྷག་པའི་ཐབས་ཤེས་གཞན་ཞིག་མེད་པར་གྲུབ་བོ།།

གཉིས་པ། བོད་རང་ཁུལ་གྱི་བོད་ཡིག་གི་གནས་སྟངས།

ང་བརྒྱད་སྐབས་ཀྱི་འཚུབ་མ་ནག་པོ་དེ་ཁད་ཀྱིས་ཡལ་བའི་མཐར། ཐོན་མའི་ཐུགས་ཀློང་ནས་བལྟམས་ཤིང་། དམ་པ་དུ་མའི་བདག་སྐྱོང་ལས་འཚར་བའི་རང་རེའི་བོད་ཡིག་ཀྱང་། ཤིན་ཏུ་ཉེ་བའི་འཆི་ལྟས་ཀྱིས་མནར་བའི་ནད་པ་ཚབས་ཅན་ཞིག་ཏུ་གྱུར་ཡོད་པའི་ཚེ། བོད་ཡུལ་མདོ་དབུས་ཁམས་གསུམ་གྱི་ཕུལ་བྱུང་དཔའ་བོ་ཁྱུ་ཞིག་གིས། གཏར་བསྲེག་ལུམས་སྦྱོང་ལྟ་བུའི་རིག་པའི་ཐབས་འཕྲུལ་མང་པོ་བསྟུད་མར་བཀོལ་པས། གེགས་རྐྱེན་དེ་དག་ལས་ཐར་ནས་མུ་མཐུད་དེ་གསོན་རྒྱུ་ཡིན་པའི་མདངས་ཤིག་ག་ལེར་ཐོན་བྱུང་། ཡིན་ནའང་། སྤྱི་ལོ་༡༩༨༦་ནས་སྤྱི་ལོ་༢༠༠༣་བར་ཏེ། ལོ་ངོ་བཅུ་བདུན་ཙམ་གྱི་རིང་ལ་སྐད་ཡིག་ཡར་རྒྱས་ཀྱི་ནུས་པ་མདུན་བསྐྱོད་དགོས་རབ་དང་། བརྡ་ཆད་ཁ་སྐོང་གི་ལས་འགུལ་ལ་དགེ་མཚན་ཆེ་ཚུལ་སོགས་ལག་ལེན་བྲལ་བའི་ལབ་བརྡོལ་ཁོ་ནའི་ངང་དེ་ལྟར་ལྷག་པ་རེད། དེའི་ཕྱིས་དང་ཕྱིས་ཤིག་ཏུ། མཁས་དབང་ཚུལ་ཁྲིམས་བློ་གྲོས་མཆོག་དབུར་བཞུགས་ཐོག བོད་རང་གི་ཡི་གེའི་རིག་གཞུང་དར་རྒྱས་གོང་འཕེལ་གཏོང་ཕྱོགས་ཀྱི་སྐོར་ལ་གྲོས་བསྡུར་བྱ་ཆེད།མཁས་པ་མང་པོ་གདན་ཞུས་ཀྱིས་ཚོགས་གྲོས་ཐེངས་འགར་བགྱིས་པ་དང་། ལྷག་དོན་སྤྱི་ལོ་༢༠༠༧་ཏེ་རབ་གནས་མེ་ཕག་ལོར་དམ་པ་ཁོང་གི་དགོངས་འཆར་བཞིན།ཁྲིན་ཏུའུ་གྲོང་ཁྱེར་དུ་བོད་ཡུལ་མདོ་དབུས་ཁམས་གསུམ་གྱི་མཁས་པ་བགྲེས་གཞོན་སྐོར་ཞིག་གིས་ནུས་ཤུགས་གཅིག་སྦྲེལ་མཛད་དེ། དཔེ་དེབ་༼གསར་བྱུང་རྒྱུན་བཀོལ་མིང་མཛོད༽ གསར་བསྐྲུན་དང་འགྲེམས་སྤེལ་བགྱིས་ཐོག ཐ་སྙད་དེ་དག་སྤྱི་ཚོགས་ཁྲོད་ཁྱབ་བརྡལ་དུ་འགྲོ་ཐབས་ཀྱི་ཐད་ནས་ཀྱང་རྣམ་གྲངས་ཅན་གྱི་ལམ་སྟོན་མང་པོ་ཞིག་བསྩལ་བས། དེ་ནས་བཟུང་ད་བར་ལོ་ངོ་བཅུ་ཙམ་ལས་ཕྱིན་མེད་ནའང་། བོད་ནང་ལ་མཚོན་ན། མི་མང་ཡོངས་ལ་སྦྲགས་མའི་སྐད་ཡིག་ལ་མཆོག་ཏུ་འཛིན་པའི་འདུ་ཤེས་གཏན་ནས་ལྷོད་ཅིང་།  རང་གི་སྐད་ཡིག་དང་འཚམས་པའི་ཐ་སྙད་ཀྱི་དབུལ་ཕོངས་ལས་ཐར་བར་མ་ཟད། བོད་ཡིག་རིག་གཞུང་རང་རྐང་ལ་ཡང་དེང་རབས་ཤེས་བྱའི་ཁྲོད་ལ་འཕུར་སྐྱོད་ནུས་པའི་གྲིམས་ཤ་ཞིག་མངོན་ཡོད་དོ།།

གསུམ་པ། བཙན་བྱོལ་སྤྱི་ཚོགས་ཁྲོད་ཀྱི་བོད་ཡིག་གི་གནས་སྟངས།

བཙན་བྱོལ་སྤྱི་ཚོགས་ཁག་གི་ཁྲོད་ལ་ཆ་བཞག་ན། ༧གོང་ས་མཆོག་གི་ཐུགས་བསྐྱེད་ཀྱི་མཐུ་ལ་བརྟེན་ནས་བཞུགས་སྒར་དུ། རང་རེའི་རིག་གཞུང་དར་སྤེལ་རྒྱུན་འཛིན་ལ་དམིགས་ཏེ། ལས་ཁུངས་འགའ་ཞིག་བཙུགས་ཡོད་ལ།ཕྱོགས་གང་སར་དེ་དག་གི་མངའ་འོག་ཏུ་གཏོགས་པའི་ཡན་ལག་དང་། ཆེ་འབྲིང་བར་མའི་སློབ་གྲྭ་དུ་མ་བཙུགས་ཡོད་པ་མ་ཟད། དེ་དག་ཏུ་བྱེད་སྒོ་དང་ཤེས་བྱའི་རྣམ་གྲངས་ཙམ་གྱི་ཆ་ནས་ཧ་ཅང་ཕུན་སུམ་ཚོགས་པ་ཞིག་རེད། འོན་ཀྱང་། བོད་རང་གི་སྐད་ཡིག་གནས་སྟངས་ཀྱི་སྐོར་ལ་སློབ་གྲྭ་ཁག་གི་བོད་ཡིག་གནས་སྟངས་ཙམ་གྱི་ཆ་ནས་བལྟས་ན། ཟུར་བཞི་རྒྱབ་མདུན་གང་ནས་གཞལ་རུང་། ཡལ་ལ་ཉེ་བ་དང་། ལྷད་པ། མ་འདངས་པ་སྟེ། སྐྱོན་གསུམ་གྱིས་གདུང་གིན་ཡོད་པར་མངོན། དེ་དག་གི་འབྱུང་རྐྱེན་ནི། སྔོན་གྱི་མཁས་པ་དག་གི་གསུང་རབ་གླེགས་བམ་ཚོའི་ཁྲོད་ཀྱི་བརྡ་ཚིག་རིགས་མཁྲེགས་པོ་འདུག ཅེས་ལོགས་སུ་འཇོགས་པ་དང་། འབྲི་ཀློག་གང་གི་སྐབས་སུའང་མི་རིགས་གཞན་གྱི་མིང་ཚིག་དུ་མ་ཚབ་བཀོལ་བྱེད་པར་མཆོག་ཏུ་འཛིན་པ། གསར་བྱུང་ཐ་སྙད་ཀྱི་རིགས་ལ་དོ་སྣང་མི་བྱེད་པ་སྟེ་གསུམ་མོ།།གོང་དུ་སོང་མ་ཐག་པ་ལྟར། དེང་སྐབས་བོད་ནང་ཁུལ་གྱི་བོད་ཡིག་གི་ཆུ་ཚད་དང་། བཙན་བྱོལ་སྤྱི་ཚོགས་ཁྲོད་ཀྱི་གནས་ཚུལ་གཉིས་ལ་བསམ་བློ་ཞིག་བཏང་བ་ཡིན་ན། རྒྱུ་འབྲས་གོ་ལྡོག་ལྟ་བུའི་འཆར་སྣང་ཞིག་ངམ་ངམ་ཤུགས་ཀྱིས་སྐྱེ་འོང་སྟེ། གཞིས་ལུས་བོད་མི་ཚོ་ནི་རྒྱལ་ཁབ་གཞན་གྱི་བཙན་གནོན་འོག་ཏུ་ཡོད་ལ། ང་ཚོ་ནི་སྐྱབས་བཅོལ་བ་ཡིན་རུང་།རང་དབང་ཆ་ཚང་བ་ཞིག་ཡོད་པས་སོ།།འདིས་ཅི་ཞིག་མཚོན་གྱི་ཡོད་དམ། ཞེས་འདྲི་ན། འདིས་ནི་སློབ་གསོ་ལ་གསོའི་ལག་ལེན་ཞན་པ་དང་། རང་གི་སྐད་ཡིག་ལ་ཐད་ཀར་ཚད་པའི་བསམ་བློའི་འཛིན་སྟངས་ཀྱང་རྗེན་པར་བཏང་འདུག་པར་མཐོང་ངོ་།།

བཞི་བ། སློབ་གསོ་དང་ལས་འགུལ་སྐོར་གྱི་བསམ་ཚུལ་མདོར་བསྡུས།

བྱེས་བཞུགས་བོད་མའི་ཁྲོད་ན། སྐད་བཞི་སྨྲ་བའི་ལོ་ཙ་བ་དང་། དེང་རབས་ཚན་སྨྲ་བ་སོགས་ཁྱད་ཐོན་གྱི་མཁས་པ་མང་བ་ཡང་བདེན་པ་རེད། རང་གཞུང་གི་ཆབ་སྲིད་ལམ་ལུགས་གཞི་རྒྱ་ཆེ་ལ་གཏིང་ཟབ་པའང་བདེན་པ་རེད། འོན་ཀྱང་། བོད་རང་གི་སྐད་ཡིག་ཉམས་ཉེས་ཀྱི་ཐད་ལ་དོ་སྣང་མི་བྱེད་པ་འདིས་བྱས་ཚད་ཐམས་ཅད་བྱེ་མར་བྲིས་པའི་རི་མོོ་ལྟར་འགྱུར་བར་ངེས་ཏེ། རང་གི་སྐད་ཡིག་ནི་རིག་གཞུང་ཡུན་གནས་དང་མིའི་རིགས་རྒྱུད་གཏན་སྲིང་གི་གཞི་རྩ་གཙོ་བོ་ཞིག་ཡིན་པ་མ་ཟད། རང་དབང་འཐབ་རྩོད་ཀྱི་བྱ་བར་འབྲེལ་བའི་གཏན་ཚིགས་རིགས་ལ་ནམ་ཡང་མི་རྒུད་པའི་རྣོ་དབལ་སྟེར་བྱེད་ཅིག་ཀྱང་ཡིན་པས་སོ།། གལ་ཏེ། ང་ཚོས་དགོས་ངེས་ཀྱི་གནད་ལ་མི་འབབ་པའི་སློབ་གསོ་དང་། སྐད་ཡིག་གཅེས་སྐྱོང་གི་ལས་འགུལ་ཡིན་ཁུལ་གྱིས་འདི་འདྲ་ཁོ་ནའི་ངང་དུ་བསྡད་པ་ཡིན་ན། ང་ཚོའི་དམིགས་ཡུལ་མངོན་འགྱུར་འོང་རྒྱུ་ཕར་བཞག གལ་སྲིད། ད་དུང་ཡང་ལོ་ངོ་དུ་མ་ཞིག་གི་རིང་ལ་འདི་ལྟར་གནས་དགོས་ཚེ། ནམ་ཞིག་རང་རེའི་མི་རིགས་ཀྱང་གང་དུ་གྱེས་སའི་ཡུལ་དེ་དང་དེའི་མི་རིགས་ཀྱི་ངོ་བོར་འགྱུར་ཉེན་ཆེ། དེས་ན། རང་གཞུང་ནས་སྐད་ཡིག་ཡར་རྒྱས་དང་འབྲེལ་བའི་སློབ་གསོའི་བྱ་བཞག་གི་རིན་ཐང་ཇེ་མཐོར་གཏང་རྒྱུ་དང་། སློབ་གྲྭ་ཁག་གི་དགེ་སློབ་རྣམས་ཀྱིས་གཙོས། གཞུང་ཞབས་ལས་བྱེད་ཡིན་མིན་ཀུན་གྱིས་རང་རེའི་སྐད་ཡིག་འདིའི་ཉམས་རྐྱེན་དག་བསལ་བར་བྱ་བའི་ཕྱིར་དུ་ནུས་པ་གང་ཡོད་རེ་འདོན་ན་ལེགས། ང་ཚོ་དངོས་གནས། ལེ་ལོ་དང་སྒྱིད་ལུག་ལ་མགོ་མི་སྒུར་བར་རྣམ་རིག་བསྒྲིམ་སྟེ། ཐབས་ཤེས་ཤིག་གཏོང་ཐུབ་པ་ཡིན་ན། གཞིས་ལུས་ཁྲོད་ཀྱི་རང་རེའི་སྐད་ཡིག་རིག་གཞུང་གི་གནས་སྟངས་ལས་ཀྱང་། སྐད་ཡིག་མི་ཉམས་གོང་འཕེལ་དང་། ནུས་པའི་རྒྱུན་གསོ་བ་ལ་མཆོག་ཏུ་ཕན་པར་ངེས་པའི་ལས་འགུལ་དུ་མ་ཞིག་སྤེལ་ནས། རིམ་བཞིན་རང་རེའི་བོད་ཡིག་འདི་ད་ལྟའི་དུས་ཀྱི་དབྱིན་ཇིའི་ཡི་གེ་བཞིན་ས་སྒང་འདིའི་མི་རིགས་ཕལ་མོ་ཆེ་ཞིག་གིས་འཛམ་གླིང་ཡི་གེ་གཉིས་པར་ངོས་འཛིན་པའི་ཚད་ཅིག་ལ་ཡང་སྤར་ཐུབ་པ་ཡིན། དེ་ལ་རྒྱུ་མཚན་གཙོ་བོ་གཉིས་ཏེ། གཅིག་ནི༧གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་རང་དབང་དང་མཐུན་རྐྱེན་ཤིན་ཏུ་འཛོམས་པོ་ཡོད་ལ། གཉིས་པ་གང་ཞེ་ན། བཙན་བོད་མི་ཚོ་ནི། རྒྱ་བལ་འབྲུག་གསུམ་སོགས་ཧཱི་མ་ལའི་འདབས་འབྲེལ་ཡུལ་གྲུ་ཁག་དང་། ཤར་ནུབ་སོགས་ཀྱི་རྒྱལ་ཁབ་མང་པོ་ཞིག་ཏུ་སོ་སོར་གྱེས་ཤིང་གནས་སྡོད་བྱེད་ཀྱིན་ཡོད་པས་སོ།།ཞེས་ལྕགས་པོ་རིའི་བོད་སྨན་མཐོ་རིམ་སློབ་གླིང་དུ་རེས་གཟའ་སྤེན་པའི་ཕྱི་དྲོའི་ཆར་མགྱོགས་པོར་བྲིས་པའོ།།